Scriptures
3 Nefi 26


Tanaj 26

Ri Colonel nusol rij ronojel, cʼa pa tok rutiquiribel pe. Yeʼel nimalej tak chʼabel pa quichiʼ ri tak neʼy. Nitzijox ri quisamaj ri tijoxelaʼ.

1 Xcʼulvachitej cʼa chi tok ri Jesús xeruchol ronojel reʼ chique ri nimalej molaj vinakiʼ, jariʼ tok xusol rij chiquivech. Can xusol vi quij checonojel ri nimaʼk y chukaʼ chʼutiʼk tak naʼoj.

2 Quereʼ cʼa xubij rijaʼ: Ri Tataʼixel xubij chuve chi tinyaʼ cʼa chive rix re lokʼolej tzʼibanic reʼ, roma cʼa manek iviqʼuin rubanon can. Jareʼ cʼa ri utzilej runojibal rijaʼ, richin queriʼ xqueyaʼox cʼa chique ri iyaj mamaj ijaʼtzul apon.

3 Cʼa cʼariʼ, rijaʼ xusol rij ronojel, cʼa pa tok rutiquiribel pe, y cʼa chupan ri kʼij tok xtipe riqʼuin ri rucʼojlemal. Xukʼalajirisaj cʼa ronojel ri cʼo chi xtibecʼulvachitej pe chuvech re ruvachʼulef, cʼa tok xquechʼub ri rutiquiribel re ruvachʼulef roma nimalej cʼaten, y re ruvachʼulef xtubol riʼ, achiʼel cʼa jun bolon vuj, y ri caj y re ruvachʼulef xquekʼax el.

4 Chukaʼ xchʼo cʼa chirij ri ruqʼuisibel kʼij tok conojel vinakul, ijaʼtzul tinamit y chʼabel xqueʼapon chuvech ri Dios, richin chi xtikʼat tzij pa quiviʼ chiquij ri quibanobal, stapeʼ cʼa e utz o xa e itzel.

5 Vi can e utz, xquecʼastej cʼa pe richin ri cʼaslen jumul, y vi e itzel, can xquecʼastej vi pe richin ri etzelanic. Reʼ nibanatej cʼa junan, roma ri jun nibe riqʼuin ri jun, y ri jun chic nibe riqʼuin ri jun chic, achiʼel cʼa ri niquikʼalajirisaj ri joyovabel y ri kʼatoj tzij y ri chʼajchʼojriʼil ri e cʼo riqʼuin ri Cristo, ri cʼo pe tok cʼa manjani titzʼucutej ri ruvachʼulef.

6 Vacami cʼa, manek banel richin yetzʼibatej can chupan re vuj reʼ ri jun vocʼal ramaj ri can xuchʼabalij vi ri Jesús chique ri vinakiʼ.

7 Kitzij cʼa, can janíla vi qʼuiy chire ri xuchʼabalij chique ri vinakiʼ, nicʼojeʼ can chuvech ri xaxilej tak chʼichʼ richin ri Nefi.

8 Yin nutzʼiban cʼa can ri nicʼojeʼ vaveʼ, y jareʼ xa jubaʼ chire ri xuchʼabalij chique ri vinakiʼ. Nutzʼiban cʼa can reʼ, richin queriʼ xticʼam cʼa pe chic jun bey quiqʼuin re vinakul reʼ, coma ri Gentiliʼ, achiʼel cʼa ri ruchʼabel ri xutzijoj can ri Jesús.

9 Xtiquicʼul cʼa nabey re vuj reʼ, roma nicʼatzin chi nicʼojeʼ can quiqʼuin, richin queriʼ nitejtobex ri quicukubabel cʼuʼx. Cʼa cʼariʼ, vi rijeʼ xquequinimaj re tijonic reʼ, jariʼ tok xtikʼalajirisex cʼa chiquivech rijeʼ ri icʼovinek ruviʼ nim chuvech reʼ.

10 Vi xa man xquequinimaj ta re tijonic reʼ, jariʼ tok achique ri janíla nim chuvech reʼ, can xtevatej vi chiquivech, y xqueʼetzelex can riqʼuin.

