1 O inap mi kamap olsem ensel, na inap kisim laik long bel bilong mi, olsem mi bai go het na autim tok wantaim biugel olsem God, na autim tok wantaim wanpela maus long mekim graun guria, na singaut long tanim bel long olgeta pipol.

2 Ye, inap mi bai autim long wanwan sol, olsem long maus bilong klaut i pairap, autim tanim bel na plen bilong kisim bek, olsem ol bai tanim bel na kam long God, olsem i no gat moa sore bai kamap long olgeta pes bilong graun.

3 Tasol lukim, mi em man, na sin long laik bilong mi, long wanem, mi mas amamas wantaim ol samting bikpela i bin givim mi.

4 Mi no inap senisim long laik bilong mi strongpela lo bilong stretpela God, long wanem, mi save olsem em i save givim long ol man olsem long laik bilong ol, sapos long idai o long laip, ye, mi save olsem em i save givim long ol man, ye, em i save givim long ol lo na dispela ol lo i no inap senisim olsem long laik bilong ol, sapos long kisim selvesen o long kisim bagarap.

5 Ye, na mi save olsem gutpela na nogut i bin kamap long olgeta man, man em i no save gutpela na nogut i nogat hevi, tasol man em i save gutpela na nogut, em i laik bilong em long makim, sapos gutpela o nogut, laip o idai, amamas o sem long tingting.

6 Nau, bikos mi save long ol dispela samting, bilong wanem mi bai laikim moa long wok mi bin makim long wokim?

7 Bilong wanem mi bai laikim long kamap olsem ensel, olsem mi bai toktok long olgeta hap long graun?

8 Long wanem, lukim, Bikpela i save givim long olgeta nesen, sampela pipol long nesen bilong ol yet na tok ples, long lanim toktok bilong em, ye, wantaim bikpela save olgeta samting em i lukim i inap long ol ken kisim, olsem na yumi lukim olsem Bikpela i save kaunsel wantaim bikpela save long dispela samting we i stretpela na trupela.

9 Mi save wanem samting Bikpela i bin tokim mi, na mi glori long dispela. Mi no glori long mi yet, tasol mi glori long dispela samting God i bin tokim mi, ye, na dispela i glori bilong mi, olsem mi bai kamap wanpela wokman long han bilong God long bringim sampela sol long tanim bel, na dispela i amamas bilong mi.

10 Na lukim, sol bilong mi i pulap wantaim amamas taim mi lukim planti lain brata bilong mi tanim bel trutru, na kam long Bikpela God bilong ol, na mi save tingim wanem Bikpela i bin wokim long mi, ye, tru tumas olsem em i bin harim beten bilong mi, ye, na mi save tingim marimari han bilong em, em i bin givim i go long mi.

11 Ye, na tu mi tingim kalabus bilong ol lain papa bilong mi, long wanem, tru tumas mi save olsem bikpela i bin rausim ol long kalabus, na kirapim sios bilong em taim em i rausim ol long kalabus, ye, God Bikpela, God bilong Abraham, God bilong Aisek na God bilong Jekop, em i bin rausim ol long kalabus.

12 Ye, mi save tingim kalabus bilong ol tumbuna papa bilong mi, na long dispela God yet em i bin rausim ol long han long ol lain bilong Isip, em i bin rausim ol long kalabus.

13 Ye, na dispela God yet i bin kirapim sios bilong em namel long ol, ye, dispela God yet i bin singautim mi long wokim holi wok, long autim toktok bilong em long dispela ol pipol, na em i bin givim mi pawa long kamapim gutpela wok, na amamas bilong mi i pulap bikos long dispela.

14 Tasol mi no amamas long dispela gutpela wok bilong mi tasol, tasol amamas bilong mi i kamap moa yet bikos long gutpela wok long ol brata bilong mi, husat i bin go antap long graun bilong Nifai.

15 Lukim, ol i bin wok hat nogut tru, na ol i bin karim planti prut, na bikpela pe tru bai bilong ol!

16 Nau, taim mi tingim gutpela wok long ol dispela brata bilong mi, sol bilong mi i kamap kamap tru tumas wankain olsem em i bruk i go aut long bodi, bikos long traipela amamas tru bilong mi.

17 Na nau inap God i givim long ol dispela brata bilong mi, olsem ol bai sindaun long kingdom bilong God, ye, wantaim olgeta lain em ol i bin winim wok bilong ol, olsem ol bai i no moa go aut, tasol olsem ol bai amamasim em oltaim. Na inap God bai wokim olsem long ol toktok bilong mi, tru tumas olsem mi bin toktok. Amen.