1 Xcʼulvachitej cʼa chi kʼaxinek chic el ri junaʼ jumuchʼ julajuj y ja cʼareʼ chukaʼ tok jukʼo lajujcʼal junaʼ e kʼaxinek chic el tok tel pe ri Leʼi pa Jerusalem. Chupan cʼa re junaʼ reʼ, Laconeo ja rijaʼ ri nimalej kʼatoy tzij y ri ucʼuey bey richin ri ruvachʼulef riʼ.

2 Ri Nefi, ri rucʼajol ri Elaman, elenek chic el chupan ri ruvachʼulef Zarajemla. Rijaʼ xerujech can chire ri nabey rucʼajol rubiniʼan Nefi chukaʼ ri xaxilej tak cʼakoʼj chiʼichʼ, y conojel ri retal banobel ri e tzʼiban can, y conojel ri achique can lokʼolej vi ri e quichajin pe pa tok ri Leʼi xel pe pa Jerusalem.

3 Ja cʼariʼ tok ri Nefi tataʼaj xel el chupan ri ruvachʼulef y manjun achin xetaman acuchi xbe vi. Ri Nefi alcʼualaxel xerutzekelbej cʼa can ri retal banobel pa ruqʼuexel rijaʼ. Ja cʼariʼ ri retal banobel quichin re vinek reʼ.

4 Xcʼulvachitej cʼa chi pa ri rutiquiribel ri junaʼ jumuchʼ cablajuj, can kitzij vi chi ri lokʼolej rutzijol quichen ri e yaʼol lokʼolej rutzijol xekʼajer pe jubaʼ chic. Roma can xchap vi quicʼulvachitajic nimalej tak etal y nimalej tak banobel chiquicojol ri vinakiʼ.

5 Man riqʼuin vi riʼ, xecʼojeʼ chʼakaʼ ri xquibilaʼ chi xa kʼaxinek chic ri kʼij ri cʼutun can richin yekʼajer ri chʼabel ri xubij can ri Samuel, ri aj Lamaniʼ.

6 Xquichop cʼa tziʼen chiquij ri cachʼalal y quereʼ xquibij: Can kitzij vi chi xa kʼaxinek chic ri kʼij, y ri ruchʼabel ri Samuel man xekʼajer ta. Roma cʼariʼ, ri iquicoten y ri icukubabel cʼuʼx riqʼuin reʼ xa manek rejkalen chive.

7 Xcʼulvachitej cʼa chi rijeʼ xquiben jun nimalej chʼujirinen chuvech chijun ri ruvachʼulef riʼ. Y ri yeniman, janíla xebison roma xa riqʼuin jubaʼ xa man xquebecʼulvachitej ta achique ri e bitajinek can.

8 Man riqʼuin vi cʼariʼ, can kitzij chi rijeʼ xcoyobej tok ri jun kʼij y ri jun akʼaʼ y ri jun chic kʼij xtiquiben xaxe achiʼel jun kʼij, y man xtikʼekumer ta ka ri akʼa, richin queri xtiquetamaj chi can cʼo vi rejkalen ri niquinimaj.

9 Xcʼulvachitej cʼa chi xkʼijux can jun kʼij coma ri man yeniman ta, chi checonojel ri yeniman quichin ri nimanic riʼ can xquecamisex vi. Jariʼ xtibanatej vi man xticʼulvachitej ta ri retal ri xyaʼox can roma ri Samuel, ri yaʼol lokʼolej rutzijol.

10 Vacami cʼa, xcʼulvachitej chi tok ri Nefi, ri rucʼajol ri Nefi, xutzʼet re etzelal reʼ ri niquiben ri ruvinakul, janíla xbison ri ránima.

11 Xcʼulvachitej cʼa chi rijaʼ xbe y xuqueʼ pa ri ulef, y janíla xchʼo akʼanij riqʼuin ri ru Dios pa quiviʼ ri ruvinakul ri xa jubaʼ chic man yevulatej roma xquicukubaʼ quicʼuʼx quiqʼuin ri quinimanic ri catiʼt quimamaʼ.

12 Xcʼulvachitej cʼa chi rijaʼ, riqʼuin ri ruchukʼaʼ, can xchʼo vi akʼanij riqʼuin ri Ajaf chijun kʼij. Y can kitzij vi, ri ruchʼabel ri Ajaf xpe riqʼuin y quereʼ xubij chire:

13 Tayacaʼ ajolon y caquicot, roma can kitzij vi chi ri kʼij can ninakajub vi pe. Y pa re tocokʼaʼ reʼ xtiyaʼox ri retal, y chuvaʼk xquipe chuvech ri ruvachʼulef, richin nincʼut chiquivech ri e aj re ruvachʼulef chi yin can xtintzʼakatisaj vi ronojel ri xinbij chi tiquitzijoj chʼajchʼojilej tak nuyaʼol lokʼolej rutzijol.

