1 Kag karon natabo ini, sa ika-otsenta’y sais nga tuig, ang mga Nefinhon nagpabilin gihapon sa kalainan, huo, sa dako nga kalainan, samtang ang mga Lamanhon nagtinguha gid sa pagsunod sang mga kasugoan sang Dios suno sa layi ni Moises.

2 Kag natabo ini nga sa sini nga tuig may isa ka Samuel, isa ka Lamanhon, nga nag-abot sa duta sang Zarahemla, kag nagsugod sa pagwali sa katawhan. Kag natabo ini nga nagwali sia, sa madamo nga adlaw, sang paghinulsol sa katawhan, kag gintabog nila sia, kag naghana na sia nga magbalik sa iya kaugalingon nga duta.

3 Apang tan-awa, nabatian niya ang tingug sang Ginuo nga dapat sia magbalik liwat, kag magpropesiya sa katawhan sang kon ano man nga mga butang nga magasulod sa iya tagipusuon.

4 Kag natabo ini nga indi sila magtugot nga magsulod sia sa siyudad; gani naglakat sia kag nagtaklas sa pader sini, kag gin-untay ang iya kamot kag nagsinggit sa isa ka mabaskog nga tingug, kag nagpropesiya sa katawhan sang kon ano man nga mga butang nga ginsulod sang Ginuo sa iya tagipusuon.

5 Kag nagsiling sia sa ila: Tan-awa, ako, si Samuel, isa ka Lamanhon, nagahambal sang mga pulong sang Ginuo nga iya ginbutang sa akon tagipusuon; kag tan-awa ginsulod niya ini sa akon tagipusuon agud magsiling sa sining katawhan nga ang espada sang hustisya nagabitay sa ibabaw sining katawhan; kag apat ka gatos ka tuig indi magligad luwas lang kon ang espada sang hustisya magtupa sa sining katawhan.

6 Huo, dako nga kalaglagan ang nagahulat sa sining katawhan, kag pat-od gid nga magaabot ini sa sining katawhan, kag wala sing mahimo nga makaluwas sining katawhan luwas lang nga ini amo ang paghinulsol kag pagtuo sa Ginuong Jesucristo, nga pat-od gid nga magakari sa kalibutan, kag magaantos sang madamo nga mga butang kag pagapatyon para sa iya katawhan.

7 Kag tan-awa, isa ka anghel sang Ginuo ang nagpahayag sini sa akon, kag nagdala sia sang maayong balita sa akon kalag. Kag tan-awa, ginpadala ako sa inyo agud ipahayag man ini sa inyo, agud nga makaangkon kamo sang maayong balita; apang tan-awa indi kamo magbaton sa akon.

8 Gani, amo ini ang siling sang Ginuo: Tungod sang katig-a sang mga tagipusuon sang katawhan sang mga Nefinhon, luwas lang kon maghinulsol sila bawion ko ang akon pulong halin sa ila, kag ipalayo ko ang akon Espiritu sa ila, kag indi na ako magbatas pa sa ila, kag lisuon ko ang mga tagipusuon sang ila mga kauturan batok sa ila.

9 Kag apat ka gatos ka tuig indi magligad antes ko ipahanabo nga pagasakiton sila; huo, bisitahon ko sila paagi sa espada kag paagi sa tiggulutom kag paagi sa peste.

10 Huo, bisitahon ko sila sa akon mabangis nga kaakig, kag may yara sadtong sa ika-apat nga henerasyon sang inyo mga kaaway nga magakabuhi pa, agud magtan-aw sang inyo lubos nga kalaglagan; kag ini pat-od gid nga magaabot luwas lang nga maghinulsol kamo, siling sang Ginuo; kag yadtong mga sa ika-apat nga henerasyon ang magadala sang inyo kalaglagan.

11 Apang kon maghinulsol kamo kag magbalik sa Ginuo nga inyo Dios ipaiway ko ang akon kaakig, siling sang Ginuo; huo, amo ini ang siling sang Ginuo, bulahan sila nga magahinulsol kag magadangop sa akon, apang kalisud sa iya nga indi maghinulsol.

12 Huo, kalisud sa sining dako nga siyudad sang Zarahemla; kay tan-awa, tungod sang mga matarong nga naluwas ini; huo, kalisud sa sining dako nga siyudad, kay nakita ko, siling sang Ginuo, nga may madamo, huo, bisan ang kalabanan sining dako nga siyudad, nga magapatig-a sang ila mga tagipusuon batok sa akon, siling sang Ginuo.

13 Apang bulahan sila nga magahinulsol kay sila pagakaluoyan ko. Apang tan-awa, kon indi tungod sang mga matarong nga yara sa sining dako nga siyudad, tan-awa, ipahanabo ko nga ang kalayo manaog halin sa langit kag sunogon ini.

