1 Kiiō ālikin men kein Alma eaar jino n̄an kwaļo̧k naan in Anij n̄an armej ro, m̧okta ilo āneen Zaraemla, im jān ijo ilo aolepān āneo.

2 Im erkein naan ko eaar kōnono n̄an armej ro ilo kabun̄ eo kar kajutak ilo jikin kwelo̧k Zaraemla, ekkar n̄an ļo̧o̧k eo an make, im ba:

3 N̄a, Alma, āinwōt kar kapit eō jān jema, Alma, bwe in juon pris eutiej ioon kabun̄ eo an Anij, kōnke eaar wōr an kajoor im maron̄ jān Anij n̄an kōm̧m̧ani men kein, ko, ij ba n̄an kom̧ bwe eaar jino kajutak juon kabun̄ ilo āneo eaar pād ilo tōrerein ko in Nipai; aaet, āneo kar ņa etan āneen Mormon; aaet, im eaar peptaiji ro jein im jatin ilo dān ko in Mormon.

4 Im lo, ij ba n̄an kom̧, kar kōtļo̧k er jān pein armej ro an kiin̄ Noa, jān tūriam̧okake im kajoor eo an Anij.

5 Im lo, ālikin men eo, kar bōklaļļo̧k er n̄an kōm̧akoko kōn pein riLeman ro ilo āne jem̧aden; aaet, ij ba n̄an kom̧ raar pād ilo ineen kōm̧akoko, im Irooj Eaar bar kōtļo̧k er jān kōm̧akoko kōn kajoor in An innaan; im kar bōktok kōm n̄an āniin, im ijin kōm ar jino kajutak kabun̄ eo an Anij ilo aolepān āneo barāinwōt.

6 Im kiiō lo, ij ba n̄an kom̧, ro jeiū im jatū, kom̧ ro rej uwaan kabun̄ in, kom̧ar ke dāpdep ilo ememej eō kōn kōm̧akoko eo an ro jemāmi? Aaet, im kom̧ eaar dāpdep ke ilo ememej tūriam̧okake An im kōmmaanwa eo An n̄an er? Im eļapļo̧k, kom̧ ar dāpdep ke ilo ememej bwe Eaar kōtļo̧k jetōb ko aer jān hell?

7 Lo Eaar ukōt burueer; aaet, Eaar karuj er jān kiki leplep eo, im raar rujļo̧k n̄an Anij. Lo, raar pād ibuļōn marok jilōn̄lōn̄; mekarta, jetōb ko aer raar romaak jān meram in naan eo ej n̄an indeeo; aaet, kar kapooļ er kōn to ko an mej, im tomede ko an hell, im ko̧kkure indeeo eo eaar kōttar er.

8 Im kiiō ij kajitūkin kom̧, ro jeiū im jatū, kar ko̧kkure ke er? Lo, ij ba n̄an kom̧, Jaab, raar jab.

9 Im ij bar kajjitōk, ekar m̧wijkōk ke to ko an mej, im tomede ko an hell kar kapooļe er, raar ke mejaļ? Ij ba n̄an kom̧, Aaet, raar mejaļ im jetōb ko aer raar ļapļo̧k im raar al iakwe epinmuur. Im ij ba n̄an kom̧ bwe raar lo lo̧mo̧o̧r.

10 Im kiiō ij kajjitōk ippam̧ ilo wāween rot ko lo̧mo̧o̧ren er jāni? Aaet, ba un ko kar ippāer n̄an kōjatdikdik ilo lo̧mo̧o̧r? Ta ej kōm̧m̧an bwe ren mejaļ jān to ko an mej, aaet, im barāinwōt tomede ko an hell?

11 Lo, imaron̄ ba n̄an kom̧—ta jema Alma eaar jab tōmak ilo naan ko kar kwaļo̧ki jān lo̧n̄iin Abinadai ke? Im eaar jab juon rikanaan ekwōjarjar ke? Eaar jab kōnono naan ko an Anij ke, im jema Alma eaar tōmaki?

