1 Xcʼulvachitej cʼa chi kechin roj can kitzij vi. Jariʼ xa roma can kitzij chi choj ri achin ri xtzʼiban ri retal banobel. Roma cʼa rijaʼ xeruben e qʼuiy nimalej tak samaj pa ri rubiʼ ri Jesús. Y manjun achin xtiquir ta xuben jun nimalej samaj pa ri rubiʼ ri Jesús, xaxe vi rijaʼ chʼajchʼojirisan chic el jumul chupan ri rumac.

2 Vacami cʼa, vi manjun sachitajic xuben ri achin riʼ tok xrajilaj can ri junaʼ, xa kʼaxinek chic el ri junaʼ juvinek oxlajuj. Queriʼ cʼa nubij ri retal kabanobal.

3 Y ri vinakiʼ xquichop chic royobexic chi utzil ri retal yaʼon can roma ri Samuel, ri aj Lamaniʼ. Kitzij cʼa chi xcoyobej ri kʼij tok xtikʼekumer pa ronojel ri ruvachʼulef oxiʼ kʼij.

4 Ri vinakiʼ cʼa xquibanalaʼ caʼiʼ quicʼuʼx, y cʼa xetojojen na, stapeʼ cʼa e qʼuiy ri retal e banon can chiquivech.

5 Xcʼulvachitej cʼa chi chupan ri junaʼ juvinek cajlajuj, pa ri nabey icʼ y ri rucaj kʼij, xuben jun nimalej job ri can man junan ta vi riqʼuin xabachique chic ri cʼulvachitajinek can chuvech ri ruvachʼulef riʼ.

6 Chukaʼ xuben jun nimalej y xibinel cakʼikʼ, y xuben chukaʼ xibinel cokolajay. Jariʼ xusiloj ri ruvachʼulef, achiʼel vi ta xa jubaʼ man xchʼaratej pa nicʼaj.

7 Chukaʼ xuben cʼa janíla chʼichʼanilej coyopaʼ, man junan ta riqʼuin xabachique chic ri xbanatej can chuvech chijun ri ruvachʼulef riʼ.

8 Cʼariʼ, xcʼat ri tinamit Zarajemla.

9 Y ri tinamit Moroni xmukutej ka nej chupan ri nimalej yaʼ, y ri e cʼo chiriʼ xejikʼ.

10 Y xmukutej ri tinamit Moronija riqʼuin ulef y pa ruviʼ ri tinamit riʼ xcʼojeʼ can jun nimalej tzʼurutzʼic juyuʼ.

11 Xbanatej cʼa chukaʼ jun nimalej vulatajic chupan ri ruvachʼulef ri cʼo pa rajxocon ri kʼij.

12 Man riqʼuin vi riʼ, kitzij chi can janíla vi nim y cʼayef ri vulatajic xcʼulvachitej chupan ri ruvachʼulef ri cʼo pa rajquikʼaʼ ri kʼij. Roma can kitzij vi chi xjalatej ruvech chijun ri ruvachʼulef coma ri nimalej tak cakʼikʼ, y ri nimalej tak silonel ri xquibanalaʼ chuvech chijun ri ruvachʼulef riʼ.

13 Chukaʼ cʼa, ri nimaʼk tak bey xejakajoxin, y ri liʼan tak bey xepeqʼuepoxin, y xban chi e qʼuiy tak liʼan cʼojlibel xejoteʼ xexuleʼ.

14 E qʼuiy nimaʼk y cʼatzinel tak tinamit xejikʼ. E qʼuiy xecʼat, y e qʼuiy xesilotej. Cʼa cʼariʼ, xetzak ri nimalej tak jay ri e cʼo chiquipan, y ri vinakiʼ xecom, y ri tak cʼojlibel xetoleʼ can.

15 Chʼakaʼ chi tinamit cʼa xecʼojeʼ na can. Man riqʼuin vi riʼ, can nim vi ri vulatajic xbanatej chique, y can e qʼuiy vi xecom.

