Ol Skripsa
Alma 12


Sapta 12

Alma i tok pait wantaim Sisrom—God ken soim ol tokhait bilong em long ol stretpela lain tasol—God bai jasim ol manmeri long ol tingting, bilip, toktok na wok bilong ol—Ol lain nogut bai idai long spirit—Dispela laip long skin i taim bilong traim—Plen bilong kisim bek i kamapim kirap gen, na rausim sin olsem long bilip—Ol lain husat i tanim bel i gat rait long marimari insait long Wanpela Pikinini man Tasol. Klostu 82 krismas bipo Krais.

1 Nau Alma, taim em i lukim olsem ol toktok bilong Amulek i bin pasim maus bilong Sisrom, long wanem, em i bin lukim olsem Amulek i bin kisim em long giaman na paul plen bilong em long bagarapim em, na taim Alma lukim olsem Sisrom i stat long guria bikos em i bin save gut long rong bilong em yet, em i opim maus bilong em na i stat long toktok long em, na long strongim ol toktok bilong Amulek, na long tok klia moa yet long ol samting o long tok klia long ol skripsa Amulek i no inap tok klia.

2 Nau ol pipol ol i bin i stap raun nabaut na bin harim ol toktok Alma i bin autim long Sisrom, long wanem, planti ol pipol i bin stap taim em i bin autim tok olsem:

3 Nau Sisrom, i luk olsem Amulek i bin kisim yu long giaman na paul plen bilong yu, long wanem, yu no i bin giaman long ol man tasol, yu bin giaman long God tu, bikos lukim, em i save olgeta tingting bilong yu, na yu lukim olsem Spirit bilong em i bin soim ol tingting bilong yu long mipela long save.

4 Na yu lukim olsem mipela save olsem plen bilong yu i wanpela smatpela plen, olsem long smatpela pasin bilong tewel, olsem long giamanim na paulim dispela pipol olsem yu bai mekim ol birua long mipela long sutim tok long mipela na long tromoim mipela go ausait—

5 Nau dispela i plen long birua bilong yu, na em i yusim pawa bilong em insait long yu. Nau mi laikim olsem yu bai tingim olsem, wanem mi bai toktok long yu mi bai toktok long olgeta.

6 Na lukim, mi tokim yupela olgeta olsem dispela i wanpela umben bilong birua, na em i bin yusim long kisim dispela ol pipol, olsem em bai bringim yupela kam aninit long pawa bilong em, olsem em bai raunim yupela wantaim ol sen bilong em, olsem em bai senim yupela i go daun long bagarap oltaim oltaim, long pawa long kalabus bilong em.

7 Nau taim Alma autim ol dispela toktok, Sisrom i stat long guria nogut tru, long wanem, em i bin bilip tru long pawa bilong God, na tu em i bin bilip olsem Alma wantaim Amulek ol i bin save gut long em, bikos em bilip olsem ol i bin save long tingting na plen long bel bilong em, long wanem, God i bin givim ol pawa olsem ol bai save long ol dispela samting wantaim spirit bilong profesi.

8 Na Sisrom i stat long askim ol gut tru, olsem em bai save moa long kingdom bilong God. Na em i askim Alma: Amulek i min wanem taim em i toktok long kirap gen bilong idai manmeri, olsem olgeta bai kirap long idai, stretpela lain wantaim lain nogut, na bai bringim kam long sanap long pes bilong God long jasim long wok bilong ol?

9 Na nau Alma i stat long tok klia long ol dispela samting long em, olsem: God i bin soim planti lain long save ol tokhait bilong em, tasol em i bin givim ol strongpela lo olsem ol bai no inap autim ol tokhait bilong God i bin givim long ol lain pikinini bilong ol man, tasol em bai autim long ol olsem long bilip bilong ol long em.

10 Olsem na, man em bai kamapim belhat bilong em, dispela man bai kisim liklik tasol long toktok bilong em, na man em bai i no inap kamapim belhat bilong em, God bai givim moa toktok bilong em long em, inap long em bai save ol tokhait bilong em i go inap long em bai save olgeta.

11 Na em bai givim liklik toktok tasol bilong em long ol lain ol i kamapim belhat bilong ol i go inap long ol i no moa save long tokhait bilong em, na bihain long dispela tewel i kalabusim ol, na lidim ol long laik bilong em i go long bagarapim ol. Nau tok klia long ol sen bilong hel i dispela.