11 Can kitzij vi chi xa jubaʼ chic man xentzʼibaj ri chʼakaʼ ri e tzʼibatel can chuvech ri xaxilej tak chʼichʼ richin ri Nefi. Xa ja ri Ajaf xkʼaton vichin, y que cʼariʼ xubij chuve: Yin xtintejtobej ri quicukubabel cʼuʼx ri nuvinaki.

12 Xa roma cʼariʼ tok yin Mormon, nintzʼibaj ri nubij cʼa ri Ajaf chi tintzʼibaj. Vaveʼ cʼa, yin Mormon nintanbaʼ nutzijonen, y ninchop rutzʼibaxic ri bitajinek can chi tintzʼibaj.

13 Roma cʼariʼ, yin ninvajoʼ chi ninabej chi xaxe pa oxiʼ kʼij ri Ajaf can xerutijoj vi ri vinakiʼ. Chirij cʼariʼ, rijaʼ binakel xucʼut riʼ chiquivech y binakel xuperelaʼ ri caxlan vey, xuturusaj, y xuyaʼ chique.

14 Xcʼulvachitej chukaʼ chi rijaʼ xerutijoj ri alcʼualaʼ quichin ri nimalej molaj vinakiʼ riʼ, achojchij xtzijox vi yan, y xuben lokʼolej samaj pa quiviʼ. Xucoropij cʼa ri cakʼ y xequichʼabalij nimalej y meyel tak naʼoj chique ri quiteʼ quitataʼ. Ri naʼoj riʼ janíla nim chuvech ri xukʼalajirisaj can rijaʼ chiquivech ri vinakiʼ. Quereʼ cʼa xucoropij ri cakʼ richin queriʼ xetiquir xetzijon.

15 Cʼariʼ, xcʼulvachitej chi ri Cristo xjoteʼ chic el chicaj. Jacʼa rucaʼn bey riʼ tok xucʼut riʼ chiquivech y xtzolin chic riqʼuin ri Tataʼixel. Que cʼariʼ xuben tok xerakʼomaj yan ri quiyavaʼiʼ y ri e jetzʼ, y xujek ri runakʼ quivech ri moyiʼ, y ri quixiquin ri tʼojiʼ, y xuben rononjel ruvech akʼomanic chiquicojol, y xucʼasoj pe jun achin caminek chic, y xukʼalajirisaj ri ruchukʼaʼ chiquivech. Cʼariʼ, xbe chic riqʼuin ri Tataʼixel.

16 Can kitzij vi cʼa, chi pa rucaʼn kʼij, ri nimalej molaj vinakiʼ xquimol chic quiʼ, y xequitzʼet y xecacʼaxaj ri tak alcʼualaʼ chiriʼ. Jaʼ, ri tak neʼy chukaʼ xquijek quichiʼ, y xequitzijoj nimalej tak naʼoj. Ri xequitzijoj rijeʼ can xekʼat vi richin queriʼ manjun achin xerutzʼibaj ta can.

17 Xcʼulvachitej cʼa chi chupan ri kʼij riʼ, ri tijoxelaʼ ri xeruchaʼ ri Jesús, xquichop rubanic ri kasanic chuxeʼ yaʼ y xequitijoj conojel ri xeʼapon quiqʼuin. Cʼariʼ, conojel ri xekasex chuxeʼ yaʼ pa rubiʼ ri Jesús can xenoj vi riqʼuin ri Uxlabixel.

18 E qʼuiy chique rijeʼ xequitzʼet y xecacʼaxaj ri achique manek banel richin yetzijox, y can chʼaʼoj vi richin yetzʼibex can.

19 Chukaʼ xquitijolaʼ ka qui chiquivech, y xquibanalaʼ lokʼolej samaj pa quiviʼ chiquijujunal. Ronojel xa junan ruvech cʼo quiqʼuin checonojel, y conojel ri vinakiʼ choj xquibanalaʼ quiqʼuin ri chʼakaʼ chic.

20 Xcʼulvachitej cʼa chi xequibanalaʼ ronojel achiʼel cʼa ri Jesús xubij yan chique.

21 Cʼa cʼariʼ, ri xekasex chuxeʼ yaʼ pa rubiʼ ri Jesús xquibiniʼaj ri Rukʼataj ri Cristo.