1 Nau, taim Amon wok yet long lainim ol pipol bilong Lamonai olsem, mipela bai go bek long stori bilong Eron wantaim ol brata bilong em, long wanem, bihain long em i lusim graun bilong Midonai, spirit i bin lidim em go long graun bilong Nifai, tru tumas long haus bilong king em i bin bosim olgeta graun tasol i no graun bilong Ismael, em i papa bilong Lamonai.

2 Na em i kamap we Eron i bin go long em long haus bilong king wantaim ol brata bilong em, na baut daun em yet long pes bilong king, na tokim em: Lukim, O king, mipela em ol brata bilong Amon, em yu bin rausim long kalabus.

3 Na nau, O king, sapos yu larim mipela long i stap laip, mipela bai kamap wokman bilong yu. Na king i bin tokim ol: Kirap, long wanem, mi bai i no inap kilim yupela, na mi bai i no inap larim yupela long kamap wokman bilong mi, tasol mi bai strong yet olsem yupela bai toktok long mi, bikos mi bin trabel liklik long het bilong mi bikos long gutpela pasin na nambawan toktok tru bilong brata bilong yu Amon, na mi laik save bilong wanem as na em i no kamap wantaim yupela long graun bilong Midonai.

4 Na Eron i bin bekim king: Lukim, Spirit bilong Bikpela i bin singautim em long go long narapela rot, em i bin go long graun bilong Ismael long lainim ol pipol bilong Lamonai.

5 Nau king i askim ol: Wanem i tok klia bilong dispela samting yu tok i Spirit bilong Bikpela? Lukim, em dispela samting i paulim mi.

6 Na tu, wanem i tok klia bilong dispela samting Amon i bin tok—Sapos yu tanim bel, yu bai kisim selvesen, na sapos yu no tanim bel yu bai tromoi go ausait long las de?

7 Na Eron i bin bekim na tokim em: Yu bilip olsem God i stap? Na king tok: Mi save olsem ol lain bilong Amalikaia tok olsem God i stap, na mi bin tokim ol long wokim haus lotu, olsem ol bai bungim ol yet long lotu long em. Na nau sapos yu tok olsem God i stap, lukim mi bai bilip.

8 Na nau taim Eron harim dispela, bel bilong em i stat long amamas, na em tok: Lukim, tru tumas, olsem yu i stap, O king, God i stap.

9 Na king i askim: God em dispela Bikpela Spirit Tru em i bin bringim ol tumbuna papa bilong mipela long graun bilong Jerusalem?

10 Na Eron i bekim em: Ye, em dispela Bikpela Spirit Tru, na em i bin krietim olgeta samting long heven na long graun. Yu bilip long dispela?

11 Na em i bekim: Ye, mi bilip olsem Bikpela Spirit Tru i bin wokim olgeta samting, na mi laikim olsem yu mas autim long mi long olgeta long dispela samting, na mi bai bilip long ol toktok bilong yu.

12 Na em i kamap we taim Eron i lukim olsem king bai bilip long ol toktok bilong em, em i stat long kriesen bilong Adam, long ritim ol skripsa long king—olsem God i bin wokim man wankain olsem em yet, na olsem God i bin givim long man ol lo, na olsem bikos long pasin brukim lo, man i bin pundaun.

13 Na Eron i bin tok klia long em long ol skripsa long taim long kriesen bilong Adam, soim long em pundaun bilong man, na long laip bilong ol long graun, na tu long plen bilong kisim bek, bin redim long taim graun i bin sanapim, insait long Krais, long olgeta lain manmeri husat bai bilip long nem bilong em.

14 Na bikos man i bin pundaun, em i no inap wokim wanpela samting em yet, tasol ol pen na idai bilong Krais i wokim atonmen long sin bilong ol, sapos ol bilip na tanim bel, na wokim kain samting olsem, inap long em bai brukim ol rop bilong idai, olsem matmat bai no inap win, na olsem hop long glori bai winim pen long idai, na Eron i bin tok klia long olgeta long dispela samting long king.

