1 Can kitzij, kitzij ninbij chive, chi yin ninrayij chi yeʼitoʼ ta cʼa ri mebaʼiʼ. Xa titzʼetaʼ cʼa iviʼ richin chi man tiben ri utzil chiquivech ri vinakiʼ xa richin yixtzʼetetej coma rijeʼ. Vi xa quereʼ xtiben, can man xticʼul ta vi cʼa ri ivajel pa rukʼaʼ ri Itataʼ cʼo chilaʼ chicaj.

2 Roma cʼariʼ, tok nivajoʼ yeʼitoʼ chʼakaʼ chic, man tisiloj ri xupunel kʼojoʼm chivech rix achiʼel ri niquiben ri caʼiʼ quipalej chupan ri tak jay richin ri molojriʼil y pa tak bey, richin queriʼ niyatej cʼa quikʼij rijeʼ coma ri achiʼaʼ. Can kitzij ninoij chive chi rijeʼ xa can niquicʼul yan ri cajel.

3 Jacʼa tok nivajoʼ yixtoʼon, man tretamaj cʼa ri ixocon ri nuben ri ivajquikʼaʼ.

4 Queriʼ cʼa, xtibanatej ri toʼonic pan evel y jacʼa ri Itataʼ, ri nitzuʼun pan evel, ja rijaʼ xtuyaʼ ri rajel ruqʼuexel chive chuvech sakil.

5 Tok yixchʼo akʼanij riqʼuin ri Dios, man tiben cʼa achiʼel ri caʼiʼ quipalej. Rijeʼ can jebel vi niquinaʼ e paʼel, yechʼo akʼanij chiriʼ pa tak jay richin ri molojriʼil, y pa tak rucajtzʼuc ri bey, richin queriʼ yetzʼetetej cʼa can coma ri vinakiʼ. Can kitzij vi ninbij chive, chi rijeʼ niquicʼul yan ri cajel.

6 Jacʼa rat, tok yachʼo akʼanij riqʼuin ri Dios, catoc oc pan avarabel, y tok xatzʼapij pe ri ruchiʼ jay, cachʼo cʼa akʼanij riqʼuin ri Atataʼ ri cʼo pan evel. Y ri Atataʼ ri nitzuʼun pan evel, xtuyaʼ ri rajel ruqʼuexel chave chiquivech conojel.

7 Tok cʼa yixchʼo akʼanij riqʼuin ri Dios, man ticamuluj ri ichʼabel, achiʼel niquiben ri e aj yaʼol quikʼij ri atiʼy. Rijeʼ niquinimaj cʼa chi roma ri janíla chi chʼoven niquiben, romariʼ xqueʼacʼaxex.

8 Man tiben cʼa achiʼel riieʼ, roma ti Itataʼ can retaman vi chic achique nicʼatzin chive tok cʼa manjani ticʼutuj akʼanij chire.

9 Que cʼareʼ tibanaʼ chire tok yixchʼo akʼanij riqʼuin rijaʼ: Katataʼ ri at cʼo chilaʼ chicaj, xtilokʼobex ta cʼa ri abiʼ.

10 Xtibanatej ta cʼa ri arayibal, achiʼel ri chilaʼ chicaj, queriʼ ta cʼa chukaʼ chuvech ri ruvachʼulef.

11 Xqueʼacuy ta cʼa ri kacʼas, achiʼel roj chukaʼ yekacuy ri aj cʼasiʼ kiqʼuin.

12 Chukaʼ man ta xkojacʼuaj pa tejtobebelriʼil, xa xkojacol ta chuvech ri itzel.

13 Roma can xa avichin vi rat ri ajavaren, y ri uchukʼa, y ri cʼojlemal benek ruvech. Amen.

14 Roma vi rix yeʼicuy ri quimac ri vinakiʼ, ri chicajel Itataʼ chukaʼ xquixrucuy rix.

15 Jacʼa vi xa man yeʼicʼuy ta quimac ri vinakiʼ, chukaʼ ri Itataʼ man xtucuy ta ri imac rix.

16 Chukaʼ, tok yixmevayin, man tiben cʼa achiʼel ri caʼiʼ quipalej. Rijeʼ nibison, nibison ri quipalej, roma xa can niquijel vi ka ri quipalej, richin niquinabej ri vinakiʼ chi rijeʼ yemevayin. Can kitzij ninbij chive chi rijeʼ niquicʼul yan ri cajel.

17 Jacʼa rat, tok yamevayin, queʼayalaʼ akʼom pan aviʼ y tachʼajaʼ cʼa ri apalej.

18 Queriʼ cʼa, man cavachin chi yamevayin chiquivech ri vinakiʼ, xaxe chuvech ri Atataʼ ri cʼo pan evel. Cʼariʼ, ri Atataʼ ri nutzʼet ronojel pan evel, xtuyaʼ ri avajel chuvech sakil.