12 Na Amulek i bin toktok klia tru long idai, na long kirap gen long dispela laip long skin, na long kisim skin i no inap idai, na sanap long pes long jasmen ples bilong God long jasim long wok bilong ol.

13 Na sapos mipela i bin kamapim belhat bilong mipela, ye, sapos mipela i bin kamapim belhat bilong mipela long toktok bilong em, inap long toktok bilong em i no i stap wantaim mipela, mipela bai kamap nogut tru, long wanem, mipela bai kisim bagarap.

14 Long wanem, ol toktok bilong mipela bai kotim mipela, ye, olgeta wok bilong mipela bai kotim mipela, mipela bai no inap kamap klinpela, na tu ol tingting bilong mipela bai kotim mipela, na mipela bai no inap lukluk antap long God taim mipela i stap long dispela laip nogut tru, na yumi bai amamas sapos yumi ken tokim ol ston na maunten long pundaun long mipela long haitim mipela long ai bilong em.

15 Tasol dispela bai i no inap kamap, mipela mas kamaut na sanap long pes bilong em long glori bilong em, na long pawa, olgeta strong, mejesti wantaim rul bilong em, na tok orait wantaim sem oltaim oltaim bilong mipela olsem olgeta jasmen bilong em i stretpela, olsem olgeta wok bilong em i stret, na olsem em i save marimari long ol lain pikinini bilong ol man, na olsem em i gat olgeta pawa long seivim wanwan man ol i bilip long nem bilong em na wokim wok bilong tanim bel.

16 Na nau lukim, mi tokim yu, idai bai kamap bihain long dispela, tru tumas wanpela namba i dia tumas, na dispela i idai bilong spirit, na long dispela taim man husat idai long sin bilong em, olsem long idai long skin bai idai long spirit tu, ye, em bai idai olsem long kamapim tru ol samting bilong stretpela pasin.

17 Na taim bai kam we pen bilong ol bai kamap wankain olsem raun wara bilong paia na salfa, paia lait bilong em bai go antap oltaim oltaim na oltaim, na bihain Satan bai senim ol i go daun long bagarap oltaim oltaim olsem long pawa long kalabus bilong em, bihain long em i winim ol long laik bilong em.

18 Na, mi tokim yu, ol bai i stap olsem kisim bek i no bin kamap, long wanem, ol bai i no inap kisim bek bikos long stretpela pasin bilong God, na tu ol bai i no inap idai, bikos idai bai no moa i stap.

19 Nau em i kamap we taim Alma i pinisim ol dispela toktok bilong em, ol pipol i stat long kirap nogut moa yet,

20 Tasol wanpela man nem bilong em Antiona, em i het bos namel long ol, bin sanap na askim em: Wanem i tok klia long toktok bilong yu olsem man bai kirap long idai na senisim dispela skin long idai long skin i no inap idai, we sol bai no inap idai?

21 Na wanem i tok klia long skripsa, we em i tok God i bin putim ol serub wantaim paia lait naip bilong pait long hap bilong is long gaden long Iden, nogut namba wan papa na mama bilong mipela bai go insait na kaikaim prut long diwai bilong laip, na i stap oltaim oltaim? Olsem na yumi save olsem ol nogat wanpela sans olsem ol bai i stap oltaim oltaim.

22 Nau Alma i bekim em: Mi laik tok klia long dispela samting na yu askim. Nau yumi lukim olsem Adam i bin pundaun taim em i kaikai prut i bin tambuim, olsem God i bin toktok, olsem na yumi lukim, olsem olgeta manmeri i bin kamap wanpela pipol bilong paul na pundaun bikos long pundaun bilong em.

23 Na nau lukim, mi tokim yu olsem sapos Adam i kaikaim prut long diwai bilong laip long dispela taim, idai bai nogat, na toktok bilong God bai kamap nating, long mekim God i kamap wanpela giaman man, long wanem, em i bin tok: Sapos yu kaikai, tru tumas yu bai idai.

24 Na yumi lukim olsem manmeri ol i save idai, ye, idai Amulek i bin toktok, na dispela i idai long skin, tasol God i bin givim taim long man long tanim bel, olsem na dispela laip i kamap taim bilong traim, i taim long redi long bungim God, wanpela taim long redi long dispela laip oltaim oltaim mipela i bin tok, na dispela laip bai kam bihain long kirap gen bilong idai.

