1 Kitzij ninbij chi ninyaʼ chive jun etal richin xtinabej cʼa tok xa jubaʼ chic man xquecʼulvachitej ronojel reʼ. Ja cʼariʼ tok yin xquenmol pe chic ri nuvinak, ri e aj rujayul ri Israel, pa ri nimalej quitalutajic y xtinpabaʼ cʼa jun bey chic ri nu Sión chiquicojol.

2 Vaveʼ cʼa jareʼ ri ninyaʼ chive achiʼel jun etal. Kitzij cʼa chi can ja vi yin ninkʼalajirisaj ronojel reʼ chivech rix, y cʼa cʼo na chʼakaʼ chic ri xtinkʼalajirisaj apon chivech. Roma cʼa ri ruchukʼaʼ ri Uxlabixel ri xtuyaʼ ri Tataʼixel chive, can xquekʼalajirisex vi ronojel reʼ chiquivech ri Gentiliʼ chukaʼ, richin chi xtiquetamaj chirij re vinakul reʼ, ri e rutzʼakat ri rujayul ri Jacob, y chiquij re nuvinak reʼ ri xquequiratej coma rijeʼ.

3 Can kitzij, kitzij ninbij chive chi ronojel reʼ xquekʼalajirisex chiquivech roma ri Tataʼixel. Xqueʼel cʼa pe riqʼuin ri Tataʼixel, cʼariʼ xqueʼel pe quiqʼuin rijeʼ, cʼa iviqʼuin rix.

4 Jareʼ cʼa ri utzilej runojibal ri Tataʼixel, roma rijeʼ xquetiquibex chuvech re ruvachʼulef reʼ y xqueʼoc e jun vinakul solcopin roma ri ruchukʼaʼ ri Tataʼixel. Riqʼuin cʼariʼ, ronojel reʼ xtibe el quiqʼuin rijeʼ chire ri rutzʼakat ri ivijaʼtzul, richin queriʼ xtikʼajer ri cʼulanen tzij xuben ri Tataʼixel quiqʼuin ri ruvinak ri aj rujayul ri Israel.

5 Roma cʼariʼ, re samaj reʼ y ri chʼakaʼ chic samaj ri xquebanatej chiʼicojol rix can xqueʼucʼuex vi coma ri Gentiliʼ chique ri ivijaʼtzul. Ri ivijaʼtzul xa xquesachiyaj can roma manjun niquinimalaʼ roma ri itzel quibanobal.

6 Roma reʼ, can utz vi chire ri Tataʼixel chi ronojel reʼ xtel el quiqʼuin ri Gentiliʼ, richin queriʼ rijaʼ xtucʼut ri ruchukʼaʼ chiquivech ri Gentiliʼ. Roma cʼariʼ, vi ri Gentiliʼ man xtiquicovirisaj ta ri cánima, xa xtitzolin ta pe quicʼuʼx, y yejel pe viqʼuin, y xquekasex ta chuxeʼ yaʼ pa nubiʼ yin, y xtiquetamaj ta ri nutijonic, jariʼ tok xqueʼajilex cʼa chiquicojol ri nuvinakul, ri aj rujaul ri Israel.

7 Tok xticʼulvachitej cʼareʼ, jariʼ tok ri ivijaʼtzul xtiquichop cʼa retamaxic ronojel reʼ. Can ja vi cʼa ronojel reʼ jun etal chique rijeʼ, richin chi xtiquetamaj chi ri Tataʼixel rutiquiriban chic ri rusamaj, richin queriʼ nuben chi nikʼajer ri cʼulanen tzij ri xuben quiqʼuin ri vinakiʼ ri aj rujayul ri Israel.

8 Tok napon ri kʼij riʼ, xticʼulvachitej cʼa chi ri tak tataʼal quichin ri tinamit xtiquikʼil ri quichiʼ, roma can xtiquitzʼet vi ri manjun bey tzijon ta can chique. Chukaʼ xtiquichʼob rij ri manjun bey xcacʼaxaj ta can.

9 Chupan ri kʼij riʼ, can voma vi yin, ri Tataʼixel xtuben jun samaj y jariʼ jun nimalej y meyel samaj chiquicojol rijeʼ. Xquecʼojeʼ cʼa chʼakaʼ chiquicojol rijeʼ man xtiquinimaj ta, stapeʼ cʼa cʼo jun achin nikʼalajirisan pe chiquivech.

10 Can kitzij vi cʼa chi ri rucʼaslen ri nusamajel xticʼojeʼ pa nukʼaʼ yin. Roma cʼariʼ tok rijeʼ man xtiquiyoj ta, stapeʼ cʼa rijaʼ xtisocotej can coma rijeʼ. Man riqʼuin vi riʼ, yin xtinvakʼomaj roma can xtincʼut vi chiquivech chi ri utzilej nunojibal janíla vi nim chuvech ri kʼolonel naʼoj richin ri itzel vinek.

11 Ri Tataʼixel xtuben chi ri samajel riʼ xtucʼuaj ri nuchʼabel chique ri Gentiliʼ y xtuyaʼ uchukʼaʼ chire richin queriʼ xtucʼuaj cʼa chique ri Gentiliʼ. Roma cʼariʼ, xticʼulvachitej chi ri man xqueniman ta ri nuchʼabel yin, ri in Jesucristo, can xquecʼuk vi el quiqʼuin ri nuvinak achojiqʼuin xinben vi jun cʼulanen tzij. Xtibanatej cʼa chique achiʼel xubij can ri Moisés.