12 Im ekkar n̄an an tōmak eaar wōr juon oktak ekajoor kōm̧m̧ane ilo būruōn. Lo ij ba n̄an kom̧ bwe aolepān men in em̧ool.

13 Im lo, eaar kwaļo̧k naan eo n̄an ro jemāmi, im juon oktak ekajoor eaar barāinwōt kōm̧m̧an ilo burueer, im raar kōttāik er im likūt aer lōke ilo Anij em̧ool im emour. Im lo, raar niknik n̄an jem̧ļo̧kin; kōn menin raar mour.

14 Im kiiō lo, ij kajjitōk ippemi, ro jeiū im jatū ilo kabun̄ in, kom̧ nan̄in ke ilo jetōb kar ļotak jān Anij? Kom̧ ar bōk ke nememen ilo paotok ko ami? Kom̧ ar bōk ke oktak in ekajoor ilo būruōmi?

15 Kom̧ij kwaļo̧k ke tōmak ilo lo̧mo̧o̧ren an eo Eaar kōm̧anm̧an kom̧? Kom̧ij reim̧aanļo̧k ke kōn mejān tōmak, im lo ānbwinnin kanniōk in ej jerkak ilo jab wabanban, im mennin ijurwewe in ej jerkak ilo jab ijurwewe, n̄an jutak im̧aan Anij n̄an ekajet ekkar n̄an kōm̧m̧an ko kar kōm̧m̧ani ilo ānbwinnin kanniōk?

16 Ij ba n̄an kom̧, kom̧ maron̄ ļōmņake ilo kom̧ make ke bwe kom̧ij ron̄ ainikien Irooj, ej ba n̄an kom̧, ilo raan eo: Itok n̄an Ippa kom̧ jeraam̧m̧an, bwe lo jerbal ko ami raar jerbal ko rejim̧we ioon mejān laļ?

17 A kom̧ maron̄ ke ļōmņake ilo kom̧ bwe kom̧ maron̄ riab n̄an Irooj ilo raan eo, im ba—Irooj jerbal ko am raar jerbal ko rejim̧we ioon mejān laļ—im bwe Enaaj lo̧mo̧o̧ren kom̧?

18 A ilo bar juon wāween, kom̧ maron̄ ļōmņake kar bōktok kom̧ im̧aan tribunal, jikin ekajet an Anij kōn aolepān ami obrak kōn bōd im būrom̧ōj, aaet, juon ememej eweeppān kōn aolep ami jero̧wiwi, aaet, juon ememej bwe kom̧ ar likūt ilo kōwaan kien ko an Anij?

19 Ij ba n̄an kom̧, kom̧ maron̄ ke reilo̧k n̄an Anij ilo raan en kōn juon bōro erreo im pā ko rerreo? Ij ba n̄an kom̧, kom̧ maron̄ ke reilo̧k, nememen Anij kar m̧wijiti ilo paotokimi?

20 Ij ba n̄an kom̧, kom̧ maron̄ ke ļōmņak kōn bōk lo̧mo̧o̧r n̄e kom̧ ar kōtļo̧k kom̧ n̄an erom ro doon devil?

21 Ij ba n̄an kom̧, kom̧ naaj jeļā ilo raan en bwe kom̧ij jab maron̄ bōk lo̧mo̧o̧r; bwe ejjeļo̧k armej naaj lo̧mo̧o̧ren ijello̧kun wōt n̄e nuknuk ko an reaikuj kwaļkoļ im mouj; aaet, nuknuk ko an reaikuj karreo m̧ae iien rej erreo jān aolep ettoon, kōn bōtōktōkin E eo kar kōnono kake jān ro jemād, eo En kar itok n̄an lo̧mo̧o̧ren armej ro An jān jero̧wiwi ko aer.