14 Apang tan-awa, ini tungod sang mga matarong nga ginkaluoyan ini. Apang tan-awa, ang tion magaabot, siling sang Ginuo, nga kon panabugon ninyo ang mga matarong halin sa inyo, gani mangin luto na kamo para sa kalaglagan; huo, kalisud sa sining dako nga siyudad tungod sang kalainan kag mga kangil-aran nga yara sa iya.

15 Huo, kag kalisud sa siyudad sang Gideon tungod sang kalainan kag mga kangil-aran nga yara sa iya.

16 Huo, kag kalisud sa tanan nga siyudad nga yara sa kadutaan sa palibot, nga ginapanag-iyahan sang mga Nefinhon, tungod sang kalainan kag mga kangil-aran nga yara sa mga ini.

17 Kag tan-awa, isa ka sumpa ang magaabot sa duta, siling sang Ginuo sang mga Kasoldadohan, tungod sang mga ginahimo sang katawhan nga yara sa kadutaan, huo, tungod sang ila kalainan kag sang ila mga kangil-aran.

18 Kag matabo ini, siling sang Ginuo sang mga Kasoldadohan, huo, ang aton gamhanan kag matuod nga Dios, nga kon sin-o man ang magtago sang mga manggad sa duta indi na makakita sang mga ini liwat, tungod sang dako nga sumpa sang duta, luwas lang kon isa sia ka matarong nga tawo kag magpatago sini sa Ginuo.

19 Kay luyag ko, siling sang Ginuo, nga ipatago nila ang ila mga manggad sa akon; kag ginasumpa sila nga wala nagapatago sang ila mga manggad sa akon; kay wala sing may nagapatago sang ila mga manggad sa akon luwas sa mga matarong; kag sia nga wala nagapatago sang iya mga manggad sa akon, ginasumpa sia, kag amo man ang manggad, kag wala sing magatubos sini tungod sang sumpa sang duta.

20 Kag ang adlaw magaabot nga taguon nila ang ila mga manggad, tungod ginpahamtang nila ang ila mga tagipusuon sa mga manggad; kag tungod ginpahamtang nila ang ila mga tagipusuon sa ila mga manggad, kag magatago sang ila mga manggad kon magpinalagyo sila sa atubang sang ila mga kaaway; tungod indi nila pag-ipatago ang mga ini sa akon, ginasumpa sila kag amo man ang ila mga manggad; kag sa sina nga adlaw pagasakiton sila, siling sang Ginuo.

21 Tan-awa ninyo, mga katawhan sining dako nga siyudad, kag mamati sa akon mga pulong; huo, pamatii ang mga pulong nga ginasiling sang Ginuo; kay tan-awa, nagasiling sia nga ginasumpa kamo tungod sang inyo mga manggad, kag amo man ang inyo mga manggad ginasumpa tungod ginpahamtang ninyo ang inyo mga tagipusuon sa mga ini, kag wala nagpamati sa mga pulong niya nga naghatag sang mga ini sa inyo.

22 Wala ninyo pagdumduma ang Ginuo nga inyo Dios sa mga butang nga sa sini ginbugayan niya kamo, apang dalayon ninyo nga ginadumdum ang inyo mga manggad, indi sa pagpasalamat sa Ginuo nga inyo Dios tungod sang mga ini; huo, ang inyo mga tagipusuon wala napalapit sa Ginuo, kundi nga napuno ang mga ini sing tuman nga bugal, sa paghinambog, kag sa dako nga kaakig, mga paghinisaay, mga pag-ilinaway, pagtuyo sing malain, mga paghingabot, kag mga pagpamatay, kag tanan nga sari sang mga kalainan.

23 Sa sini nga kabangdanan ang Ginuong Dios nagpahanabo nga isa ka sumpa ang magaabot sa kadutaan, kag amo man sa inyo mga manggad, kag ini tungod sang inyo mga kalainan.

24 Huo, kalisud sa sining katawhan, tungod sang sini nga tion nga nag-abot, nga ginapanabog ninyo ang mga propeta, kag ginayaguta sila, kag ginahaboy sila sang mga bato, kag ginapamatay sila, kag ginahimo ang tanan nga sari sang kalainan sa ila, bisan pareho sa ila ginhimo sang dumaan nga panahon.

25 Kag karon kon maghambal kamo, nagasiling kamo: Kon ang amon mga adlaw yara kuntani sa mga adlaw sang amon mga amay sadto, wala kuntani namon ginpamatay ang mga propeta; wala kuntani namon sila ginpangbato, kag ginpanabog.

26 Tan-awa, mas malain pa kamo sangsa ila; kay pareho ka pat-od nga buhi ang Ginuo, kon ang isa ka propeta mag-abot sa inyo kag magpahayag sa inyo sang pulong sang Ginuo, nga nagapamatuod parte sa inyo mga sala kag mga kalainan, akig kamo sa iya, kag ginatabog sia pagwa kag nagapangita sang tanan nga sari sang mga paagi sa pagpatay sa iya; huo, magasiling kamo nga isa sia ka di-matuod nga propeta, kag isa sia ka makasasala, kag iya sang yawa, tungod nagapamatuod sia nga malain ang inyo mga hinimoan.

