1 Adtoy, ita napasamak iti maikanem-a-pulo-ket-siam a tawen a panangituray dagiti ukom kadagiti tao dagiti Nephite, a ni Nephi, ti lalaki nga anak ni Helaman, ^anagsubli iti daga a Zarahemla manipud iti daga iti amianan.

2 Ta nakipagyan kadagiti tao iti daga iti amianan, ket inkasabana kadakuada ti balikas ti Dios, ken impadtona kadakuada ti adu a banag;

3 Ket awan ti inawatda kadagiti balikasna, iti kasta saan a makapagbayag kadakuada, ngem nagsubli manen iti daga a nakayanakanna.

4 Ket iti pannakakitana kadagiti tao iti nakaam-amak a kasasaad ti kinadangkes, ken iti panangpunno dagiti mannanakaw ni Gadianton iti pangukoman—iti panangrabsutda iti bileg ken panangituray iti daga; nga impaknida dagiti bilin ti Dios, ket pulos nga awan ti panamatida kenkuana; iti dida pannangted iti linteg kadagiti annak ti tattao;

5 Iti panangkednganda kadagiti nalinteg gapu iti kinalintegda; iti dida panangdusa kadagiti nagbasol ken nadangkes gapu iti kuartada; ken kangrunaanna agtakem iti opisina iti ulo ti gobierno, a mangiturong ken agaramid iti maibatay iti pagayatanda, tapno rumang-ayda ken dumayag iti ^alubong, ken, kangrunaanna, tapno nalaklakada ti makiabig, ken agtakaw, ken mamapatay, ken agaramid iti kaykayatda—

6 Ita immay kadagiti Nephite daytoy nakaro a pagbasolan, iti uneg ti saan unay nga adu a tawen; ket idi nakita ni Nephi, dimmagsen ti barukongna iti ladingit ti pusona; ket nayebkasna iti panagtutuok ti kararuana:

7 O, adda koma dagiti aldawko kadagiti aldaw ni tatangko a Nephi idi immuna a rimmuar iti daga a Jerusalem, tapno nakipagrag-oak koma kenkuana iti naikari a daga; ket nalaklaka koma a nataming dagiti taona, a natibker a mangtungpal kadagiti bilin ti Dios, ken nabuntog a maiturong iti panagaramid iti pagbasolan; ket napartakda a dumngeg kadagiti balikas ti Apo—

8 Wen, no koma dagiti aldawko ket kadagidi nga aldaw, agrag-o koma ti kararuak iti kinalinteg dagiti kabsatko.

9 Ngem adtoy, naikari a dagitoy ti aldawko, ken mapno ti kararuak iti leddaang gapu iti kinadangkes dagiti kabsatko.

10 Ket adtoy, ita napasamak nga iti torre, nga adda iti minuyongan ni Nephi, nga adda iti asideg ti nalawa a kalsada nga agturong iti kangrunaan a tiendaan, nga adda iti siudad ti Zarahemla; ngarud, nagkurno ni Nephi iti torre nga adda iti minuyonganna, a dayta a torre asideg met iti ruangan ti minuyongan a mangdugpa iti nalawa a kalsada.

11 Ket napasamak nga adda lallaki a limmabas ket nakitada ni Nephi bayat ti panangibukbokna iti kararuana iti Dios iti torre; ket nagtarayda a napan nangibaga kadagiti tao iti naimatanganda, ket napan dagiti tao a sangsangkamaysa tapno maammuanda ti gapu ti nalaus a panagleddaang iti kinadangkes dagiti tao.

12 Ket ita, idi tumakder ni Nephi nakitana ti ummong dagiti tao a nagkaykaysa.

13 Ket napasamak nga inungapna ti ngiwatna ket kinunana kadakuada: Adtoy, ^aapay a naguummongkayo? Tapno ibagak kadakayo ti basbasolyo?

14 Wen, gapu ta immayak ditoy torrek ket ibukbokko ti kararuak iti Diosko, gapu iti nalaus a ladingit ti pusok, a gapu iti basbasolyo.

