1 Xcʼulvachitej cʼa chi ri rutijoxelaʼ ri Jesús xebiyaj, y xequichʼabalij ri xecacʼaxaj y ri xequitzʼet, y xquibanalaʼ ri kasanic chuxeʼ yaʼ pa rubiʼ ri Jesús. Cʼa cʼariʼ, xcʼulvachitej chi ri tijoxelaʼ quimolon quiʼ, y can xemevayin vi junan, y xechʼo akʼanij chi utzil riqʼuin ri Dios.

2 Ja cʼariʼ tok ri Jesús xucʼut chic riʼ jun bey chiquivech rijeʼ, roma can xechʼo vi akʼanij riqʼuin ri Tataʼixel pa rubiʼ. Ri Jesús xpe cʼa y xpaʼeʼ ka pa quinicʼajal, quereʼ cʼa xubij chique: ¿Achique cʼa nivajoʼ chi yin ninyaʼ chive?

3 Cʼa cʼariʼ, rijeʼ quereʼ xquibij chire: Kajaf, nikajoʼ chi rat nabij ta chike achique cʼa biʼaj xtikayaʼ can chire re kʼataj reʼ. Roma e cʼo e qʼuiy tojojenic chikacojol chirij re naʼoj reʼ.

4 Jariʼ tok ri Ajaf quereʼ xubij chique: Can kitzij, kitzij ninbij chive, ¿achique cami cʼa roma tok re vinakul reʼ yexebeloj y yetojojen chirij re naʼoj reʼ?

5 ¿La man quitzʼeton ta cami ri lokʼolej tzʼibanic, ri nubij chi cʼo chi niqʼuen ka pan iviʼ ri rubiʼ ri Cristo? Jariʼ ri nubiʼ yin. Roma xa riqʼuin re biʼaj reʼ xquixoyox pe pa ruqʼuisibel kʼij.

6 Ri nuqʼuen ka chire ri nubiʼ y nicochʼon chi utzil, cʼa pa ruqʼuisibel, jariʼ, can xticolotej vi pa ri ruqʼuisibel kʼij.

7 Roma cʼariʼ, ronjel cʼa ri niben rix, tibanaʼ cʼa pa nubiʼ yin. Roma cʼariʼ tok rix can ja vi ri nubiʼ yin xtiyaʼ cʼa chire ri kʼataj. Chukaʼ xticʼutuj akʼanij chire ri Tataʼixel pa nubiʼ yin richin queriʼ xtuturusaj cʼa ri kʼataj voma yin.

8 ¿Achique ta cami cʼa rubaniquil ri nukʼataj, vi xa man ta nucʼuaj cʼa ri nubiʼ? Roma vi jun kʼataj niyatej ri rubiʼ ri Moisés chire, xa richin cʼa ri Moisés riʼ. Chukaʼ, vi niyatej xabachique chic rubiʼ jun achin chire, xa richin cʼa ri achin riʼ. Jacʼa, vi niyatej ri nubiʼ yin chire, can vichin vi cʼa yin riʼ, vi rijeʼ e paban pa ruviʼ ri utzilej nutzijol.

9 Kitzij cʼa ninbij chive chi rix xa can ix paban vi pa ruviʼ ri utzilej nutzijol. Roma cʼariʼ, xabachique niyaʼ na jun rubiʼ chire, tibanaʼ cʼa pa nubiʼ yin chire. Roma cʼariʼ, vi nivoyoj akʼanij ri Tataʼixel, roma ri kʼataj, vi niben cʼa akʼanij pa nubiʼ yin, jariʼ tok ri Tataʼixel xquixracʼaxaj cʼa pe.

10 Vi ri kʼataj can paban vi pa ruviʼ ri utzilej nutzijol, ja cʼariʼ tok ri Tataʼixel nukʼalajirisaj ri rusamaj riqʼuin.

11 Vi xa man paban ta cʼa pa ruviʼ ri utzilej nutzijol, vi xa paban cʼa pa ruviʼ ri quisamaj ri achiʼaʼ, y ri rusamaj ri itzel vinek, can kitzij cʼa ninbij chive chi xquequicot riqʼuin ri quisamaj xa jubaʼ oc kʼij. Man riqʼuin vi riʼ, xa ninakajub cʼa pe ri ruqʼuisibel chique, tok rijeʼ xquecʼuk el y xquetorix pa kʼakʼ, acuchi can manjun vi chic nitiquir ta nitzolin pe.

