1 Xcʼulvachitej cʼa chi xkʼax cʼa ri juvinek cajlajuj junaʼ y chukaʼ ri juvinek volajuj junaʼ y can kitzij vi chi ri rutijoxelaʼ ri Jesús xquitiquiribaʼ ri Rukʼataj ri Cristo chuvech ronojel ri ruvachʼulef ri e cʼo nakaj. E jampeʼ xeʼapon quiqʼuin y can xtzolin vi pe quicʼuʼx chupan ri quimac, xekasex cʼa chuxeʼ yaʼ pa rubiʼ ri Jesús, y chukaʼ xquicʼul ri Uxlabixel.

2 Xcʼulvachitej cʼa chupan ri juvinek vaklajuj junaʼ chi checonojel ri vinakiʼ chuvech re ruvachʼulef, ri Nefiʼiʼ y chukaʼ ri Lamaniʼ, e pachkʼomin pe chic riqʼuin ri Ajaf. Manjun cʼa cʼaxinic, ni ta chukaʼ tojonen chiquicojol, y checonojel ri vinakiʼ xquibanalaʼ ri chojmilal quiqʼuin ri chʼakaʼ chic.

3 Ronojel ri cʼo quiqʼuin, xa e quichin conojel. Roma cʼariʼ, manek beyomaʼ ni mebaʼiʼ, ni ta chukaʼ e tzʼapel ni e solcopin, xa checonojel yaʼon kʼij chique y yecʼuluman apon riqʼuin ri aj chicajel sipanic.

4 Xcʼulvachitej cʼa chi xkʼax el chukaʼ ri juvinek vuklajuj junaʼ y cʼa cʼo na uxlanibel cʼuʼx chupan ri ruvachʼulef riʼ.

5 Chukaʼ xebanatej nimalej y meyel tak banobel coma ri rutijoxelaʼ ri Jesús. Xecakʼomaj cʼa ri yavaʼiʼ y xequicʼasbaʼ cʼa ri caminakiʼ. Xquiben chi ri e jetzʼ xebiyin, y chi ri e moy xetzuʼun, y chi ri e tʼoj xcacʼaxaj. Xequiben cʼa ronojel ruvech meyel tak samaj chiquicojol ri calcʼual ri achiʼaʼ, y manjun cʼa meyel samaj xquiben, xaxe cʼa vi xbanatej pa rubiʼ ri Jesús.

6 Queriʼ cʼa xkʼax can ri juvinek vakxaklajuj junaʼ y chukaʼ ri juvinek belejlajuj junaʼ y chukaʼ ri cavinek jun y ri cavinek caʼiʼ junaʼ quereʼ xekʼax can, cʼa tok cavinek belejeʼ junaʼ e kʼaxinek chic. Xkʼax can chukaʼ ri cavinek julajuj junaʼ y ri cavinek cablajuj junaʼ. Queriʼ cʼa xekʼax ri junaʼ, cʼa tok e kʼaxinek chic cavinek belejlajuj junaʼ.

7 Ri Ajaf janíla xerubeyomirisaj rijeʼ chupan ri ruvachʼulef riʼ. Kitzij cʼa chi xequipabaʼ chic ri tinamit acuchi xecʼat vi ri tinamit tok rubanon can.

8 Kitzij cʼa chi xquiben chi ri nimalej tinatmit Zarajemla xpabatej chic jun bey.

9 Man riqʼuin vi riʼ, e qʼuiy tinamit xesobosoʼ ka y ri yaʼ xpe pa quivi. Roma cʼariʼ tok ri tinamit riʼ manek chic banel xepabatej.

10 Vacami cʼa, can kitzij vi chi ri ruvinakul ri Nefi xquicovirisaj quiʼchi utzil, y xeqʼuiyer chaʼnin, y xeʼoc jun vinakul sek y jebel.

11 Rijeʼ xecʼuleʼ el, y xquicʼulubalaʼ quiʼ, y xeturusalox achiʼel cʼa quibin ri qʼuiy tak sujunic ri xeruyaʼ can ri Ajaf chique.

