Kapitulo 4
Agtipon dagiti bileg dagiti sumupsuppiat a Nephite ken dagiti Lamanite ket alaenda ti daga a Zarahemla—Dumteng ti pannakaabak dagiti Nephite gapu iti kinadangkesda—Bumassit ti Simbaan, ken kumapsut dagiti tao a kas kadagiti Lamanite. Agarup 38–30 S.C.
1 Ket napasamak iti maika-limapulo-ket-uppat a tawen nga adu ti simmuppiat iti simbaan, ken adda met sinnupanget kadagiti tao, isu nga adu ti nagayus a dara.
2 Ket napapatay dagiti nasukir ken napapanawda iti daga, ket napanda iti ari dagiti Lamanite.
3 Ket napasamak nga inkarigatanda a sugsogan dagiti Lamanite a manggubat kadagiti Nephite; ngem adtoy, nalaus ti buteng dagiti Lamanite, isu a dida dimngeg kadagiti balikas dagiti sumupsuppiat.
4 Ngem napasamak nga iti maika-limapulo-ket-innem a tawen a panagturay dagiti ukom, adda dagiti sumupsuppiat a Nephite a napan kadagiti Lamanite; ket nagballigida a nangsugsog kadagiti dadduma a gumura kadagiti Nephite; ket nagsaganada amin iti dayta a tawen a makigubat.
5 Ket napanda nakidangadang kadagiti Nephite iti maika-limapulo-ket-pito a tawen, ket inrugida ti aramid ni patay; wen, isu nga iti maika-limapulo-ket-walo a tawen a panagturay dagiti ukom nagballigida a nangagaw iti daga a Zarahemla; wen, ken kasta met amin dagiti daga, uray pay ti daga iti asideg ti daga a Bountiful.
6 Ket napagsanud dagiti Nephite ken dagiti buyot ni Moronihah agingga iti daga a Bountiful;
7 Ket sadiay natrinseraanda kadagiti Lamanite, manipud iti baybay iti laud, uray pay iti daya; ta maysa nga aldaw a pagnaen ti Nephite, iti nakaiban-uyatan ti trinserada ken nangidestinuanda kadagiti buyotda a mangsalaknib iti amianan a paset ti pagilianda.
8 Ket kasta ti pannakagun-od dagiti sumupsuppiat kadagiti Nephite, babaen ti tulong dagiti di mabilang a buyot dagiti Lamanite, iti amin a sanikua dagiti Nephite nga adda iti daga iti abagatan. Ket napasamak amin dagitoy iti maika-limapulo-ket-walo ken siam a tawen a panagturay dagiti ukom.
9 Ket napasamak iti maikanem-a-pulo a panagturay dagiti ukom, nagballigi ni Moronihah ken dagiti buyotna a nanggun-od iti adu a paset ti daga; wen, napasublida ti adu a siudad a natnag kadagiti ima dagiti Lamanite.
10 Ket napasamak iti maikanem-a-pulo-ket-maysa a panagturay dagiti ukom ti panagballigida a nangpasubli iti kagudua ti amin a sanikuada.
11 Ita daytoy dakkel a pukaw dagiti Nephite, ken ti kinadawel ti panagpapatayda, saan koma a napasamak no saan a gapu iti kinadangkesda ken ti kinarimon nga adda kadakuada; wen, ken dagiti pay nangibaga a kamengda ti simbaan ti Dios.
12 Ket gapu dayta iti kinapalangguad ti puspusoda, gapu iti aglaplapusanan a kinabaknangda, wen, gapu iti panangilupitlupitda kadagiti marigrigat, ti panangyimutda iti taraonda kadagiti mabisin, ti panangyimutda iti lupotda kadagiti lamulamo, ken ti panangtungpada kadagiti napakumbaba a kabsatda, ti pananglaisda iti dayta sagrado, ti dida panamati iti espiritu ti panangipadto ken ti pammaltiing, nadawel a panagpapatay, panagsamsam, panagulbod, panagtakaw, pannakiabig, irurukuas iti nakaro a pannakisupanget, ken ipapanaw iti daga ti Nephi, kadagiti Lamanite—
13 Ket gapu itoy ti nalabes a kinadangkesda, ken ti panangipaspasindayagda iti pigsada, napanawanda iti bukodda a pigsa; ngarud saanda a rimmang-ay, ngem nagrigatda ken nadangranda, ken napapanawda iti sango dagiti Lamanite, agingga a napukawda amin ti panagtagikuada kadagiti dagada.
