1 Im kiiō, nejū m̧aan, ij kile ke ej ļap wōt ijo kwōj inepata kake ilo koļmānļo̧kijeņ eo am̧, eo kwōj jab maron̄ meļeļe—eo ej kōn jim̧we an Anij ilo kaje ro rej rijero̧wiwi, bwe kwōj kajjion̄ ļōmņak bwe ebōd bwe rijero̧wiwi en aikuj ba kajjien n̄an juon mejatoto in būrom̧ōj.

2 Kiiō lo, em̧m̧aan ro nejū, inaaj kōmmeļeļeik men in n̄an eok. Bwe lo, ālikin Irooj Anij eaar jilkinļo̧k ro jemād im jined m̧okta jān jikin kallib Iden, n̄an kalbwin laļ, jān ijo kar bōk er jāne—aaet, Eaar kōm̧akūt armej eo, im E eaar likūt ņa iturear in jikin kallib Iden, kerub ko, im jāje eo eurur eo eaar ukoktak ijo, n̄an baare wōjke in mour—

3 Kiiō, jej lo bwe armej eo eaar erom āinwōt Anij, jeļā em̧m̧an im nana; im n̄e eab erļo̧ke pein, im bōk barāinwōt leen wōjke in mour, im m̧ōn̄ā im mour n̄an indeeo, Irooj Anij eaar likūt kerub ko im jāje eo eurur, bwe e en maron̄ jab bōk leen—

4 Im āindein jej lo, bwe eaar wōr juon iien kar leļo̧k n̄an armej n̄an ukeļo̧k, aaet, juon iien mālejjon̄, juon iien n̄an ukeļo̧k im jerbal n̄an Anij.

5 Bwe lo, eļan̄n̄e Adam eaar erļo̧ke pein iien eo wōt, im kar bōk leen wōjke in mour, enaaj kar mour indeeo, ekkar n̄an naan eo an Anij, im enaaj kar ejjeļo̧k eaar iien n̄an ukeļo̧k; aaet, im barāinwōt naan an Anij enaaj kar waan, im karōk in lo̧mo̧o̧r eļap en kar jej tokjān.

6 A lo, eaar karōke n̄an armej n̄an mej—kōn menin, āinwōt ke raar jepelļo̧k jān wōjke in mour rej aikuj jepelļo̧k jān mejān laļ—im armej ej jebwābwe indeeo, aaet, rej erom armej ro rebun̄.

7 Im kiiō, kwōj lo jān men in bwe ro jemād im jined raar jepelļo̧k jim̧or ilo kanniōk im ilo jetōb jān im̧aan mejān Irooj; im āindein jej lo bwe raar erom ro rej ļoorļo̧k ankilaer make.

8 Kiiō lo, eaar jab mennin aikuj bwe en bar wiaiki armej jān mej in ilo kanniōk, bwe men in enaaj kar ko̧kkure karōk in m̧ōņōņō eļap.

9 Kōn menin, āinwōt jetōb ejjāmin mej, im bun̄ eo eaar bōktok ioon armej otemjeļo̧k juon mej ilo kanniōk āinwōt bar juon mej ilo kanniōk, en̄in bwe, raar jepelļo̧k jān im̧aan mejān Irooj, eaar mennin aikuj bwe armej ren bar wiaiki er jān mej in ilo jetōb.

10 Kōn menin, āinwōt raar erom mennin kanniōk, m̧ōm̧ ko, im ridevil, jān biktokier, iien mālejjon̄ in eaar erom iien eo n̄an er n̄an m̧aanjāppopo; eaar erom iien mālejjon̄.

11 Im kiiō kwōn keememej, nejū m̧aan, eļan̄n̄e en kar jab karōk in lo̧mo̧o̧r, (ijello̧kun wōt e) ilo iien eo wōt rej mej jetōb ko aer renaaj kar kabbūrom̧ōjm̧ōj, kōnke renaaj kar jepelļo̧k jān im̧aan mejān Irooj.

12 Im kiiō, eaar ejjeļo̧k wāween ko n̄an bar wiaiki armej jān mejatoto in bun̄ļo̧k in, eo armej eaar bōktok ioon make kōn an jab pokake.

13 Kōn menin, ekkar n̄an jim̧we, karōk in lo̧mo̧o̧r maron̄ kar jab kūrm̧ool, ak ioon wōt men ko an ukeļo̧k in armej ilo iien mālejjon̄ in, aaet, iien mālejjon̄ in; bwe eļan̄n̄e eaar jab men kein, tūriam̧o ejjāmin kar jejjet kūtien n̄e jab naaj ruprupe jerbal an jim̧we. Kiiō jerbal in jim̧we ejjāmin rup; eļan̄n̄e āindein, Anij en kar jab Anij.

14 Im āindein jej lo bwe armej otemjeļo̧k raar wōtlo̧k, im raar pād ilo lokjak an kien; aaet, kien an Anij, eo ej ba kajjier indeeo n̄an jepelļo̧k jān im̧aan mejān.

15 Im kiiō, karōk in tūriam̧okake ejjāmin kar kūrm̧ool ijello̧kun n̄e pinmuur eo en kar jab kōm̧m̧an; kōn menin, Anij make Eaar pinmuur kōn jero̧wiwi ko an laļ, n̄an kakūrm̧ool karōk in tūriam̧o kake, n̄an medek akweļap ko an kien, bwe Anij en maron̄ wānōk, Anij in jim̧we, im Anij in tūriam̧o kake barāinwōt.