15 Ket gapu iti panagladingitko ken panagunnoy nagkaykaysakayo, ket nasdaawkayo; wen, ket adda nasken unay a pagsiddaawanyo; wen, nasken nga agsiddaawkayo gapu ta napanuynoyankayo isu a nairut ti panangpetpet ti sairo iti puspusoyo.

16 Wen, kasano a naikkanyo iti gundaway ti pananggargari ti agpanggep a mangiwallages kadagiti kararuayo iti agnanayon a pagladingitan ken awan inggana a kinaay-ay-ay?

17 O agbabawikayo, agbabawikayo! ^aApay a mataykayo? Agsublikayo, agsublikayo iti Apo a Diosyo. Apay a binaybay-annakayo?

18 Gapu ta pinatangkenyo ti puspusoyo; wen, diyo denggen ti timek ti ^anasayaat nga agpaspastor; wen, ^bpinagpungtotyo a maibusor kadakayo.

19 Ket adtoy, idinto nga ^aurnongennakayo, malaksid no agbabawikayo, adtoy, warawaraennakayo tapno agbalinkayo a karne a para kadagiti aso ken kadagiti atap nga ayup.

20 O, kasano a nalipatanyo a dagus ti Diosyo iti dayta nga aldaw a panangwayawayana kadakayo?

21 Ngem adtoy, tapno rumang-ay, tapno dayawen dagiti tao, wen, ken tapno makaalakayo iti balitok ken pirak. Ket insaadyo ti puspusoyo iti kinabaknang ken iti awan kaes-eskanna a banag iti daytoy a ^alubong, ta namapataykayo a sidadawel, ken nagsamsam, ken nagtakaw, ken ^bnamarpardayakayo kadagiti kaarrubayo, ken nagaramidkayo iti amin a kita ti basol.

22 Ket iti daytoy a gapu ay-aykayonto pay malaksid no agbabawikayo. Ta no saankayo nga agbabawi, adtoy, daytoy dakkel a siudad, ken kasta met amin dagiti dadakkel a siudad nga adda iti aglawlaw, nga adda iti daga a sakuptayo. Maagawto tapno awan ti pagyananyo kadakuada; ta adtoy, dinakayonto ikkan ti Apo iti ^apigsa, a kas naaramidnan ditoy, tapno masarkedanyo dagiti kabusoryo.

23 Ta adtoy, kastoy ti kuna ti Apo: Saanko nga ipakita kadagiti nadangkes ti pigsak, iti ad-adu ngem maysa iti sabali, malaksid kadagiti agbabawi kadagiti basolda, ken dumngeg kadagiti balikasko. Ita ngarud, kayatko nga imatanganyo kakabsatko, a ^anasaysayaat dagiti Lamanite ngem dakayo malaksid no agbabawikayo.

24 Ta adtoy, nalinlintegda ngem dakayo, ta saanda a nagbasol iti dayta naindaklan a pannakaammo a naawatyo; ngarud kaasianto ida ti Apo; wen, ^ayatiddognanto dagiti aldawda ken nayonanna dagiti bukelda, idinto nga awan duaduanto a ^bmadadaelkayo malaksid no agbabawikayo.

25 Wen, ay-aykayonto pay gapu iti dayta nalabes a makarimon nga aramid nga immay kadakayo; ket nagkaykaysaanyo, wen, iti dayta ^analimed a bunggoy a binukel ni Gadianton!

26 Wen, ^aay-aykayonto pay gapu iti dayta palangguad nga impalubosyo a sumrek iti puspusoyo, a nangitag-ay kadakayo iti labes dayta nasayaat gapu iti aglaplapusanan a ^bkinabaknangyo!

27 Wen, ay-aykayonto pay gapu iti kinadangkesyo ken makarimon nga aramid!

28 Ket malaksid no agbabawikayo mapukawkayonto; wen, maagawto pay kadakayo dagiti dagayo, ket madadaelkayonto iti rabaw ti daga.

29 Adtoy ita, diak ibaga a mapasamakto dagitoy a banag, iti bagik, gapu ta saan a siak ti ^amakaammo kadagitoy a banag; ngem adtoy, ammok a pudno dagitoy a banag gapu ta impakaammo kaniak ti Apo a Dios, ngarud paneknekak a kastadanto.