22 Im kiiō ij kajjitōk ippemi, ro jeiū im jatū, ekōjkan ami ļōmņak, eļan̄n̄e kom̧ naaj jutak im̧aan jikin ekajet an Anij, men ko ballemi remāār kōn bōtōktōk im aolepān wāween ettoon otemjeļo̧k? Lo, ta men kein naaj kam̧ool ņae kom̧ ke?

23 Lo ren jab ke kam̧ool bwe kom̧ riuror ro, aaet, im barāinwōt bwe kar ņa ruōmi kōn aolep jero̧wiwi otemjeļo̧k?

24 Lo, ro jeiū im jatū, kom̧ij kōtmāne ke bwe juon āinwōt in emaron̄ wōr juon jikin n̄an jijet ilo aelōn̄ eo an Anij, ippān Ebream, ippān Aisak, im ippān Jekab, im barāinwōt aolep rikanaan ro rekwōjarjar, ro nuknuk ko ballier kar karreoik im jab libbijinjin, erreo im mouj?

25 Ij ba n̄an kom̧, Jaab; ijello̧kun wōt n̄e kom̧ij kōm̧m̧an bwe ad Rikōm̧anm̧an en ririab jān jinoin, ak kōtmāne bwe E ririab jān jino in, kom̧ij jab maron̄ kōtmāne bwe rein remaron̄ wōr jikier ilo aelōn̄ in lan̄; a naaj joļo̧k er bwe rej ro nejin aelōn̄ eo an devil.

26 Im kiiō lo, ij ba n̄an kom̧, ro jeiū im jatū, eļan̄n̄e kom̧ ar imminene kōn juon oktak in bōro, im eļan̄n̄e kom̧ ar en̄jake n̄an al, al in iakwe em̧ool in pinmuur, ikōņaan kajjitōk, kom̧ maron̄ ke en̄jake kiiō?

27 Kom̧ ar etetal, im kōjparok ami erreo im̧aan Anij? Kom̧in ba ke, n̄e kar kūr kom̧ n̄an mej ilo iien in, ilo kom̧ make, bwe ebwe ami kar ettā? Bwe nuknuk ko ballemi kar karreoiki im remouj kōn bōtōktōkin Kraist, eo Enaaj itok n̄an lo̧mo̧o̧ren armej ro An jān jero̧wiwi ko aer?

28 Lo, kom̧ ar utūki ke jān kom̧ juwa? Ij ba n̄an kom̧, eļan̄n̄e kom̧ij jab kom̧ij jab pojak n̄an ioon Anij. Lo kom̧ aikuj pojak m̧ōkaj; bwe aelōn̄ in lan̄ epaaktok, im eo āinwōt in ejamin bōk mour indeeo.

29 Lo, ij ba, ewōr ke juon ilubwiljimi ej jab utūkļo̧k jān e juunm̧aad? Ij ba n̄an kom̧ bwe eo āinwōt in ej jab pojak; im ikōņaan bwe en pojak m̧ōkaj, bwe awa eo ej epaaktok, im e jeļā jaab n̄āāt iien eo Enaaj itok; bwe eo āinwōt in jamin lo ejjeļo̧k ruōn.

30 Im ij ba n̄an kom̧, ewōr ke juon ilubwiljimi ej kajjirere kōn eo jein im jatin, ak ejoujik ioon matōrtōr ko?

31 Wo n̄an eo āinwōt in, bwe e ejjab pojak; im iien eo epaak bwe en aikuj ukeļo̧k ak ejamin mour!

32 Aaet, em̧ool wo n̄an aolep kom̧ rijerbal nana, kom̧in ukeļo̧k, kom̧in ukeļo̧k, bwe Irooj Anij Eaar kōnono men in!

33 Lo, E ej jilkintok juon karuwainene n̄an aolep armej, bwe pein tūriam̧okake rej erļo̧k n̄an er, im Ej ba: Kom̧in ukeļo̧k, im Inaaj bōk kom̧.