16 Chʼakaʼ chic vinakiʼ xeʼucʼuex el coma ri nimalej tak salcum. Y manjun vinek etamayon acuchi xebe vi. Xaxe quetaman chi can xeʼucʼuex vi el.

17 Que cʼariʼ, chironojel ri ruvachʼulef xjalatej coma ri cakʼikʼ, y ri cokolajay, y ri coyopaʼ, y ri silonel.

18 Xcʼulvachitej cʼa chukaʼ chi ri abej xechʼaratej pa nicʼaj, y xevulatej chuvech chironojel ri ruvachʼulef. Cʼariʼ, xepaxlan cʼa, y xemuchʼmuʼ jumul, y xejakatej chuvech chijun ri ruvachʼulef.

19 Xcʼulvachitej cʼa chi xetaneʼ ri cokolajay, y ri coyopaʼ, y ri job, y ri cakʼikʼ, y ri silonel. Can kitzij vi cʼa chi conojel riʼ xeyaloj oxiʼ retabal kʼij. Chʼakaʼ xquibij chi xeyaloj jubaʼ chic. Man riqʼuin vi riʼ, conojel re nimalej y xibinel cʼulvachitajic reʼ xebanatej pa laʼek oxiʼ retabal kʼij. Can ja vi cʼariʼ, tok xkʼekumer chuvech rononjel ri ruvachʼulef riʼ.

20 Cʼariʼ, xcʼulvachitej chi xpe jun tʼokol kʼekuʼm chuvech chijun ri ruvachʼulef, y ri e cʼo pa ri ruvachʼulef riʼ, ri man e tzakinek ta, can xetiquir vi xquinalaʼ ri tzʼokpil richin ri kʼekuʼm riʼ.

21 Roma cʼa ri nimalej kʼekuʼm riʼ, manek chic sakil ta, chukaʼ manek banon kʼakʼ y sakirisanel chej. Manjun banel chi xtzijtej kʼakʼ riqʼuin ri utzilej y chakiʼj tak siʼ. Roma cʼariʼ, manek banel richin nicʼojeʼ manjun sakil.

22 Y manek sakil xtzuʼun, ni ta chukaʼ kʼakʼ, ni manjun xuyupuyut, ni ta chukaʼ ri kʼij, y ri icʼ, y ri chʼumil, roma can janíla vi nim ri kʼekuʼmilej tzʼokpil riʼ, ri xutzʼapij ruviʼ re ruvachʼulef.

23 Xcʼulvachitej cʼa chi riʼ xyaloj oxiʼ kʼij, y manek sakil xtzuʼun. Ri vinakiʼ jutakel xeʼokʼ janíla, y xevuyin, y xesiqʼuin. Kitzij cʼa chi janíla nim ri quivuyinen ri vinakiʼ roma ri kʼekuʼm, y roma ri nimalej vulatajic ri xkaʼ pe pa quiviʼ.

24 Pa jun cʼojilibel xacʼaxex chi xesiqʼuin, y quereʼ xquibij: Ja ta cʼa xtzolin pe kacʼuʼx tok manjani tipe re nimalej y xibinel kʼij reʼ. Vi ta queriʼ, ri kachʼalal xecolotej ta, y man ta cʼa xecʼat pa ri nimalej tinamit Zarajemla.

25 Pa jun chic cʼojlibel xacʼaxex xeʼokʼ, y xesiqʼuin, y quereʼ xquibij: Ja ta cʼa xtzolin pe kacʼuʼx tok manjani tipe re nimalej y xibinel kʼij reʼ, y man ta xekacamisaj, y xekaqʼuek che abej, y xekokotaj el ri e yaʼol lokʼolej rutzijol. Vi ta queriʼ, ri kateʼ y ri jebel tak kamiʼal y ri kalcʼual xecolotej ta, y man ta xemukutej chupan ri nimalej tinamit Moronija. Que cʼariʼ, janíla nim y xibinel ri quivuyinen ri xquiben ri vinaki.