1 Ket napasamak iti maikapat-a-pulo-ket-dua a tawen a panagturay dagiti ukom, kalpasan ti panangipasdek manen ni Moronihah iti kappia iti nagbaetan dagiti Nephite ken dagiti Lamanite, adtoy awan ti uray no maysa a maipatugaw iti pangukoman; ngarud nangrugi manen dita ti panagsusupanget dagiti tao maipanggep iti agtugaw iti pangukoman.

2 Ket napasamak a ni Helaman, a lalaki nga anak ni Helaman, natudingan nga agtugaw iti pangukoman, babaen ti timek dagiti tao.

3 Ngem adtoy, naguray ni ^aKishkumen, a nangpapatay ken ni Pahoran, iti gundaway a mangdadael met ken ni Helaman; ket intandudo ti bunggoyna, a simrek iti katulagan nga awan ti asino man a makaammo iti kinadangkesna.

4 Ta adda maysa a ^aGadianton, nga aglaplapusanan ti laingna iti amin a balikas, ken kasta met ti sikapna, a mangipatungpal iti nalimed nga aramid ti pammapatay ken panagtakaw; ngarud nagbalin a dadaulo ti bunggoy ni Kishkumen.

5 Ngarud linamlamiongna ida, ken kasta met ni Kishkumen, a no ipatugawda iti pangukoman itdenna kadagiti kameng ti bunggoyna ti bileg ken panangituray kadagiti tao; ngarud kinalikaguman ni Kishkumen a dadaelen ni Helaman.

6 Ket napasamak nga iti yaasidegna iti pangukoman tapno patayenna ni Helaman, adtoy maysa kadagiti katulongan ni Helaman, a nakapanawen iti rabii, ken naaddaan, babaen ti pananglimlimo, iti ammo kadagiti plano nga inwayang daytoy a bunggoy a mangdadael ken ni Helaman—

7 Ket napasamak a sinabatna ni Kishkumen, ket inikkanna daytoy iti tanda; ngarud imbaga kenkuana ni Kishkumen ti panggep ti tarigagayna, a tinarigagayanna nga iturongna iti pangukoman ta papatayenna ni Helaman.

8 Ket idi naammuan ti katulongan ni Helaman ti adda iti puso ni Kishkumen, ken no kasano ti panggepna a mangpapatay, ken kasta met a ti panggep dagiti amin a kameng ti bunggoy ket pumatay, ken agtakaw, ken manggun-od iti bileg, (ket daytoy ti ^analimed a planoda, ken kinnunsaboda) kinuna ti katulongan ni Helaman ken ni Kishkumen: Mapantayo iti pangukoman.

9 Ita nalaus ti pannakapagusto ni Kishkumen iti daytoy, ta impapanna a maipatungpalna ti panggepna; ngem adtoy, binagsol ti katulongan ni Helaman, bayat ti papanda iti pangukoman, ni Kishkumen a simmalbag iti pusona, a nakaudatalanna a di man la nakapagasug. Ket nagtaray a napan nangibaga ken ni Helaman iti amin a nakita, ken nangngeg, ken inaramidna.

10 Ket napasamak a nangibaon ni Helaman iti mangala itoy a bunggoy dagiti mannanakaw ken nalimed a mammapatay, tapno mapapatayda a maibatay iti paglintegan.

11 Ngem adtoy, nagdanag ni Gadianton idi naduktalanna a saan a nagsubli ni Kishkumen amangan la ketdi ta nadadael; ngarud imbilinna iti bunggoyna a surotenda. Ket rimmuarda iti daga, babaen ti nalimed a dalan, iti panagturongda iti langalang; ket kasta ti gapuna a saan a nasarakan ida dagiti imbaon ni Helaman.

12 Ket ad-adu pay ti masao maipanggep itoy a Gadianton kalpasanna. Ket kasta ti panaggibus ti maikapat-a-pulo-ket-dua a tawen a panangituray dagiti ukom kadagiti tao ni Nephi.

13 Ket adtoy, makitam iti paggibusan daytoy a libro a pinaneknekan daytoy a ^aGadianton ti panangpadisi, wen, ti dandani pannakadadael amin dagiti tao ni Nephi.

14 Adtoy diak kayat a sawen ti paggibusan ti libro ni Helaman, ngem kayatko a sawen ti paggibusan ti libro ni Nephi, a nangalaak iti amin a pakaammo nga insuratko.