Ol Skripsa
Alma 52


Sapta 52

Amoron i kisim ples long Amalikaia long kamap king long ol lain bilong Leman—Moronai, Tiankum wantaim Lihai i lidim ol lain bilong Nifai long winim pait wantaim ol lain bilong Leman—Siti bilong Mulek i bin kisim bek, na Jekop, wanpela long lain bilong Joram i bin kilim. Klostu 66–64 krismas bipo Krais.

1 Na nau, em i kamap we insait long tupela ten sikis krismas long rul bilong ol jas long ol pipol bilong Nifai, lukim, taim ol lain bilong Leman i kirap long nambawan monin long namba wan mun, ol i bin painim Amalikaia idai i stap long haus sel bilong em yet, na tu ol i lukim olsem Tiankum i redi long pait wantaim ol long dispela de.

2 Na nau, taim ol lain bilong Leman i lukim dispela ol i bin poret, na lusim plen bilong ol long go long graun long hap long not, na ol i bin go bek long siti bilong Mulek wantaim olgeta ami bilong ol, na hait i stap long ol banis bilong em.

3 Na em i kamap we ol pipol i bin makim brata bilong Amalikaia, nem bilong em Amoron long kamap king bilong ol, olsem na king Amoron, brata bilong king Amalikaia i bin makim long bosim long ples bilong em.

4 Na em i kamap we em i bin tokim ol pipol bilong em long lukautim ol dispela siti, ol i bin kapsaitim blut long kisim, long wanem, nogat wanpela siti ol i bin kisim nating, tasol long kapsaitim planti blut.

5 Na nau, Tiankum i bin lukim olsem ol lain bilong Leman i strong long lukautim ol dispela siti wantaim sampela graun ol i bin kisim, na tu taim Tiankum i lukim planti namba bilong ol em i bin tingim olsem em i no gutpela tumas long pait wantaim ol insait long ples banis bilong ol.

6 Tasol em i bin putim ol man bilong em raunabaut, olsem ol i redi long pait, ye, na tru tumas em i bin redim long banisim em yet long ol, long putim banis raunabaut na wokim ol ples hait.

7 Na em i kamap we em i bin redi yet long pait olsem, i go inap long Moronai i bin salim wanpela bikpela namba long ol man long strongim ami bilong em.

8 Na tu Moronai i bin salim oda long em olsem em bai holim i stap olgeta kalabus lain ol i bin kisim taim ol i bin pait, long wanem, bikos ol lain bilong Leman i bin kisim planti kalabus lain, olsem na Tiankum mas holim stap olgeta kalabus lain long ol lain bilong Leman inap long baim ol lain em ol lain bilong Leman i bin kisim.

9 Na tu Moronai i bin salim oda long Tiankum olsem em i mas banisim graun ol i kolim Planti, na strongim liklik nek tru graun go long graun long hap long not, nogut ol lain bilong Leman ol bai kisim dispela hap graun long givim ol pawa long bagarapim ol lain bilong Nifai long olgeta sait.

10 Na tu Moronai i bin salim pas long em, na laikim long em olsem em mas strong long lukautim dispela hap long graun, na olsem em mas painin olgeta rot long pawa bilong em long givim pen long ol lain bilong Leman long dispela hap inap long em bai yusim plen o sampela narapela rot long kisim bek gen ol siti bilong ol, na tu olsem em bai banisim na strongim ol siti raunabaut, ol lain bilong Leman i no kisim.

11 Na tu em i bin tokim em, inap mi bai kam long yu, tasol lukim, ol lain bilong Leman i kamap long mipela long ol arere long graun long solwara long hap long wes, na lukim, mi pait wantaim ol, olsem na mi no inap kam long yu.

12 Nau, king Amoron i bin lusim graun bilong Jarahemla i go, na tok save long kwin long idai long brata bilong em, na bungim wantaim bikpela namba long ol man, na em i bin go long pait wantaim ol lain bilong Nifai long ol arere long solwara long hap long wes.

