1 Ket ita napasamak a nangipadto ni ^aSamuel, a Lamanite, iti adu pay a banag a saan a maisurat.

2 Ket adtoy, kinunana kadakuada: Adtoy, itedko kadakayo ti pagilasinan; ta lima pay a tawen ti umay, ket adtoy, umayton ti Anak ti Dios a mangsubbot kadakuada a mamatinto iti naganna.

3 Ket adtoy, daytoy ti itedko a ^apagtandaananyo iti kanito a yaayna; ta adtoy, addanto naraniag a silsilaw iti langit, kasta met nga iti rabii sakbay nga umay awanto ti sipnget, kasta met nga agparangto iti tao a kas aldaw.

4 Ngarud, addanto maysa nga aldaw ken rabii ken maysa nga aldaw, a kasla maysa nga aldaw nga awan ti rabiina; ket daytoy ti maipaay kadakayo a pagilasinan; gapu ta maammuanyonto ti ileleggak ti init ken kasta met ti ilelennekna; ngarud maammuanyonto a sitatalged nga addanto dua nga aldaw ken maysa a rabii; nupay kasta saanto nga agsipnget ti rabii; ket isunto ti rabii sakbay ti ^apannakayanakna.

5 Ket adtoy, addanto ^alumgak a baro a bituen, maysa a saanyo pay a nakita; ket maysa pay daytoy a pagilasinanyo.

6 Ket adtoy saan la a dagitoy, adunto ti pagilasinan ken datdatlag iti langit.

7 Ket mapasamak a napalausto ti panagdayaw ken siddaawyo amin, ket ^amatuangkayo iti daga.

8 Ket mapasamakto a siasino man a ^amamati iti Anak ti Dios, maaddaanto iti agnanayon a biag.

9 Ket adtoy, kastoy ti imbilin ti Apo kaniak, babaen ti anghelna, a masapul nga umayak ket ibagak daytoy a banag kadakayo; wen, imbilinna a masapul nga ipadtok dagitoy a banag kadakayo; wen, kinunana kaniak: Ipaganetgetmo kadagitoy a tao, agbabawikayo ket isaganayo ti dalan ti Apo.

10 Ket ita, agsipud ta maysaak a Lamanite, ket naibagak kadakayo dagiti balikas nga imbilin ti Apo kaniak, ken agsipud ta nadagsen dagitoy kadakayo, kinaguradak ket pinanggepdak a dadaelen, ken ^apinapanawdak iti ummongyo.

11 Ket mangngegyonto dagiti balikasko, ta, gapu iti daytoy a panggep simmalpaak iti pader ti siudad, tapno mangngegyo ken maammuanyo dagiti pangngeddeng ti Dios nga agur-uray kadakayo gapu iti kinadakesyo, ken tapno maammuanyo ti kasasaad ti panagbabawi;

12 Ken tapno maammuanyo met ti yaay ni Jesucristo, ti Anak ti Dios, ti ^aAma ti langit ken ti daga, ti Namarsua iti isu amin a banag manipud idi punganay; ken tapno maammuanyo ti pagilasinan ti yaayna, iti panggep a mamatikayo koma iti naganna.

13 Ket no ^amamatikayo iti naganna agbabawikayo iti basbasolyo, ket iti kasta mapakawankayo gapu iti ^bkinaimbagna.

14 Ket adtoy, manen, sabali pay a pagilasinan ti itedko kadakayo, wen, ti pagilasinan iti ipapatayna.

15 Ta adtoy, nasken a matay tapno mapasamak ti ^apannakaisalakan; wen, nasken kenkuana ken rumbeng unay a matay, tapno matungpal ti ^bpanagungar dagiti natay, tapno iti kasta maidatag ti tao iti sanguanan ti Apo.

16 Wen, adtoy, yeg daytoy nga ipapatay ti pannakatungpal ti panagungar, ken ^asubbotenna ti amin a tao manipud iti immuna nga ipapatay—dayta naespirituan nga ipapatay; ti amin a tao, babaen ti ^bpannakatnag ni Adan a ^cpannakaisinana manipud iti imatang ti Apo, maibilang a ^dpatay, iti agpadpada a banag a nainlasagan ken banag a naespirituan.

17 Ngem adtoy, ^asubboten ti panagungar ni Cristo ti amin a tao, wen, ti amin a tao, ket isublina ida iti imatang ti Apo.