12 Cʼariʼ, man xequitakej ta chic ri rubanic y ri rupixaʼ ri Moisés, xa xequitakej cʼa ri pixaʼ ri xequicʼul riqʼuin ri Ajaf ri qui Dios. Romariʼ tok jutakel xemevayin, y xquibanalaʼ lokʼolej chʼoven riqʼuin ri Ajaf, y xquimololaʼ qui binakel richin chi yechʼo akʼanij riqʼuin ri Ajaf y nicacʼaxaj ri ruchʼabel ri Ajaf.

13 Xcʼulvachitej cʼa chi manek chic cʼaxinic cʼo chiquicojol checonojel ri vinakiʼ chuvech chijun ri ruvachʼulef riʼ, xa xebanatej cʼa nimalej tak meyel samaj coma ri rutijoxelaʼ ri Jesús.

14 Xcʼulvachitej cʼa chi xkʼax ri oxcʼal julajuj junaʼ y chukaʼ ri oxcʼal cablajuj junaʼ. Queriʼ cʼa xekʼax el ri tak junaʼ, cʼa tok ri oxcʼal belejlajuj junaʼ kʼaxinek chic el. Kitzij cʼa chi vocʼal junaʼ xekʼax cʼa el y ri rutijoxelaʼ ri Jesús, ri xeruchaʼ can rijaʼ, e benek chic pa ri lokʼolej cʼojlibel richin quicoten richin ri Dios. Xaxe cʼa e cʼo na ri oxiʼ ri xquecanej na can. Chʼakaʼ chic tijoxelaʼ xetak chi utzil pa quiqʼuexel ri xecom. Queriʼ cʼa, e qʼuiy chire ri iyaj mamaj ijaʼtzul riʼ xecom yan el.

15 Xcʼulvachitej cʼa chi manek cʼaxinic chupan ri ruvachʼulef riʼ, roma ri rajovabal ri Dios qʼues chupan ri cánima ri vinakiʼ riʼ.

16 Chukaʼ manek chic xochʼinic, ni ta cʼaxinic, ni ta chʼaʼoj, ni ta tzʼiʼinic, ni ta tzʼucuj tzij, ni ta camisanic, ni ta manjun ruvech itzel naʼoj. Can jic vi cʼa chi manek rubeyal chi nicʼojeʼ jun chic vinakul chiquicojol conojel ri vinakiʼ ri xerutzʼuc pe ri Dios, ri nicʼo ruviʼ quiquicoten chuvech ri vinakul riʼ.

17 Manek elekʼomaʼ, ni ta chukaʼ camisanelaʼ. Chukaʼ manek Lamaniʼ, ni manjun ruvech iʼ. Xa checonojel e junan ri ralcʼual ri Cristo, ichinanelaʼ richin ri rajavaren ri Dios.

18 ¡Can janíla vi nim ruva quikʼij! Ri Ajaf xeruturusaj cʼa riqʼuin ronojel ri xequibanalaʼ. Kitzij cʼa chi xeturusex y xebeyomirisex, cʼa tok xekʼax vocʼal lajuj junaʼ. Cʼa cʼariʼ, ri nabey iyaj mamaj ijaʼtzul riqʼuin ri Cristo e kʼaxinek chic el y manek cʼaxinic chuvech chijun ri ruvachʼulef riʼ.

19 Xcʼulvachitej cʼa chi ri Nefi xcom. Ja ri Nefi riʼ ri xtzʼiban richin re ruqʼuisibel retal banobel reʼ. Xutzʼibaj cʼa ri retal banobel chuvech ri xaxilej tak chʼichʼ richin ri Nefi. Cʼa cʼariʼ, ri rucʼajol rijaʼ, rubiniʼan Amos, xutzʼibaj ri retal banobel pa ruqʼuexel rijaʼ. Rijaʼ chukaʼ xutzʼibaj cʼa chuvech ri xaxilej tak chʼichʼ richin ri Nefi.