34 Aaet, Ej ba: Kom̧in itok n̄an Ippa im kom̧ naaj bōk leen wōjke in mour; aaet, kom̧ naaj m̧ōn̄ā im idaak jān pilawā im dān in mour ilo anemkwōj;

35 Aaet, kom̧in itok n̄an Ippa im bōktok jerbal ko in jim̧we, im naaj jamin juok laļļo̧k im joļo̧k kom̧ ilo kijeek—

36 Bwe lo, iien eo epaak im jabdewōt eo ejjab kwaļo̧k leen em̧m̧an, a jabdewōt ej kōm̧m̧an jaab jerbal ko rejim̧we, ejja in wōt e wōr unin an liaajlo̧ļ im būrom̧ōj.

37 O kom̧ rijerbal nana; kom̧ ro rej kōmmejāje ilo men ko rewaan an laļ, kom̧ ro raar kabun̄bun̄ļo̧k ke ko eaar jeļā kōn iaļ ko rejim̧we mekarta kom̧ ar jebwābwe, āinwōt sip ejjeļo̧k an seperd, mekarta seperd eo eaar kūr n̄an kom̧ im E ej kūr n̄an kom̧ wōt, a kom̧ij jab eo̧ron̄ ainikien!

38 Lo, ij ba n̄an kom̧, seperd in em̧m̧an ej kūr kom̧; aaet, ilo etan wōt E ej kūr kom̧, eo ej etan Kraist; im eļan̄n̄e kom̧ij jab eo̧ron̄ ainikien seperd eo em̧m̧an, n̄an āt eo kar kūr kom̧ kake, lo, kom̧ij jab sip ko an seperd eo em̧m̧an.

39 Im kiiō eļan̄n̄e kom̧ij jab sip an seperd eo em̧m̧an, jān bwij ta kom̧? Lo, ij ba n̄an kom̧, bwe devil ej ami seperd, im kom̧ij jān bwij eo an; im kiiō, wōn emaron̄ kariab men in? Lo, ij ba n̄an kom̧, jabdewōt eo ej kariab men in ej ririab im juon nejin devil.

40 Bwe ij ba n̄an kom̧ bwe jabdewōt men em̧m̧an ej itok jān Anij, im jabdewōt men enana ej itok jān devil.

41 Kōn menin, eļan̄n̄e juon armej ej kwaļo̧k jerbal ko rem̧m̧an e ej eo̧ron̄ ainikien seperd eo em̧m̧an, im e ej ļoor E; a jabdewōt eo ej kwaļo̧k jerbal ko renana, ejja in wōt ej erom eo nejin devil, bwe e ej eo̧ron̄ ainikien, im e ej ļoor e.

42 Im jabdewōt eo ej kōm̧m̧ane menin eaikuj bōk wōņāān jān e; kōn menin, n̄an wōņāān ko an ej bōk mej, āinwōt n̄an men ko an wānōk, kōnke eaar mej n̄an aolep jerbal ko rem̧m̧an.

43 Im kiiō, ro jeiū im jatū, ikōņaan bwe kom̧in ron̄jake eō, bwe ij kōnono ilo kajoor in aō jetōb; bwe lo, iaar kōnono n̄an kom̧ ilo alikkar bwe kom̧in jab bōd, a kar kōnono ekkar n̄an kien ko an Anij.

44 Bwe kar kūr eō n̄an kōnono ilo wāween in, ekkar n̄an laajrak eo ekwōjarjar an Anij, eo ej ilo Kraist Jisōs; aaet, em̧ōj kar jiron̄ eō n̄an jutak im kam̧ool n̄an armej rein men ko kar kōnono kaki jān ro jemād kōn men ko rej itok.

45 Im ej jab aolepān in. Kom̧ij jab kōtmāne bwe i jeļā men kein make ke? Lo, ij kam̧ool n̄an kom̧ bwe i jeļā men kein ko iaar kōnono kaki rem̧ool. Im ekōjkan ilo ami kōtmāne bwe i jeļā kōn aer m̧ool?