25 Nau, sapos plen long kisim bek i bin putim long taim dispela graun i bin sanapim i no stap, kirap gen bai nogat, tasol God i bin putim plen bilong kisim bek, na dispela bai kamapim kirap gen bilong idai ol manmeri, long em mipela i bin toktok.

26 Na nau lukim, sapos namba wan papa na mama bilong mipela ol i bin go het na kaikaim prut long diwai bilong laip, ol bai i stap long laip nogut tru oltaim oltaim, na ol bai nogat taim long redi, olsem na plen bilong kisim bek bai bagarap, na toktok bilong God bai kamap nating, bikos em i nogat pawa.

27 Tasol lukim, em i no kamap olsem, tasol God i bin makim olsem ol man mas idai, na bai kam long jasmen bihain long idai, tru tumas dispela wankain jasmen mipela i bin toktok i nogat arere.

28 Na bihain God i bin makim olsem ol dispela samting mas kam long man, lukim, em i bin lukim olsem em i gutpela olsem na man mas save long ol dispela samting em i bin makim long ol.

29 Olsem na em i bin salim ol ensel long toktok wantaim ol, em i bin mekim ol man long lukim glori bilong em.

30 Na ol i stat long dispela taim i go het long singautim long nem bilong em, olsem na God i bin toktok wantaim ol man, na soim long ol long plen bilong kisim bek i bin redim long taim dispela graun i bin sanapim, na em i bin soim dispela long ol olsem long bilip bilong ol na tanim bel na holi pasin bilong ol.

31 Olsem na, em i bin givim ol lo long ol man, bikos ol i bin brukim namba wan lo long namba wan taim long ol samting long skin na kamap olsem god long save gutpela na nogut, na putim ol yet long ples we ol i ken makim o bin putim long ples we ol i ken makim long laik bilong ol, sapos nogut o gutpela—

32 Olsem na God i bin givim ol lo, bihain long em i bin soim plen bilong kisim bek long ol, olsem ol bai no inap wokim pasin nogut, na namba i dia tumas i mekim save long pasin nogut, na dispela i idai oltaim oltaim olsem long ol samting long stretpela pasin, bikos plen bilong kisim bek bai nogat pawa long kain man, long wanem, ol wok bilong stretpela pasin bai no inap bagarap, olsem long nambawan gutpela pasin tru bilong God.

33 Tasol God i bin singautim ol man, long nem bilong Pikinini man bilong em, (bikos dispela i plen bilong kisim bek em i bin putim) olsem: Mi bai marimari long yupela insait long Wanpela Pikinini Man Tasol bilong mi, sapos yupela tanim bel na i no kamapim belhat bilong yupela,

34 Olsem na, husat man tanim bel na i no kamapim belhat bilong em bai gat rait long marimari insait long Wanpela Pikinini Man Tasol bilong mi, long rausim sin bilong em, na ol dispela lain bai go insait long malolo bilong mi.

35 Na husat man bai kamapim belhat bilong em na bai wokim pasin nogut, lukim, mi tok antap-tru long belhat bilong mi olsem em bai i no inap go insait long malolo bilong mi.

36 Na nau, ol brata bilong mi, lukim, mi tokim yupela, olsem sapos yupela kamapim belhat bilong yupela, yupela bai no inap go insait long malolo bilong Bikpela, olsem na, pasin nogut bilong yu bai asua long em long salim belhat bilong em kam daun long yupela wankain olsem long asua i bin kamap long namba wan taim, ye, olsem long toktok bilong em i bin kamap tru olsem long asua long laspela taim na long namba wan taim, long bagarapim oltaim oltaim sol bilong ol, long olsem na, pasin nogut bilong yupela bai asua long bringim namba wan idai na namba tu idai.

37 Na nau, ol brata bilong mi, i luk olsem mipela i save long ol dispela samting, na ol dispela samting i tru, yumi mas tanim bel, na yumi no ken kamapim belhat bilong mipela, inap long mipela asua long Bikpela God bilong mipela long bringim belhat bilong em long mipela long dispela namba tu lo bilong em i bin givim long mipela, tasol yumi mas go insait long malolo bilong God i bin redim olsem long toktok bilong em.