1 Kiiō ālikin men kein ke Moronai eaar bōk lōta in eaar ļapļo̧k an illu, kōnke eaar jeļā bwe Ammoron eaar wōr jeļā ewānōk ippān kōn an ^ako̧o̧t; aaet, eaar jeļā bwe Ammoron eaar jeļā bwe eaar jab juon jibadbad ejim̧we bwe en kar kōm̧m̧ane juon tariņae ņae armej in Nipai.

2 Im eaar ba: Lo, ijjamin naaj kōro̧o̧l rikalbuuj ro ippān Ammoron m̧ae iien ej kabbōjrak kōttōpar eo an, āinwōt iaar ba ilo lōta eo aō; bwe ijjamin naaj kōtļo̧k n̄an e bwe en wōr an kajoorļo̧k wōt jān jon̄an eo ewōr ippān.

3 Lo, ijeļā jikin eo ijo riLeman ro rej baare armej ro aō ro raar bōk er rikalbuuj; im āinwōt Ammoron ejjāmin kōtļo̧k n̄an eō āinwōt lōta eo aō, lo, inaaj leļo̧k n̄an e ekkar n̄an naan ko aō; aaet, inaaj kappukot mej ilubwiljier m̧ae aer naaj owar kōn aenōm̧m̧an.

4 Im kiiō ālikin men kein ke Moronai eaar ba naan kein, eaar kōm̧m̧an bwe juon etale en kōm̧m̧an ilubwiljin em̧m̧aan ro an, bwe bōlen en maron̄ lo juon em̧m̧aan eo eaar bwijjin Leman ilubwiljier.

5 Im ālikin men kein raar lo juon, eo etan eaar Leman; im eaar ^ajuon iaan ro rikarejeran kiin̄ eo kar m̧ane jān pein Amalikaia.

6 Kiiō Moronai eaar kōm̧m̧an bwe Leman in juon oran eiiet in em̧m̧aan ro an ren ilo̧k n̄an ribaar ro kar ioon riNipai ro.

7 Kiiō riNipai ro kar baare er ilo jikin kwelo̧k in Gid; kōn menin Moronai eaar jitōn̄ Leman im kōm̧m̧an bwe oran eo eiiet in em̧m̧aan ro ren ilo̧k ippān.

8 Im ke eaar jota Leman eaar ilo̧k n̄an ribaar ro raar ioon riNipai ro, im lo, raar lo ej itok im raar lam̧ōje; a eba n̄an er: Kom̧in jab mijak; lo, n̄aij juon riLeman. Lo, kōm ar ko jān riNipai raņ, im rej kiki; im kōm ar bōk m̧ōttan wain eo aer im kar bōktok ippām.

9 Kiiō ke riLeman ro raar ron̄ naan kein raar karuwaineneik e kōn m̧ōņōņō; im rej ba n̄an e: Letok n̄an kōm m̧ōttan wain in am̧, bwe kōmin maron̄ idaak; kōmij m̧ōņōņō bwe kwaar āindein bōktok wain ippām bwe kōmij m̧ōk.

10 A Leman eba n̄an er: Jen kōjparok m̧ōttan wain in ad m̧ae ad ilo̧k ņae riNipai raņ n̄an pata. A ennaan in eaar kōm̧m̧an wōt an ļapļo̧k aer kōņaan idaak m̧ōttan wain eo;

11 Bwe rej ba: Kōm m̧ōk, kōn menin jen bōk m̧ōttan wain in, im ālikin jidik iien jenaaj bōk wain n̄an kōj ko ad, ko renaaj kōkajoorļo̧k kōj n̄an ilo̧k ņae riNipai raņ.

12 Im Leman eba n̄an er: Kom̧ maron̄ kōm̧m̧an ekkar n̄an kōņaan ko ami.

13 Im ālikin men kein raar bōk m̧ōttan wain eo ilo anemkwōj; im eaar enno̧ n̄an aer nemake, kōn menin raar bōk m̧ōttan eļapļo̧k ilo anemkwōj; im eaar kajoor, kōnke kar kōpooje n̄an kajoor eo an.

14 Im ālikin men kein raar idaak im kar lem̧ōņōņō, im ālikin jidik iien raar aolep kadek.

15 Im ke Leman im em̧m̧aan ro an raar lo bwe raar aolep kadek, im kar pād ilo kiki em̧wilaļ, raar ro̧o̧l n̄an Moronai im ba n̄an e aolep men ko raar waļo̧k.

16 Im kiiō men in eaar ekkar n̄an karōk an Moronai. Im Moronai eaar kōpooj em̧m̧aan ro an kōn kein tariņae ko n̄an pata; im eaar ilo̧k n̄an jikin kwelo̧k in Gid, ke riLeman ro raar pād ilo kiki em̧wilaļ im kadek, im juļo̧k kein tariņae ko n̄an rikalbuuj ro, jon̄an raar aolep pojak;

17 Aaet, em̧ool n̄an kōrā ro aer, im aolep ro kar nejier, jon̄an wōt lōn̄in ro raar maron̄ in kōjerbal juon kein tariņae, ke Moronai eaar kōpooj aolep rikalbuuj ro; im aolep men kein kar kōm̧m̧an ilo juon tōn̄tōn̄ in ikōn̄.