46 Lo, ij ba n̄an kom̧ men kein kar kwaļo̧k n̄an eō jān Jetōb Kwōjarjar an Anij. Lo, iaar jitlo̧k im jar elōn̄ raan ko bwe in maron̄ jeļā men kein n̄an eō make. Im kiiō i jeļā make bwe rem̧ool; bwe Irooj Anij Eaar kwaļo̧ki n̄an eō kōn An Jetōb Kwōjarjar; im en̄in ej jitōbōn revelesōn eo ej ilo n̄a.

47 Im eļapļo̧k, ij ba n̄an kom̧ bwe eaar āindein kar kwaļo̧k n̄an eō, bwe naan ko kar kōnono jān ro jemān rem̧ool, em̧ool āinwōt ekkar n̄an jitōbōn kanaan eo ej ilo n̄a, eo ej barāinwōt jān waļo̧k in Jitōbōn Anij.

48 Ij ba n̄an kom̧, bwe i jeļā ippa make bwe jabdewōt inaaj ba n̄an kom̧, kōn men eo ej itok, e m̧ool; im ij ba n̄an kom̧, bwe i jeļā bwe Jisōs Kraist Enaaj itok, aaet, eo Nejin, eo Emake Keotak in Jemān, obrak kōn jouj, im tūriam̧o, im m̧ool. Im lo, ej E eo ej itok n̄an bōkļo̧k jero̧wiwi ko an laļ, aaet, jero̧wiwi ko an jabdewōt armej eo ej pen ilo tōmak ilo Etan.

49 Im kiiō ij ba n̄an kom̧ bwe en̄in ej laajrak eo kūr eō jān e, aaet, n̄an kwaļo̧k naan n̄an ro jeiū im jatū rejitōnbōro, aaet, im jabdewōt eo ej jokwe ilo āniin; aaet, n̄an kwaļo̧k naan n̄an aolep, rūtto im dik jim̧or, riatajinemjen im rianemkwōj jim̧or; aaet ij ba n̄an kom̧ ribwijwoļā, im barāinwōt rimman ded, im epepen eo ej rūtto tak; aaet, n̄an kūr n̄an er aolep bwe rej aikuj ukeļo̧k im bar ļotak.

50 Aaet, āindein jetōb in ej ba: Kom̧in ukeļo̧k, aolep ro jabōntata ko in laļ, bwe aelōn̄ in lan̄ epaak; aaet, eo Nejin Anij ej itok ilo An wōj, ilo An kajoor; utiej, maron̄, im irooj. Aaet, ro jeiū im jatū rejitōnbōro, ij ba n̄an kom̧, bwe jetōb ej ba: Loaiboojoj an Kiin̄ in aolepān laļ; im barāinwōt Kiin̄ in lan̄ naaj romaakļo̧k ejjab to ilubwiljin aolep ro nejin armej ran.

51 Im barāinwōt jetōb in ej ba n̄an eō, aaet, ej kūr n̄an eō kōn juon ainikien ekajoor, im ba: Kwōn ilo̧k im ba n̄an armej rein—Kom̧in ukeļo̧k, bwe ijello̧kun wōt n̄e kom̧ij ukeļo̧k kom̧ij jab maron̄ jolōte aelōn̄ in lan̄.

52 Im ij bar ba n̄an kom̧, jetōb in ej ba: Lo, ūlūl eo em̧ōj likūti ilo okran wōjke eo; kōn menin aolep wōjke eo ej kwaļo̧k jaab leen em̧m̧an naaj juok e im joļo̧k ilo kijeek, aaet, kijeek eo e jamin jem̧ļo̧k, e m̧ool juon kijeek e jamin kun. Lo, im keememej, eo Rikwōjarjar Eaar kōnono men in.

53 Im kiiō ro jeiū im jatū rejitōnbōro, ij ba n̄an kom̧, kom̧ maron̄ jum̧ae ennaan kein; aaet, kom̧ maron̄ ke kajekdo̧o̧ni men kein, im jujuri eo Rikwōjarjar ium̧win neemi; aaet, kom̧ maron̄ ke kōmmejāje ilo juwa in būruōmi; aaet, kom̧ naaj ke kōņak wōt nuknuk ko reļļap wōņāer im likūt būruōmi ioon men ko rewaan an laļ in, ioon m̧weie ko ami?