20 Rijaʼ xutzʼibaj jumuchʼ cajiʼ junaʼ y cʼa cʼo na uxlanibel cʼuʼx chupan ri ruvachʼulef. Xaxe cʼa, cʼo jun ti molaj vinakiʼ ri xquipabaʼ quiʼ chuvech ri kʼataj, y xquibiniʼaj cʼa chic quiʼ Lamaniʼ. Roma cʼariʼ tok e cʼo chic jun bey Lamaniʼ chupan ri ruvachʼulef riʼ.

21 Xcʼulvachitej cʼa chi xcom chukaʼ ri Amos. Vaveʼ cʼa, e kʼaxinek chic el belejcʼal cajlajuj junaʼ tok tipe ri Cristo. Cʼa cʼariʼ, ri rucʼajol rubiniʼan Amos chukaʼ, xutzʼibaj ri retal banobel pa ruqʼuexel. Rijaʼ chukaʼ xutzʼibaj cʼa chuvech ri xaxilej tak chʼichʼ richin ri Nefi. Ri xutzʼibaj rijaʼ cʼo cʼa chupan ri vuj richin ri Nefi y ja cʼareʼ ri vuj riʼ.

22 Xcʼulvachitej cʼa chi e kʼaxinek chic lajuj cʼal junaʼ. Conojel cʼa ri rucaʼn iyaj mamaj ijaʼtzul e kʼaxinek chic el, xaxe e jujun chic oc cʼa e qʼues na.

23 Vacami cʼa, yin Mormon ninvajoʼ ta chi nivetamaj chi ri vinakul riʼ can xeqʼuiyer vi y xequirex chuvech chijun ri ruvachʼulef riʼ. Janíla xebeyomer cʼa roma ri quiqʼuiyirinen riqʼuin ri Cristo.

24 Vacami cʼa, chupan ri lajuj cʼal jun junaʼ, xecʼoje cʼa chiquicojol rijeʼ ri xquichop quinimirisaxic quiʼ. Xquicusaj cʼa quitziak jotol rajel, y ronojel ruvech jebelilej tak abej, y jebel tak lokʼoj xa richin re ruvachʼulef.

25 Chupan ri kʼij riʼ, ri quibeyomal y ri nicʼatzin chique man junan ta cʼo quiqʼuin conojel.

26 Cʼa cʼariʼ, xquichop quichʼaric quiʼ chupan jalojoj ruvech molaj. Xquitiquiribaʼ cʼa quibanic tak kʼataj xa quichin can rijeʼ. Riʼ xquiben xaxe richin chi yechʼacon, y rijeʼ xquichop ruxutuxic ri kitzij Rukʼataj ri Cristo.

27 Xcʼulvachitej cʼa chi tok e kʼaxinek chic el lajuj cʼal lajuj junaʼ, qʼuiy cʼa chic ruvech kʼataj e cʼo chuvech ri ruvachʼulef riʼ. Kitzij cʼa chi e cʼo e qʼuiy kʼataj ri xquibij chi quetaman ruvech ri Cristo. Man riqʼuin vi riʼ, rijeʼ xequixutuj ri janíla cʼatzinel tak tijonic richin ri utzilej rutzijol. Riqʼuin cʼariʼ, rijeʼ xquicʼul ronojel ruvech itzel y xquiyaʼ ri achique can lokʼalej vi chique ri chʼaʼoj quij. Chʼaʼoj quij roma xa man e rucʼamon ta.

28 Ri kʼataj riʼ janíla xnimirisex roma ri itzel banobel y roma ri ruchukʼaʼ ri Satanás ri xuchop ri cánima.

29 Cʼo cʼa chukaʼ jun chic kʼataj ri xuxutuj ri Cristo. Rijeʼ xa xequiyokʼ cʼa ri e richin ri kitzij Rukʼataj ri Cristo roma chʼuchʼuj ri cánima y roma quiniman ri Cristo. Chukaʼ xequixovaj rijeʼ roma xebanatej qʼuiy meyel tak samaj chiquicojol.

