Ol Skripsa
Alma 44


Sapta 44

Moronai i tokim ol lain bilong Leman long wokim wanpela promis bilong bel isi o bai bagarap olgeta—Jerahemna i les long wokim promis bilong bel isi na pait i stat gen—Ol ami bilong Moronai i winim ol lain bilong Leman. Klostu 74–73 krismas bipo Krais.

1 Na em i kamap we ol i no moa kapsaitim blut na surik i go bek na lusim ol. Na Moronai i bin tokim Jerahemna: Lukim, Jerahemna, olsem mipela i no laik kamap ol man bilong kapsaitim blut. Yupela save olsem laip bilong yupela i stap long han bilong mipela, tasol mipela i no laik kilim yupela.

2 Lukim, mipela i no kamaut long pait wantaim yupela olsem mipela bai kapsaitim blut bilong yupela long kisim pawa, o mipela i no laikim long bringim wanpela man kam insait long hevi bilong kalabus. Tasol dispela i laik bilong yupela olsem na yupela i bin kam long pait wantaim mipela, ye, na yupela i belhat long mipela bikos long lotu bilong mipela.

3 Tasol nau, yupela i lukim olsem Bikpela i stap wantaim mipela, na yupela i lukim olsem em i bin givim yupela long han bilong mipela. Na nau mi laikim yupela long save olsem dispela i bin kamap long mipela bikos long lotu bilong mipela na long bilip bilong mipela long Krais. Na nau yupela i lukim olsem yupela i no inap bagarapim dispela bilip bilong mipela.

4 Nau yupela i lukim olsem dispela i trupela bilip bilong God, ye, yupela i lukim olsem God ken sapotim, na kipim, na lukautim mipela, sapos mipela i bilip long em, na strong long bilip na lotu bilong mipela, na Bikpela bai i no inap larim mipela long kisim bagarap, tasol sapos mipela bai pundaun long brukim lo na tok nogat long bilip bilong mipela.

5 Na nau, Jerahemna, mi tokim yu, long nem bilong dispela God i gat olgeta pawa, husat i bin strongim ol han bilong mipela long winim yupela bikos long bilip bilong mipela, lotu bilong mipela, ol kastam long lotu bilong mipela, sios bilong mipela, holi sapot mipela i dinau long ol meri na lain pikinini bilong mipela, fridom we emi pasim mipela long graun na kantri bilong mipela, ye, na tu bikos long holi toktok bilong God mipela save bihainim, we dispela i save givim olgeta amamas long mipela, na bikos long olgeta samting i stap insait tru long bel bilong mipela—

6 Ye, na i no dispela tasol, mi tokim yupela long olgeta laik yupela gat long laip, olsem yupela givim ol samting bilong pait bilong yupela long mipela, na mipela bai i no inap kapsaitim blut bilong yupela, tasol mipela bai larim yupela long i stap laip, sapos yupela bai go awe na no moa kam gen long pait wantaim mipela.

7 Na nau, sapos yupela i no wokim dispela, lukim, yupela i stap long han bilong mipela, na mi bai givim oda long ol man bilong mi long paitim yupela, na givim ol sua long bodi bilong yupela long idai, inap long yupela bai idai olgeta, na bihain long dispela mipela bai lukim husat bai gat pawa long bosim dispela ol pipol, ye, mipela bai lukim husat bai kamap kalabus lain.

8 Na nau, em i kamap we taim Jerahemna i harim ol dispela toktok em i bin go het na givim naip bilong pait, na huknaip wantaim banara bilong em long han bilong Moronai, na tokim em: Lukim, mipela i givim ol samting bilong pait bilong mipela long yu, tasol mipela bai no inap wokim promis long yu, bikos mipela i save olsem mipela wantaim ol lain pikinini bilong mipela bai brukim dispela promis, tasol kisim ol samting bilong pait bilong mipela, na larim mipela long go long ples we nogat man i stap, sapos nogat, mipela bai kisim bek ol naip bilong pait bilong mipela, na mipela bai idai o win.

9 Lukim, mipela i no wan lotu bilong yu, mipela i no bilip olsem God i bin givim mipela long han bilong yupela, tasol mipela i bilip olsem em i smatpela pasin bilong yu bin seivim yupela long ol naip bilong pait bilong mipela. Lukim, em i ol brosplet wantaim banis bilong pait bilong yupela i bin seivim yupela.

10 Na nau taim Jerahemna i pinisim toktok bilong em, Moronai i bin givim bek naip bilong pait wantaim ol samting bilong pait long Jerahemna na tok: Lukim, mipela bai pait i go long arere na lukim husat bai win.

