1 Vacami cʼa, yin ninvajoʼ yichʼo quiqʼuin ri vinakiʼ ri e rutzʼakat re ruvinakul reʼ ri cʼa yecʼojeʼ can. Jariʼ ri Dios cʼa xtuyaʼ na ri nuchʼabel chique rijeʼ, richin chi xtiquetamaj chiquij ri catiʼt quimamaʼ. Jaʼ, yin yichʼo chive rix ri ix rutzʼakat ri rujayul ri Israel. Jareʼ cʼa ri chʼabel ri ninbij chive:

2 Tivetamaj cʼa chi rix ix aj rujayul ri Israel.

3 Tivetamaj cʼa chukaʼ chi cʼo chi nitzolin pe icʼuʼx, o manek banel yixcolotej.

4 Tivetamaj cʼa chi cʼo chi niyaʼ can ri samajibel richin camisanel oyoval, y man niqʼuen ta pe chic, y man yixquicot ta chic riqʼuin ri quicʼ nitix riqʼuin ri camisanic xaxe cʼa vi queriʼ nubij ri Dios chive.

5 Tivetamaj cʼa chi can nicʼatzin vi chi nivetamaj chiquij ri ivatiʼt imamaʼ, y nitzolin pe icʼuʼx chupan ronojel ri imac y ri itzel ibanobal, y ninimaj ri Jesucristo. Cʼo cʼa chi nivetamaj chi ja rijaʼ ri Rucʼajol ri Dios, y chi can xcamisex vi coma ri e aj Judá, y riqʼuin ri ruchukʼaʼ ri Tataʼixel rijaʼ cʼastajinek pe chic. Riqʼuin cʼariʼ, rijaʼ rukasan ri rukʼij ri camic, y chukaʼ riqʼuin cʼa rijaʼ ri kʼaxoʼn richin ri camic niyojtej.

6 Rijaʼ can nuben vi ri cʼastajibel quichin ri caminakiʼ. Riqʼuin riʼ, ri vinakiʼ xqecʼastej y xqueʼapon, chuvech ri kʼatbel tzij richin rijaʼ.

7 Rijaʼ chukaʼ xuben can ri quicolotajic ri e aj ruvachʼulef. Roma cʼariʼ, ri man nrejkalej ta manjun mac tok xtapon chuvech ri Ajaf chupan ri kʼij tok xtukʼet tzij pa ruviʼ, xtiyaʼox cʼa kʼij chire richin nicʼojeʼ riqʼuin ri Dios chupan ri rajavaren riqʼuin quicoten richin jantapeʼ. Chiriʼ cʼa xquerubixaj bix man e qʼuisel ta quiqʼuin ri molaj bixanelaʼ aj chicaj. Xquerubixaj chire ri Tataʼixel, y chire ri Cʼajolaxel, y chire ri Uxlabixel ri can e jun Dios vi.

8 Roma cʼariʼ, titzolin pe icʼuʼx y quixkasex chuxeʼ yaʼ pa rubiʼ ri Jesús y titakej ri utzilej rutzijol ri Cristo ri xtikʼalajirisex apon chivech. Man xaxe ta chupan re vuj reʼ xticʼut chivech, xa chukaʼ chupan ri vuj ri benek el quiqʼuin ri e aj Judaʼ chique ri Gentiliʼ. Ri vuj riʼ xtapon iviqʼuin rix coma ri Gentiliʼ.

9 Roma can kitzij vi chi tzʼiban can re jun reʼ richin chi xtinimaj ri jun chic. Vi ninimaj cʼa ri jun chic, xtinimaj cʼa chukaʼ re jun chic, xtinimaj cʼa chukaʼ re jun reʼ. Cʼariʼ, vi ninimaj re jun reʼ, can xtivetamaj vi chiquij ri ivatiʼt imamaʼ. Chukaʼ xtivetamaj chiquij ri nimalej tak samaj ri xebanatej can chiquicojol rijeʼ roma ri ruchukʼaʼ ri Dios.

10 Xtivetamaj chukaʼ chi rix can ix rutzʼakat rijaʼtzul ri Jacob. Roma cʼariʼ tok ix ajilan quiqʼuin ri vinakiʼ richin ri nabey cʼulanen tzij. Can utz vi xtuben chive chupan ri kʼij tok ri Cristo xtukʼet tzij pan iviʼ, vi ninimaj cʼa rijaʼ, y yixkasex chuxeʼ yaʼ, y yixturusex riqʼuin kʼak y ri Uxlabixel. Que cʼariʼ xuben ri Kacolonel, y rijaʼ xubij cʼa chike chi tikabanaʼ cʼa chukaʼ. Amen.