16 Kiiō, ukeļo̧k ejjāmin kar itok n̄an armej ijello̧kun n̄e eaar wōr juon kaje, eo eaar barāinwōt ejjeļo̧k jem̧ļo̧kin āinwōt mour eo an jetōb ej, ekkejelļo̧k n̄an karōk in m̧ōņōņō, eo eaar barāinwōt ejjeļo̧k jem̧ļo̧kin āinwōt mour eo an jetōb.

17 Kiiō, ekōjkan an juon armej ukeļo̧k eļan̄n̄e ej jab jero̧wiwi? Ekōjkan an jero̧wiwi eļan̄n̄e eaar ejjeļo̧k kien? Ekōjkan eaar wōr juon kien eļan̄n̄e ejjeļo̧k juon kaje?

18 Kiiō, eaar wōr juon kaje ej ekkejel, im juon kien ejim̧we letok, eo eaar bōktok būrom̧ōj in bōklōkōt n̄an armej.

19 Kiiō, eļan̄n̄e ejjeļo̧k kien kar letok—eļan̄n̄e juon armej ej uror ej aikuj mej—en kar mijak ke bwe enaaj kar mej eļan̄n̄e ej uror?

20 Im barāinwōt, eļan̄n̄e eaar ejjeļo̧k kien letok ņae jero̧wiwi armej ren kar jab mijak n̄an jero̧wiwi.

21 A eļan̄n̄e eaar ejjeļo̧k kien letok, eļan̄n̄e armej raar jero̧wiwi ta kien emaron̄ kar kōm̧m̧an, ak tūriam̧o kake barāinwōt, bwe enaaj kar ejjeļo̧k aer ioon armej eo?

22 A ewōr juon kien kar letok, im juon kaje ej ekkejel, im ukeļo̧k eo letoke; ukeļo̧k eo tūriam̧o kake ewōr an ie, n̄e jaab, kien ej an armej eo im kakūrm̧ool kakien eo, im kakien eo ej kajejjet kūtien kaje eo; eļan̄n̄e jab āindein, jerbal ko an kien ren kar rup, im Anij en kar jab Anij.

23 A Anij ej jab bōjrak an Anij, im tūriam̧okake ej an riukeļo̧k, im tūriam̧o kake ej itok kōn pinmuur eo; im pinmuur eo ej kakūrm̧ool jerkakpeje eo an ro remej; im jerkakpeje eo an ro remej ej kōro̧o̧lļo̧k armej n̄an im̧aan mejān Anij; im āindein rej jepļaakļo̧k ilo im̧aan mejān, n̄an ekajet ekkar n̄an jerbal ko aer, ekkar n̄an kien im jim̧we.

24 Bwe lo, jim̧we ej kōjerbal aolep akweļap ko an, im barāinwōt tūriam̧o kake ej pukot aolep men ko an; im āindein, ejjeļo̧k ak ro wōt em̧ool aer ukeļo̧k rej mour.

25 Ta, kwōj ļōmņak bwe tūriam̧o kake emaron̄ ko̧o̧te kien ke? Ij ba n̄an eok, Jaab; jaab n̄an jidik. Eļan̄n̄e āindein, Anij en kar jab Anij.

26 Im āindein Anij ej kakūrm̧ool un ko reļļap im ejjeļo̧k jem̧ļo̧kier, ko kar kōpooji jān lōn̄tak ko an laļ. Im āindein ej kūrm̧ool mour im lo̧mo̧o̧ren eo an armej, im barāinwōt ko̧kkure im būrom̧ōj.

27 Kōn menin, O nejū m̧aan, jabdewōt eo ekōņaan emaron̄ itok im bōk dān in mour ilo ejjeļo̧k wōņāān; im jabdewōt ekōņaan ejja in wōt jab kipel e n̄an itok; a ilo raan eo āliktata enaaj jepļaakļo̧k n̄an e ekkar n̄an kōm̧m̧an ko an.

28 Eļan̄n̄e e wōr an kōņaan n̄an kōm̧m̧an nana, im eaar jab ukeļo̧k ilo raan ko an, lo, nana naaj kōm̧m̧an n̄an e, ekkar n̄an kōjepļaak an Anij.

29 Im kiiō, nejū m̧aan, ikōņaan bwe kwōn kōtļo̧k bwe men kein rejjab bar kainepataik eok, im kōtļo̧k wōt bwe jero̧wiwi ko am̧ ren kainepataik eok, kōn inepata eo enaaj bōk laļļo̧k eok n̄an ukeļo̧k.

30 O nejū em̧m̧aan, ikōņaan bwe kwōn jab bar kaarmejjete jim̧we an Anij ļo̧k wōt. Jab jibadek n̄an jekpen ilo men eo ediktata kōnke jero̧wiwi ko am̧, jān kaarmejjete jim̧we an Anij; a kwōn kōtļo̧k bwe jim̧we an Anij, im An tūriam̧o kake, im An ineem̧m̧an ren kanooj kōm̧m̧an oktak ilo buruōm̧; im en bōk laļļo̧k eok n̄an būn̄al ilo ettā bōro.

31 Im kiiō, O nejū m̧aan, kar kūr eok jān Anij bwe kwōn kwaļo̧k naan eo n̄an armej rein. Im kiiō, nejū m̧aan, kwōn etal ilo iaļ eo am̧, kabun̄bun̄ļo̧k naan eo kōn m̧ool im jatōr, bwe kwōn maron̄ bōktok armej n̄an ukeļo̧k, bwe karōk eļap an tūriam̧o kake en maron̄ wōr an ioer. Im Anij en lewōj n̄an eok em̧ool ekkar n̄an naan ko aō. Amen.