1 Vacami cʼa, xcʼulvachitej chi tok ri Jesús xbe chic el chicaj, ri nimalej molaj vinakiʼ xquitaluj el quiʼ. Chiquijununal ri achiʼaʼ xecachibilaj el ri quixjayilal, y ri calcʼual, y xetzolin chicachoch.

2 Chaʼnin cʼa xyaʼox rutzijol chiquicojol ri chʼakaʼ chic vinakiʼ, tok manjani tikʼekumer ka, chi ri nimalej molaj vinakiʼ xquitzʼet ri Jesús, y chi rijaʼ xuben ri lokʼolej rusamaj pa quiviʼ rijeʼ, y chi can xtucʼut vi riʼ jun bey chic pa rucaʼn kʼij chiquivech ri nimalej molaj vinakiʼ.

3 Kitzij cʼa chi xyatej rutzijol chirij ri Jesús chijun ri tocokʼaʼ riʼ. Roma cʼa qʼuiy rutzijol xyatej chique ri vinakiʼ, e qʼuiy, jaʼ, can janíla vi e qʼuiy exquitij quikʼij chijun ri tocokʼaʼ riʼ richin chi xqueʼapon cʼa pa rucaʼn kʼij acuchi xtucʼut vi riʼ ri Jesús chiquivech ri nimalej molaj vinakiʼ.

4 Xcʼulvachitej cʼa chi pa rucaʼn kʼij ri nimalej molaj vinakiʼ xquimol chic quiʼ. Chiriʼ cʼa, e cʼo vi ri Nefi y ri ruchakʼ rubiniʼan Timoteo, ri xucʼasoj pe tok caminek chic. Cʼo chukaʼ ri rucʼajol rubiniʼan Jonás, chukaʼ cʼa ri Matoni y ri Matonia ri ruchakʼ, chukaʼ ri Kumen, ri Kumenoni, ri Jeremías, ri Xemnon, ri Jonás, ri Sedecías, y ri Isaías. Can ja vi rijeʼ ri tijoxelaʼ ri xeruchaʼ can ri Jesús. Xcʼulvachitej cʼa chi rijeʼ xebe apon y xepaʼeʼ pa quinicʼajal ri nimalej molaj vinakiʼ.

5 Kitzij cʼa, chi ri nimalej molaj vinakiʼ riʼ can nim vi y xa romariʼ tok cʼo chi xquiben cablajuj tak molaj vinakiʼ.

6 Cʼariʼ ri cablajuj tijoxelaʼ xequitijoj cʼa ri nimalej molaj vinakiʼ riʼ. Can kitzij vi cʼa chi rijeʼ xquiben chi ri nimalej molaj vinakiʼ xexuqueʼ ka chuvachʼulef y xechʼo akʼanij riqʼuin ri Tataʼixel pa rubiʼ ri Jesús.

7 Ri tijoxelaʼ chukaʼ xechʼo akʼanij riqʼuin ri Tataʼixel pa rubiʼ ri Jesús. Cʼa cʼariʼ, xepaʼeʼ y xquiben lokʼolej samaj pa quiviʼ ri vinakiʼ.

8 Rijeʼ xquikʼalajirisaj chiquivech ri chʼabel ri xubij can ri Jesús y can manjun xjaletej riqʼuin ri xubij ri Jesús. Ja cʼariʼ tok rijeʼ xexuqueʼ chic y xechʼo akʼanij riqʼuin ri Tataʼixel pa rubiʼ ri Jesús.

9 Xquicʼutuj cʼa akʼanij ri janíla xcajoʼ. Ri janíla xcajoʼ ja ta ri tiyaʼox cʼa chique rijeʼ ri Uxlabixel.

10 Tok quicʼutun chic ri xcajoʼ, rijeʼ xebe cʼa chuchiʼ ri yaʼ y ri nimalej molaj vinakiʼ xequitzekelbej ka.

11 Xcʼulvachitej cʼa chi ri Nefi xoc ka chupan ri yaʼ y xkasex ka chuxeʼ yaʼ.

12 Cʼa cʼariʼ, rijaʼ xel pe chupan ri yaʼ y xuchop rubanic ri kasaxic chuxeʼ yaʼ chique. Rijaʼ xerukasaj cʼa chuxeʼ yaʼ conojel ri xeruchaʼ can ri Jesús.

