Dagiti Nasantuan a Kasuratan
Helaman 16


Kapitulo 16

Binuniagan ni Nephi dagiti Nephite a mamati ken ni Samuel—Saan a mapatay dagiti pana ken bato dagiti di agbabawi a Nephite ni Samuel—Sumagmamano ti nangpatangken iti pusoda, ken nakakita dagiti dadduma kadagiti anghel—Kuna dagiti saan a mamati a saan a nainkalintegan ti pammati ken ni Cristo ken ti yaayna iti Jerusalem. Agarup 6–1 S.C.

1 Ket ita napasamak nga adu ti nakangngeg iti sao ni Samuel, a Lamanite, nga imbagana kadagiti pader ti siudad. Ket kas iti kaadu ti namati iti saona napan ket binirokda ni Nephi; ket idi napanda, nasarakanda ket impudnoda dagiti basolda kenkuana ket saanda nga inlibak, ta tinarigagayanda ti mabuniagan iti Apo.

2 Ngem kas iti kaadu dagiti saan a namati iti sao ni Samuel ti nanggura kenkuana; ket binatoda nga impadeg iti pader, ket adu met ti nangibiat iti panada kenkuana iti yaampirna iti pader; ngem adda kenkuana ti Espiritu ti Apo, iti kasta saanda a mapuntaan iti bato wenno panada.

3 Ita idi makitada a saanda a mapuntaan, ad-adu manen ti namati iti saona, ket napanda ken ni Nephi tapno mabuniagan.

4 Agsipud ta adtoy, mangbumbuniag ni Nephi, mangipadpadto, ken mangaskasaba, ipakpakaasina ti panagbabawi dagiti tao, a mangipakpakita iti tanda ken akinadatdatlag, agar-aramid iti milagro kadagiti tao tapno ammuenda nga basidegen ti yaay ni Cristo—

5 Ibagbagana kadakuada dagiti banag nga asidegen a mapagteng, tapno maammuan ken malagipda ti kanito ti yaayda dagitoy naipasakbay a naipakaammo kadakuada, iti panggep a mamatida; ngarud kas iti kaadu dagiti namati iti sao ni Samuel ti napan kenkuana a pabuniagan, gapu ta napanda nga agbabawi ken mangipudno kadagiti basolda.

6 Ngem ad-adu kadakuada ti saan a namati iti sao ni Samuel; ngarud idi makitada a saanda a mapuntaan iti bato ken panada, impukkawda kadagiti kapitanda, a kinunada: Tiliwenyo daytoy a tao ket punguenyo ta adtoy, adda kenkuana ti sairo; ket saanmi a mapuntaan iti bato ken panami gapu iti pannakabalin ti sairo nga adda kenkuana; ngarud punguenyo, tiliwenyo ket yadayoyo.

7 Ket idi ilayatda dagiti imada kenkuana, adtoy, timmappuak manipud iti pader, ket naglibas iti pagilianda, wen, nagturong iti bukodna a pagilian, ket nangrugi a nangasaba ken nagipadto kadagiti taona.

8 Ket adtoy, saanen a nangngegan pay dagiti Nephite; ket kasta ti aramid dagiti tao.

9 Ket kastoy ti panaggibus ti walopulo-ket-innem a tawen a panagturay dagiti ukom kadagiti tao ni Nephi.

10 Ken kasta met ti panaggibus ti maika-walopulo-ket-pito a tawen a panagturay dagiti ukom, a kaaduan kadagiti umili ti nagtultuloy iti kinatangsit ken kinadangkesda, ken basbassit kadakuada ti agbibiag a siaannad iti imatang ti Dios.

11 Ket daytoy met ti kasasaad, idi maika-walopulo-ket-walo a tawen ti panagturay dagiti ukom.

12 Ket adda bassit panagbaliw ti aramid dagiti tao, ta kimmaro ti panagbasol, ken panagaramidda iti ad-adu a maisupadi iti bilin ti Dios, iti maika-walopulo-ket-siam a tawen ti panagturay dagiti ukom.

13 Ngem napasamak idi maika-siam-a-pulo a tawen iti panagturay dagiti ukom, adda dagiti anaindaklan a tanda a naited kadagiti tao, ken datdatlag; ket bnangrugi a matungpal ti sao dagiti propeta.

14 Ket nagparang dagiti aanghel kadagiti tao, masirib a tao, ket napnuanda iti ragsak a nangipalawag kadakuada iti naragsak a damag; ket nangrugi iti daytoy a tawen a matungpal ti nasantuan a kasuratan.

15 Nupay kasta, rinugian dagiti tao ti mangpatangken iti pusoda, isuda amin malaksid dagiti pudno a namati kadakuada, dagiti Nephite ken Lamanite, ket nangrugida a nagtalek iti bukodda a pigsa ken asirib, a kunkunada:

16 Nalabit a sumagmamano a banag ti napugtuanda nga umno, kadagiti adu; ngem adtoy, ammotayo a saan a mapasamak amin dagitoy naindaklan ken nakaskasdaaw nga aramid, a kas iti naibagan.

17 Ket rinugianda ti nagikalintegan ken nagririri, a kunkunada:

18 A asaan a nainkalintegan ti yaayto ti maysa a nabiag a kas iti Cristo; no kasta, ken no isu ti Anak ti Dios, ti Ama iti langit ken iti daga, a kas iti nasaon, apay a dina iparang ti bagina kadakami ken kadakuada nga addanto idiay Jerusalem?

19 Wen, apay a dina iparang ti bagina ditoy a daga ken iti daga ti Jerusalem?

20 Ngem adtoy, ammomi a nadangkes a akannawidan daytoy, nga impatawid kadakami dagiti ammami, a mamatikami iti sumagmamano a naindaklan ken datdatlag a banag a masapul a mapasamak, ngem saan a kadakami, ngem iti ili nga adayo, iti ili a saanmi nga ammo; ngarud mabalin a pagbalinendakami a nakuneng, agsipud ta saan a bmasaksian ti matmatami a pudno dagitoy.

21 Ken agaramidda, babaen ti kinalaing ken nakaskasdaaw a paglaingan ti maysa a sairo, iti sumagmamano a nakaskasdaaw a saanmi a maawatan, a kapilitan a mangiturong kadakami nga agbalin nga adipen ti saoda, ken kasta met nga adipenda, agsipud ta nagtalekkami kadakuada a mangisuro kadakami iti balikas; ket iti kastoy aramidendakami a nakuneng no isukomi ti bagbagimi kadakuada, iti unos ti panagbiagmi.

22 Ket adu pay a banag ti inarapaap dagiti umili kadagiti pusoda, a minamaag ken aawan pategna; ket kasta unay ti pannakariribukda, agsipud ta kinibur ida ni Satanas a nagtultuloy nga agaramid iti basol; wen, napan nagiwaras iti sayangguseng ken panagririri iti isu amin a paset ti daga, tapno patangkenenna ti puso dagiti umili a maibusor iti naimbag ken iti dayta masapul nga umay.

23 Ken uray adda dagiti pagilasinan ken datdatlag nga inyeg ti Apo kadagiti tao, ken iti adu a milagro nga inaramidda, nabileg ti pananggemgem ni Satanas iti puso dagiti tao iti amin a paset ti daga.

24 Ket kastoy ti panaggibus ti maika-siam-a-pulo a tawen ti panagturay dagiti ukom kadagiti tao ni Nephi.

25 Ket kastoy ti panaggibus ti Libro ni Helaman, babaen ti kasuratan ni Helaman ken dagiti annakna.