1 Im ālikin men kein riNipai ro raar jab ^amej jān kein tariņae ko in pata, ālikin kar kalbwin ro raar mej—kiiō oran eo eaar mej kar jab bwine, kōnke jon̄an ļap in oran eo aer—ālikin aer kar kalbwin rimej ro aer raar aolep ro̧o̧l n̄an āneo āneer, im n̄an im̧ōko im̧weer, im kōrā ro pāleer, im ro nejier.

2 Kiiō elōn̄ kōrā im ajri raar mej kōn jāje, im barāinwōt elōn̄ aer bwijin in kidu ko rellōn̄ im ko reddik; im barāinwōt meļaaj in ine ko kar ko̧kkuri, bwe raar jujuri kōn bwijin elōn̄ armej.

3 Im kiiō jon̄an lōn̄ in riLeman ro im riAmlijai ro kar m̧an er ioon kappe in reba Sidon kar joļo̧k ilo ^adān ko in Sidon; im lo di ko dier rej ilo m̧wilaļ ko in ^blo̧jet, im er rellōn̄.

4 Im ^ariAmlijai ro raar alikkar jān riNipai ro, bwe raar ^bkakōļļeik er kōn būrōrō idam̧aer ilo ejja wāween wōt riLeman ro; mekarta raar jab āl bōraer āinwōt riLeman ro.

5 Kiiō bōran riLeman ro raar āl; im raar ^akeelwaan, ijello̧kun wōt kilier ilo peļaakin ipier, im barāinwōt kein tariņae ko aer, eo eaar pen ipeļaakier, im lippo̧ņ ko aer, im m̧ade in lippo̧ņ ko aer, im dekā ko aer, im buwat ko aer, im men ko āierļo̧k wōt.

6 Im kilin riLeman ro raar marok, ekkar n̄an kakōļļe eo kar likūt ioon ro jemāer, eo eaar juon ^alia ioer kōnke aer bōd im jum̧ae ro jeir im jatier, ro raar kitbuuj Nipai, Jekab, im Josep, im Sam, ro raar armej jim̧we im ekwōjarjar.

7 Im ro jeir im jatier raar pukot n̄an ko̧kkure er, kōn menin raar lia; im Irooj Anij eaar likūt juon ^akakōļļe ioer, aaet, Leman im Lemuel, im barāinwōt ļōm̧aro nejin Ishmael, im kōrā in Ishmael ro.

8 Im men in eaar kōm̧m̧an bwe ro ineer en maron̄ jenolo̧k jān ineen ro jeir im jatier, bwe ilo wāween in Irooj Anij en maron̄ oņaake armej ro An, bwe ren maron̄ jab ^akoba im tōmak ilo ^bm̧anit ko rebōd ko renaaj kar kam̧ool ko̧kkure eo aer.

9 Im ālikin men kein jabdewōt eo enaaj kobaik ineen ippān eo ineen riLeman ro eaar bōktok ejja lia in wōt ioon ineen.

10 Kōn menin, jabdewōt eo eaar kōtļo̧ke bwe riLeman ro ren tōlļo̧ke kar kūri ium̧win bar eo im eaar wōr juon kakōļļe likūt ioon.

11 Im ālikin men kein jabdewōt eo eaar jab tōmak ilo ^am̧anit ko an riLeman ro, ak eaar tōmak ļo̧o̧k ko kar būkitok jān āneen Jerusalem, im barāinwōt ilo m̧anit ko an ro jemāer, ko raar jim̧we, ro raar tōmak ilo kien ko an Anij im kōjparoki, kar kūr er riNipai, ak armej in Nipai, jān iien eo m̧aanļo̧k—

12 Im ej er ro raar kōjparok ļo̧o̧k ko ^arem̧ool kōn armej ro aer, im barāinwōt kōn armej in riLeman ro.

13 Kiiō jenaaj bar ro̧o̧l n̄an riAmlijai ro, bwe kar bar likūt juon ^akakōļļe ioer; aaet, raar likūt kakōļļe eo ioer make, aaet, em̧ool juon kakōļļe in būrōrō ioon dam̧aer.

