1 Ket ita napasamak iti maika-pitopulo-ket-dua a tawen a panagturay dagiti ukom ti ikakaro ti panagsusupanget, isu nga adda gubgubat iti intero a daga dagiti amin a tao ni Nephi.

2 Ket dagiti ^analimed a bunggoy dagiti mannanakaw ti nangilungalong itoy aramid a panagdadael ken kinadangkes. Ket nagpaut daytoy a gubat iti makatawen; ket nagpaut met iti maika-pitopulo-ket-tallo a tawen.

3 Ket napasamak nga itoy a tawen immararaw ni Nephi iti Apo, a kinunana:

4 O Apo, dimo ipalubos a madadael dagitoy a tao iti espada; ngem O Apo, imbes mangyegka ketdi iti ^abisin iti daga, a mangriing kadakuada a manglagip iti Apo a Diosda, ket bareng no agbabawida ket agsublida kenka.

5 Ket naaramid ngarud a kasta, a maibatay kadagiti balikas ni Nephi. Ket adda nakaro a bisin iti daga, kadagiti amin a tao ni Nephi. Ket kasta a nagtultuloy ti bisin iti maika-pitopulo-ket-uppat a tawen, ket naisardeng ti aramid a panagdadael babaen ti espada ngem nagbalin a nasaem babaen ti bisin.

6 Ket nagtultuloy met daytoy nga aramid ti panagdadael iti maika-pitopulo-ket-lima a tawen. Ta nasaplit ti daga ket natikag, ket saan a nakapataud iti apit iti panawen ti panagaapit; ket nasaplit ti sangabukel a daga, kadagiti man Lamanite ken kadagiti Nephite, isu a nasaplitda ket rinibu ti napukaw nga ad-adu ti kinadangkes iti daga.

7 Ket napasamak a nakita dagiti tao a dandani mapukawdan iti bisin, ket nangrugi a ^analagipda ti Apo a Diosda; ket nangrugi a nalagipda dagiti balikas ni Nephi.

8 Ket nangrugi dagiti tao a nagpakaasi kadagiti pangulo nga ukomda ken kadagiti dadauloda, ket kinunada ken ni Nephi: Adtoy, ammomi a sika ti tao ti Dios, ket ngarud ipakaasim iti Apo a Diosmo nga ilisina kadakami daytoy a bisin, amangan ta mapasamak amin dagiti ^abalikas nga imbagam a maipanggep iti pannakadadaelmi.

9 Ket napasamak a kinuna dagiti ukom ken ni Nephi, a maibatay kadagiti balikas a tinarigagayanna. Ket napasamak nga idi nakita ni Nephi a nagbabawin dagiti tao ken impakumbabada ti bagbagida iti nakersang nga aruaten, immararaw manen iti Apo, a kinunana:

10 O Apo, adtoy dagitoy tao a nagbabawi; ket sinagadda ti bunggoy ni Gadianton nga inyadayo kadakuada agingga nga awan ti nabati kadakuada, ken imbutaktakda dagiti nalimed a panggepda iti daga.

11 Ita, O Apo, gapu iti daytoy ti panagpakumbabada yadayom koma ti pungtotmo, ket maibsan koman ti pungtotmo iti pannakadadael dagiti kinadangkes a tao a dinadaelmon.

12 O Apo, yadayom koma ti pungtotmo, wen, ti nakaam-amak a pungtotmo, ket ibilinmo ti pannakapukaw ti bisin ditoy a daga.

13 O Apo, imdengannak koma, ket ipalubosmo a maaramid a maibatay kadagiti balikasko, ket ^apagtuduem iti rabaw ti daga, tapno isangbayna ti bungana, ken ti apitna iti panawen ti apit.

14 O Apo, inimdengam dagiti ^abalikasko idi kinunak, Adda koma bisin, tapno mapukaw ti angol ti espada; ket ammok nga aramidem, uray itoy a kanito, imdengam dagiti balikasko, ta kinunam a: No agbabawi dagitoy a tao isalakanko ida.

15 Wen, O Apo, ket makitam a nagbabawidan, gapu iti bisin ken iti angol ken pannakadadael, a napasamaken kadakuada.

16 Ket ita, O Apo, yadayom koma ti pungtotmo, ket padasem kadi manen no pagpaayandaka met laeng? Ket no kasta, O Apo, mabendisionam ida a maibatay kadagiti balikasmo a nasaomon.

17 Ket napasamak nga iti maika-pitopulo-ket-innem a tawen inyadayo ti Apo ti pungtotna kadagiti tao, ket imbilinna nga ^aagtudo iti daga, tapno iti kasta isangbayna ti bungana iti panawen ti panagbungana. Ket napasamak a nangisangbay iti apitna iti panawen ti panagapitna.

18 Ket adtoy, nagrag-o dagiti tao ket dinaydayawda ti Dios, ket napno ti daga iti ragrag-o; ket saandan a pinanunot pay a dadaelen ni Nephi, ngem intandudoda ketdi a ^anaindaklan a propeta, ken tao ti Dios, nga addaan iti naindaklan a bileg ken panangituray nga inted kenkuana ti Dios.

19 Ket adtoy, awan ti uray no ^asangkabassit a nakaudian ni Lehi, ti kabsatna, kenkuana maipanggep iti kinalinteg.

20 Ket kasta a napasamak a nangrugi manen dagiti tao ni Nephi a rimmang-ay iti daga, ket rinugianda a binangon dagiti nadadael a lugarda, ken nangrugida nga immadu ken nagwaras, nga agingga a naaplagandan ti rabaw ti daga, nga agpadpada iti amianan ken iti abagatan, manipud iti laud a baybay agingga iti daya a baybay.