14 Ngem adtoy, adu a banag ti inkasaba ni Moronihah kadagiti tao gapu iti kinamanagbasolda, ken kasta met kada Nephi ken Lehi, a lallaki nga annak ni Helaman, nagikasaba met iti adu a banag kadagiti tao, wen, ken adu a banag ti impadtoda kadakuada maipanggep iti kinamanagbasolda, ken no ania ti mapasamak kadakuada no saanda nga agbabawi kadagiti basolda.
15 Ket napasamak a nagbabawida, ket isu nga idi nakapagbabawida nangrugida a rimmang-ay.
16 Ta idi nakita ni Moronihah ti panagbabawida indauluanna ida a napan iti nadumaduma a lugar, ken nadumaduma a siudad, agingga a napasublida ti kagudua ti amin a dagada.
17 Ket kasta ti panaggibus ti maikanem-a-pulo-ket-maysa a tawen a panagturay dagiti ukom.
18 Ket napasamak iti maikanem-a-pulo-ket-dua a tawen a panagturay dagiti ukom, nga awanen ti magun-od ni Moronihah a sanikua kadagiti Lamanite.
19 Ngarud binaybay-anda ti panggepda a manggun-od iti nabati kadagiti dagada, ta saan a mabilang dagiti Lamanite ket saan a mabalin a makagun-od pay dagiti Nephite iti bileg kadakuada; ngarud insagana amin ni Moronihah dagiti buyotna a mangasikaso kadagiti paset a naalana.
20 Ket napasamak, a napalaus ti buteng dagiti Nephite gapu iti kaadu ti bilang dagiti Lamanite, amangan la ketdi no maabakda, ket maidasayda, ken mapapatay, ken madadael.
21 Wen, nangrugi a nalagipda dagiti padto ni Alma, ken kasta met dagiti balikas ni Mosiah; ket nakitada a nasukirda a tattao, ken dida impateg dagiti bilin ti Dios;
22 Ket binaliwan ken inludekludekda dagiti paglintegan ni Mosiah, wenno ti imbilin ti Apo kenkuana nga itedna kadagiti tao; ket nakitada ti pannakadadael dagiti paglinteganda, ket nagbalinda a nadangkes a tattao, isu a nadangkesda a kas kadagiti Lamanite.
23 Ket gapu iti kinamanagbasolda nangrugi a bimmassit ti simbaan; ket nangrugida a di mamati iti espiritu ti pammadto ken iti espiritu ti pammaltiing; ket kinita ida ti pangngeddeng ti Dios iti rupa.
24 Ket nakitada a nagbalinda a nakapsut, a kas kadagiti kabsatda, a Lamanite, ket saanen a tinaginayon ida ti Espiritu ti Apo; wen, naikkaten kadakuada gapu ta saan nga agtaeng ti Espiritu ti Apo kadagiti saan a nasantuan a templo—
25 Ngarud insardeng ti Apo ti mangtaginayon kadakuada babaen ti nakaskasdaaw ken awan pumadpad a bilegna, ta natnagda iti kasasaad a di panamati ken nakaal-alingget a kinadangkes; ket nakitada nga ad-adu nga amang dagiti Lamanite ngem kadakuada, ket malaksid no makikappengda iti Apo a Diosda dida maliklikan ti pannakapukawda.
26 Ta adtoy, nakitada a kas iti pigsada ti pigsa dagiti Lamanite, uray ti tao iti tao. Ket kasta ti pannakatnagda itoy nakain-inaka a pagbasolan; wen, kasta ti panagbalinda a nakapsut, gapu iti panagbasolda, iti uneg ti saan nga adu a tawen.