12 Roma xa ja ri quisamaj yequitzekekelbej el, y xa roma cʼa ri quisamaj, tok rijeʼ yecʼuk cʼa el. Roma cʼariʼ, man timestaj ri nubin can chive.

13 Vaveʼ cʼa, yin nuyaʼon chic chive ri utzilej nutzijol, y can ja vi reʼ ri utzilej nutzijol ri nuyaʼon can chive, chi yin in petenek chuvachʼulef chubanic ri rurayibal ri Nataʼ, roma ja rijaʼ takayon pe vichin.

14 Ri Nataʼ xirutek cʼa pe, richin chi xiyac ta chuvech ri paban kʼeban cheʼ. Cʼa cʼari tok in yacon ta chic chuvech ri paban kʼeban cheʼ, xenqʼuen ta pe viqʼuin conojel vinakiʼ. Riqʼuin cʼariʼ, can achiʼel vi yin xiyac cʼa coma ri achiʼaʼ, que cʼa chukaʼ riʼ, ri vinakiʼ xqueyac ta cʼa roma ri Tataʼixel, richin queriʼ xqueʼokaʼ ta cʼa chinuvech yin. Chiriʼ cʼa, xtikʼat cʼa tzij pa quiviʼ chirij ri quibanobal, stapeʼ cʼa e utz o e itzel.

15 Xa roma cʼariʼ tok yin xiyac cʼa el. Roma cʼariʼ, riqʼuin ri ruchukʼaʼ ri Tataʼixel, yin xquenqʼuen pe viqʼuin conojel ri vinakiʼ richin queriʼ xtikʼat tzij pa quiviʼ chiquij ri quibanobal.

16 Xticʼulvachitej cʼa chukaʼ, chi ri nitzolin pe rucʼuʼx, y nikasex chuxeʼ yaʼ pa nubiʼ yin, can xtinoj vi. Cʼa cʼariʼ, vi rijaʼ nicochʼon, cʼa pa ruqʼuisibel, can kitzij vi chi yin, riqʼuin ri Nataʼ, xtikatzʼet chi rijaʼ can chʼajchʼoj vi, chupan ri kʼij tok yin xtinkʼet tzij pa quiviʼ ri vinakiʼ ri e aj re ruvachʼulef.

17 Jacʼa ri man xticochʼon ta, cʼa pa ri ruqʼuisibel kʼij, jacʼa rijaʼ ri xtichoy el y xtitorix ka chupan ri kʼakʼ, acuchi can man vi xtitzolin ta pe jun chic bey, roma cʼa ri rukʼatoj tzij nuben ri Tataʼixel.

18 Can ja vi cʼareʼ ri ruchʼabel ruyaʼon can chique ri calcʼual ri achiʼaʼ. Xa roma cʼariʼ, tok rijaʼ nuben chi yekʼajer ri ruchʼabel ri ruyaʼon can y man nutzʼuc ta tzij, xa can nuben vi chi yekʼajer ronojel ri ruchʼabel.

19 Manjun cʼa tzʼil nitiquir noc chupan ri rajavaren ri Dios. Roma cʼariʼ, tok manjun noc pa ri ruxlanibel rijaʼ, xaxe cʼa ri quichʼajon can ri quitziak riqʼuin ri nuquiqʼuel, roma cʼa ri quicukubabel cʼuʼx, y ri quitzolibel cʼuʼx chupan ri quimac, y roma niquitij quikʼij, cʼa pa ruqʼuisibel.

20 Vacami cʼa, jareʼ ri pixaʼ: Titzolin cʼa pe icʼuʼx chiʼivonojel rix ri ix cʼo chuvachʼulef y quixampe cʼa viqʼuin y xquixkasex cʼa chuxeʼ yaʼ pa nubiʼ yin, richin queriʼ xquixchʼajchʼojirisex cʼa roma ri rucʼulic ri Uxlabixel, richin queri ʼ ix cʼo na cʼa ix chʼakchʼoj chinuvech, pa ri ruqʼuisibel kʼij.

21 Can kitzij, kitzij ninbij chive chi can ja vi reʼ ri utzilej nutzijol. Vacami cʼa, rix ivetaman chic achique cʼo chi niben chupan ri nukʼataj. Ri samaj itzʼeton chi nubanon yin, ja cʼariʼ ri xtiben rix chukaʼ. Ri itzʼeton chi nubanon can yin, can ja vi riʼ ri xtiben chukaʼ rix.

22 Roma cʼariʼ, vi niben cʼa ronojel reʼ, can nim vi ruva ikʼij, roma cʼa can xquixyacatej vi pe chupan ri ruqʼuisibel kʼij.

