Balaan ng mga Kasulatan
Helaman 3


Kapitulo 3

Madamo nga Nefinhon ang nagsaylo sa duta pa-norte—Nagpatukod sila sang mga balay nga semento kag nagtipig sang madamo nga kasulatan—Napulo ka linibo ang nahaylo kag nabunyagan—Ang pulong sang Dios nagadala sang mga tawo sa kaluwasan—Si Nefi nga anak ni Helaman ang nagkapot sang hukom-lingkuranan. Mga 49–39 B.C.

1 Kag karon natabo ini, sa ika-kwarenta’y tres nga tuig sang pagginahum sang mga hukom, wala sing pagbinaisay sa katawhan ni Nefi luwas sa diutay nga bugal nga yara sa simbahan, nga nagtuga sang pila ka pag-ilinaway sang katawhan, nga ang amo nga mga sitwasyon nahusay sa paghingapos sang ika-kwarenta’y tres nga tuig.

2 Kag wala na sing pagbinaisay sang katawhan sa ika-kwarenta’y kwatro nga tuig; kag wala man sing madamo nga pagbinaisay sa ika-kwarenta’y singko nga tuig.

3 Kag natabo ini, sa ika-kwarenta’y sais, huo, may madamo nga pagbinaisay kag madamo nga pagsilipak; nga sa diin tuman kadamo ang naggwa sa duta sang Zarahemla, kag nagkadto sa duta pa-norte agud panublion ang duta.

4 Kag nagpanglakaton sila sing tuman kalayo, sa bagay nga nakalab-ot sila sa dalagko nga katubigan kag madamo nga suba.

5 Huo, kag sa pagkamatuod naglinapta sila sa tanan nga bahin sang kadutaan, padulong sa bisan ano nga mga bahin nga wala nangin mamingaw kag wala sing kakahuyan tungod sang madamo nga pumuluyo nga nagpanubli sang duta sang una.

6 Kag karon wala sing bahin sang duta nga mamingaw luwas sa kakahuyan; kundi tungod sa kadako sang kalaglagan sang katawhan nga nagpuyo sa duta sang una amo nga gintawag ini nga mamingaw.

7 Kag tungod nga diutay lamang ang kahoy sa ibabaw sang kadutaan, apang ang katawhan nga nagkadto didto nangin tuman kabatid sa paghimo sang semento; gani nagtukod sila sang mga balay nga semento kon sa diin sila nagpuyo.

8 Kag natabo ini nga nagdamo sila kag naglapta, kag nagkadto halin sa kadutaan sa sur padulong sa kadutaan pa-norte, kag naglapta sa bagay nga nagsugod sila sa pagpuno sang ibabaw sang bug-os nga duta, halin sa sur nga dagat, padulong sa norte nga dagat, halin sa weste nga dagat padulong sa este nga dagat.

9 Kag ang katawhan nga yara sa duta pa-norte nagpuyo sa mga tolda, kag sa mga balay nga semento, kag gintugotan nila ang kon ano man nga kahoy nga magtubo sa ibabaw sang kadutaan nga magdako ini, agud nga pag-abot sang panahon may yara sila sang kahoy agud ipatukod sang ila mga balay, huo, sang ila mga siyudad, kag sang ila mga templo, kag sang ila mga sinagoga, kag sang ila mga santuaryo, kag tanan nga sari sang ila mga bilding.

10 Kag natabo ini, tungod ang kahoy tuman kaiwat sa duta pa-norte, nagpadala sila sing madamo paagi sa sakayan-dagat.

11 Kag gani nahatagan nila sing paagi ang katawhan sa duta pa-norte nga makatukod sang madamo nga siyudad, pareho sa kahoy kag sa semento.

12 Kag natabo ini nga madamo sa katawhan ni Amon, nga mga Lamanhon sa pagkabun-ag, nga nagkadto man sa sini nga duta.

13 Kag karon may madamo nga kasulatan nga gintipigan parte sa mga kahimoan sining katawhan, sang madamo sining katawhan, nga detalyado kag madamo kaayo parte sa ila.

