1 Im lo, kiiō ālikin men kein kōttōpar eo an tokālik eaar n̄an bōk jikin kwelo̧k in Mantai; bwe lo, ejjeļo̧k iaļ kōm ar maron̄ kaalļo̧k er jān jikin kwelo̧k eo kōn kumi ko reddik am. Bwe lo, raar keememej men ko kōm kar m̧oktaļo̧k kōm̧m̧ani; kōn menin kōm ar jab maron̄ ^aaneļo̧k er jān jikin tariņae ko reppen aer.

2 Im raar kanooj lōn̄ļo̧k jān kar jarin tariņae eo am bwe kōmin kar ekkōl in jab wōnm̧aanļo̧k im m̧urm̧uriļo̧k er ilo jikin tariņae ko reppen aer.

3 Aaet, eaar erom mennin aikuj bwe kōmin kōjerbal em̧m̧aan ro am n̄an dāpij m̧ōttan ko in āneo kōm kar bar būki im rej jikūm̧, kōn menin eaar erom mennin aikuj bwe kōmin kōttar, bwe kōmin maron̄ bōk eļapļo̧k kajoor jān āneen Zaraemla im barāinwōt juon kakke in mennin aikuj ko.

4 Im ālikin men kein eaar āindein iaar jilkinļo̧k juon rikōnono n̄an prokonsōl eo an āneo āneem, n̄an kōjjeļāik e kōn jekjek ko an armej ro am. Im ālikin men kein, kōm ar kōttar n̄an bōk mennin aikuj ko im kajoor jān āneen Zaraemla.

5 Ak lo, men in eaar jipan̄ kōm jidik wōt; bwe riLeman ro raar barāinwōt bōk eļap kajoor jān raan n̄an raan, im barāinwōt elōn̄ mennin aikuj ko; im āindein raar wāween ko am ilo tōre in.

6 Im riLeman ro raar kōm̧m̧alijar ņae kōm jān iien n̄an iien, im kāālet jān kōttōbalbal n̄an ko̧kkure kōm; mekarta kōm ar jab maron̄ itok n̄an kōpata deļo̧n̄, kōnke likōpejn̄ak ko aer im jikin tariņae ko aer reppen.

7 Im ālikin men kein kōm ar kōttar ilo jekjek kein reppen ium̧win elōn̄ allōn̄ ko, em̧ool m̧ae ke kōm ar nan̄in itōn jako kōn ikdeelel kōn kanooj.

8 Ak ālikin men kein kōm ar bōk kijōm m̧ōn̄ā, ko kar baare tok n̄an kōm jān jarin tariņae eo an ruo to̧ujin em̧m̧aan n̄an jipan̄ eo am; im en̄in ej aolep jipan̄ eo kōm ar bōke, n̄an jojomar kōn kōm make im laļ eo am jān wōtlo̧k ilo pein rikōjdat ro am, aaet, n̄an pata ippān rikōjdat eo eaar kanooj bwijlep.

9 Im kiiō unjān kajjookok kein am, ak un eo etke raar jab jilkintok eļapļo̧k kajoor n̄an kōm, kōmij jab jeļā; kōn menin kōm ar būrom̧ōj im barāinwōt obrak kōn lōļn̄o̧n̄, n̄e ab jān jabdewōt wāween ekajet ko an Anij enaaj kar itok ioon āneo āneem, n̄an joļo̧k kōm im tōn̄tōn̄ in ko̧kkure eo am.

10 Kōn menin kōm ar lutōkleplepļo̧k būruōm̧ ilo jar n̄an Anij, bwe E en kar kōkajoor kōm im lo̧mo̧o̧ren kōm jān pein ro am rikōjdat, aaet, im barāinwōt letok n̄an kōm kajoor bwe kōmin maron̄ dāpij wōt jikin kwelo̧k ko am, im bwidej ko am, im men ko m̧weiōm̧, n̄an rejetake eo an armej ro am.

11 Aaet, im ālikin men kein Irooj am Anij eaar lotok kōm kōn kabab-laļ ko bwe Enaaj lo̧mo̧o̧ren kōm; aaet, jon̄an bwe Eaar kōnono aenōm̧m̧an n̄an jetōb ko am, im kar letok n̄an kōm eļap tōmak, im kar kōm̧m̧an bwe kōmin kōjatdikdik kōn lo̧mo̧o̧ren eo am ilo E.

12 Im kōm ar bōk peran kōn jarin tariņae eo edik am eo kōm ar bōk e, im kar jek kōn juon kōttōpar n̄an anjo̧ ioon rikōjdat ro am, im n̄an ^adāpij wōt bwidej ko am, im men ko m̧weiōm̧, im kōrā ro pāleem̧, im ro nejim, im jibadbad eo n̄an am ^banemkwōj.

13 Im āindein kōm ar wōnm̧aanļo̧k kōn aolep am maron̄ ņae riLeman ro, ro raar pād ilo jikin kwelo̧k in Mantai; im kōm ar kajutak im̧ōn kōppād ko am iturin tōrerein āne jem̧aden eo, eo eaar epaakeļo̧k jikin kwelo̧k eo.

