1 Kiiō nejū m̧aan, en̄in ej ļapļo̧k in ijo Ikōņaan ba n̄an eok; bwe ij kile bwe ļōmņak eo am̧ ej inepata kōn jerkakpeje an ro remej.

2 Lo, ij ba n̄an eok, bwe ejjeļo̧k jerkakpeje—ak, in ba, ilo juon wāween ba, bwe ānbwinnin kanniōk in ej jab kōņak ^amour indeeo, ijurwewe in ej jab ^bkōņak jab ijurwewe—^cm̧ae ālikin itok eo an Kraist.

3 Lo, E ej kōm̧m̧an bwe en itok ^ajerkakpeje an ro remej. A lo, nejū m̧aan, jerkakpeje eo ej jan̄in ilo iien in. Kiiō, ij erļo̧ke n̄an eok juon mennin ittino; mekarta, elōn̄ļo̧k ^bmennin ittino ko ^crekoņ, bwe ejjeļo̧k en jeļā kake er ijello̧kun wōt Anij make. A ij kwaļo̧k n̄an eok juon men eo iaar niknik akweļap kake n̄a Anij bwe in maron̄ jeļā—men in ej kōn jerkakpeje.

4 Lo, ewōr juon iien karōke n̄e aolep naaj ^aitok jān mej. Kiiō n̄āāt iien in ej itok ejjeļo̧k juon ejeļā; a Anij ejeļā iien eo karōke.

5 Lo, eļan̄n̄e enaaj wōr juon iien, ak bar juon iien kein ^akaruo, a iien kein kajilu, bwe armej naaj itok jān mej, ejjab aorōk; bwe Anij E ^bjeļā aolep men kein; im ebwe wōt n̄an aō jeļā bwe en̄in ej wāween eo—bwe ewōr juon iien karōke bwe aolep naaj jerkak jān ro remej.

6 Kiiō eaikuj bwe en kar wōr jidik iien ikōtaan iien mej im iien an jerkakpeje.

7 Im kiiō ij kōņaan kajjitōk ta jekjekin ^ajetōb ko an armej jān iien mej in n̄an iien eo karōke n̄an jerkakpeje eo?

8 Kiiō eļan̄n̄e ak jab elōn̄ļo̧k jān juon iien karōke n̄an armej n̄an jerkak ej jab aorōk; bwe aolep rejjab mej ilo juon wōt iien, im men in ejjab aorōk; aolep ej āinwōt juon raan ippān Anij, im iien wōt jon̄e n̄an armej.

9 Kōn menin, ewōr juon iien karōke n̄an armej bwe renaaj jerkak jān ro remej; im ewōr juon iien ikōtaan iien mej im jerkakpeje eo. Im kiiō, kōn iien jidik in, ta jekjekin jetōb ko an armej ej men eo iaar niknik akweļap kake jān Irooj n̄an jeļā; im en̄in ej men eo ijeļā.

10 Im n̄e iien eo ej itok n̄e aolep naaj jerkak, innām renaaj jeļā bwe Anij E jeļā aolep ^aiien ko karōki n̄an armej.

11 Kiiō, kōn ļamļam in jetōb eo ikōtaan ^amej im jerkakpeje eo—Lo, kar kwaļo̧k n̄an eō jān juon enjeļ, bwe jetōb ko an aolep armej, ilo wōt iien eo rej ilo̧k jān ānbwinnin kanniōk in, aaet, jetōb ko an aolep armej, mekarta n̄e rem̧m̧an ak nana, rej ilo̧k n̄an ^bjikier n̄an Anij eo eaar leļo̧k n̄an er mour.

12 Innām ālikin men kein, jetōb ko an ro raar jim̧we naaj bōk er ilo juon mejatoto in ^am̧ōņōņō, eo ņa etan ^bparedais, juon mejatoto in ^ckakkije, juon mejatoto in ^daenōm̧m̧an, ijo renaaj kakkije jān aolep inepata ko aer im jān aolep ailparo, im būrom̧ōj.

13 Innām ālikin men kein, jetōb ko an ro renana, aaet, ro rejero̧wiwi—bwe lo, ejjeļo̧k aer m̧ōttan im jidikin Jetōb eo an Irooj; bwe lo, raar kāālet jerbal ko renana im jab ko rem̧m̧an; kōn menin jetōb eo an devil eaar deļo̧n̄ ilo er, im bōk bwe an m̧weo im̧weer—im rein naaj joļo̧k er ilo ^akapin marok; ijo naaj ^bjan̄, im lim̧ō, im n̄i ļaļļaļ, im men in kōnke nana eo aer make, kōnke rej jipo̧kwe kōn ankilaan devil.