54 Aaet, kom̧in kōtmāne wōt ke bwe kom̧ em̧m̧anļo̧k jān bar jet; aaet, kom̧in matōrtōre wōt ke ro jeiūm̧i im jātimi, ro rej kōttāik er im rej etetal āinwōt laajrak eo ekwōjarjar an Anij, im kōnke E ekar bōk tok er n̄an kabun̄ in, im Jetōb Kwōjarjar eaar kokwōjarjare er, im rej jebar leen ko rekkar n̄an ukeļo̧k—

55 Aaet, im kom̧in ke ālikurkur wōt jān rijeram̧ōl, im riaikuj, im ilo dāpij m̧weiuk ko ami jān er?

56 Im āliktata, aolep kom̧ ro renaaj wōnm̧aanļo̧k ilo ami nana, ij ba n̄an kom̧ bwe er rein ro renaaj juok er im joļo̧k ilo kijeek ijello̧kun wōt n̄e rej m̧ōkaj im ukeļo̧k.

57 Im kiiō ij ba n̄an kom̧, aolep kom̧ ro rekōņaan ļoor ainikien seperd eo em̧m̧an, kom̧in diwōjtok jān nana, im kom̧in jenolo̧k, im jibwe jaab men ko aer rettoon; im lo, etaer naaj bukweļo̧k, bwe etan ro renana jamin bōnbōn ilubwiljin etan ro rewānōk, bwe naan an Anij en maron̄ kūrm̧ool, eo ej ba: Etan ro renana jamin pukwōj e ippān etan armej ro Aō;

58 Bwe etan ro rewānōk naaj jeje ilo bok im mour, im n̄an er Inaaj leļo̧k juon jolōt ilo Peiū anbwijmaron̄. Im kiiō, ro jeiū im jatū, ta kom̧ij ba ņae men in? Ij ba n̄an kom̧, eļan̄n̄e kom̧ij kōnono ņae e, ejjeļo̧k tokjān, bwe naan eo an Anij eaikuj kūrm̧ool.

59 Bwe seperd ta eo ilubwiljimi elōn̄ an sip ej jab lale er, bwe kidu oļip ko ren jab deļo̧n̄ im kan̄ kobban wōrwōr eo An? Im eļan̄n̄e kidu oļip eo ej deļo̧n̄e wōrwōr eo an ta e ej jab lukwarkwareļo̧k ke? Aaet, im ilo jem̧ļo̧kin, eļan̄n̄e emaron̄, enaaj m̧an e.

60 Im kiiō ij ba n̄an kom̧ bwe seperd eo em̧m̧an ej kūrļo̧k kom̧; im eļan̄n̄e kom̧ij eo̧ron̄ ainikien Enaaj bōkļo̧k kom̧ n̄an wōrwōr eo An, im kom̧ij an sip; im E ej jiron̄ kom̧ bwe kom̧in jab kōtļo̧k kidu oļip ko rekwōle n̄an deļo̧n̄ ilubwiljimi, bwe kom̧in jab naaj jako.

61 Im kiiō n̄a, Alma, ij jiron̄ kom̧ ilo kajin eo An eo Eaar jiron̄ eō, bwe kom̧in lale n̄an kōm̧m̧ani naan ko iaar kōnono n̄an kom̧.

62 Ij kōnono ilo iaļan naan in jiron̄ n̄an kom̧ ro rej kobatok ilo kabun̄ in; im n̄an ro rejjab kobatok ilo kabun̄ in ij kōnono ilo iaļan karuwainene, im ba: Kom̧in itok im peptaij n̄an ukeļo̧k, bwe kom̧in barāinwōt maron̄ ribōk leen wōjke in mour.