14 Im ālikin men kein ilo raan eo ilju, ke riLeman ro raar lo bwe kōm ar pād iturin tōrerein ko an āne jem̧aden eo eo eaar epaakeļo̧k jikin kwelo̧k eo, bwe raar jilkinļo̧k riiaron̄ron̄ ro aer ipeļaakin ijo kōmij pād ie bwe ren maron̄ etale oran im kajoor in jarin tariņae eo am.

15 Im ālikin men kein ke raar lo bwe kōm ar jab kajoor, ekkar n̄an oran eo am, im kōnke raar mijak n̄e kōmin kar m̧wijitļo̧k er jān rejetake eo aer ijello̧kun n̄e rej itok im pata ņae kōm im m̧an kōm, im barāinwōt kōnke raar ļōmņak bwe ren kar pidodo aer ko̧kkure kōm kōn inelep ko aer rellōn̄, kōn menin raar jino kōm̧m̧ani m̧aanjāppopo ko n̄an itok ņae kōm n̄an pata.

16 Im ke kōm ar lo bwe raar kōm̧m̧ani m̧aanjāppopo ko n̄an itok ņae kōm, lo, iaar kōm̧m̧an bwe Gid, ippān juon oran edik in em̧m̧aan ro, en tilekek e ilo āne jem̧aden, im barāinwōt bwe Teomner im juon oran edik in em̧m̧aan ro ren tilekekļo̧k barāinwōt ilo āne jem̧aden eo.

17 Kiiō Gid im em̧m̧aan ro an raar pād ianbwijmaron̄ im ro jet ianmiin̄; im ke raar tilekekļo̧k, lo, iaar pād wōt, ippān bwe eo an jarin tariņae eo aō, ilo ejja ijo wōt jaar kalōk im̧ōn kōppād ko ad im pojak ņae iien eo riLeman ro ren kar itok im kōpata.

18 Im ālikin men kein riLeman ro raar diwōjtok kōn jarin tariņae eo aer ebwijlep ņae kōm. Im ke raar itok im kar nan̄in itōn wōtlo̧k ioom̧ kōn jāje eo, iaar kōm̧m̧an bwe em̧m̧aan aō, ro raar pād ippa, ren jenlikļo̧k ilo āne jem̧aden eo.

19 Im ālikin men kein riLeman ro raar ļoorļo̧k kōm kōn m̧ōkaj eļap, bwe raar kōņaan otem kōņaan bwe ren jibwe kōm bwe ren maron̄ m̧an kōm; kōn menin raar ļoor kōm ļo̧k ilo āne jem̧aden; im kōm ar eļļāļo̧k ioļapļap in Gid im Teomner, jon̄an riLeman ro raar jab lo er.

20 Im ālikin men kein ke riLeman ro raar eļļāļo̧k, ak ke jarin tariņae eo eaar eļļāļo̧k, Gid im Teomner raar jutakļo̧k jān jikin tilekek ko aer, im kar bukweļo̧k riiaron̄ron̄ ro an riLeman ro bwe ren jab ro̧o̧lļo̧k n̄an jikin kwelo̧k eo.

21 Im ālikin men kein ke eaar m̧ōj aer bukweļo̧k er, raar ettōrļo̧k n̄an jikin kwelo̧k eo im wōtlo̧k ioon ribaar ro kar likūt er n̄an baare jikin kwelo̧k eo, jon̄an raar ko̧kkure er im bōk aer jikin kwelo̧k eo.

22 Kiiō men in eaar waļo̧k kōnke riLeman ro raar kōtļo̧k aolepān jarin tariņae eo aer, ijello̧kun wōt jet ribaar wōt, n̄an tōlļo̧k er ilo āne jem̧aden eo.

23 Im ālikin men kein Gid im Teomner jān wāween in raar bōk jikin tariņae ko reppen aer. Im ālikin men kein kōm ar etal ilo iaļ eo am, ālikin kar ito-itak eļap ilo āne jem̧aden eo ļo̧k n̄an āneen Zaraemla.

24 Im ke riLeman ro raar lo bwe rej ilo̧k n̄an āneen Zaraemla, raar mijak otem mijak, n̄e ab wōr juon karōk kōpooje n̄an tōlļo̧k er n̄an ko̧kkure; kōn menin raar jino bar koļo̧k ilo āne jem̧aden eo, aaet, em̧oolļo̧k ilo ejja iaļ eo wōt raar itok ie.

25 Im lo, eaar bon̄ im raar kajutak im̧ōn kōppād ko aer, bwe kapen utiej ro an riLeman ro raar ļōmņak bwe riNipai ro raar mōk kōnke etetal eo aer; im kar ļōmņak bwe raar lukwarkwareļo̧k aolepān jarin tariņae eo aer kōn menin eaar ejjeļo̧k aer ļōmņak kōn jikin kwelo̧k in Mantai.