11 Nau mi no inap kisim bek ol toktok mi bin autim, olsem na bikos Bikpela i stap, yupela bai no inap go nating tasol yupela mas wokim promis olsem yupela bai no inap kam gen long pait wantaim mipela pastaim long yupela go. Nau bikos yupela i stap long han bilong mipela, mipela bai kapsaitim blut bilong yupela long graun, sapos yupela i no wan bel long toktok mi bin tok.

12 Na nau taim Moronai i autim ol dispela toktok, Jerahemna i kisim bek naip bilong pait bilong em, na em i bin belhat long Moronai, na em i go het hariap tru olsem em bai kilim Moronai, tasol taim em i apim naip bilong pait bilong em, lukim wanpela soldia bilong Moronai i bin paitim naip bilong pait bilong em i go daun long graun, na brukim han bilong em, na tu em i katim Jerahemna na rausim skin long het na gras bilong em na dispela skin i bin pundaun long graun. Na Jerahemna i surik i go bek long pes bilong ol i go insait long namel long ol soldia bilong em.

13 Na em i kamap we ol soldia ol i bin sanap klostu, ol i bin katim na rausim skin wantaim gras long het bilong Jerahemna, ol i bin kisim dispela skin long het long gras long graun, na putim long sap long naip bilong pait bilong em, na taitim naip bilong pait wantaim skin long het i go aut long ol, na bikmaus long tok long ol olsem:

14 Tru tumas, yupela bai pundaun long graun wankain olsem dispela skin long het long hetman bilong yupela i bin pundaun long graun, sapos yupela i no givim ol samting bilong pait bilong yupela na go wantaim wanpela promis bilong bel isi.

15 Nau planti lain bilong Leman ol i bin poret nogut tru taim ol i harim ol dispela toktok na lukim skin long het long naip bilong pait, na ol i bin go het na tromoi ol samting bilong pait bilong ol long lek bilong Moronai, na wokim promis bilong bel isi. Na planti ol lain ol i wokim promis ol i bin larim ol long go long ples we nogat man i stap.

16 Nau em i kamap we Jerahemna i bin belhat nogut tru, na em i tanim bel bilong sampela soldia bilong em husat i stap long belhat, long strong moa yet long pait wantaim ol lain bilong Nifai.

17 Na nau Moronai i bin belhat, bikos long ston het pasin long ol lain bilong Leman, olsem na em i bin givim oda long ol ami bilong em long paitim na kilim ol. Na em i kamap we ol i stat long kilim ol, ye, na ol lain bilong Leman i pait wantaim naip bilong pait bilong ol na olgeta strong bilong ol.

18 Tasol lukim, ol as nating skin bilong ol wantaim het nating bilong ol i bin kamap ples klia long sap long naip bilong pait long ol lain bilong Nifai, ye, lukim, ol i bin sutim na paitim, ye, na planti tru ol i bin pundaun kwiktaim wantaim naip bilong pait long ol lain bilong Nifai, na ol i stat long idai hariap tru, olsem soldia bilong Moronai i bin profesai.

19 Nau Jerahemna, taim em i lukim olsem olgeta long ol i klostu kisim bagarap, em i bin krai nogut tru long Moronai, na promis olsem em wantaim ol pipol bilong em ol bai i stap wantaim em, bai wokim promis, sapos ol lain bilong Nifai bai larim em i stap laip ol lain bilong Leman ol ken i stap wantaim em, na olsem ol bai i no inap moa kam long pait wantaim ol.

20 Na em i kamap we Moronai i bin givim oda long wok bilong idai long pinis gen namel long ol pipol. Na em i bin kisim ol samting bilong pait long ol lain bilong Leman, na larim ol i go long ples we nogat man i stap bihain long ol i bin wokim promis bilong bel isi wantaim em.

21 Nau namba long idai long ol lain bilong Leman i no bin kaunim bikos ol i no inap kaunim, ye, na tu namba long idai long ol lain bilong Nifai wantaim ol lain bilong Leman i moa yet.

22 Na em i kamap we ol lain bilong Nifai wantaim ol lain bilong Leman ol i bin tromoi idai bilong ol i go insait long wara Saidon, na wara i bin karim ol i go na planim aninit long solwara.

23 Na ol ami long ol lain bilong Nifai, o ol ami bilong Moronai, bin go bek long haus bilong ol na graun bilong ol.

24 Na wanpela ten eit krismas long rul bilong ol jas long ol pipol bilong Nifai i pinis olsem. Na rekot bilong Alma, bin raitim long ol plet bilong Nifai i pinis olsem.