13 Xcʼulvachitej cʼa chi tok checonojel rijeʼ xekasex chuxeʼ yaʼ y xeʼel pe chic chiquijujunal chupan ri yaʼ, jariʼ tok ri Uxlabixel xkaka pa quiviʼ y rijeʼ xenoj riqʼuin ri Uxlabixel y riqʼuin kʼakʼ.

14 Can kitzij vi cʼa chi rijeʼ xesutix achiʼel cʼa roma jun kʼakʼ y riʼ xa xkaka pe chicaj y ri nimalej molaj vinakiʼ can xquitzʼet vi y xquijiquibaʼ. Chukaʼ takonaxelaʼ xekaka pe chicaj y xquiben lokʼolej samaj pa quiviʼ.

15 Xcʼulvachitej cʼa chi tok ri takonaxelaʼ yetajin chubanic lokʼolej samaj pa quiviʼ ri tijoxelaʼ, can ja vi cʼariʼ tok ri Jesús xpe y xpaʼeʼ ka pa quinicʼajal, y xuben lokʼolej samaj pa quiviʼ.

16 Xcʼulvachitej cʼa chi rijaʼ xchʼo quiqʼuin ri nimalej molaj vinakiʼ y xubij chi quexuqueʼ cʼa ka chic chuvachʼulef, y chukaʼ chi ri rutijoxelaʼ quexuqueʼ cʼa chuvachʼulef.

17 Cʼariʼ, xcʼulvachitej chi tok checonojel rijeʼ e xucul chic chuvachʼulef, rijaʼ xubij chique ri rutijoxelaʼ chi quechʼo cʼa akʼanij riqʼuin ri Dios.

18 Vaveʼ cʼa, rijeʼ xquichop lokʼolej chʼoven. Xechʼo cʼa akʼanij riqʼuin ri Jesús y xquibilaʼ chi ja rijaʼ ri Cajaf y ri qui Dios.

19 Cʼa cʼariʼ, ri Jesús xel el jubaʼ quiqʼuin y xuxuc riʼ chuvachʼulef y quereʼ xubij:

20 Nataʼ, ninmatioxij chave roma ayaʼon pe ri Uxlabixel chique ri e nuchaʼon pe. Xa roma cʼa ri quicukubabel cʼuʼx viqʼuin yin, tok e nuchaʼon pe rijeʼ chiquicojol ri e aj re ruvachʼulef.

21 Nataʼ, nincʼutuj chave chi xtayaʼ cʼa ri Uxlabixel chique ri xqueniman ri xtiquibij rijeʼ.

22 Nataʼ, rat ayaʼon pe ri Uxlabixel chique rijeʼ roma yinquinimaj. Rat natzʼet cʼa chi yinquinimaj roma yeʼavacʼaxaj, y rijeʼ yechʼo akʼanij viqʼuin. Rijeʼ yechʼo akʼanij viqʼuin yin roma in cʼo quiqʼuin.

23 Vacami cʼa, Nataʼ, yin nincʼutuj akʼanij chave rat coma rijeʼ y chukaʼ coma checonojel ri xqueniman ri xtiquibij. Nincʼutuj chi quinquinimaj na cʼa yin, richin queriʼ yin xquicʼojeʼ cʼa quiqʼuin, achiʼel rat, Nataʼ, at cʼo cʼa viqʼuin yin, richin queriʼ roj xa oj junan.

24 Xcʼulvachitej cʼa chi tok ri Jesús queriʼ xucʼutuj cʼa chire ri Tataʼixel, xapon cʼa quiqʼuin ri rutijoxelaʼ, y can kitzij vi chi rijeʼ cʼa xechʼo na akʼanij riqʼuin rijaʼ, y man xquikʼil ta quiʼ chubanic. Man xequicamululaʼ ta cʼa quitzij, roma xa xyaʼox cʼa chique achique rucʼamon chi xquicʼutuj, y e nojinek riqʼuin utzilej rayibel pa cánima.

25 Xcʼulvachitej cʼa chi ri Jesús xeruturusaj rijeʼ tok cʼa xechʼo na akʼanij riqʼuin, y xtzuʼun riqʼuin quicoten pa quiviʼ, y ri rusakil ri ruvech rijaʼ xchʼichʼan chiquivech, y can kitzij vi chi rijeʼ e sek xquiben, achiʼel ri ruvech y ri rutziak ri Jesús. Kitzij cʼa chi ri sakil riʼ nicʼo ruviʼ chiquivech ronojel chic sakil, y manek chic banel richin nicʼojeʼ ta chuvachʼulef janíla sakil junan ta riqʼuin riʼ.