30 Roma cʼariʼ tok xquisamajij ri cuchukʼaʼ y ri quikʼatbel tzij pa quiviʼ ri rutijoxelaʼ ri Jesús ri e canajinek can chiquicojol, y xequiyaʼ cʼa pa tak tzʼapin cheʼ. Chiriʼ cʼa, roma ri ruchukʼaʼ ri ruchʼabel ri Dios ri cʼo quiqʼuin ri tijoxelaʼ riʼ, ri tak tzʼapin cheʼ xechʼaratej pa nicʼaj. Cʼa cʼariʼ, rijeʼ xeʼel chic el y xequibanalaʼ meyel tak samaj chiquicojol ri vinakiʼ.

31 Man riqʼuin vi cʼariʼ, stapeʼ cʼa xebanatej ronojel re meyel tak samaj reʼ, ri vinakiʼ cʼa xquicovirisaj na ri cánima, y xquitij quikʼij richin chi yequicamisaj. Riʼ xa achiʼel cʼa ri e aj Judá ri e cʼo pa Jerusalem tok xquitj quikʼij richin chi xquicamisaj ri Jesús, achiʼel cʼa ri xubij can rijaʼ.

32 Xequitorij cʼa chukaʼ chupan ri tak porobel. Chiriʼ cʼa, xa xeʼel pe chic chupan y manek rubanon chique.

33 Chukaʼ xequiyaʼ cʼa chupan quicʼojlibal ri e cʼuxunelaʼ chicopiʼ. Chiriʼ cʼa xa xeʼetzʼan quiqʼuin ri chicopiʼ riʼ, achiʼel cʼa jun alcʼual netzʼan riqʼuin jun ti carneʼl. Cʼa cʼariʼ, xeʼ el pe chic quiqʼuin y manek rubanon chique.

34 Man riqʼuin vi riʼ, ri vinakiʼ xquicovirisaj ri cánima, xa roma xeyukex cʼa el coma qʼuiy teuchunelaʼ y man kitzij ta e yaʼol lokʼolej rutzijol, richin xequipabalaʼ e qʼuiy ruvech kʼataj, y richin xquibanalaʼ ronojel ruvech etzelal. Xequisoc cʼa ri ruvinak ri Jesús. Man riqʼuin vi riʼ, ri ruvinak ri Jesús man xequisoc ta pe chic. Que cʼariʼ, rijeʼ xeyojyaj can roma manjun xquinimalaʼ y can xquibanalaʼ vi ri itzel, benek cʼa ri junaʼ, cʼa tok e kʼaxinek chic el julajuj cʼal lajuj junaʼ.

35 Xcʼulvachitej cʼa chi xbanatej jun nimalej chʼarojriʼil chiquicojol ri vinakiʼ chupan ri junaʼ julajuj cʼal julajuj.

36 Xcʼulvachitej cʼa chi chupan ri junaʼ riʼ, xyacataj jun vinakul ri xquibiniʼaj Nefiʼiʼ. Jacʼa rijeʼ ri can kitzij vi xquinimaj ri Cristo. Chiquicojol cʼa rijeʼ e cʼo vi ri vinakiʼ achojchique ri Lamaniʼ xquibij vi: Jacobiʼ, Joseʼiʼ, Zoramiʼ.

37 Roma cʼariʼ, ri kitzij nimanelaʼ richin ri Cristo xquibiniʼaj Nefiʼiʼ, Jacobiʼ, Joseʼiʼ, Zoramiʼ. Jecʼa rijeʼ ri can kitzij vi xquiyaʼ rukʼij ri Cristo. Ri oxiʼ rutijoxelaʼ ri Jesús ri e canajinek can, chukaʼ e cʼo vi chiquicojol rijeʼ.

38 Xcʼulvachitej cʼa chi ri xexutun ri utzilej rutzijol xquibiniʼaj cʼa Lamaniʼ, Lemueliʼ, Ismaeliʼ. Rijeʼ man xeyojyaj ta can roma manjun xquinimalaʼ. Xa can riqʼuin vi ri quirayibal xquipabaʼ cʼa quiʼ chuvech ri utzilej rutzijol ri Cristo. Xequitijoj cʼa chukaʼ ri calcʼual richin chi man xquinimaj ta, achiʼel cʼa ri catiʼt quimamaʼ xeyojyaj vi pe, pa tok rutiquiribel pe.