14 Apang tan-awa, ang ika-isa ka gatos nga bahin sang mga kahimoan sining katawhan, huo, ang kasaysayan sang mga Lamanhon kag sang mga Nefinhon, kag ang ila mga giyera, kag mga pagbinaisay, kag mga pag-ilinaway, kag ang ila pagpangwali, kag ang ila mga propesiya, kag ang ila pagpadala paagi sa sakayan-dagat, kag ang ila paghimo sang mga sakayan-dagat, kag ang ila pagtukod sang mga templo, kag sang mga sinagoga kag sang ila mga santuaryo, kag ang ila pagkamatarong, kag ang ila kalainan, kag ang ila mga pagpamatay, kag ang ila mga pagpangawat, kag ang ila pagpangagaw, kag tanan nga sari sang kangil-aran kag mga pagkamakihilawason, indi makaigo sa sini nga libro.

15 Apang tan-awa, may madamo nga libro kag madamo nga kasulatan sang tagsa ka sahi, kag ginatipigan ang mga ini masami sang mga Nefinhon.

16 Kag ginapasa-pasa ang mga ini halin sa isa ka henerasyon pakadto sa isa sang mga Nefinhon, bisan tubtob nga nahulog sila sa kalapasan kag ginpamatay, ginpang-agawan, kag ginpang-ayam, kag ginpanabog, kag ginpamatay, kag ginpalapta sa ibabaw sang duta, kag nakigsimpon sa mga Lamanhon tubtob nga wala na sila pagtawga nga mga Nefinhon, nga nangin mga malain, kag mabangis, kag mapintas, huo, bisan tubtob nga nangin mga Lamanhon.

17 Kag karon magabalik ako liwat sa akon kasaysayan; gani, kon ano ang akon ginhambal natabo pagkatapos nga may nangin dako nga mga pagbinaisay, kag mga kinagamo, kag mga giyera, kag mga pag-ilinaway sa tunga sang katawhan ni Nefi.

18 Ang ika-kwarenta’y sais nga tuig sang pagginahum sang mga hukom natapos;

19 Kag natabo ini nga may dako gihapon nga pagbinaisay sa duta, huo, bisan sa ika-kwarenta’y siyete nga tuig, kag amo man sa ika-kwarenta’y otso nga tuig.

20 Apang ginkaptan ni Helaman ang hukom-lingkuranan nga may hustisya kag katarongan; huo, nagtinguha sia sa pagtuman sang mga pagsulundan, kag mga paghukom, kag sang mga kasugoan sang Dios; kag ginhimo niya sing dalayon inang matarong sa panulok sang Dios; kag naglakat sia suno sa mga dalanon sang iya amay, sa bagay nga nag-uswag sia sa duta.

21 Kag natabo ini nga may duha sia ka anak nga lalaki. Ginhatag niya sa kamagulangan ang ngalan nga Nefi, kag sa kamanghuran, ang ngalan nga Lehi. Kag nagsugod sila sa pagdako para sa Ginuo.

22 Kag natabo ini nga ang mga giyera kag mga pagbinaisay nagsugod nga mag-untat gawa sa katawhan sang mga Nefinhon sa hingapusan nga bahin sang ika-kwarenta’y otso nga tuig sang pagginahum sang mga hukom sa katawhan ni Nefi.

23 Kag natabo ini, sa ika-kwarenta’y nuebe nga tuig sang pagginahum sang mga hukom, may dalayon nga paghidaet nga nagluntad sa kadutaan, tanan luwas sa sekreto nga mga padihot nga ginpahamtang ni Gadianton nga tulisan sa mas ginapuy-an nga mga bahin sang kadutaan, nga sa sina nga panahon wala mahibal-i sadtong mga yara sa pamunoan sang gobyerno; gani wala ang mga ini naguba sa kadutaan.

24 Kag natabo ini nga sa sining amo man nga tuig may tuman kadako nga kauswagan sa simbahan, sa bagay nga may linibo nga nagbuylog sa simbahan kag ginbunyagan sa paghinulsol.

25 Kag sa pagkadako sang pag-uswag sang simbahan, kag sa pagkadamo sang mga bugay nga ginbubo sa katawhan sa bagay nga bisan ang mga mataas nga pari kag mga manunudlo mismo tuman gid nga natingala.

