1 Vaveʼ cʼa, xcʼulvachitej chi tok ri Jesús e rubin chic re chʼabel reʼ, rijaʼ xerutzulaʼ ri nimalej molaj vinakiʼ y quereʼ xubij chique: Can kitzij vi chi ri nukʼij ninakajub pe.

2 Yin ninnaʼ chi xa manek ivuchukʼaʼ y man nikʼax ta chivech ronojel ri chʼabel ri xuchilabej chuve ri Tataʼixel richin ninbij chive vacami.

3 Roma cʼariʼ, quixbiyin cʼa chivachoch y tichʼoboʼ rij ri e nubin can. Chukaʼ ticʼutuj chire ri Tataʼixel, pa ri nubiʼ yin, chi ticʼojeʼ cʼa banel richin nikʼax chivech. Chukaʼ tinucʼuʼ cʼa ri inojibal richin chuvaʼk, y cʼariʼ xquipe chic cʼa iviqʼuin.

4 Vacami cʼa, yibe riqʼuin ri Tataʼixel y chukaʼ ninbekʼalajirisaj viʼ chiquivech ri e sachinek ijaʼtzul richin ri Israel. Roma cʼa rijeʼ xa man e sachinek ta chuvech ri Tataʼixel, roma rijaʼ retaman acuchi e rucʼuan vi el.

5 Xcʼulvachitej cʼa chi tok ri Jesús rubin chic quereʼ, rijaʼ xerutzulaʼ cʼa chic ri nimalej molaj vinakiʼ y xutzʼet chi elenek ri ruyaʼal runakʼ quivech y can xquitzuʼ vi pe rijaʼ, achiʼel cʼa xcajoʼ ta xcanej ta can rijaʼ jubaʼ chic quiqʼuin.

6 Que cʼareʼ xubij rijaʼ chique: Can kitzij chi ri nucʼuʼx can nojinek vi riqʼuin joyovabel chive rix.

7 ¿La e cʼo cami yava? chiʼicojol? Queʼicʼamaʼ cʼa pe vaveʼ. ¿La e cʼo cami chiʼicojol rix ri e jetzʼ, o ri e moy, o ri e cut, o ri e socotajinek, o ri e saʼl, o ri chakirinek ri quitzʼumal, o ri e tʼoj, o ri e cʼo xabachique ruvech kʼaxomal chique? Queʼicʼamaʼ cʼa pe vaveʼ y yin xquencʼachojirisaj conojel roma ninjoyovaj ivech, y ri nucʼuʼx can nojinek vi riqʼuin joyovabel.

8 Roma yin ninnaʼ cʼa chi rix nirayij chi nincʼut chivech ri achique nubanon quiqʼuin ri ivachʼalal ri e cʼo pa Jerusalem. Roma yin nintzʼet cʼa chi janíla nicukubaʼ icʼuʼx richin chi yixinvakʼomaj.

9 Xcʼulvachitej cʼa chi tok quereʼ xubij ka rijaʼ, ri nimalej molaj vinakiʼ, riqʼuin junan quinojibal, xequicʼuaj apon ri quiyavaʼiʼ, y ri e cʼo quikʼaxomal y, ri e quijetzʼ, y ri e quimoyiʼ, y ri e quimemaʼ, y ri e cʼo xabachique ruvech quikʼaxomal. Cʼariʼ rijaʼ xerakʼomaj cʼa chiquijujunal tok xeʼucʼuex riqʼuin.

10 Conojel cʼa ri xeʼakʼomex y conojel ri can utz vi quivech, xexuqueʼ ka cʼa chuvech ri raken, y xquiyaʼ rukʼij rijaʼ. Checonojel chique ri niamalej molaj vinakiʼ riʼ, ri xetiquir xepe, xquitzʼubaj ri raken, y riqʼuin cʼariʼ, rijeʼ janíla xquichʼekebaʼ ri raken riqʼuin ri ruvaʼal quivech.

11 Xcʼulvachitej cʼa chi rijaʼ xubij chique chi quequicʼamaʼ pe ri tak calcʼual riqʼuin.

12 Roma cʼariʼ, rijeʼ xequiqʼuen pe ri tak calcʼual y xequitzʼuyubaʼ ka pa ri ulef pa ri rusutilen rijaʼ. Cʼariʼ, ri Jesús xpaʼeʼ pa quinicʼajal. Ri nimalej molaj vinakiʼ riʼ xquijechʼej jubaʼ quiʼ richin chi conojel ri alcʼualaʼ xecʼamer pe riqʼuin.