13 Na em i bin traim long givim pen long ol lain bilong Nifai, long kisim sampela ami bilong ol go long dispela hap long graun, na tokim ol lain em ol i bin lusim long lukautim ol siti em i bin kisim, olsem ol tu bai givim pen long ol lain bilong Nifai long ol arere long solwara long hap long is, na long kisim graun bilong ol sapos ol i ken long pawa bilong ol, olsem long pawa long ol ami bilong ol.

14 Olsem na ol lain bilong Nifai stap long dispela sindaun nogut tru taim tupela ten sikis krismas long rul bilong ol jas long ol pipol bilong Nifai i pinis.

15 Tasol lukim, em i kamap we long tupela ten seven krismas long rul bilong ol jas, olsem Tiankum long oda bilong Moronai—em i bin kirapim ol ami long lukautim ol arere long graun long hap long saut na long hap long wes, na i stat long go long hap long graun Planti, olsem em bai halivim Tiankum wantaim ol man bilong em long kisim bek ol siti ol i bin lusim—

16 Na em i kamap we Tiankum i bin kisim oda long pait wantaim ol lain bilong Leman i stap long siti bilong Mulek, na kisim bek siti Mulek, sapos em i ken.

17 Na em i kamap we Tiankum i bin redi long pait wantaim ol lain bilong Leman i stap insait long siti bilong Mulek, na go het wantaim ami bilong em, tasol em i bin lukim olsem em i hat long winim ol taim ol i stap insait long ples banis bilong ol, olsem na em i bin lusim plen bilong em na go bek gen long siti Planti, long wet long Moronai, olsem em bai kisim strong long ami bilong em.

18 Na em i kamap we Moronai i bin kam wantaim ami bilong em long graun bilong Planti, insait long tupela ten seven krismas long rul bilong ol jas long ol pipol bilong Nifai i klostu pinis.

19 Na long stat long tupela ten eit krismas, Moronai, Tiankum wantaim planti het kepten bilong ol i bin holim wanpela kibung bilong bikpela pait—wanem ol mas wokim long mekim ol lain bilong Leman kamaut long pait wantaim ol, o olsem ol bai yusim sampela we long grisim ol long kamaut long ples banis bilong ol, olsem ol bai abrusim ol long kisim bek siti bilong Mulek.

20 Na em i kamap we ol i bin salim ol man bilong kisim toktok i go long ami long ol lain bilong Leman, em i bin lukautim siti bilong Mulek, long lida bilong ol, nem bilong em Jekop, na laikim olsem em bai kamaut wantaim ol ami bilong em long bungim ol long ples daun namel long tupela siti. Tasol lukim, Jekop, em i wanpela long ol lain bilong Joram i les long kamaut wantaim ami bilong em long bungim ol long ples daun.

21 Na em i kamap we Moronai, bikos em i nogat sans long bungim ol long skelim bun, olsem na em i bin kamapim wanpela plen, olsem em bai trikim ol lain bilong Leman long kamaut long ples banis bilong ol.

22 Olsem na em i bin tokim Tiankum long kisim wanpela liklik namba long ol man na go daun klostu long nambis, na Moronai wantaim ami bilong em i bin go long ples we nogat man i stap, long hap long wes long siti bilong Mulek long nait, olsem na, taim ol wasman long ol lain bilong Leman i painim Tiankum long tumora, ol i ron i go na tok save long Jekop, lida bilong ol.

23 Na em i kamap we ol ami long ol lain bilong Leman i bin go het long pait wantaim Tiankum, na tingim olsem ol i gat namba long winim Tiankum bikos namba long ol man bilong em i liklik tru. Na taim Tiankum i lukim ol ami bilong Leman kamaut ol i long pait wantaim ol, em i stat long go bek daun long nambis, long hap long not.

24 Na em i kamap we taim ol lain bilong Leman lukim olsem em i stat long ronawe, ol i kisim strong na ronim ol nogut tru. Na taim Tiankum i lidim i go awe ol lain bilong Leman em ol i bin ronim ol nating, lukim, Moronai i bin givim oda long wanpela hap long ami bilong em i stap wantaim em long go het insait long siti, na kisim dispela siti.

