1 Can kitzij, kitzij ninbij chive chi cʼa e cʼo na chʼakaʼ chic nucarneʼl ri man e aj vaveʼ ta, ni ta chukaʼ man e aj ri ruvachʼulef Jerusalem ta, ni ta man e aj xabachique chic cʼojlibel ta acuchi in kʼaxinek vi can richin ninben ri lokʼolej nusamaj.

2 Roma cʼa je rijeʼ ri achojchiquij yichʼo vi vacami ri manjani ticacʼaxaj ri nuchʼabel. Chukaʼ manjun bey nukʼalajirisan viʼ chiquivech.

3 Man riqʼuin vi riʼ, nucʼulun pe jun pixaʼ riqʼuin ri Tataʼixel richin xquibiyin cʼa quiqʼuin rijeʼ, y rijeʼ xticacʼaxaj cʼa ri nuchʼabel, y xqueʼajilex cʼa quiqʼuin ri nucarneʼl, richin queriʼ xticʼojeʼ xaxe jun kʼataj y xaxe jun yukʼunel. Roma cʼariʼ, cʼo chi ninbekʼalajirisaj viʼ chiquivech.

4 Yin ninbij cʼa chive chi queʼitzʼibaj cʼa re chʼabel reʼ tok in benek chic el. Queriʼ cʼa, vi ri nuvinak ri e cʼo pa Jerusalem (ri in quitzʼeton chic y ri e cʼo viqʼuin tok xinben ri lokʼolej nusamaj), vi rijeʼ xa man cʼa niquicʼutuj ta chire ri Tataʼixel pa nubiʼ yin, richin chi niquetamaj chivij rix roma ri Uxlabixel, y chukaʼ chiquij ri chʼakaʼ chic ijaʼtzul achojchiquij manjun vi quetaman, cʼa cʼariʼ, re chʼabel reʼ ri xtitzʼibaj rix can xtichajix vi cʼa, y xtikʼalajirisex cʼa chiquivech ri Gentiliʼ. Queriʼ cʼa roma ri tzʼakatisanic ri cʼo quiqʼuin ri Gentiliʼ, ri rutzʼakat ri quijaʼtzul ri e aj Judá xquecʼamer cʼa pe, o pa jun chic chʼabel, xquetijox cʼa chi ja yin ri in Lokʼolej Quelesanel rijeʼ. Jecʼa rijeʼ ri xquequiratej cʼa chuvech chijun re ruvachʼulef roma xa man cʼa yinquinimaj ta.

5 Ja cʼariʼ tok xquenmol pe chuvech chijun re ruvachʼulef, y ja cʼariʼ tok xtinben chi xtikʼajer ri cʼulanen tzij ri xuben can ri Tataʼixel quiqʼuin conojel ri vinakiʼ ri e aj rujayul ri Isreal.

6 Nim cʼa ruva quikʼij ri Gentiliʼ roma cʼa ri quicukubabel cʼuʼx viqʼuin yin, ri elenek pe riqʼuin y roma ri Uxlabixel ri nijiquiban chiquivech rijeʼ chuvij yin y chirij ri Tataʼixel.

7 Can kitzij vi chi roma ri quicukubabel cʼuʼx viqʼuin yin nichaʼ ri Tataʼixel, y roma rix ri ix aj rujayul ri Israel, man yixniman ta, cʼariʼ cʼa, chupan ri ruqʼuisibel kʼij ri kitzij xtapon cʼa quiqʼuin ri Gentiliʼ richin queriʼ checonojel reʼ can tzʼaket vi xquekʼalajirisex cʼa chiquivech.

8 Jacʼa ri Tatʼixel nubij chi xa joʼoc quivech ri Gentiliʼ ri man yeniman ta. Roma rijeʼ can e petenek vi cʼa chuvech re ruvachʼulef reʼ, y e quiquiran ri nuvinak ri e aj rujayul ri Israel. Y ri nuvinak ri e aj rujayul ri Israel e elesan el quiqʼuin rijeʼ y e paliben coma.

9 Ronojel cʼareʼ xa roma cʼa ri rujoyovabal ri Tataʼixel chiquivech ri Gentiliʼ y chukaʼ roma ri rucʼajisabel ri Tataʼixel ri e cʼo pa quiviʼ ri nuvinak ri e aj rujayul ri Israel. Can kitzij, kitzij ninbij chive chi tok xtibanatej yan can ronojel reʼ, chukaʼ xtinben chi ri nuvinak ri e aj rujayul ri Israel xquesocotej, y xquechʼitatej, y xquecamisalox, y xqueʼokotex el chiquicojol, y xqueʼetzelatej coma, y xtiyaloj cʼa xquexilkʼotix y xqueyokʼ.