13 Xcʼulvachitej cʼa chi tok conojel ri alcʼualaʼ e cʼamon pe chic y ri Jesús paʼel chic pa quinicʼajal, jariʼ tok rijaʼ xubij chique ri nimalej molaj vinakiʼ chi quexuqueʼ ka pa ri ulef.

14 Xcʼulvachitej cʼa chi tok rijeʼ xexuqueʼ ka pa ri ulef, ri Jesús xsiqʼuin pa ránima y quereʼ xubij: Nataʼ, janíla nitʼujtʼut ri vánima, roma ri quetzelal ri vinakiʼ ri e aj rujayul ri Israel.

15 Tok rijaʼ xubij cʼa re chʼabel reʼ, chukaʼ rijaʼ xuqueʼ ka pa ri ulef. Kitzij cʼa, rijaʼ xchʼo akʼanij riqʼuin ri Tataʼixel y ri xubij rijaʼ manek banel richin ta nitzʼibex can, y ri nimalej molaj vinakiʼ riʼ, ri xcacʼaxaj, can xquijiquibaʼ vi.

16 Quereʼ cʼa ri xquijiquibaʼ rijeʼ: Ri runakʼ vachaj manjun bey e rutzʼeton ta, y ri xiquin manjun bey e racʼaxan ta, ri nimalej y jebel tak naʼoj achiʼel ri xekatzʼet y ri xekacʼaxaj roj ri xerubilaʼ ri Jesús chire ri Tataʼixel.

17 Manjun akʼ nitiquir ta yerutzijoj, y manjun vinek nitiquir ta yerutzʼibaj, y chukaʼ ri cánima ri vinakiʼ man yetiquir ta yequinaʼ ri nimalej y meyel tak naʼoj achiʼel ri xekatzʼet roj y ri xekacʼaxaj ri xerubij ri Jesús. Manjun nitiquir ta cʼa chic nunaʼ ri quicoten ri xunojisaj ri kánima roj tok xkacʼaxaj rijaʼ tok xchʼo akʼanij riqʼuin ri Tataʼixel koma roj.

18 Xcʼulvachitej cʼa chi tok ri Jesús xuqʼuis ri lokʼolej ruchʼoven riqʼuin ri Tataʼixel, rijaʼ xyacatej. Man riqʼuin vi riʼ, can janíla vi nim ri quiquicoten ri nimalej molaj vinakiʼ y rijeʼ can xemayamo vi ka.

19 Cʼa cʼariʼ xcʼulvachitej chi ri Jesús xchʼo quiqʼuin rijeʼ y xubij chi queyacatej cʼa.

20 Rijeʼ xeyacatej cʼa pe pa ri ulef y rijaʼ quereʼ chic xubij chique: Nim ruva ikʼij rix roma ri icukubabel cʼuʼx. Vacami cʼa, kitzij chi ri nuquicoten can xtzʼaket vi.

21 Tok rubin chic re chʼabel reʼ, rijaʼ xokʼ, y ri nimalej molaj vinakiʼ xejiquiban chirij ri xuben. Rijaʼ xeruqʼuen cʼa apon ri tak calcʼual ri e cʼo chiriʼ, y xeruturusaj chiquijujunal, y xchʼo akʼanij riqʼuin ri Tataʼixel coma rijeʼ.

22 Tok que chic cʼariʼ rubanon can, xokʼ cʼa rijaʼ jun bey chic.

23 Xchʼo cʼa chi quiqʼuin ri nimalej molaj vinakiʼ y quereʼ xubij chique: Queʼitzuʼ cʼa pe ri ivalcʼual.

24 Tok rijeʼ xequitzuʼ apon ri calcʼual, ja cʼariʼ tok xquichojmij chukaʼ ri quitzubal chicaj, y xquitzʼet chi xejakatej ri caj, y xequitzʼet takonaxelaʼ ri xekaka pe chicaj, achiʼel vi ta xa pa runicʼajal jun kʼakʼ e petenek vi. Xekaka pe y xesutin chiquij ri tak alcʼualaʼ. Rijeʼ e sutivinek roma jun kʼakʼ y ri takonaxelaʼ xquiben lokʼolej samaj pa quiviʼ.

25 Ri nimalej molaj vinakiʼ can xquitzʼet vi cʼa y xcacʼaxaj y xquijiquibaʼ ronojel riʼ. Rijeʼ quetaman chi can kitzij vi ri quijiquibanic xquiben, roma can checonojel vi rijeʼ xquitzʼet y xcacʼaxaj, chiquijujunal ri e cʼo chiriʼ. E cʼo cʼa laʼek vakakʼo vocʼal vinakiʼ, y rijeʼ e achiʼaʼ, ixokiʼ y alcʼualaʼ.