1 Na em i kamap we ol lain bilong Nifai ol i no idai long pait, ol i bin go bek long graun bilong ol, na haus bilong ol na meri wantaim pikinini bilong ol, bihain ol planim ol lain ol i bin idai long pait—nau namba bilong ol lain idai ol i no bin kaunim, bikos namba bilong ol i bikpela tumas.

2 Nau planti meri na pikinini ol i bin idai wantaim naip bilong pait, na tu planti sipsip na bulmakau wantaim gaden bilong rais samting bilong ol i bin bagarap, bikos planti man i bin kurungutim ol.

3 Na nau planti lain bilong Leman wantaim ol lain bilong Amlisai ol idai long arere bilong wara Saidon, na ol i bin tromoi ol go insait long ol wara bilong Saidon, na lukim, planti bun bilong ol i stap aninit long solwara.

4 Na ol lain bilong Amlisai i kamap narapela kain long ol lain bilong Nifai, long wanem, ol i bin putim ret mak long pes bilong ol, wankain olsem ol lain bilong Leman, tasol, ol i no sapim het bilong ol olsem ol lain bilong Leman.

5 Nau ol lain bilong Leman ol i bin sapim het bilong ol, na ol i as nating, tasol ol i bin pasin as tanget long skin bilong animal raun long sangana bilong ol, na tu ol i save pasim raun long ol, ol samting bilong pait olsem banara, na spia bilong banara, na ston, na sling na kainkain samting bilong pait.

6 Na skin bilong ol lain bilong Leman i blak, wankain olsem mak bilong skin i bin kamap long ol tumbuna papa bilong ol, em kes i bin kamap long ol bikos ol brukim lo, na sakim tok long ol brata bilong ol em i Nifai, Jekop, Josep na Sem, ol i stretpela na holi man.

7 Na ol brata bilong ol i bin traim long bagarapim, olsem na Bikpela i bin kesim ol, na God Bikpela i bin putim wanpela mak long ol, ye, long Leman na Lemuel wantaim ol pikinini man na meri bilong Ismael.

8 Na dispela i bin kamap olsem pikinini bilong ol bai kamap narapela kain long pikinini bilong ol brata bilong ol, we bai God Bikpela bai lukautim ol i stap ol pipol bilong em, olsem ol bai i no inap miks wantaim ol lain brata bilong ol, na bilip long ol kranki kastam bilong ol we bai bagarapim ol.

9 Na em i kamap we ol man long ol lain bilong Nifai, i maritim meri long ol lain bilong Leman bai bringim kes long pikinini bilong em.

10 Olsem na, ol manmeri i larim ol lain bilong Leman long lidim em, ol i bin kisim nem bilong ol lain bilong Leman, na wanpela mak bin putim antap long em.

11 Na em i kamap we manmeri husat i no bilip long kastam bilong ol lain bilong Leman, tasol bilip long ol rekot i bin karim kam long Jerusalem, na tu kastam bilong ol lain tumbuna papa bilong ol, husat i stret, na husat manmeri bilip long ol lo bilong God na bihainim ol, i kamap ol lain bilong Nifai, o pipol bilong Nifai long dispela taim i go het—

12 Na em ol lain bilong Nifai, husat i bin kipim trupela rekot long ol pipol bilong ol wantaim ol pipol bilong lain bilong Leman.

13 Nau mipela bai go bek gen long ol lain bilong Amlisai, long wanem, ol tu i bin putim wanpela mak long ol; ye, ol i bin putim wanpela mak long ol yet, ye, tru tumas wanpela ret mak long poret bilong ol.

14 Na toktok bilong God i bin kamapim tru olsem, long wanem, dispela ol toktok Bikpela i bin tokim Nifai: Lukim, mi bin kesim ol lain bilong Leman, na mi bai putim wanpela mak long ol lain husat bai bruk i go awe long yu na ol lain pikinini bilong yu, long dispela taim i go yet na oltaim oltaim, sapos ol i no tanim bel long pasin nogut bilong ol na tanim bel bilong ol long mi olsem mi bai marimari long ol.

15 Na gen: Mi bai putim wanpela mak long man husat miksim pikinini bilong em wantaim ol lain brata bilong yu, olsem ol tu bai kisim kes.

16 Na gen: Mi bai putim wanpela mak long man em i pait wantaim yu na pikinini bilong yu.

17 Na gen, mi tokim yu, man em i lusim yu bai i no moa kamap pikinini bilong yu, na mi bai blesim yu wantaim em man kamap pikinini bilong yu, long dispela taim i go yet na oltaim oltaim, na dispela i ol promis Bikpela i bin mekim long Nifai wantaim ol lain pikinini bilong em.

18 Nau ol lain bilong Amlisai i no save olsem ol kamapim tru ol toktok bilong God taim ol i stat long putim mak long pes bilong ol yet, tasol ol i bin sakim tok bilong God long ples klia, olsem na i gat nid olsem kes mas kamap long ol.

19 Nau mi laikim yupela long save olsem ol i bin bringim kes antap long ol yet, na tru tumas, wanwan man i bin kisim kes bringim bagarap long em yet.

20 Nau em i kamap we i no planti de i go pinis bihain long bikpela pait i bin kamap long graun bilong Jarahemla wantaim ol lain bilong Leman na ol lain bilong Amlisai, na narapela ami bilong ol lain bilong Leman ol i bin kamap long ol pipol bilong Nifai, long sem ples we namba wan ami i bin bungim ol lain bilong Amlisai.

21 Na em i kamap we ol pipol bilong Nifai ol i bin salim wanpela ami long ronim ol go aut long graun bilong ol.

22 Nau Alma i no go long dispela taim long pait wantaim ol lain bilong Leman bikos wanpela sua i bin givim pen long em.

23 Tasol em i bin salim planti ami long pait wantaim ol, na ol ami bilong lain bilong Nifai ol i bin go antap na kilim planti lain bilong Leman, na ronim ol i go aut long arere long graun bilong ol, ol lain bilong Leman ol i no bin idai.

24 Na bihain long dispela, ol i go bek gen na i stap long kamapim bel isi long graun, na ol birua bilong ol i no moa trabelim ol long liklik taim.

25 Nau dispela olgeta samting ol i bin kamap, ye, dispela olgeta bikpela pait na tok pait i bin i stat na pinis insait long faipela krismas long rul bilong ol jas.

26 Na ol tausen na ol ten tausen sol i bin salim i go long graun oltaim insait long wanpela krismas, olsem ol bai kisim pe long wok bilong ol, sapos ol wok i gutpela o nogut, long kisim amamas oltaim o pen oltaim, olsem ol i bin makim spirit long bihainim, sapos ol i makim long bihainim gutpela spirit o spirit nogut.

27 Long wanem, wanwan man bai kisim pe long man husat em i bin makim long bihainim, olsem ol toktok bilong spirit bilong profesi i tok, olsem na larim ol samting long kamap olsem tok tru. Na arere bilong faipela krismas long rul bilong ol jas i bin kamap olsem.