23 Titzʼibaj cʼa ri xeʼitzʼet y ri xeʼivacʼaxaj. Xaxe cʼa man titzʼibaj can ri xa chʼaʼoj rij.

24 Titzʼibaj cʼa apon ri xtiquibanalaʼ re vinakul reʼ, achiʼel cʼa tzʼibatajinek can ri quibanalon rijeʼ.

25 Roma can kitzij vi chi quiqʼuin ri vuj ri e tzʼibatajinek can, y chukaʼ ri xquetzʼibex na apon, can xtikʼat vi tzij pa quiviʼ re vinakul reʼ. Roma cʼa, quiqʼuin ri vuj riʼ, can xquekʼalajirisex vi ri quibanobal chiquivech ri achiʼaʼ.

26 Can kitzij vi cʼa chi ronojel ri e tzʼiban can, xa roma vi ri Tataʼixel. Roma cʼariʼ tok xa quiqʼuin ri vuj ri xquetzʼibex can, xtikʼat cʼa tzij pa quiviʼ ri vinakiʼ ri e aj re ruvachʼulef.

27 Tivetamaj chi ja rix ri xquixoc kʼatoy tzij quichin re vinakul reʼ, achiʼel cʼa ri kʼatoj tzij ri xtinyaʼ chive, y can choj vi ri kʼatoj tzij riʼ. Roma cʼariʼ, ¿achique cʼa ruvech achiʼaʼ rucʼamon chi yixoc vi rix? Can kitzij vi ninbij chive chi nicʼatzin chi yixoc xa junan cʼa viqʼuin yin.

28 Vacami xa cʼa yibe riqʼuin ri Tataʼixel. Kitzij cʼa ninbij chive, chi xabachique ri nicʼutuj chire ri Tataʼixel pa nubiʼ, can xtiyatej vi chive.

29 Roma cʼariʼ, ticʼutuj cʼa, y can xticʼul vi. Ticʼoscʼa, y can xtijak vi chivech. Roma cʼa, ri nicʼutun, can nicʼulun vi, y chuvech ri nicʼoscʼa, can xtijak vi.

30 Vacamiʼ cʼa, can kitzij vi chi janíla nim ri nuquicoten, y can tzʼakatisan vi ivoma rix, y chukaʼ coma re iyaj mamaj ijaʼtzul reʼ. Kitzij cʼa chi ri Tataʼixel niquicot. Chukaʼ yequicot conojel ri chʼajchʼojilej tak takonaxelaʼ. Jareʼ xa ivoma rix y coma re iyaj mamaj ijaʼtzul reʼ, roma manjun chique rijeʼ sachinek ta.

31 Vaveʼ cʼa, ninvajoʼ chi nikʼax ta cʼa chivech re reʼ. Roma yin yichʼo ka chiquij ri e qʼues vacami, chupan re iyaj mamaj ijaʼtzul reʼ. Manjun cʼa chique rijeʼ sachinek ta, y can tzʼakatisan vi ri nuquicoten coma rijeʼ.

32 Can kitzij vi chi yibison roma ri rucaj iyaj mamaj ijaʼtzul ri elenek el riqʼuin re iyaj mamaj ijaʼtzul reʼ. Rijeʼ e cʼuan cʼa el e chapatajinek el roma rijaʼ, achiʼel cʼa ri ralcʼual ri sachel. Rijeʼ xquinquicʼayij cʼa roma ri saka puek y ri kʼana puek, richin queriʼ niquil cʼa ri xa nichicopir y ri cʼo rubanel chi ri elekʼomaʼ xtiquicʼot y niquelekʼaj el. Chupan cʼa ri kʼij riʼ, yin xquenkʼejelaʼ richin yenpiscolij ka ri quisamaj pa quiviʼ rijeʼ.

33 Xcʼulvachitej cʼa chi tok ri Jesús xutanabaʼ re chʼoven reʼ, quereʼ cʼa xubij chique ri rutijoxelaʼ: Quixoc cʼa apon chupan ri ruchiʼ jay ti latzʼ oc, roma ti latzʼ oc ruchiʼ ri jay, y coʼol oc ruvech, ri bey, ri xa jariʼ rucʼuan chupan ri cʼaslen, y xa e jubaʼ oc ri yeʼilon richin. Jacʼa nim ruvech ruchiʼ ri jay, y nim ruvech ri ey ri rucʼuan ka pa camic, y can e janíla vi yeʼocyaj ka chupan, cʼa tok xtokaʼ ri akʼaʼ tok manjun achin nitiquir chic nisamej.