1 Na gen, mi, Alma, bikos God i bin tokim mi long kisim Amulek na go het na autim toktok bilong God gen long ol dispela pipol, o ol pipol ol i stap long siti bilong Amonaia, em i kamap we taim mi stat long toktok long ol, ol i stat long tok pait wantaim mi olsem:

2 Yu em husat? Yu ting olsem mipela bai bilip long testimoni bilong wanpela man inap em bai tok olsem dispela graun bai pinis olgeta?

3 Nau ol i no bin save gut long toktok ol i bin autim, long wanem, ol no save olsem dispela graun bai pinis olgeta.

4 Na tu ol i bin tok: Mipela bai no inap bilip long toktok bilong yu sapos yu profesai olsem dispela strongpela siti bai bagarap long wanpela de.

5 Nau ol i no bin save olsem God i ken wokim kain wok bilong kirap nogut, bikos ol i lain bilong kamapim belhat na nek bilong ol.

6 Na ol tok: God em husat long salim wanpela man tasol namel long dispela ol pipol, long autim kain strongpela samting bilong kirap nogut long ol?

7 Na ol i sanap long putim han bilong ol long mi, tasol lukim ol no wokim. Na mi sanap na strong long toktok long ol, ye, mi bin strong long toktok long ol olsem:

8 Lukim, o yupela jeneresen bilong wokim nogut na pasin paul, bilong wanem yupela lus tingting long kastam long tumbuna papa bilong yupela, ye, bilong wanem yupela i bin lus tingting long ol lo bilong God.

9 Yupela i no tingim olsem papa bilong mipela Lihai i bin kisim kam aut long Jerusalem wantaim han bilong God? Yupela i no tingim olsem God i bin lidim olgeta long ples we nogat man i stap?

10 Na yupela i bin lus tingting hariap tru olsem em i bin seivim ol tumbuna papa bilong mipela planti taim long han bilong ol birua bilong ol, na lukautim ol olsem ol bai i no inap kisim bagarap long han bilong lain brata bilong ol?

11 Ye, na sapos em i no yusim strongpela pawa tru bilong em, na marimari bilong em na pasin bilong stap strong bilong em long mipela, inap mipela bin lus stret long pes bilong graun long taim, na husat save inap God i bin putim mipela long laip bilong sore na pen oltaim oltaim.

12 Lukim, nau mi tok long yupela olsem em tokim yupela long tanim bel, na sapos yupela i no tanim bel, yupela i no inap kisim kingdom bilong God. Tasol lukim, em i no dispela tasol—em i bin tokim yupela long tanim bel, nogut em bai bagarapim yupela olgeta long pes bilong graun, ye, em bai visitim yupela long belhat bilong em, na em bai wok yet long givim pen nogut tru long yupela.

13 Lukim, yupela i no tingim ol toktok em i bin autim long Lihai, olsem: Sapos yupela bai bihainim ol lo bilong mi, sindaun bilong yupela bai kamap gutpela long graun? Na gen em i bin tok olsem: Sapos yupela i no bihainim ol lo bilong mi, yupela bai lus long pes bilong Bikpela.

14 Nau mi laikim olsem yupela bai tingim, olsem bikos ol lain bilong Leman i no bihainim ol lo bilong God, ol i bin lus long pes bilong Bikpela. Nau mipela lukim olsem toktok bilong God i bin kamap tru long dispela samting na ol lain bilong Leman ol i bin lus long pes bilong em, taim ol i brukim lo long stat tru long dispela graun.

15 Tasol mi tokim yupela, olsem em bai isi long ol lain long de bilong jasmen na long yupela, sapos yupela i stap yet long sin bilong yupela, ye, na tu em i isi long ol lain long dispela laip na long yupela, sapos yupela i no tanim bel.

16 Long wanem, planti promis ol i bin mekim long ol lain bilong Leman, bikos em i kastam bilong ol tumbuna papa bilong ol, ol bin mekim ol long i stap kanaka, olsem na Bikpela bai marimari long ol long mekim ol i stap longpela taim long graun.

17 Na ol bai kam long bilip long toktok bilong em long sampela taim, na save olsem kastam bilong tumbuna papa bilong ol i rong, na planti long ol bai kisim selvesen, bikos Bikpela bai marimari long olgeta lain em i singautim nem bilong em.

18 Tasol lukim, mi tokim yupela olsem sapos yupela wokim pasin nogut yet, yupela bai no inap i stap longpela taim long graun, long wanem, Bikpela bai salim ol lain bilong Leman long kam long yupela, na sapos yupela i no tanim bel, ol bai kam long taim yupela i no redi, na ol bai bagarapim yupela olgeta, olsem long belhat nogut tru bilong Bikpela.

19 Long wanem, em bai i no inap larim yupela long i stap long pasin nogut bilong yupela long bagarapim ol pipol bilong em. Mi tokim yupela, Nogat, tasol em bai inap long larim ol lain bilong Leman long bagarapim olgeta pipol bilong em ol i save kolim ol pipol bilong Nifai, sapos ol i sin na brukim lo, bihain long Bikpela God bilong ol i bin givim planti lait na bikpela save tru long ol.

