Ri Vuj richin ri Mormon

1 Vacami cʼa, yin Mormon ninben jun retal banobel chiquij ri e nutzʼeton y ri e vacʼaxan, y ninyaʼ cʼa rubiʼ ri Vuj richin ri Mormon.

2 Chupan cʼa laʼek ri kʼij tok ri Amaron xerevaj can riqʼuin ri Ajaf ri retal banobel, jariʼ tok rijaʼ xpe viqʼuin. Yin lajuj laʼek nujunaʼ y nuchapon nutijoxic viʼ chire ri etamanic quichin ri nuvinakul. Ja cʼariʼ tok ri Amaron quereʼ xubij cʼa chuve: Yin vetaman chi rat at jun alcʼual utz ajolon y at novinek richin natzuʼ ronojel.

3 Roma cʼariʼ, ninvajoʼ cʼa chi nokaʼ cʼa chacʼuʼx ronojel ri atzʼeton chiquicojol re vinakul reʼ. Cʼa cʼariʼ, tok xtuben juvinek cajiʼ laʼek ajunaʼ, cabiyin cʼa pa ri ruvachʼulef Antum, acuchi cʼo vi jun ti loman juyuʼ rubiniʼan Xim. Chiriʼ cʼa, yin nuyacon can riqʼuin ri Ajaf ronojel ri lokʼolej retal banobel can quichin re vinakul reʼ.

4 Can kitzij vi cʼa chi rat xtacʼuaj aviqʼuin ri xaxilej tak chʼichʼ richin ri Nefi, y ri chʼakaʼ chic xa xqueʼayaʼ can pa ri cʼojlibel acuchi e cʼo vi. Cʼa cʼariʼ, rat xtatzʼibaj chuvech ri xaxilej tak chʼichʼ richin ri Nefi ronojel ri atzʼeton chi xquibanalaʼ re vinakul reʼ.

5 Vacami cʼa, yin Mormon in elenek cʼa pa ri rijaʼtzul ri Nefi. Ri nataʼ chukaʼ rubiniʼan Mormon. Chiriʼ cʼa, man xinmestaj ta ri xubij ri Amaron chuve.

6 Xcʼulvachitej cʼa chi tok cʼo julajuj nujunaʼ, ri nataʼ xirucʼuaj cʼa pa ri ruvachʼulef pa rajxocon kʼij, cʼa chupan ri ruvachʼulef Zarajemla.

7 Chijun ri ruvachʼulef riʼ nojinek che jay, y ri vinakiʼ can e janíla vi e cʼo, xa e achiʼel jubaʼ ri sanayiʼ richin ri nimalej yaʼ.

8 Xcʼulvachitej cʼa chupan ri junaʼ riʼ, chi xyacatej jun camisanel oyoval acuchi e cʼo vi ri Nefiʼiʼ. Chupan cʼa ri vinakul riʼ e cʼo vi ri Nefiʼiʼ, ri Jacobiʼ, ri Joseʼiʼ, ri Zoramiʼ. Ri camisanel oyoval riʼ xbanatej cʼa chiquivech ri Nefiʼiʼ, y ri Lamaniʼ, ri Lemueliʼ, ri Ismaeliʼ.

9 Vacami cʼa, ri Lamaniʼ, ri Lemueliʼ, ri Ismaeliʼ, xquibiniʼaj Lamaniʼ. Roma cʼariʼ, ri caʼiʼ ruvech molaj vinakiʼ ja ri Nefiʼiʼ y ri Lamaniʼ.

10 Xcʼulvachitej cʼa chi xchapatej rubanic ri camisanel oyoval chiquicojol rijeʼ pa ri rucʼulbaʼt ri Zarajemla, chunakaj ri yaʼ rubiniʼan Sidon.

11 Xcʼulvachitej cʼa chi ri Nefiʼiʼ e quimolon janíla achiʼaʼ ri can xicʼo quiviʼ oxochuvi volajuj kʼo achiʼaʼ. Chupan cʼa ri junaʼ riʼ, xcʼulvachitej chi xequiben e qʼuiy chʼaʼoj. Chiriʼ cʼa, ri Nefiʼiʼ xequichʼec ka ri Lamaniʼ y xequicamisaj janíla chique rijeʼ.

12 Cʼariʼ, xcʼulvachitej chi ri Lamaniʼ xquijel ri man utz ta quirayibal, y xcʼojeʼ chic uxlanibel cʼuʼx chuvech ri ruvachʼulef riʼ. Cʼo laʼek cajiʼ junaʼ xcʼojeʼ cʼa ri xulanibel cʼuʼx y manek chic camisanic.

13 Man riqʼuin vi riʼ, cof chʼiquiban ri etzelal chuvech chijun ri ruvachʼulef ri. Xa romariʼ tok ri Ajaf xerelesaj el ri rutijoxelaʼ ri e rulokʼokʼen. Cʼa cʼariʼ, xtaneʼ cʼa rubanic ri meyel tak samaj y akʼomanic, roma cʼa ri nimalej quetzelal ri vinakiʼ.

14 Chukaʼ manek chic lokʼolej sipanic elenek pe riqʼuin ri Ajaf, y ri Uxlabixel man xkaka chic ta pa ruviʼ manjun, roma xquibanalaʼ ri itzel y man xquinimalaʼ ta.

15 Cʼa cʼariʼ, yin cʼo volajuj nujunaʼ y choj jubaʼ ri nunojibal. Roma cʼariʼ tok xikʼejelox pe roma ri Ajaf, y xinnaʼ y xinvetamaj chirij ri rutzil ri Jesús.

16 Cʼariʼ, yin xintij nukʼij richin xichʼabalin chique re vinakul reʼ. Man riqʼuin vi riʼ, xkʼat nuchʼabel y yin xikʼil can richin chi man xichʼabalin ta chic chique. Roma chi kitzij, rijeʼ riqʼuin ronojel quirayibal quipaban quiʼ chuvech ri qui Dios. Chukaʼ ri tijoxelaʼ e lokʼokʼen xeʼelesex cʼa el chupan ri ruvachʼulef riʼ, roma nim ri quetzelal ri vinakiʼ.

17 Yin xicanej cʼa can chiquicojol. Man riqʼuin vi riʼ, xikʼil richin man xichʼabalin ta chique roma cʼa ri rucovil ri cánima. Chukaʼ cʼa, xa roma ri rucovil ri cánima rijeʼ, ri ruvachʼulef xetzelex can chiquivech.

18 Ri elekʼomaʼ riʼ richin ri Gadianton, ri e cʼo chiquicojol ri Lamaniʼ, xecʼojlan cʼa chic chuvech chijun ri ruvachʼulef riʼ. Roma cʼariʼ tok ri vinakiʼ xequevaj ka ri quibeyomal pan ulef. Cʼa cʼariʼ, ri quibeyomal xquiben likʼ, roma ri Ajaf xretzelaj ri ruvachʼulef richin chi man xetiquir ta xequichop, ni ta chukaʼ xequichʼojij.

19 Xcʼulvachitej cʼa chukaʼ chi e cʼo itzel meyel tak cʼutbel, y itzinic, y itzel man etaman ta banobel, y ri ruchukʼaʼ ri itzel vinek can samajinek vi chuvech chijun ri ruvachʼulef riʼ. Riqʼuin cʼariʼ, xekʼajer cʼa ronojel ri chʼabel richin ri Abinadi y chukaʼ richin ri Samuel ri aj Lamaniʼ.