10 Quereʼ cʼa nubij chuve ri Tataʼixel chi tinbij cʼa chive: Yin xtinvelesaj cʼa el quiqʼuin ri Gentiliʼ ri rutzʼakatisanic ri utzilej nutzijol, tok xtapon ri kʼij chi rijeʼ xquemacun chirij ri utzilej nutzijol, y xtiquinimirisaj quiʼ pa quiviʼ conojel chic tinamit, y pa quiviʼ conojel chic vinakiʼ chuvech chijun re ruvachʼulef. Que cʼa chukaʼ riʼ tok xquenoj riqʼuin ronojel ruvech tzʼucuj tzij, y kʼoloj, y itzel novinek tak naʼoj, y ronojel ruvech rubanic caʼiʼ quipalej, y camisanic, y ri samaj quichin ri itzel tak yukenelaʼ pa tak kʼataj, y tzʼiʼinic, y nimalej tak mac pan evel, y yequiben cʼa ronojel reʼ y niquixovaj ri utzilej nutzijol, nichaʼ ri Tataʼixel.

11 Cʼa cʼariʼ, xtokaka chinucʼuʼx ri cʼulanen tzij ri xinben quiqʼuin ri nuvinak e aj rujayul ri Israel, y xtincʼuaj cʼa ri utzilej nutzijol chique rijeʼ.

12 Xtincʼut cʼa chivech rix, ri ix rujayul ri Israel, chi ri Gentiliʼ man xticʼojeʼ ta chic cuchukʼaʼ pan iviʼ. Xa xtokaka chinucʼuʼx ri cʼulanen tzij ri xinben iviqʼuin rix, ri ix rujayul ri Israel. Cʼariʼ xquixtijox cʼa chire ri rutzʼakatisanic ri utzilej nutzijol.

13 Jacʼa, vi ri Gentiliʼ nitzolin pe quicʼuʼx y yepe chic viqʼuin, nichaʼ ri Tataʼixel, can kitzij vi chi xqueʼajilex quiqʼuin ri nuvinak, ri e rujayul ri Israel.

14 Man xtinyaʼ ta cʼa kʼij richin chi ri nuvinak, ri e aj rujayul ri Israel, xquebe ta cʼa chiquicojol ri Gentiliʼ richin xquequipalibej ta, nichaʼ ri Tataʼixel.

15 Jacʼa vi man yepe ta viqʼuin y man nicacʼaxaj ta ri nuchʼabel, can xtinyaʼ vi cʼa kʼij chique, jaʼ, can xtinyaʼ vi cʼa kʼij chique ri nuvinak, ri e aj rujayul ri Israel, richin chi yepe cʼa chiquicojol y yequipalibej. Rijeʼ xqueʼoc achiʼel ri atzʼan ri qʼuisinek chic ri rutzʼamil, ri manek chic nicʼatzin, xaxe chic richin nitorix el y nipalibelox coma ri nuvinak, ri e aj rujayul ri Israel.

16 Can kitzij, kitzij ninbij chive chi can que vi reʼ, ja ri Tataʼixel rubin can chuve chi tinyaʼ cʼa re ruvachʼulef reʼ chique re vinakiʼ reʼ richin chi xtiquichinaj.

17 Cʼa cʼariʼ, xquekʼajer cʼa ri ruchʼabel ri yaʼol lokʼolej rutzijol Isaías, ri quereʼ niquibij:

18 Ri ichajinelaʼ xtiquiyec cʼa ri quichʼabel y xaxe pa jun chʼabel xquebixan junan, roma xtiquitzulubelaʼ cʼa quiʼ tok ri Ajaf xtutzolij pe chic ri Sión chique rijeʼ.

19 Quixel cʼa pe riqʼuin quicoten y quixbixan cʼa junan, ja rix ri ix cʼojlibel tolan can richin ri Jerusalem, roma cʼa ri Ajaf e rubochiʼin chic pe ri ruvinak y relesan chic pe ri Jerusalem chupan rucʼayeval.

20 Ri Ajaf rukʼalajirisan pe chijun ri lokʼolej rukʼaʼ chiquivech conojel tinamit, y ri e cʼo chuvech chijun re ruvachʼulef xtiquitzʼet cʼa ri colotajic ri xtuben ri Dios.