Scriptures
3 Nefi 24


Tanaj 24

Ri ruchʼabel ri Malaquías yechʼabalix chique ri Nefiʼiʼ. Nutzijoj ri pixaʼ quichin ri lajujitakil y ri sujubel. Tajunumaj cʼa riqʼuin ri Malaquías 3.

1 Xcʼulvachitej cʼa chi rijaʼ xubij chique chi quequitzʼibaj cʼa ri chʼabel ri xeruyaʼ ri Tataʼixel chire ri Malaquías, ri yerubij na cʼa rijaʼ chique rijeʼ. Xcʼulvachitej cʼa chi tok xetzʼibatej can riʼ, jariʼ tok rijaʼ xusol quij. Jareʼ cʼa ri chʼabel ri xerutzijoj chique, y quereʼ xubij: Quereʼ cʼa xubij ri Tataʼixel chire ri Malaquías: Can kitzij vi chi yin xtintek nutakonaxel y rijaʼ xtuchojmirisaj apon ri bey chinuvech, y ri Ajaf ri nicanoj rix xtapon chek cʼateʼ chupan ri lokʼolej runimajay. Jacʼa rijaʼ ri takonaxel richin ri cʼulanen tzij achojiqʼuin yixquicot vi. Jariʼ cʼa, can xtipe vi, nichaʼ ri Ajaf quichin ri E Janíla.

2 Man riqʼuin vi riʼ, ¿achique cami cʼa xticochʼon ri kʼij richin ri rupetebal? ¿Achique cʼa xtipaʼeʼ tok rijaʼ xtucʼut riʼ? Roma rijaʼ can achiʼel vi ri rukʼakʼ ri nichʼajchʼojirisan y ri ruchʼupek ri chʼajonel.

3 Rijaʼ xtitzʼuyeʼ cʼa achiʼel jun chayunel y jun ruchʼajchʼojirisanel saka chʼichʼ. Xqueruchʼajchʼojirisaj cʼa ri rucʼajol ri Levi y xqueruchʼej achiʼel cʼa nibantej chire ri kʼana chʼichʼ y ri saka chʼichʼ, richin chi rijeʼ xtiquiben riqʼuin ruchojmilal jun sujubel chire ri Ajaf.

4 Ja cʼariʼ tok ri sujubel richin ri Judá y ri Jerusalem jebel xtikaʼ chuvech ri Ajaf, achiʼel cʼa rubanon can chupan ri ojer tak kʼij.

5 Yin xquijel cʼa apon iviqʼuin richin ninkʼet tzij pan iviʼ. Chaʼnin xquijiquiban chiquij ri e aj itzʼ y ri yetzʼiʼin y ri yekʼaban tzij. Que cʼa chukaʼ riʼ, xtinben chique ri man niquiyaʼ ta utzilej ri rutojbal chire ri samajel. Chukaʼ queriʼ xtinben chique ri niquikasaj rukʼij ri malcaʼn ixok y ri mebaʼiʼ alcʼualaʼ, y ri niquixilkʼotij ka ri achin nej nipe vi, y chique chukaʼ ri man niquiyaʼ ta nukʼij yin, nichaʼ ri Ajaf quichin ri E Janíla.

6 Can ja vi yin ri Ajaf y man yijalatej ta. Roma cʼariʼ, tok rix ri ix rucʼajol ri Jacob man ix vulatajinek ta.

7 Cʼa chupan can ri quikʼij ri ivatiʼt, imamaʼ, rix ix elenek cʼa el chic riqʼuin ri nutakbal y man e itaken ta chic pe. Quixtzolin cʼa pe viqʼuin yin y yin xquitzolin cʼa chic iviqʼuin rix, nichaʼ ri Ajaf quichin ri E Janíla. Rix quereʼ nibij: ¿Achojiqʼuin xkojtzolin vi cʼa?

8 ¿La xtelekʼ el cami jun achin riqʼuin ri Dios? Rix ix elekʼavinek cʼa chic el viqʼuin yin. Vacami cʼa, quereʼ nibij rix: ¿Achojiqʼuin cami oj elekʼavinek vi el chavech rat? Xa quiqʼuin cʼa ri lajujitakil y ri sujubel.

9 Rix ix etzelan cʼa riqʼuin jun etzelanic. Riʼ xa roma rix chiʼivonojel ri ix cʼo chupan re tinamit reʼ xa ix elekʼavinek cʼa el viqʼuin.

10 Queʼicʼamaʼ cʼa pe ronojel ri lajujitakil chupan ri cʼujay, richin queriʼ nicʼojeʼ tiʼij chupan ri vachoch. Quinitejtobej cʼa vacami, nichaʼ ri Ajaf quichin ri E Janíla. Titzʼetaʼ cʼa vi man xtinjek ta ri ruchiʼ ri caj y xtinchoxoxej cʼa ka jun turusanic, xa cʼa tok nupulisaj.

11 Xtintorij cʼa el ri turunel ivoma rix. Cʼa cʼariʼ, man xtuvulaj ta ri ticoʼn pa ri ivulef. Manjun xtiban ta cʼa chique ri cʼanilej kʼayis, richin queriʼ jebel nivachin pa juyuʼ, nichaʼ ri Ajaf quichin ri E Janíla.

12 Checonojel ri tinamit xtiquibij chi nim ruva ikʼij rix. Riʼ xa roma can jebel vi ri iruvachʼulef, nichaʼ ri Ajaf quichin ri E Janíla.

13 Rix ix chʼovinek cʼa cof chuvij yin, nichaʼ ri Ajaf. Man riqʼuin vi riʼ, cʼa que na reʼ nibij: ¿Achique cami kabin cʼa chavij?

14 Rix quereʼ ibin cʼa can: Xa manek rejkalen cʼa chike richin nikasamajij ri Dios. ¿Achique cami cʼa kachʼacon tok kabanalon ri rutakbal rijaʼ y tok chʼuchʼuj oj biyirinek chuvech ri Ajaf quichin ri E Janíla?

15 Vacami cʼa nikabij chi ri niquinimirisaj quiʼ xa yequicot. Jaʼ, ri niquiben ri itzel e jotoban. Jaʼ, ri niquiyokʼ ri Dios, e solcopin.

16 Cʼa cʼariʼ ri xquixibij quiʼ chuvech ri Ajaf xetzijon ka binakel chiquivech. Jariʼ tok ri Ajaf xuyaʼ cʼa ruxiquin y xracʼaxaj. Cʼa cʼariʼ xtzʼibex jun vuj richin natabel, chuvech rijaʼ. Ri vuj riʼ xucʼuaj ri quibiʼ ri xquixibij quiʼ chuvech ri Ajaf, y ri xquichʼob rij ri rubiʼ.

17 Rijeʼ xqueʼoc ri e vichin yin chupan ri kʼij tok ninben ri jebelilej abej, nichaʼ ri Ajaf quichin ri E Janíla. Yin xquencuy rijeʼ, achiʼel cʼa jun achin nucuy ri rucʼajol ri nusamajij pe rijaʼ.

18 Ja cʼariʼ tok xquixtzolin pe. Xtivetamaj cʼa quivech ri e choj y ri e itzel. Xtivetamaj cʼa ruvech ri nusamajij pe ri Dios y ri man nusamajij ta pe.