Balaan ng mga Kasulatan
Helaman 15


Kapitulo 15

Ginsilotan sang Ginuo ang mga Nefinhon tungod palangga Niya sila—Ang nahaylo nga mga Lamanhon mga mabakod kag malig-on sa pagtuo—Ang Ginuo mangin maluluy-on sa mga Lamanhon sa ulihing mga adlaw. Mga 6 B.C.

1 Kag karon, pinalangga kong mga kauturan, tan-awa, ginapahayag ko sa inyo nga luwas lang kon maghinulsol kamo ang inyo mga balay mabilin sa inyo nga mamingaw.

2 Huo, luwas lang nga maghinulsol kamo, ang inyo mga babayi mangin may dako nga kabangdanan sa pagkalisud sa adlaw nga magpasuso sila; kay magatinguha kamo sa pagpalagyo kag mangin wala sing lugar nga dalangpan; huo, kag kalisud sa ila nga mga nagabusong, kay mangin mabug-at sila kag indi makapalagyo; gani, malapakan sila kag mabayaan agud magkalamatay.

3 Huo, kalisud sa sining katawhan nga ginatawag nga katawhan ni Nefi luwas lang kon maghinulsol sila, sa tion nga makita nila ining tanan nga tanda kag mga katilingalahan nga igapakita sa ila; kay tan-awa, nangin isa sila ka pinili nga katawhan sang Ginuo; huo, ang katawhan ni Nefi ginpalangga niya, kag amo man ginpinahan niya sila; huo, sa mga adlaw sang ila mga kalainan ginpinahan niya sila tungod palangga niya sila.

4 Apang tan-awa, mga kauturan ko, ang mga Lamanhon gindumtan niya tungod ang ila mga binuhatan nangin dalayon nga malain, kag ini tungod sang kalainan sang tradisyon sang ila mga amay. Apang tan-awa, ang kaluwasan nag-abot sa ila paagi sa pagpangwali sang mga Nefinhon; kag sa sini nga tinutuyo ginpalawig sang Ginuo ang ila mga adlaw.

5 Kag luyag ko nga makita ninyo nga ang kalabanan sa ila yara sa banas sang ila tulumanon, kag nagalakat sila sing mainandamon sa atubang sang Dios, kag nagatinguha sila sa pagtuman sang iya mga kasugoan kag sang iya mga pagsulundan kag sang iya mga paghukom suno sa layi ni Moises.

6 Huo, ginasiling ko sa inyo, nga ang kalabanan sa ila nagahimo sini, kag nagatinguha sila sa wala’y kakapoy nga katutum agud nga madala nila ang nabilin sang ila mga kauturan sa ihibalo parte sa kamatuoran; gani may madamo nga nagadugang sa ila kadamuon adlaw-adlaw.

7 Kag tan-awa, nakahibalo kamo sa inyo mga kaugalingon, kay nasaksihan ninyo ini, nga ang tanan sa ila nga madala sa ihibalo parte sa kamatuoran, kag makahibalo sang kalainan kag makangilil-ad nga mga tradisyon sang ila mga amay, kag madala sa pagpati sang balaan nga mga kasulatan, huo, sang mga propesiya sang balaan nga mga propeta, nga nasulat, nga nagadala sa ila sa pagtuo sa Ginuo, kag sa paghinulsol, nga ang amo nga pagtuo kag paghinulsol nagadala sing pagbag-o sang tagipusuon sa ila—

8 Gani, nakahibalo kamo sa inyo mga kaugalingon nga ang tanan nga nakaabot sa sini mga mabakod kag malig-on sa pagtuo, kag sa butang kon sa diin nahimo sila nga hilway.

9 Kag nakahibalo man kamo nga ginpanglubong nila ang ila mga armas sa giyera, kag nagakahadlok sila sa pagkapot sang mga ini kay basi sa ano man nga paagi makasala sila; huo, makita ninyo nga nagakahadlok sila nga makasala—kay tan-awa pagatugotan nila ang ila mga kaugalingon nga tasakon sila kag pamatyon sang ila mga kaaway, kag indi mag-alsa sang ila mga espada batok sa ila, kag ini tungod sang ila pagtuo kay Cristo.

10 Kag karon, tungod sang ila kalig-on sang magpati sila sa sina nga butang nga ila ginapatihan, kay tungod sang ila kabakod sang kis-a napasanagan sila, tan-awa, pakamaayohon sila sang Ginuo kag palawigon ang ila mga adlaw, sa pihak sang ila kalainan—

11 Huo, bisan pa kon magausmod sila sa pagkawala’y pagtuo palawigon sang Ginuo ang ila mga adlaw, tubtob nga magaabot ang tion nga ginhambal sang aton mga amay, kag amo man sang propeta nga si Zenos, kag sang madamo nga iban pa nga mga propeta, parte sa pagpanumbalik liwat sang aton mga kauturan, ang mga Lamanhon, sa ihibalo parte sa kamatuoran—

12 Huo, ginasiling ko sa inyo, nga sa ulihing mga panahon ang mga promisa sang Ginuo gintanyag sa aton mga kauturan, ang mga Lamanhon; kag sa pihak sang madamo nga pag-antos nga ila mabatyagan, kag bisan pa nga panabugon sila diri kag didto sa ibabaw sang duta, kag pangitaon, kag sakiton kag palaptahon sa iban nga lugar, nga wala sing lugar nga dalangpan, ang Ginuo mangin maluluy-on sa ila.

13 Kag ini suno sa propesiya, nga pagadal-on sila liwat sa matuod nga ihibalo, nga amo ang ihibalo parte sa ila Manunubos, kag sa ila dako kag matuod nga manugpahalab, kag maisip sa iya mga carnero.

14 Gani ginasiling ko sa inyo, mangin mas maayo pa para sa ila sangsa para sa inyo luwas lang kon maghinulsol kamo.

15 Kay tan-awa, kon ang gamhanan nga mga buluhaton nga ginpakita sa inyo ginpakita kuntani sa ila, huo, sa ila nga nag-usmod sa pagkawala’y pagtuo tungod sang mga tradisyon sang ila mga amay, makita ninyo sa inyo mga kaugalingon nga wala na gid sila kuntani nag-usmod liwat sa pagkawala’y pagtuo.

16 Gani, siling sang Ginuo: Indi ko sila lubos nga laglagon; kundi nga ipahanabo ko nga sa adlaw sang akon kaalam magabalik sila liwat sa akon, siling sang Ginuo.

17 Kag karon tan-awa, siling sang Ginuo, parte sa katawhan sang mga Nefinhon: Kon indi sila maghinulsol, kag magtinguha sa paghimo sang akon kabubut-on, laglagon ko sila sing lubos, siling sang Ginuo, tungod sang ila kawala’y pagtuo sa pihak sang madamo nga gamhanan nga mga buhat nga akon ginhimo sa ila; kag pareho kapat-od nga buhi ang Ginuo mangin amo ining mga butang, siling sang Ginuo.