18 A eļan̄n̄e raar karuj riLeman ro, lo raar kadek im riNipai ro remaron̄ kar m̧an er.

19 A lo, men in eaar jab kōņaan eo an Moronai; im eaar jab itok-limo ilo uror ak kōto̧o̧rļo̧k ^abōtōktōk, a eaar itok-limo ilo lo̧mo̧o̧ren armej ro an jān ko̧kkure; im kōn un in eaar maron̄ jab bōktok ioon e jab wānōk, eaar jab wōtlo̧k ioon riLeman ro im ko̧kkure er ilo aer kadek.

20 A eaar tōprak kōņaan ko an; bwe eaar kōpooj rikalbuuj in riNipai ro raar pād ilowaan wōrwōr in jikin kwelo̧k eo, im kar leļo̧k n̄an er kajoor n̄an bōk aer m̧ōttan ko ilowaan wōrwōr ko.

21 Innām eaar kōm̧m̧an bwe em̧m̧aan ro ippān ren ruwaakļo̧k jidik jān er, im jepooļe jarin tariņae ko an riLeman ro.

22 Kiiō lo men in eaar kōm̧m̧an ke ej bon̄, bwe kōnke n̄e riLeman ro reruj ilo jibbon̄ rej lo bwe raar pooļ jān riNipai ro itulik im bwe rikalbuuj ro aer raar pojak itulowa.

23 Im āindein raar lo bwe riNipai ro eaar wōr aer kajoor ioer; im ilo jekjek kein raar lo bwe eaar jab juon mennin kōkajooror bwe ren kōpata ippān riNipai ro; kōn menin kapen ro reutiej aer raar kajjitōk kein tariņae ko aer, im raar būki m̧aanļo̧k im juļo̧k ineen riNipai ro, im owar kōn tūriam̧o.

24 Kiiō lo, en̄in eaar kōņaan eo an Moronai. Eaar bōk er rikalbuuj in tariņae, im bōk jikin kwelo̧k eo, im kōm̧m̧an bwe aolep rikalbuuj ro ren rōļo̧k, ro raar riNipai; im raar koba ippān jarin tariņae eo an Moronai, im kar kajoor eļap n̄an jarin tariņae eo an.

25 Im ālikin men kein eaar kōm̧m̧an bwe riLeman ro, ro eaar bōk er rikalbuuj, ren aikuj jino ^ajerbal in kōkajoorļo̧k kapenļo̧k ko ipeļaakin jikin kwelo̧k Gid.

26 Im ālikin men kein ke eaar dedeļo̧k an kapenļo̧k jikin kwelo̧k Gid, ekkar n̄an kōņaan ko an, eaar kōm̧m̧an bwe ro an rikalbuuj kar bōkļo̧k er n̄an jikin kwelo̧k Bun̄-pāļo̧k; im eaar barāinwōt baare jikin kwelo̧k eo kōn jar eo ekajoor otem kajoor.

27 Im ālikin men kein raar kōm̧m̧an, mekarta aolep kōttōbalbal ko an riLeman ro, im kōjparok aolep rikalbuuj ro raar bōk er, im barāinwōt dāpij aolep tōprak im em̧m̧an tam̧m̧we eo raar bar bōke.

28 Im ālikin men kein riNipai ro raar jino bar anjo̧ ilo pata, im n̄an bar bōk jim̧we ko aer im jeraam̧m̧an ko aer.

29 Elōn̄ iien riLeman ro raar kajjion̄ in jepooļe er ilo bon̄, a ilo kajjion̄ kein eaar mej elōn̄ aer rikalbuuj.

30 Im elōn̄ iien raar kajjion̄ in leļo̧k m̧ōttan wain eo aer n̄an riNipai ro, bwe ren maron̄ ko̧kkure er kōn unokan mej ak kōn kadek.

31 A lo, riNipai ro raar jab rum̧wij n̄an ^aememej Irooj aer Anij ilo tōre in ej iien aer en̄taan. Raar jab po ilo aujiid ko aer; raar jab bōk m̧ōttan wain eo aer, m̧ae aer kar m̧okta leļo̧k jet iaan riLeman ro rikalbuuj.

32 Im raar āindein uwōta bwe en ejjeļo̧k unokan mej kōjjeplōklōk ilubwiljier; bwe eļan̄n̄e wain eo aer en kar ko̧kkure juon riLeman enaaj kar ko̧kkure juon riNipai; im āindein raar mālejjon̄e aolep dān in grep ko aer.

33 Im kiiō ālikin men kein eaar mennin kōkajooror n̄an Moronai n̄an kōm̧m̧an m̧aanjāppopo ko n̄an kōm̧m̧alijar ņae jikin kwelo̧k Moriantōn; bwe lo, riLeman ro raar, jān jerbal ko aer, kapenļo̧k jikin kwelo̧k Moriantōn m̧ae an kar erom juon jikin tariņae epen otem pen.

34 Im raar bōktok jarin tariņae ko rekāāl n̄an jikin kwelo̧k eo, im barāinwōt mennin aikuj ko im m̧weiuk ko.

35 Im āindein eaar jem̧ļo̧k ron̄oul im ruwatimjuon iiō in iien tōl an riekajet ro ioon armej in Nipai.