15 Na em i kamap we bihain long Eron tok klia long ol dispela samting long em, king i bin askim: Mi bai wokim wanem inap long mi bai kisim dispela laip oltaim oltaim yu bin toktok? Ye, mi bai wokim wanem inap long mi bai kamap niupela long God, na rausim dispela nogut spirit long bros bilong mi, na kisim spirit bilong em, olsem mi bai kisim amamas, olsem mi bai no inap tromoi go ausait long las de? Lukim, em i bin tok, mi bai lusim olgeta samting mi gat, ye, mi bai lusim kingdom bilong mi, inap long mi bai kisim dispela bikpela amamas tru.

16 Tasol Eron i bekim em: Sapos yu laikim dispela samting, sapos yu bai baut daun long ai bilong God, ye, sapos yu bai tanim bel long olgeta sin bilong yu, na bai baut daun long ai bilong God, na singaut long nem bilong em wantaim bilip olsem yu bai kisim, yu ken kisim dispela hop yu laikim bihain long yu wokim ol dispela samting.

17 Na em i kamap we taim Eron i autim ol dispela toktok, king i bin brukim sukuru long baut daun long ai bilong God, ye, inap long em i bin pundaun na silip wantaim tupela han i go aut long graun, na krai nogut tru olsem:

18 O God, Eron i bin tokim mi olsem wanpela God i stap, na sapos dispela God i stap, na sapos yu em dispela God, inap yu soim yu yet long mi, na mi bai rausim olgeta sin bilong mi long save long yu, na olsem mi bai kirap gen long idai, na kisim selvesen long las de. Na nau taim king autim ol dispela toktok, em i bin pundaun olsem em idai.

19 Na em i kamap we ol wokman bilong em i bin ron i go na tokim kwin long olgeta samting i bin kamap long king. Na em i bin kam long king, na taim em i lukim king silip olsem em i idai, na tu Eron wantaim ol brata bilong em i bin sanap i stap olsem em i ol lain bin mekim em idai, em i bin kros wantaim ol, na tokim olsem ol wokman bilong em, o ol wokman bilong king, bai kisim ol na kilim ol.

20 Nau ol wokman i bin lukim as long pundaun bilong king, olsem na ol i les long putim han bilong ol long Eron na ol brata bilong em, na ol i bin tokim kwin olsem: Bilong wanem yu tok olsem mipela bai kilim ol dispela man, bikos lukim, wanpela bilong ol i strongpela tumas long mipela olgeta? Olsem na mipela bai pundaun long pes bilong ol.

21 Nau taim kwin lukim ol wokman i poret, em tu i stat long poret nogut tru, nogut nogut samting bai kamap long em. Na em i tokim ol wokman olsem ol bai go na singautim ol pipol, olsem ol bai kilim Eron wantaim ol brata bilong em.

22 Nau taim Eron lukim strong bilong kwin long kilim ol, na tu em i bin save long belhat bilong ol pipol, em i bin poret nogut planti pipol bai bungim wantaim ol yet, na olsem bikpela tok pait na trabel bai kamap namel long ol yet, olsem na em i bin putim han bilong em long king na apim king long graun, na tokim em: Sanap. Na king i bin sanap long tupela lek bilong em na kisim strong.

23 Nau dispela i bin kamap long ai bilong kwin wantaim planti wokman bilong em. Na taim ol i lukim ol i kirap nogut tru, na i stat long poret. Na king i bin sanap, na i stat long autim toktok bilong God long ol. Na em i bin autim toktok bilong God long ol, inap long olgeta famili bilong em i bin tanim bel long Bikpela.

24 Nau planti pipol i bin bung wantaim bikos long toktok bilong kwin, na ol tok baksait i stat long kamap namel long ol bikos long Eron na ol brata bilong em.

25 Tasol king i bin sanap namel long ol na toktok long ol. Na bel kol i bin kamap long ol long Eron wantaim ol lain ol i stap wantaim em.

26 Na em i kamap we taim king lukim olsem bel kol i bin kamap long ol pipol, em i tokim olsem Eron na ol brata bilong em bai sanap namel tru long pipol, na autim toktok bilong God long ol.

