1 Ket ita, ay-ayatek a kakabsatko, adtoy, ipalawagko kadakayo a malaksid no agbabawikayo ^akawawto ti pagtaenganyo.

2 Wen, malaksid no agbabawikayo, addanto dakkel a gapu ti panagladingit dagiti assawayo iti aldaw a panagtagibida; ta padasenyonto ti aglibas ngem awanto ti lugar a pagkamanganyo; wen, ket asi pay dagiti ^atagtagibian, agsipud ta nadagsenda ket saanda a makataray; ngarud, mabaddebaddekan ken mabatidanto a matay.

3 Wen, asi pay dagitoy tao a maawagan a tao ni Nephi malaksid no agbabawida, no makitadanto amin dagitoy a pagilasinan ken pagsidsiddaawan a maiparangto kadakuada; agsipud ta adtoy, napilida a tao ti Apo; wen, dagiti tao ni Nephi nga inayatna, ken ^adinusana; wen, dinusana ida kadagiti aldaw ti panagbasolda gapu ta ay-ayatenna ida.

4 Ngem adtoy kakabsatko, ginurana dagiti Lamanite gapu iti agtultuloy a panagaramidda iti dakes, ket daytoy gapu iti kinadakes ti ^akannawidan dagiti ammada. Ngem adtoy, immay kadakuada ti pannakaisalakan babaen ti panangikaskasaba dagiti Nephite; ken ^bpinaatiddog ti Apo ti aldawda gapu iti daytoy a panggep.

5 Ket kayatko a masapul a makitayo a ^akaaduanna kadakuada ti adda iti dalan ti pagrebbenganda, ket magnada a siaannad iti sango ti Dios, ket sitatallugodda a mangtungpal kadagiti bilin ken dagiti linteg ken dagiti pangngeddengna babaen ti paglintegan ni Moises.

6 Wen, kunak kadakayo, nga adu kadakuada ti mangar-aramid iti daytoy, ket inkagumaanda nga awan pannakabannog a kinaregta tapno maidalanda dagiti nabati a kakabsatda a mangammo iti kinapudno; ngarud adu ti mainaynayon iti bilangda iti inaldaw.

7 Ket adtoy, ammoyo iti bagbagiyo, gapu ta nasaksianyo, nga adu kadakuada ti nakaammo ti kinapudno, ken mangammo iti kinadangkes ken kinarimon ti ugali dagiti ammada, ket naiturongda a mamati iti nasantuan a kasuratan, wen, ti padto dagiti nasantuan a propeta, a naisurat, a nangitunda kadakuada a mamati iti Apo, ken iti panagbabawi, a nangted ti pammati ken panagbabawi iti ^apanagbalbaliw ti pusoda—

8 Ngarud, kas ti kaadu ti immay iti daytoy, ammoyo iti bagbagiyo a ^anatibker ken napigsa ti pammatiyo, ken iti banag a nakaited iti wayawaya.

9 Ket ammoyo met nga ^ainkalida dagiti igamda iti gubat, ket mabutengda a mangala kadagitoy amangan ta agbasolda iti babaen ti uray ania a wagas; wen, makitayo a mabutengda nga agbasol—ta adtoy agsagaba ti bagbagida a mabaddekan ken mapapatay babaen ti kabusorda, ket saanda nga ilayat ti kampilanda kadakuada, ket gapu daytoy iti pammatida ken ni Cristo.

10 Ket ita, gapu iti kinasikenda iti dayta banag a pinatida, gapu iti kinatibkerda idi apaman a nalawlawaganda, adtoy, bendisionan ken paatiddogen ti Apo ti aldawda, nupay nagbasolda—

11 Wen, uray no mapukpukawanda iti pammati iti Apo ^apaatiddogennanto ti aldawda, agingga a dumteng ti kanito a kas naibagan dagiti ammatayo, ken kasta met a babaen ni propeta ^bZenos, ken adu pay a sabali a propeta, maipapan iti ^cpannakaisubli manen dagiti kakabsattayo, dagiti Lamanite, iti pannakaammo iti pudno—

12 Wen, kunak kadakayo, nga iti ud-udina a panawen maited dagiti ^akari ti Apo kadagiti kakabsattayo, dagiti Lamanite, ket nupay adu dagiti rigat a malak-amdanto, ken nupay ^bmapagsublisublida ditoy daga, ken maanup, ken masaplit ken masinasina iti sabali a pagilian, nga awan ti lugar a pagkamanganda, ^cmaasianto ti Apo kadakuada.

13 Ket daytoy babaen iti padto, a ^amaiturongdanto manen iti pudno a pannakaammo, nga isu ti pannakaammo iti Mannubbotda, ken ti naindaklan ken pudno a ^bpastorda, ket maibilangda kadagiti karnerona.

14 Ngarud kunak kadakayo, ^anasaysayaatto kadakuada ngem kadakayo malaksid no agbabawikayo.

15 Ta adtoy, ^ano maipakita la ketdi kadakuada dagiti naindaklan nga aramid a kas iti pannakaipakitada kadakayo, wen, kadakuada a mapukpukaw ti pammatida gapu kadagiti kannawidan dagiti ammada, makitayonto a saanton a mapukaw ti pammatida.

16 Ngarud, kuna ti Apo: Saanko a dadaelen ida a mamimpinsan, ngem aramidek nga iti aldaw a panangikeddengko agsublidanto manen kaniak, kuna ti Apo.

17 Ket ita adtoy, kuna ti Apo, maipapan kadagiti Nephite: No saanda nga agbabawi, ken aramiden ti pagayatak, mamimpinsan a ^adadaelek ida, kinuna ti Apo, gapu iti saanda a panamati, nupay adu ti naindaklan nga inaramidko para kadakuada; ket kas iti kaawan duadua a sibibiag ti Dios, matungpalto dagitoy a banag, kinuna ti Apo.