14 Āindein naan eo an Anij eaar kūrm̧ool, bwe erkein naan ko Eaar ba n̄an Nipai: Lo, riLeman ro Iaar kalia, im Inaaj likūt juon kakōļļe ioer bwe er im ineer en maron̄ jepel jān kwe im ineem, jān iien im wōnm̧aanļo̧k im indeeo, ijello̧kun wōt n̄e rej ukeļo̧k jān aer nana im ^aoktak tok n̄an Eō bwe en wōr Aō tūriam̧okake ioer.

15 Im bar juon alen: Inaaj likūt juon kakōļļe ioon eo enaaj kobaik ineen ippān ro jeiūm̧ im jatūm̧, bwe ren maron̄ lia barāinwōt.

16 Im bar juon alen: Inaaj likūt juon kakōļļe ioon eo ej jum̧ae eok im ro ineem.

17 Im bar juon alen, Ij ba bwe eo ej diwōjļo̧k jān kwe jamin bar kūr e ineem; im Inaaj kōjeraam̧m̧an eok, im jabdewōt eo naaj kūr e ineem, jān kiiō im indeeo; im erkein kar kallim̧ur ko an Irooj n̄an Nipai im ineen.

18 Kiiō riAmlijai ro raar jab jeļā bwe raar kakūrm̧ool naan ko an Anij ke raar jino kakōļļeik er make ilo dam̧aer; mekarta raar jab ņooj aer ^ajum̧ae Anij; kōn menin eaar juon jejjet bwe lia eo en wōtlo̧k ioer.

19 Kiiō ikōņaan bwe kom̧in lo bwe raar bōktok ioer ^alia eo; im em̧ool jabdewōt armej eo kaliaik e ej bōktok ioon make liaakeļo̧k eo an.

20 Kiiō ālikin men kein ejjab lōn̄ raan ko m̧ōj in pata eo kar kōm̧m̧ane ilo āneen Zaraemla, jān riLeman im riAmlijai ro, bwe eaar bar wōr juon jarin tariņae an riLeman ro eaar itok ioon armej ro an Nipai, ilo ^aejja jikin eo wōt ijo jarin tariņae eo m̧okta eaar iioon riAmlijai ro.

21 Im ālikin men kein eaar wōr juon jarin tariņae kar jilkinļo̧k n̄an lukwarkwareļo̧k er jān āneo āneer.

22 Kiiō Alma make kōnke eaar en̄taan kōn ^akinej eo an eaar jab wanlōn̄ļo̧k n̄an pata ilo iien in ņae riLeman ro.

23 A eaar jilkinlaļļo̧k juon jarin tariņae eļap ņae er; im raar wanlōn̄ļo̧k im m̧an elōn̄ iaan riLeman ro, im lukwarkware bweier jān tōrerein ko an āneo āneer.

24 Im raar bar ro̧o̧l im jino kajutak aenōm̧m̧an ilo āneo, kōnke eaar jab poub ium̧win jidik iien ippān rikōjdat ro aer.

25 Kiiō aolep men kein raar kōm̧m̧an, aaet, aolep tariņae im aitwerōk kein raar jino im jem̧ļo̧k ilo iiō eo kein kaļalem in iien tōl ko an riekajet ro.

26 Im ilo juon iiō to̧ujin ko im jon̄oul to̧ujin ko in armej kar jilkinļo̧k er n̄an laļ eo ejjeļo̧k jem̧ļo̧kin, bwe ren maron̄ m̧adm̧ōde ^ajinōkjej ko aer ekkar n̄an jerbal ko aer, n̄e raar em̧m̧aan ak n̄e raar nana, n̄an m̧adm̧ōde lan̄lōn̄ indeeo ak būrom̧ōj indeeo, ekkar n̄an jetōb eo raar kāālet n̄an pokake, n̄e e juon jetōb em̧m̧an ak juon jetōb enana.

27 Bwe jabdewōt armej ej bōk ^awōņāān jān wōn eo ej kāālet n̄an ^bpokake, im men in ekkar n̄an naan ko in jitōbōn kanaan; kōn menin en ekkar n̄an m̧ool eo. Im āindein ej jem̧ļo̧k iiō eo kein kaļalem in iien tōl an riekajet ro.