19 Man queʼimololej cʼa beyomel vaveʼ chuvech re ruvachʼulef, acuchi xa nichicopir y xa nipusir, y acuchi ri elekʼomaʼ niquicʼot y niquelekʼaj.

20 Xa ticanoj cʼa ri beyomel richin chicaj, acuchi man nichicopir ta, ni man nipusir ta, ni ta cʼa ri elekʼomaʼ man xtiquicʼot ta richin niquelekʼaj.

21 Roma cʼa xa acuchi cʼo vi ri ibeyomal, can chiriʼ vi xticojeʼ ri ivánima chukaʼ.

22 Ri rusakil ri chʼaculaj ja ri runakʼ ruvech. Roma cʼariʼ, vi ri runakʼ avech ri choj oc, jariʼ nibanon chi chijun ri achʼacul nojinek che sakil.

23 Jacʼa, vi ri runakʼ avech rat xa itzel, ja cʼariʼ nibanon kʼekuʼm chire ri achʼacul. Roma cʼariʼ, vi xa manek ri sakil aviqʼuin rat, xa kʼekuʼm cʼariʼ, ¡y can janíla vi ri kʼekuʼm riʼ!

24 Manjun vinek nitiquir yerusamajij e caʼiʼ rajaf, roma xtretzelaj ri jun y xtrajoʼ ri jun chic, o xticʼojeʼ can riqʼuin ri jun y xtuxovaj ri jun chic. Man yixtiquir ta cʼa nisamajij ri Dios y chukaʼ ri beyomel richin ri ruvachʼulef.

25 Xcʼulvachitej cʼa chi tok ri Jesús xtaneʼ chubixic re chʼabel reʼ, xerutzuʼ apon ri cablajuj ri e ruchaʼon y quereʼ xubij chique: Man timestaj cʼa ronojel ri chʼabel ninbij chive. Roma cʼa vacami, ja rix ri ix nuchaʼon richin niben lokʼolej samaj pa ruviʼ re vinakul reʼ. Vacami cʼa ninbij chive chi man cʼa tisach icʼuʼx chire ri icʼaslen rix richin nikukaʼ achique cʼa xtitij y achique cʼa xtikum, ni ta cʼa chukaʼ roma ri ichʼacul chucanoxic achique tziek xticusaj. ¿La man ja ta cami ri cʼaslen icʼovinek rajel chuvech ri yetij, y ri chʼaculaj icʼovinek rajel chuvech ri tziek?

26 Queʼitzuʼ ri aj xicʼ tak chicopiʼ, rijeʼ man yeticon ta, ni man yekʼaton ta, ni man yequinojisaj ta ri quicʼujay. Man riqʼuin vi riʼ, ri chicajel Itataʼ yerilij. ¿La man cami icʼovinek ta ivajel rix chiquivech rijeʼ?

27 ¿Achique ta cami chive rix nitiquir cʼa nuvik ta chic jubaʼ ruviʼ ri rupalen vi xaxe ta oc queriʼ nunojij?

28 ¿Achique cʼa roma janíla nitij ikʼij chucanoxic ri itziak? Queʼitzʼetaʼ cʼa jubaʼ ri quiqʼuiyirinen ri tak cotzʼiʼj pa juyuʼ. Rijeʼ man yesamej ta, ni man yebatzʼin ta.

29 Man riqʼuin vi riʼ, yin ninbij chive chi ni ta ri Salomón, riqʼuin ronojel ri rubeyomal, man xtiquir ta cʼa xuvik riʼ achiʼel jun chique ri cotzʼiʼj riʼ.

30 Roma cʼariʼ, vi queriʼ ri Dios yeruvik ri kʼayis ri e cʼo pa tak juyuʼ, ri e jebel vacami y chuvaʼk xa xquetorix ka pa kʼakʼ, que cʼariʼ xquixruvik chukaʼ rix, vi ta man ta xa jubaʼ oc ri icukubabel cʼuʼx.

31 Man cʼa tikukaʼ janíla tok nibij: ¿Achique cʼa xtikatij o achique cʼa xtikakum o achique cʼa xtoc katziak.

32 Roma ri chicajel Itataʼ xa can retaman vi chi ronojel riʼ yecʼatzin chive.

33 Ticanoj cʼa nabey ri rajavaren ri Dios y ri ruchojmilal, y ronojel cʼariʼ xa xquetzʼakatisex apon chive.

34 Roma cʼariʼ, man tikukaʼ cʼa apon janíla ri xa cʼa richin chuvaʼk, roma xa ri kʼij richin chuvaʼk cʼo vi richin nisamajix ronojel richin ri kʼij riʼ. Ri cʼayeval chupan jun kʼij nuben riʼ richin ri kʼij riʼ.