25 Na ol i bin wokim olsem, na kilim olgeta lain ol lain bilong Leman i bin lusim bihain long lukautim siti, ye, olgeta lain em ol i bin les long givap ol samting bilong pait bilong ol.

26 Na Moronai i bin kisim siti bilong Mulek wantaim wanpela hap long ami bilong em olsem, taim em i bin go wantaim narapela hap long ami bilong em long bungim ol lain bilong Leman taim ol i kam bek bihain long ronim Tiankum.

27 Na em i kamap we ol lain bilong Leman i bin ronim Tiankum i go inap long ol i bin kamap long siti Planti, na Lihai wantaim liklik ami bilong em, i bin lusim bihain long lukautim siti Planti bin bungim ol.

28 Na nau lukim, taim ol het kepten long ol lain bilong Leman i lukim Lihai wantaim ami bilong em kam long pait wantaim ol, ol i paul nogut tru na ronawe, nogut ol bai i no inap kisim siti Mulek pastaim long Lihai abrusim ol, long wanem, ol i bin skin dai bikos long wokabaut bilong ol, na ol man bilong Lihai i nupela.

29 Nau ol lain bilong Leman i no save olsem Moronai i kam long bihain long ol wantaim ami bilong em, na ol i bin poret long Lihai wantaim ol man bilong em tasol.

30 Nau Lihai i no laikim long abrusim ol, tasol larim ol i go inap long bungim Moronai wantaim ami bilong em.

31 Na em i kamap we i no long taim ol lain bilong Leman i ronawe go bek, na ol lain bilong Nifai i bin rounim ol, ol man bilong Moronai long wanpela han, na ol man bilong Lihai long narapela, olgeta long ol i nupela na strong nogut tru, tasol ol lain bilong Leman ol i skin dai bikos long longpela wokabaut bilong ol.

32 Na Moronai i bin givim oda long ol man bilong em olsem ol bai paitim ol i go inap long ol bai givap ol samting bilong pait bilong ol.

33 Na em i kamap we Jekop, lida bilong ol, na tu wanpela long ol lain bilong Joram, na bikos em i strongpela man bilong pait, olsem na em i bin lidim ol lain bilong Leman long pait nogut tru wantaim Moronai.

34 Moronai i bin pasim rot bilong ol, olsem na Jekop i bin strong nogut tru long kilim ol, na katim rot bilong em namel long ol na go long siti bilong Mulek. Tasol lukim, Moronai wantaim ol man bilong em i bin gat moa pawa, olsem na ol i no givim rot long ol lain bilong Leman.

35 Na em i kamap we ol lain bilong Nifai wantaim ol lain bilong Leman ol i bin pait nogut tru, na planti ol i bin kilim ol long tupela sait, ye, na Moronai i bin kisim sua na Jekop ol i bin kilim em.

36 Na Lihai i bin putim moa strong long bihain wantaim ol strongpela man bilong em, na ol lain bilong Leman long bihain ol i bin givap long ol samting bilong pait bilong ol, na sampela bilong ol i bin longlong, na ol i no bin save olsem ol bai go o pait.

37 Nau Moronai taim em i lukim longlong bilong ol, em i bin tokim ol: Sapos yupela bringim kam ol samting bilong pait bilong yupela, na givap, lukim mipela bai i no moa kapsaitim blut bilong yupela.

38 Na em i kamap we taim ol lain bilong Leman i harim ol dispela toktok, ol het kepten bilong ol, olgeta em i no bin kilim, i bin kam na tromoim ol samting bilong pait bilong ol long ol lek bilong Moronai, na tu givim oda long ol man bilong ol long wokim wankain.

39 Tasol lukim, i gat planti bilong ol i bin les, na ol lain em ol i les long givap naip bilong pait bilong ol i bin kisim na pasim, na ol samting bilong pait bilong ol i bin rausim long han bilong ol, na ol i bin strongim long wokabaut wantaim ol lain brata bilong ol i go long graun Planti.

40 Na nau namba long ol lain em i bin kisim na kalabusim i moa yet long winim namba long ol lain em i bin kilim, ye, moa yet long winim ol lain em i bin kilim long tupela sait.