21 Ket napasamak a naggibus ti maika-pitopulo-ket-innem a tawen a sitatalna. Ket nangrugi ti maika-pitopulo-ket-pito a tawen a sitatalna; ket nagwaras ti ^asimbaan iti rabaw ti amin a daga; ken ad-adu ti bilang dagiti tao, kadagiti Nephite ken kadagiti Lamanite nga agpadpada, a kameng ti simbaan; ket naaddaanda iti aglaplapusanan a naindaklan a talna iti daga; ket kasta ti panaggibus ti maika-pitopulo-ket-pito a tawen.

22 Ken kasta met nga adda talnada iti maika-pitopulo-ket-walo a tawen, malaksid ti saggaysa a panagsusupanget maipanggep kadagiti panirigan iti doktrina nga intuyang dagiti propeta.

23 Ket iti maika-pitopulo-ket-siam a tawen nangrugi nga immadu ti riri. Ngem napasamak a da Nephi ken Lehi, ken adu kadagiti kabsatda a makaammo iti maipanggep kadagiti panirigan iti doktrina, iti kaadu dagiti ^apaltiing iti inaldaw, ngarud nangasabada kadagiti tao, iti kasta napagsardengda ti riri iti dayta a tawen.

24 Ket napasamak nga iti maika-walopulo a tawen a panangituray dagiti ukom kadagiti tao ni Nephi, adda bilang dagiti sumupsuppiat manipud kadagiti tao ni Nephi, a sumagmamano a tawenen a kimmappon kadagiti Lamanite, ket inawatda a nagan ti Lamanite, ken kasta met ti bilang dagiti talaga nga an-annabo dagiti Lamanite, a nariing ti pungtotda kadakuada, wenno babaen dagiti sumupsuppiat, ngarud inrugida ti nakigubat kadagiti kabsatda.

25 Ket nagaramidda iti nadawel a panagpapatay ken panagsamsam; sa kalpasanna nagsanudda kadagiti bantay, ken iti langalang ken nalimed a luglugar, nga inlemmengda ti bagbagida tapno dida ida masarakan, nga inaldaw nga umad-adu ti bilangda, agingga nga adda dagiti sumupsuppiat a mapan kadakuada.

26 Ket iti kasta a panawen, wen, uray pay iti uneg ti saan unay nga adu a tawen, nagbalinda a nalabes ti kadakkelna a bunggoy dagiti mannanakaw; ket sinukimatda amin a nalimed a plano ni Gadianton; ket kasta ti panagbalinda a mannanakaw ni Gadianton.

27 Ita adtoy, nagaramid dagitoy a mannanakaw iti nalabes a panagkibur, wen, uray pay iti dakkel a panagdadael kadagiti tao ni Nephi, ken kasta met kadagiti tao dagiti Lamanite.

28 Ket napasamak a kasapulan ti pannakaisardengen daytoy nga aramid a panagdadael; ngarud nangipatulodda iti buyot ti napipigsa a lallaki iti langalang ken kadagiti bantay a mangsapul iti daytoy a bunggoy dagiti mannanakaw, ket tapno dadaelenda ida.

29 Ngem adtoy, napasamak nga iti dayta met la a tawen napagsanudda nga uray la nga iti dagdagada. Ket kasta ti panaggibus ti maika-walopulo a tawen a panangituray dagiti ukom kadagiti tao ni Nephi.

30 Ket napasamak iti panangrugi ti maika-walopulo-ket maysa a tawen a napanda manen sinango ti bunggoy dagiti mannanakaw, ket adu ti dinadaelda; ket sinangbayan met ida ti dakkel a pannakadadael.

31 Ket napilitanda manen nga agsubli a rummuar iti langalang ken rummuar iti kabambantayan a mapan kadagiti dagada, gapu iti nalaus a kadakkel ti bilang dagiti mannanakaw a nangpunno kadagiti bantay ken langalang.

32 Ket napasamak a kasta ti panaggibus daytoy a tawen. Ket immadu ken pimmigsa dagiti mannanakaw, tapno iti kasta dida inkankano dagiti buyot dagiti Nephite, ken kasta met dagiti Lamanite; ket nangparnuayda iti nakaro a buteng kadagiti tao iti intero a rabaw ti daga.

33 Wen, ta sinarungkaranda ti adu a paset ti daga, ket nakaro ti panangdadaelda kadakuada; wen, adu ti pinapatayda, ket innalada a balud dagiti sabali iti langalang, wen, ken kangrunaanna nga ad-adu dagiti babbai ken annakda.

34 Ita daytoy nakaro a kinadakes, a napasamak kadagiti tao gapu iti basolda, ti nangriing manen kadakuada a manglagip iti Apo a Diosda.

35 Ket kasta ti panaggibus ti maika-walopulo-ket-maysa a tawen a panagturay dagiti ukom.

36 Ket iti maika-walopulo-ket-dua a tawen nangrugi manen a ^analipatanda ti Apo a Diosda. Ket iti maika-walopulo-ket-tallo a tawen nangrugida a pimmigsa nga agbasol. Ket iti maika-walopulo-ket-uppat a tawen dida tinarimaan dagiti wagasda.

37 Ket napasamak iti maika-walopulo-ket-lima a tawen pimmigsa a pimmigsa ti kinapalangguadda, ken iti kinadangkesda; ket kasta ti pannakaluomda manen a madadael.

38 Ket kasta ti panaggibus ti maika-walopulo-ket-lima a tawen.