27 Apang tan-awa, kon ang isa ka tawo magpalapit sa inyo kag magsiling: Himoa ini, kag wala sing kalainan; himoa ina kag indi kamo mag-antos; huo, magsiling sia: Maglakat suno sa bugal sang inyo kaugalingon nga mga tagipusuon; huo, maglakat suno sa bugal sang inyo mga mata, kag himoa ang kon ano man nga naluyagan sang inyo tagipusuon—kag kon ang isa ka tawo magpalapit sa inyo kag magsiling sini, pagabatonon ninyo sia, kag magasiling nga isa sia ka propeta.

28 Huo, ibayaw ninyo sia, kag magahatag kamo sa iya sang inyo manggad; magahatag kamo sa iya sang inyo bulawan, kag sang inyo pilak, kag pasul-oban ninyo sia sang malahalon nga panapton; kag tungod nagahambal sia sa inyo sang nagapang-into nga mga pulong, kag nagasiling sia nga ang tanan maayo, gani indi ninyo sia pagpangitaan sing sala.

29 O kamo nga malain kag kamo nga batinggilan nga henerasyon; kamo nga nagtig-a kag kamo nga batinggilan nga katawhan, tubtob san-o sa inyo hunahuna ang Ginuo magabatas sa inyo? Huo, tubtob san-o nga inyo tugotan ang inyo mga kaugalingon nga tuytuyan sang buang-buang kag bulag nga mga manugtuytuy? Huo, tubtob san-o nga pilion ninyo ang kadudulman imbes sang kasanag?

30 Huo, tan-awa, ang kaakig sang Ginuo nagadabadaba na batok sa inyo; tan-awa, ginsumpa niya ang duta tungod sang inyo kalainan.

31 Kag tan-awa, ang tion magaabot nga sumpaon niya ang inyo mga manggad, nga mangin madanlog ang mga ini, nga indi ninyo makaptan ang mga ini; kag sa mga adlaw sang inyo kaimulon indi ninyo mahuptan ang mga ini.

32 Kag sa mga adlaw sang inyo kaimulon magapakitluoy kamo sa Ginuo; kag sa wala’y kapuslanan kamo magapakitluoy kay ang inyo kahalitan nag-abot na sa inyo, kag ang inyo kalaglagan napat-od na; kag dayon magahibi kamo kag magatangis sa sina nga adlaw, siling sang Ginuo sang mga Kasoldadohan. Kag dayon magapanalambiton kamo, kag magasiling:

33 O kon nakahinulsol ako, kag wala ginpamatay ang mga propeta, kag ginpangbato sila, kag ginpanabog sila. Huo, sa sina nga adlaw magasiling kamo: O kon gindumdum namon ang Ginuo nga amon Dios sa adlaw nga ginhatag niya sa amon ang amon mga manggad, kag gani wala kuntani ang mga ini nangin madanlog nga madula namon ang mga ini; kay tan-awa, ang amon mga manggad nadula sa amon.

34 Tan-awa, ginabutang namon ang isa ka galamiton diri kag pagkaaga wala na ini; kag tan-awa, ang amon mga espada ginakuha sa amon sa adlaw nga ginapangita namon ang mga ini para sa inaway.

35 Huo, gintago namon ang amon mga manggad kag nagkaladula ang mga ini sa amon tungod sang sumpa sang duta.

36 O kon nakahinulsol kami sa adlaw nga ang pulong sang Ginuo nag-abot sa amon; kay tan-awa ang duta ginsumpa, kag ang tanan nga butang nangin madanlog, kag indi namon makaptan ang mga ini.

37 Tan-awa, ginalibutan kami sang mga demonyo, huo, nalikupan kami sang mga anghel niya nga nagtinguha sa paglaglag sang amon mga kalag. Tan-awa, kalubha sang amon mga kalainan. O Ginuo, indi mo na gid bala mapaiway ang imo kaakig sa amon? Kag amo ini ang inyo mangin pulong sa sina nga adlaw.

38 Apang tan-awa, ang inyo mga adlaw sang pagtilaw nagligad na; ginpabuyan-buyanan ninyo ang adlaw sang inyo kaluwasan tubtob nga lubos nga ulihi na gid ang tanan, kag ang inyo kalaglagan napat-od na; huo, kay naghangad kamo sa tanan nga mga adlaw sang inyo mga kabuhi para sa sinang indi ninyo maangkon; kag naghangad kamo sang kalipayan sa paghimo sang kalainan, nga ang amo nga butang nagasupak sa kinaiya sinang pagkamatarong nga yara sa aton dako kag Wala’y Katapusan nga Tagdumala.

39 O kamo nga katawhan sang kadutaan, kabay nga pamatian ninyo ang akon mga pulong! Kag ginapangamuyo ko nga ang kaakig sang Ginuo mapaiway halin sa inyo, kag magahinulsol kamo kag maluwas.