26 Kiiō ālikin men kein ke eaar bon̄, iaar kōm̧m̧an bwe em̧m̧aan ro aō ren jab kiki, a bwe ren etetalļo̧k ilo bar juon iaļ n̄an āneen Mantai.

27 Im kōnke etetal in am ilo iien bon̄, lo, ilo raan eo ilju kōm ar ellāļo̧k jān riLeman ro, jon̄an kōm ar tōprakļo̧k im̧aer ilo jikin kwelo̧k in Mantai.

28 Im āindein, ālikin men kein, bwe jān kōttōbalbal in kōm ar bōk jikin kwelo̧k in Mantai ilo ejjeļo̧k kōto̧o̧rļo̧k bōtōktōk.

29 Im ālikin men kein ke jarin tariņae ko an riLeman ro raar tōprak tok iturin jikin kwelo̧k eo, im lo bwe kōm ar pojak n̄an iioon er, raar bwilōn̄ otem bwilōn̄ im kar im̧ōk er kōn eļap mijak, jon̄an raar koļo̧k ilo āne jem̧aden.

30 Aaet, im ālikin men kein riLeman ro raar koļo̧k jān aolepān m̧ōttan in ilo āneo. A lo, raar bōkļo̧k elōn̄ kōrā im ajri ro jān āneo.

31 Im ^ajikin kwelo̧k ko riLeman ro rekar būki, aolepāer rej ilo iien in am; im ro jemām im kōrā ro am im ro nejim rej ro̧o̧l n̄an m̧ōko im̧weer, aolepāer ijello̧kun wōt ro kar bōk er rikalbuuj im riLeman ro raar bōk er.

32 A lo, jarin tariņae ko am reddik n̄an dāpij elōn̄ oran jikin kwelo̧k ko im ijoko jikim̧ reļļap.

33 A lo, kōmij kōjatdikdik ilo am Anij eo eaar letok am anjo̧ ioon bukwōn kein, jon̄an kōm ar bōk jikin kwelo̧k kein im bukwōn kein, ko raar jikūm̧ make.

34 Kiiō kōmij jab jeļā un eo bwe kien eo en jab letok n̄an kōm eļapļo̧k kajoor; im barāinwōt jaab ļōm̧aro raar wanlōn̄tak n̄an ippām jeļā etke kōm ar jab bōk eļapļo̧k kajoor.

35 Lo, kōmij jab jeļā ak ta kwōj jab tōprak, im kwaar kaalļo̧k jarin tariņae ko n̄an m̧ōttan eo in āneo; eļan̄n̄e āindein, kōmij jab kōņaan aln̄ūrn̄ūr.

36 Im eļan̄n̄e ejjab āindein, lo, kōmij mijak bwe ewōr ^ajum̧ae ilo kien eo, bwe rejjab jilkintok elōn̄ļo̧k em̧m̧aan n̄an ad rejetak; bwe jejeļā bwe rej lōn̄ļo̧k jān ro raar jilkintok.

37 A, lo, ej jab aorōk—kōmij lōke Anij enaaj ^alo̧mo̧o̧ren kōm, mekarta m̧ōjņo̧ an jarin tariņae ko am, aaet, im lo̧mo̧o̧ren kōm jān pein rikōjdat ro am.

38 Lo, en̄in ej ron̄oul im ruwatimjuon iiō, ilo jem̧ļo̧kļo̧k in, im kōmij bōk āne ko āneem; im riLeman ro raar ko n̄an āneen Nipai.

39 Im ļōm̧aro nejin armej in Ammōn, ro iaar kōnono kake er ilo utiej, rej pād ippa ilo jikin kwelo̧k in Mantai; im Irooj Eaar rejetake er, aaet, im kar kōjparok er jān wōtlo̧k jān jāje eo, jon̄an bwe em̧ool ^aejjeļo̧k juon kar m̧ane.

40 A lo, raar bōk elōn̄ kinej ko; mekarta rej jutak pen ilo ^aanemkwōj eo Anij eaar kaanemkwōj er kake; im rej niknik ilo keememej Irooj aer Anij jān raan n̄an raan; aaet, rej lale n̄an kōjparok naan in kain̄i ko An, im ekajet ko An, im kien ko An iien otemjej; im aer tōmak epen ilo kanaan ko kōn men eo ej itok.

41 Im kiiō, eo jeiū im jatū jitōnbōro, Moronai, Irooj ad Anij en, Eo eaar lo̧mo̧o̧ren kōj im kaanemkwōj kōj, kōjparok eok iien otemjej ilo im̧aan mejān; aaet, E en jouj n̄an armej ro An, em̧ool bwe kom̧in maron̄ lo jeraam̧m̧an ilo bōk aolepān ijoko ami im riLeman ro raar būki jān kōj, ko eaar n̄an ad rejetak. Im kiiō, lo, ij kiili lōta in aō. N̄aij Hilamōn, ļeo nejin Alma.