18 Wen, ken yegna ti pannakatungpal ti wagas ti panagbabawi, tapno siasino man nga agbabawi saan a mapukaw ken maitappuak iti apuy; ngem siasino man a di agbabawi mapukaw ken maitappuak iti apuy ken mapasamak manen kadakuada ti naespirituan a pannakatay, wen, ti maikadua nga ipapatay, agsipud ta maisinada manen kadagiti banag a maipapan iti kinalinteg.

19 Agbabawikayo ngarud, agbabawikayo, ta amangan no ti pannakaammoyo kadagitoy a banag ken saanyo a panangaramid kadagitoy ti pagsagabaanyonto iti pangngeddeng, ket maigarangugongkayonto iti daytoy maikadua nga ipapatay.

20 Ngem adtoy, kas kinunak kadakayo maipapan iti sabali a ^atanda, ti pagilasinan ti ipapatayna, adtoy, iti dayta nga aldaw nga agsagabanto iti ipapatay ^bagsipngetto ti init ket dinto mangted iti lawagna kadakayo; kasta met ti bulan ken dagiti bituen; ket awanto ti lawag iti rabaw daytoy a daga, uray iti kanito a lak-amenna ti patay, iti uneg ti ^ctallo nga aldaw, agingga iti kanito nga agungar manen manipud iti patay.

21 Wen, iti kanito a yawatna ti espiritu ^aaggurruodto ken agkimat iti las-ud ti adu nga oras, ken agginggined ken agarigenggen ti daga; ken dagiti bato nga adda iti daytoy a daga, nga agpapada nga adda iti rabaw ken unegna, nga ammoyo iti daytoy a kanito a sibubukel, wenno iti ragupna maysa a natangken a banag, ^bmaburakto;

22 Wen, maguduanto, ket kalpasanna masarakandanto kadagiti ^arengngat ken nagbirri, ken naburburak iti sibubukel a daga, wen, iti rabaw ken iti uneg ti daga.

23 Ket adtoy, addanto dakkel a bagyo, ken adunto ti agkusukos a bantay, a mayarig iti napatad a daga, ket adunto ti napatad a lugar ti agbalin a nangato a bantay a naidaddaduma ti tayagna.

24 Ket adu a kalsada ti madadael, ken adu a ^asiudad ti mabaybay-an.

25 Ket adunto ti ^atanem a malukatan, ket rumuarto dagiti natay; ket adunto a santo ti agparang iti kaaduan.

26 Ket adtoy, kastoy ti panangibaga ti ^aanghel kaniak; ta kinunana nga aggurruodto ken agkimat iti las-ud ti adu nga oras.

27 Ket kinunana kaniak a bayat ti kaadda ti gurruod ken kimat, ken ti bagyo, a masapul a mapasamak dagitoy, ket sakupen ti ^asipnget ti sibubukel a daga iti las-ud ti tallo nga aldaw.

28 Ken kinuna kaniak ti anghel nga adunto ti makaimatang iti nain-indaklan a banag ngem dagitoy, tapno maipapati kadakuada ti panggep a mapasamak ^adagitoy a tanda ken dagitoy a pagsidsiddaawan iti sangalubongan, ta kayatna nga awan koma ti pambar a di mamati dagiti annak ti tao—

29 Ket daytoy ti panggep tapno siasino man a mamati mabalin a maisalakan, ken ti siasino man a saan a mamati, mabalin a maipataw kadakuada ti nainkalintegan a ^apanangukom; ken kasta met a no makednganda isuda met laeng ti nangted iti bukodda a pangngeddeng no madusada.

30 Ket ita laglagipenyo, laglagipenyo, kakabsatko, a siasino man a mapukaw, mapukaw gapu kenkuana; ket siasino man nga agaramid iti kinadakes, ar-aramidenna iti bagina; agsipud ta adtoy, ^asiwawayakayo; mapalubosankayo nga agaramid iti agpaay iti bagbagiyo; ta adtoy, nangted ti Dios kadakayo iti ^bpannakaammo ket pinagbalinnakayo a nawaya.

31 Intedna kadakayo tapno ^amaammuanyo ti nasayaat manipud iti dakes, ken intedna kadakayo tapno ^bmapiliyo ti biag wenno patay; ken mabalinyo nga aramiden ti nasayaat ket maisublinto kadakayo dayta a nasayaat, wenno ^cmaisublinto kadakayo dayta a kinasayaat; wenno mabalinyo ti agaramid iti dakes, ket maisublinto kadakayo dayta a kinadakes.