26 Stapeʼ cʼa rijeʼ man xquitanabaʼ ta ri lokʼolej chʼoven, ri Jesús quereʼ xubij chique: Man titanabaʼ cʼa ri lokʼolej ichʼoven.

27 Xutzalabaʼ el riʼ quiqʼuin, y xbe el jubaʼ, y xuxuc riʼ chuvachʼulef. Cʼariʼ, rijaʼ xchʼo akʼanij riqʼuin ri Tataʼixel jun chic bey y quereʼ xubij:

28 Nataʼ, ninmatioxij chave roma e achʼajchʼojirisan ri e nuchaʼon pe roma cʼa ri quicukubabel cʼuʼx rijeʼ. Yin nincʼutuj akʼanij chave coma rijeʼ y chukaʼ coma ri xqueniman ri chʼabel xtiquibij rijeʼ, chi rijeʼ chakaʼ xquechʼajchʼojirsex cʼa viqʼuin yin, roma ri quicukubabel cʼuʼx quiqʼuin ri quichʼabel achiʼel cʼa ri tijoxelaʼ e chʼajchʼojirisan pe viqʼuin.

29 Nataʼ, man nincʼutuj ta akʼanij chave coma ri xa e richin re ruvachʼulef, xa coma cʼa ri e ayaʼon pe chuve chupan re ruvachʼulef. Ninben riʼ roma ri quicukubabel cʼuʼx, richin queriʼ xquechʼajchʼojirisex cʼa viqʼuin yin, richin queriʼ xquicʼojeʼ cʼa quiqʼuin rijeʼ, achiʼel rat, Nataʼ, at cʼo viqʼuin, richin queriʼ roj xa oj junan y richin queriʼ xtibanatej cʼa ri nucʼojlemal quiqʼuin.

30 Tok ri Jesús xerubij can re chʼabel reʼ, rijaʼ xapon jun bey chic quiqʼuin ri rutijoxelaʼ. Vaveʼ cʼa, rijeʼ cʼa xechʼo na akʼanij riqʼuin rijaʼ chi utzil y man xetaneʼ ta. Rijaʼ xtzuʼun cʼa chic riqʼuin quicoten pa quiviʼ, y can kitzij vi chi rijeʼ e sek xquiben, achiʼel cʼa ri Jesús.

31 Xcʼulvachitej cʼa chi xbe chic el jubaʼ quiqʼuin y xchʼo akʼanij riqʼuin ri Tataʼixel.

32 Ri rakʼ jun vinek man nitiquir ta yerutzijoj cʼa ri chʼabel ri xerubij akʼanij rijaʼ, y chukaʼ manek banel chi yetzʼibex ta roma jun vinek ri lokʼolej ruchʼoven xuben.

33 Ri nimalej molaj vinakiʼ xcacʼaxaj cʼa y niquijiquibaʼ. Xjakatej cʼa ri cánima rijeʼ, y can xekʼax vi chiquivech pa cánima ri chʼabel xerubij akʼanij.

34 Man riqʼuin vi riʼ, can janíla vi nimaʼk y meyel ri chʼabel ri xerubij akʼanij, y romariʼ tok manek banel richin chi yetzʼibex o yetzijox roma jun vinek.

35 Xcʼulvachitej cʼa chi tok ri Jesús xutanabaʼ ri lokʼolej chʼoven, rijaʼ xapon chic quiqʼuin ri rutijoxelaʼ y quereʼ xubij chique: Manjun bey nutzʼeton janíla ta nim cukubabel cʼuʼxʼ chiquicojol ri e aj Judaʼ, achiʼel re vaveʼ. Roma cʼariʼ, manek banel richin xencʼut ta chiquivech rijeʼ nimalej tak meyel samaj, achiʼel re vaveʼ, roma cʼa man xquinimalaʼ ta.

36 Kitzij ninbij chive chi manjun chique rijeʼ rutzʼeton ta janíla nim banobel, achiʼel ri itzʼeton rix. Chukaʼ man cacʼaxan ta janíla nim naʼoj, achiʼel ri ivacʼaxan rix.