12 Chukaʼ ri nuvinak, ri e rutzʼakat ri Jacob, xquecʼojeʼ cʼa pa quinicʼajal ri Gentiliʼ, jaʼ, pa ri quinicʼajal rijeʼ, achiʼel jun coj chiquicojol ri aj pa qʼuechelaj tak chicopiʼ, y achiʼel cʼa jun cʼajol coj chiquicojol ri tak molaj carneʼl, ri vi noc chiquicojol ri molaj, yerupalibej y yeruxil ta, y can manjun vi chic nitiquir ta yerucol ri carneʼl riʼ.

13 Ri quikʼaʼ xtiquiyec chiquij ri yecʼulaʼan quichin, y conojel ri yeʼetzelan quichin xquecʼuk el.

14 Joʼoc quivech ri Gentiliʼ vi man nitzolin ta pe quicʼuʼx. Roma ja chupan ri kʼij riʼ, xticʼulvachitej chi yin xquenmej el ri aquiej aviqʼuin y xquenvulaj ri acʼuajbal, nichaʼ ri Tataʼixel.

15 Chukaʼ xquenvulaj ri tinamit chupan re aruvachʼulef y xquenvulaj ronojel ri acʼojlibel ri cof quibanic.

16 Xquencʼuk el ri itz chupan ri aruvachʼulef y manek chic xquecʼojeʼ cʼa labajinelaʼ aviqʼuin.

17 Xquenvulaj chukaʼ ri tak atiox y xquencʼuk el aviqʼuin ri e paʼel tak tiox y manek chic xtayaʼ cʼa quikʼij ri xa rat at banayon riqʼuin ri akʼaʼ.

18 Chukaʼ xquenqʼuis el ri aqʼuechelaj pan anicʼajal y xquenvulaj ri atinamit.

19 Xticʼulvachitej chukaʼ chi xqueqʼuis conojel ri tzʼucuj tzij, y ri kʼoloj, y ri xochʼinic, y ri cʼaxinic, y ri samaj quichin ri itzel tak yukenelaʼ pa tak kʼataj, y ri tzʼiʼinic.

20 Roma xticʼulvachitej chupan ri kʼij riʼ, nichaʼ ri Tataʼixel, chi yin xquencʼuk el quiqʼuin ri nuvinak aj rujayul ri Israel conojel ri man xtitzolin ta pe quicʼuʼx y man xqueʼapon ta riqʼuin ri Nucʼajol Nulokʼokʼen.

21 Chukaʼ xtinben oyoval y chʼaʼoj chique, achiʼel cʼa ri ninben chique ri manjun niquinimaj. Ri oyoval riʼ can man vi junan ta riqʼuin xabachique chic oyoval ri cacʼaxan rijeʼ.

22 Man riqʼuin vi riʼ, vi xtitzolin pe quicʼuʼx y xticacʼaxaj ri nuchʼabel y man niquicovirisaj ta ri cánima, jariʼ tok xtinpabaʼ ri nukʼataj chiquicojol, y xqueʼoc pe riqʼuin ri cʼulanen tzij, y xqueʼajilex riqʼuin re rutzʼakat reʼ ri Jacob, achojcheʼ nuyaʼon vi re ruvachʼulef reʼ richin niquichinaj.

23 Cʼa cʼariʼ xquequitoʼ ri nuvinak, ri e rutzʼakat ri Jacob y jampeʼ na cʼa chire ri rujayul ri Israel ri xquepe richin xtiquipabaʼ cʼa jun tinamit ri xtubiniʼaj ri Cʼacʼaʼ Jerusalem.

24 Ja cʼariʼ tok xquequitoʼ ri nuvinak ri e talutajinek chuvech chijun re ruvachʼulef, richin chi xtiquimol quiʼ chupan ri Cʼacʼa Jerusalem.

25 Cʼa cʼariʼ, ri ruchukʼaʼ ri caj xtikaʼ pe quiqʼuin, y yin chukaʼ xquicʼojeʼ pa quinicʼajal.

26 Jacʼa chupan ri kʼij riʼ tok xtichap cʼa ri samaj richin ri Tataʼixel, y re utzilej rutzijol reʼ xtichʼabalix chiquicojol ri rutzʼakat re vinakul reʼ. Can kitzij ninbij chive chi can chupan vi ri kʼij riʼ, jari tok xtichap ri rusamaj ri Tataʼixel chiquicojol ri nuvinak ri e talun el, jaʼ, can ja vi riʼ ri ijaʼtzul ri e sachinek el, ri xerelesaj el ri Tataʼixel pa Jerusalem.

27 Kitzij cʼa chi ri samaj xtichapatej cʼa riqʼuin ri Tataʼixel chiquicojol checonojel ri nuvinak ri e quiran el, richin queriʼ xtichojmirisex cʼa ri rubeyal achojchupan xquepe vi cʼa viqʼuin richin queriʼ xticoyoj ta cʼa akʼanij ri Tataʼixel pa nubiʼ yin.

28 Kitzij cʼa chi jariʼ tok ri samaj xtichapatej cʼa riqʼuin ri Tataʼixel chiquicojol checonojel ri tinamit. Queriʼ cʼa nichojmirisex ri rubeyal achojiqʼuin xquemol ta pe chic ri ruvinak chupan ri ruvachʼulef quichinan.

29 Cʼa cʼariʼ, xquebe el pa conojel ri tinamit, y man xquebe ta aninek ni man xqueʼanimej ta. Roma ja yin xquinabiyej chiquivech, nichaʼ ri Ajaf, y chukaʼ xquixintzekelbej el.