20 Ye, bihain long ol i bin kamap nambawan pipol tru bilong Bikpela, ye, bihain long ol i bin kamap nambawan pipol tru long winim olgeta narapela nesen, hauslain, tok ples o ol pipol, bihain long olgeta samting i bin soim long ol, long laik bilong ol, na bilip bilong ol na beten bilong ol, long ol samting i bin kam bipo, i kam nau na bai i kam long bihain taim.

21 Bihain long Spirit bilong God i bin visitim ol, bihain long ol i bin toktok wantaim ol ensel, bihain long maus bilong Bikpela i bin toktok long ol na bihain long ol i bin kisim spirit bilong profesi, na spirit bilong revelesen, na tu planti presen, olsem presen bilong toktok long narapela tok ples, na presen bilong autim toktok bilong God, na presen bilong Holi Spirit, na presen bilong tanim tok,

22 Ye, na bihain long God i bin seivim ol long graun bilong Jerusalem wantaim han bilong Bikpela, bihain long God i bin seivim ol long taim bilong hangre, na long sik, na long olgeta kainkain sik, na bihain long ol i bin kamap strong long pait long taim long bikpela pait, olsem ol i bai no inap kisim bagarap, bihain long ol i bin rausim long kalabus planti taim, na bihain long ol i bin lukautim i stap i go inap long nau, na bihain long God i bin mekim sindaun bilong ol long kamap gutpela i go inap long ol i bin kamap man bilong planti moni samting long olgeta kainkain samting—

23 Na nau lukim, mi tokim yupela, olsem sapos dispela ol pipol ol i bin kisim tumas blesin long han bilong Bikpela, inap long brukim lo long birua long lait na long save ol i bin gat, mi tokim yupela, sapos ol i kamap olsem, inap long ol i pundaun long brukim lo, em bai isi long ol lain bilong Leman, tasol i no long ol lain yet.

24 Long wanem, lukim, Bikpela i givim promis bilong em long ol lain bilong Leman, tasol yupela bai i no inap kisim ol promis sapos yupela brukim lo, long wanem, Bikpela i no bin promis stret na mekim strongpela lo, olsem sapos yupela sakim tok bilong em, yupela bai bagarap olgeta long pes bilong graun?

25 Na nau long dispela as, olsem yupela bai no inap kisim bagarap, Bikpela i bin salim ensel bilong em long visitim planti ol pipol bilong em, long autim long ol olsem ol mas go het na strong long singaut long dispela ol pipol olsem: Yupela mas tanim bel, bikos kingdom long heven i klostu kam;

26 Na i no planti de long nau na Pikinini man bilong God bai kam, na glori bilong em bai wankain olsem glori bilong Wanpela Holi Tasol bilong Papa, pulap long grasia, na long wan bel na tok tru, pulap long pasin bilong i stap strong na marimari long longpela taim, hariap tru long harim beten long ol pipol bilong em na long bekim beten bilong ol.

27 Na lukim, em bai kam long kisim bek ol lain husat bai ol i baptais long tanim bel na bilip long nem bilong em.

28 Olsem na, yupela redim rot bilong Bikpela, bikos taim i kam klostu we olgeta man bai kisim pe long wok bilong ol, long wok ol i bin wokim—sapos ol i bin wokim stretpela pasin, ol bai kisim selvesen long sol bilong ol, olsem long pawa na selvesen bilong Jisas Krais, na sapos ol i bin wokim pasin nogut, ol bai kisim bagarap long sol bilong ol, olsem long pawa na kalabus bilong tewel.

29 Nau lukim, maus bilong ensel i bin tok olsem, long singaut long ol pipol.

30 Na nau, ol brata bilong mi em ol mi lavim tumas, long wanem, yupela i ol brata bilong mi, na ol pipol i mas lavim yupela, na yupela mas wokim gutpela pasin long soim ol olsem yupela i bin tanim bel, bikos yupela i bin kamapim belhat bilong yupela nogut tru long toktok bilong God, na bikos yupela i bin kamap ol pipol bilong paul na pundaun.

31 Nau em i kamap we bihain long mi, Alma, pinisim ol dispela toktok, lukim, ol pipol i bin belhat long mi bikos mi bin tokim ol olsem ol i wanpela pipol ol i bin kamapim belhat, na nek bilong ol i strong.

32 Na tu bikos mi bin tokim ol olsem ol i bin paul na pundaun, ol i belhat long mi na traim long kisim mi olsem ol bai tromoim mi go insait long kalabus.

33 Tasol em i kamap we Bikpela i no larim ol long kisim mi long dispela taim na tromoi i go long kalabus.

34 Na em i kamap we Amulek tu i bin go na sanap, na i stat long autim toktok bilong God long ol. Na nau, mi no raitim olgeta toktok bilong Amulek, tasol mi bin raitim sampela toktok bilong em long dispela buk.