27 Na em i kamap we king i bin salim tok save i go long olgeta hap long graun, namel long olgeta pipol ol i stap long olgeta graun bilong em, ol i stap long olgeta hap raunabaut, long arere long graun i go long solwara, long hap long is na long hap long wes, na ol i bin bruk long graun bilong Jarahemla wantaim liklik hap long ples we nogat man i stap, ol i bin i stap long hap long is long solwara na tru tumas long hap long wes long solwara, na raunabaut long ol arere long nambis na long ol arere long ples we nogat man i stap, ol i stap long hap long not long graun bilong Jarahemla, long ol arere long Mentai, long het wara bilong wara Saidon, i go long hap long is na long hap long wes—na ol lain bilong Leman na ol lain bilong Nifai ol i bin bruk olsem.

28 Nau, bikpela namba long les lain long ol lain bilong Leman ol i bin i stap long ples we nogat man i stap, na ol i bin i stap long haus sel, na ol i bin i stap long olgeta hap long wes long ples we nogat man i stap, insait long graun bilong Nifai, ye, na tu long hap long wes long graun bilong Jarahemla, insait long ol arere long nambis, na long hap long wes long graun bilong Nifai, long ples tumbuna papa bilong ol i bin kisim long nambawan taim, na long arere long nambis olsem.

29 Na tu planti lain bilong Leman ol i bin i stap long hap long is long nambis, we ol lain bilong Nifai ol i bin ronim ol i go. Olsem na ol lain bilong Leman ol i klostu raunim ol lain bilong Nifai, tasol ol lain bilong Nifai ol i bin kisim olgeta graun long hap long not long arere long ples we nogat man i stap, long het wara long wara Saidon, long hap long is i go long hap long wes, na raunabaut long hap long ples we nogat man i stap, long hap long not, tru tumas i go inap long ol i bin kamap long graun ol i kolim Planti.

30 Na graun long ol lain bilong Nifai i bin stap long arere long graun ol i kolim Bagarap, i bin stap long we long hap long not, na kam long graun we ol pipol i bin stap bipo na bin bagarap, ol bun bilong em ol mipela i bin toktok pinis, em ol pipol bilong Jarahemla ol i bin painim, na dispela i em nambawan ples we ol i bin kamap.

31 Na ol pipol bilong Jarahemla ol i bin kam long dispela hap i go antap long saut long ples we nogat man i stap. Olsem na, ol i kolim graun long hap long not Bagarap, na ol i kolim graun long hap long saut Planti, bikos dispela ples we nogat man i stap i pulap long olgeta kainkain wail animal, we sampela long ol i bin kam long graun long hap long not long painim kaikai.

32 Na nau, em save kisim wanpela de na hap long wanpela long ol lain bilong Nifai long wokabaut, namel long hap long Planti na long graun bilong Bagarap, long hap long is i go long solwara long hap long wes, olsem na solwara i bin klostu raunim graun bilong Nifai na graun bilong Jarahemla, na liklik hap graun i bin stap namel long graun long hap long not na graun long hap long saut.

33 Na em i kamap we ol lain bilong Nifai i bin stap long graun bilong Planti, tru tumas long hap long is i go long solwara long hap long wes, olsem na ol lain bilong Nifai long bikpela save bilong ol na tu long ol wasman na armi bilong ol, bin banisim ol lain bilong Leman long saut, inap long ol i no inap kisim graun long hap long not, olsem ol bai no inap winim graun long hap long not.

34 Olsem na, ol lain bilong Leman ol i no moa kisim graun tasol ol i bin kisim graun bilong Nifai na graun long ples we nogat man i stap na raunabaut. Nau dispela i bin kamap long bikpela save long ol lain bilong Nifai—na bikos ol lain bilong Leman i birua long ol, ol bai i no inap kisim pen long han bilong ol long olgeta hap, na tu olsem ol mas gat ples we ol ken ronawe long laik bilong ol.

35 Na nau, mi go bek gen long stori bilong Amon wantaim Eron, Omna wantaim Himnai, na ol brata bilong ol, bihain long raitim dispela.