1 Im kiiō ālikin men kein ke em̧ōj an armej in Ammōn tōt ilo āneen ^aJersōn, im juon kabun̄ eaar bar jutak ilo āneen Jersōn, im jarin tariņae ko an riNipai ro kar likūt er ipeļaakin āneen Jersōn, aaet, ilo aolepān tōrerein ko ipeļaakin āneen Zaraemla; lo jarin tariņae ko an riLeman ro raar ļoor ro jeir im jatier ļo̧k n̄an āne jem̧aden.

2 Im āindein eaar wōr juon pata eļap; aaet, em̧ool juon eo ejjan̄in kar wōr im kar jeļā kake ilubwiljin aolep armej in āneo jān iien eo Liai eaar likūt Jerusalem; aaet, im jon̄oul ko in to̧ujin ko in riLeman ro raar mej im ejjeplōklōk ijoko jabdewōt.

3 Aaet, im barāinwōt eaar wōr juon m̧anm̧an eļap ilubwiljin armej in Nipai; mekarta, riLeman ro kar ^alukwarkwar im kajjeplōklōk er, im armej in Nipai raar bar jepļaak n̄an āneo āneer.

4 Im kiiō in kar juon iien eo eaar wōr juon būrom̧ōj im liaajlo̧ļ eļap ron̄ iaolepān āneo, ilubwiljin aolep armej in Nipai—

5 Aaet, jan̄ in kōrā ro ejako pāleer rej būrom̧ōj kōn ļōm̧aro pāleer, im barāinwōt an ro jemāer būrom̧ōj kōn ļōm̧aro nejier, im nejier kōrā kōn ļōm̧aro jeir im jatier, aaet, ļōm̧aro jeir im jatier kōn ro jemāer, im āindein jan̄ in būrom̧ōj eo kar ron̄ ilubwiljier aolep, būrom̧ōj kōn ro nukwier im kar m̧an er.

6 Im kiiō em̧ool ke in eaar juon raan ekabūrom̧ōjm̧ōj; aaet, juon iien kejakļo̧kjeņ, im juon iien eļap ^ajitlo̧k im jar.

7 Im āindein ejem̧ļo̧k jon̄oul ļalem iiō in tōl an riekajet ro ioon armej in Nipai;

8 Im en̄in ej bwebwenato eo an Ammōn im ļōm̧aro jein im jatin, ito-itak ko aer ilo āneen Nipai, en̄taan ko aer ilo āneo, būrom̧ōj ko aer, im nan̄inmej ko aer, im ^am̧ōņōņō eo aer epen meļeļe kake, im kadeļo̧n̄ im oņaake an ro jeir im jatier ilo āneen Jersōn. Im kiiō Irooj, Ripinmuur an armej otemjeļo̧k, en kōjeraam̧m̧an er indeeo.

9 Im en̄in ej bwebwenato in tariņae ko im aitwerōk ko ilubwiljin riNipai ro, im barāinwōt tariņae ko ikōtaan riNipai im riLeman ro, im iiō eo kein kajon̄oulļalem in tōl an riekajet ro ej jem̧ļo̧k.

10 Im jān iiō eo m̧oktata n̄an eo kein kajon̄oulļalem eaar bōktok ko̧kkure in elōn̄ to̧ujin mour; aaet, eaar bōktok juon wāween enana in kōto̧o̧rļo̧k bōtōktōk.

11 Im ānbwin ko an elōn̄ to̧ujin ko kar kōbabuik er ilo bwidej, ak ānbwin ko an elōn̄ to̧ujin ko rej kōtļo̧k ilo ejoujik ioon ^amāāņāņ laļ; aaet, im elōn̄ to̧ujin ko rej ^bjan̄ kōn jako an ro nukwier, kōnke ewōr unin aer mijak, ekkar n̄an kallim̧ur ko an Irooj, bwe rej iiokļo̧k juon wāween ejjeļo̧k jem̧ļo̧kin jerata ie.

12 Ak elōn̄ to̧ujin ko kōn ro jet rej lukkuun jan̄ kōn jako an ro nukwier, mekarta raar m̧ōņōņō im lan̄lōn̄ ilo kōjatdikdik eo, im em̧ool jeļā, ekkar n̄an ^akallim̧ur ko an Irooj, bwe rej jerkakpeje n̄an pād ianbwijmaron̄in Anij, ilo wāween eo ejjeļo̧k jem̧ļo̧kin m̧ōņōņō ie.

13 Im āindein jej lo ekōjkan an ļap ^akalijekļo̧k in armej ej kōnke jero̧wiwi im bōd, im kajoor eo an devil, eo ej itok ilo ^bkarōk ko rewājepdik ko eaar kōm̧m̧an n̄an aujiidi būruōn armej.

14 Im āindein jej lo kūr in tiljek eļap an armej n̄an jerbal ilo ^ajikin kallib eo an Irooj; im āindein jej lo un eo eļap kōn būrom̧ōj, im barāinwōt kōn m̧ōņōņō—būrom̧ōj kōnke mej im ko̧kkure ilubwiljin armej ro, im m̧ōņōņō kōnke ^bmeram in Kraist n̄an mour.