39 Reʼ, xa roma cʼa ri quetzelal y ri itzel quibanobal ri catiʼt quimamaʼ, achiʼel cʼa pa tok rutiquiribel pe. Xetijox cʼa richin xequetzelaj ri ralcʼual ri Dios, achiʼel cʼa ri Lamaniʼ xetijox richin xequetzelaj ri ralcʼual ri Nefi, pa tok rutiquiribel pe.

40 Xcʼulvachitej cʼa chi cablajuj cʼal cajiʼ junaʼ e kʼaxinek chic el, y que cʼariʼ quibanon cʼa ri vinakiʼ. Ri janíla e itzel chique ri vinakiʼ riʼ xquicovirisaj quiʼ, y janíla nicʼo cʼa ruviʼ e qʼuiy rijeʼ chiquivech cʼa ri ruvinak ri Dios.

41 Rijeʼ jutakel xequipabaʼ tak jay quichin can rijeʼ richin ri ruyaʼic rukʼij ri Ajaf y xequivik riqʼuin ronojel ruvech jebelilej tak beyomel. Que cʼariʼ xekʼax cʼa el cablajuj cʼal lajuj junaʼ y que cʼa chukaʼ ri xekʼax el oxlajuj cʼal junaʼ.

42 Xcʼulvachitej cʼa chi ri e itzel chique ri vinakiʼ xquichop rubanic ri pan evel sujunic y ri pan evel tak molaj richin ri Gadianton.

43 Ri vinakiʼ ri xquibiniʼaj Nefiʼiʼ chukaʼ xquinimirisaj quiʼ pa cánima coma ri e janíla quibeyomal rijeʼ, y xeʼoc achiʼel ri Lamaniʼ, ri cachʼalal.

44 Chupan cʼa ri tak kʼij riʼ, ri tijoxelaʼ xquichop pe bisonic coma ri quimac ri e cʼo chuvachʼulef.

45 Xcʼulvachitej cʼa chi tok e kʼaxinek chic el volajuj cʼal junaʼ, ri ruvinakul ri Nefiʼ y chukaʼ ri Lamaniʼ e oquinek chic e itzel, xa e junan che caʼiʼ.

46 Xcʼulvachitej cʼa chi ri elekʼomaʼ richin ri Gadianton xequiratej chuvech chijun ri ruvachʼulef. Manjun chic chique ri e choj xcʼojeʼ can xaxe cʼa ri rutijoxelaʼ ri Jesús. Ri vinakiʼ xequiyec can qʼuiy kʼana chiʼichʼ y saka chʼich, y xequicʼayilaʼ ronojel ruvech cʼayij.

47 Xcʼulvachitej cʼa chi tok xekʼax can volajuj cʼal voʼoʼ junaʼ, jariʼ tok xcom ri Amos. Ri vinakiʼ cʼa xecʼojeʼ na chupan ri quetzelal. Cʼa cʼariʼ, ri Amaron, ri ruchakʼ ri Amos, xutzʼibaj cʼa ri retal banobel pa ruqʼuexel rijaʼ.

48 Xcʼulvachitej cʼa chi xekʼax el vaklajuj cʼal junaʼ. Jariʼ tok ri Amaron xerevaj ka ronojel ri lokʼolej retal banobel, roma cʼa ri Uxlabixel queriʼ xubij pa ránima rijaʼ. Ja cʼariʼ, ronojel ri retal banobel ri e kʼaxinek pe riqʼuin jun iyaj mamaj ijaʼtzul, cʼa chire ri jun chic, cʼa tok chupan ri vaklajuj cʼal junaʼ chirij cʼa ri rupetebal ri Cristo.

49 Rijaʼ xerevaj ka riqʼuin ri Ajaf richin xqueʼapon ta chic riqʼuin ri rutzʼakat ri rujayul ri Jacob, achiʼel niquibij can ri lokʼolej ta rutzijol y ri rusujunic ri Ajaf. Que cʼariʼ, xtaneʼ rutzʼibaxic ri retal banobel richin ri Amaron.