14 Kiiō en̄in jekjek in jetōb ko an ro ^arenana, aaet, ilo marok, im juon jekjek enana, ^brōkaammijak kōn kwi ekakijeekek in libabne an Anij ioer; āindein rej pād wōt ilo ^cjekjek in, ejja āinwōt ro rejim̧we ilo paredais, m̧ae iien aer jerkakpeje.

15 Kiiō, ewōr jet ro raar meļeļe bwe mejatoto in m̧ōņōņō in im mejatoto in būrom̧ōj in an jetōb, m̧okta jān jerkakpeje, eaar jerkakpeje eo m̧oktata. Aaet, ij kwaļo̧k bwe emaron̄ etan jerkakpeje, jerkak in jetōb ak an im bakajjeer n̄an m̧ōņōņō ak būrom̧ōj, ekkar n̄an naan ko kar kōnono.

16 Im lo, bar juon alen ekar bar kōnono, bwe ewōr juon ^ajerkakpeje ^bm̧oktata, jerkakpeje eo an aolep ro raar, ak ro rej, ak ro renaaj, laļļo̧k n̄an jerkakpeje eo an Kraist jān ro remej.

17 Kiiō, jen jab ļōmņak bwe jerkakpeje in m̧oktata, eo kōnono kake ilo wāween in, jerkakpeje eo an jetōb ko im aer ^abakajjeer n̄an m̧ōņōņō ak būrom̧ōj. Kwōn jab ļōmņak bwe en̄in meļeļein.

18 Lo, ij ba n̄an eok, Jaab; a meļeļein ej bar koba in jetōb eo ippān ānbwin eo, an ro jān raan ko an Adam laļtak n̄an ^ajerkakpeje eo an Kraist.

19 Kiiō, eļan̄n̄e ak jab jetōb ko an ānbwinnin ro kar kōnono kake naaj aolep bar koba ilo juon wōt alen, ro renana ejja āinwōt ro rejim̧we, ijjab ba; ebwe in, bwe ij ba bwe rej aolep jerkak; ak ilo bar juon wāween ba, jerkakpeje eo aer ej kūrm̧ool ^am̧okta jān jerkakpeje an ro raar mej ālikin jerkakpeje eo an Kraist.

20 Kiiō, nejū m̧aan, ijjab ba bwe jerkakpeje eo aer ej itok ilo jerkakpeje eo an Kraist; a lo, ij lewōj āinwōt juon aō ļōmņak, bwe jetōb ko im ānbwin ko rej bar koba, an ro rem̧m̧an, ilo jerkakpeje an Kraist, im ^aweaakļo̧k eo An n̄an lan̄.

21 A eļan̄n̄e ak jab enaaj ilo jerkakpeje eo An ak ālikin, ijjab ba; a jon̄an in ij ba, bwe ewōr jidik ^aiien ikōtaan mej im jerkakpeje an ānbwin, im jekjek eo an jetōb ilo ^bm̧ōņōņō ak ^cbūrom̧ōj m̧ae iien eo jitōn̄ jān Anij bwe ro remej ren jerkak, im bar koba, jim̧or jetōb im ānbwin, am̧ ^dbōktok n̄an jutak im̧aan Anij, im ekajet ekkar n̄an jerbal ko aer.

22 Aaet, men in ej bōktok jepļaaktok in men ko kar kōnono jān lo̧n̄iin rikanaan ro.

23 Im ^ajetōb naaj bar ^bjepļaakļo̧k n̄an ^cānbwin eo, im ānbwin eo n̄an jetōb eo; aaet im aolep ra im mo̧kwōj naaj bar jepļaak n̄an ānbwin eo an; aaet, em̧ool juon kooļ in bar naaj jamin jako; a aolep men kein naaj bar jepļaak n̄an jekjek im ļamļam eo eweeppān aer.

24 Im kiiō, nejū m̧aan, en̄in ej jepļaaktok eo kar ^akōnono kake jān lo̧n̄iin rikanaan ro—

25 Innām ro rem̧m̧an naaj romaakļo̧k ilo aelōn̄ in Anij.

26 A lo, ^amej eo enana ej itok ioon ro renana; bwe rej mej āinwōt n̄an men ko rej uwaanļo̧k wōt weeppān; bwe rej ettoon, im ejjeļo̧k ^bmen ettoon emaron̄ jolōte aelōn̄ in Anij; a rej juļo̧k er, im ba kajjier n̄an bōk leen jerbal ko aer ak kōm̧m̧an ko aer, ko raar nana; im rej idaak lūm ko an kap emeo̧.