26 Kag natabo ini nga ang buluhaton sang Ginuo nag-uswag padulong sa pagpabunyag kag pagpakig-isa sa simbahan sang Dios sang madamo nga tawo, huo, bisan napulo ka linibo.

27 Gani makita naton nga ang Ginuo maluluy-on sa tanan nga magpanawag sa iya balaan nga ngalan sa kasinsero sang ila mga tagipusuon.

28 Huo, gani makita naton nga ang ganhaan sang langit bukas sa tanan, bisan sa mga magpati sa ngalan ni Jesucristo nga amo ang Anak sang Dios.

29 Huo, makita naton nga kon sin-o man ang luyag, mahimo magkapyot sa pulong sang Dios, nga buhi kag gamhanan, nga magapihak-pihak sang tanan nga katusohan kag mga siod kag mga pagpatalang sang yawa, kag magatuytuy sa tawo ni Cristo sa mapiot kag makitid nga alagyan patabok sa sinang wala’y katubtuban nga kadadalman sang kalisud nga ginhanda sa paglamon sang mga malain—

30 Kag palab-uton ang ila mga kalag, huo, ang ila wala’y kamatayon nga mga kalag, sa tuo nayon nga kamot sang Dios sa ginharian sang langit, agud magpungko upod kay Abraham, kag kay Isaac, kag upod kay Jacob, kag upod sa tanan naton nga balaan nga mga amay, agud indi na maghalin pa.

31 Kag sa sini nga tuig may dalayon nga pagkinasadya sa duta sang Zarahemla, kag sa tanan nga mga lugar sa palibot, bisan sa bug-os nga kadutaan nga ginapanag-iyahan sang mga Nefinhon.

32 Kag natabo ini nga may paghidaet kag tuman kadako nga kalipay sa nabilin sang ika-kwarenta’y nuebe nga tuig; huo, kag amo man may dalayon nga paghidaet kag dako nga kalipay sa ika-singkwenta nga tuig sang pagginahum sang mga hukom.

33 Kag sa ika-singkwenta’y uno nga tuig sang pagginahum sang mga hukom may paghidaet man, luwas sa bugal nga nagsugod sa pagsulod sa simbahan—indi sa simbahan sang Dios, kundi sa mga tagipusuon sang katawhan nga nagpahayag nga miyembro sang simbahan sang Dios—

34 Kag naalsa sila sa bugal, bisan tubtob sa paghingabot sang madamo sang ila kauturan. Karon isa ini ka dako nga kalainan nga nangin kabangdanan sang mas mapainubuson nga bahin sang katawhan nga mag-antos sang tuman nga mga paghingabot, kag mag-ubog sa madamo nga pag-antos.

35 Apang nagpuasa kag nagpangamuyo sila pirme, kag mas nagbakod nga nagbakod pa gid sa ila pagkamapainubuson, kag mas naglig-on nga naglig-on pa gid sa pagtuo kay Cristo, tubtob sa pagkapuno sang ila mga kalag sing kalipay kag kaumpawan, huo, bisan tubtob sa pagtinlo kag pagpakabalaan sang ila mga tagipusuon, nga ang amo nga pagpakabalaan nagaabot tungod sang ila pagtugyan sang ila mga tagipusuon sa Dios.

36 Kag natabo ini nga ang ika-singkwenta’y dos nga tuig natapos man sa paghidaet, luwas sa tuman kadako nga bugal nga nagsulod sa mga tagipusuon sang katawhan; kag tungod ini sang ila tuman kadamo nga manggad kag sang ila kauswagan sa duta; kag nagpangibabaw ini sa ila adlaw-adlaw.

37 Kag natabo ini, sa ika-singkwenta’y tres nga tuig sang pagginahum sang mga hukom, napatay si Helaman, kag ang iya kamagulangan nga anak nga si Nefi nagsugod sa paggahum bulos sa iya. Kag natabo ini nga ginkaptan niya ang hukom-lingkuranan nga may hustisya kag katarongan; huo, gintuman niya ang mga kasugoan sang Dios, kag naglakat sa mga dalanon sang iya amay.