14 Can kitzij vi chi yipe quiqʼuin ri nuvinak yin richin chi ninitzʼakatisaj ronojel ri nukʼalajirisan pe chiquivech ri calcʼual ri achiʼaʼ, pa tok rutiquiribel pe, y richin chi ninben ri rayibel richin ri Tataʼixel y chuckaʼ ri Cʼajolaxel. Richin ri Tataʼixel xa voma yin, y richin ri Cʼajolaxel roma cʼa ri nuchʼacul. Y can kitzij vi chi ri kʼij ninakajub pe, y chupan re jun akʼaʼ reʼ can xtiyaʼox vi ri retal.

15 Xcʼulvachitej cʼa chi ri chʼabel ri xracʼaxaj ri Nefi can xekʼajer vi achiʼel xbitej can chire. Roma can kitzij vi chi tok xkaka ri kʼij, can man xkʼekumer ta. Y ri vinakiʼ janíla xquimey roma man xkʼekumer ta ka tok xocokʼaʼ.

16 E cʼo cʼa e qʼuiy ri man e quiniman ta ri quichʼabel ri e yaʼol lokʼolej rutzijol ri xetzak pan ulef, y xquiben achiʼel vi e caminek chic. Queriʼ xquiben roma rijeʼ xquetamaj chi xvulatej ri xquikʼijuj xquiben richin yequivulaj ri e nimayon quichin ri quichʼabel ri e yaʼol lokʼolej rutzijol. Roma cʼa can xkʼajer vi ri retal tzijon can.

17 Y rijeʼ xkʼax chiquivech chi ri Rucʼajol ri Dios xa juba chic man nipe. Kitzij cʼa chi can que vi reʼ, conojel ri vinakiʼ ri e cʼo chuvech chijun ri ruvachʼulef pa ri rukajibel kʼij, cʼa pa ri relebal kʼij, y chuka pa ri ruvachʼulef pa ri rajquikʼaʼ kʼijʼ, cʼa pa ri rajxocon kʼij, can janíla vi xemeyon y xetzak pa ri ulef.

18 Roma rijeʼ quetaman chi qʼuiy junaʼ ri e yaʼol lokʼolej rutzijoj quijiquiban chirij ronojel reʼ. Chukaʼ quetaman chi can xbanatej vi ri retal tzijon can. Rijeʼ xquixibij cʼa quiʼ roma can xquibanalaʼ vi ri itzel, y man xeniman ta.

19 Xcʼulvachitej cʼa chi manek kʼekuʼm chijun ri tocokʼaʼ riʼ, xa can sek vi achiʼel pa nicʼaj kʼij. Cʼariʼ, xcʼulvachitej chi pa nimakʼaʼ xel pe chic ri kʼij, achiʼel cʼa nuben jantapeʼ. Roma cʼa ri retal yaʼon can, rijeʼ xquetamaj chi jariʼ ri kʼij tok ri Ajaf xtalex pe.

20 Xcʼulvachitej cʼa checonojel reʼ achiʼel ri xquibij can ri e yaʼol lokʼolej rutzijol.

21 Xcʼulvachitej chukaʼ chi jun cʼacʼaʼ chʼumil xtzuʼun pe achiʼel cʼa ri bitajinek can.

22 Y xcʼulvachitej pe chupan ri kʼij ri, chi ri itzel vinek xerutek tzʼucuj tzij chiquicojol ri vinakiʼ, richin chi niquicovirisaj ri cánima, richin queriʼ man xtiquinimaj ta cʼa ri retal y ri meyel tak cʼutbel ri xequitzʼet can. Man riqʼuin cʼa ronojel re tzʼucuj tzij reʼ y re kʼoloj reʼ, can janíla vi qʼuiy chique ri vinakiʼ xquinimaj y xepachkʼomix cʼa riqʼuin ri Ajaf.

23 Xcʼulvachitej cʼa chi ri Nefi quiqʼuin chʼakaʼ chic achiʼaʼ xebe chiquicojol ri vinakiʼ, y xquiben ri kasanic chuxeʼ yaʼ chique rijeʼ roma ri xtzolin pe quicʼuʼx. Chiriʼ cʼa xbanatej jun nimalej cuyubel mac. Riqʼuin cʼariʼ, xcʼojeʼ chic jun bey ri uxlanibel cʼuʼx chiquicojol ri vinek chupan ri ruvachʼulef riʼ.

24 Cʼariʼ, man xecʼaxin ta chic. Xaxe e jujun chique rijeʼ xquichop chʼabalixic roma xquirayij xquijiquibaʼ, riqʼuin ri lokʼolej tzʼibanic, chi manek chic nicʼatzin chi niquitakej ri rupixaʼ ri Moisés. Jacʼa riqʼuin re naʼoj reʼ, xa xesachilan can roma man xkʼax ta chiquivech ri lokʼolej tzʼibanic.

25 Cʼa cʼariʼ, xcʼulvachitej chi chaʼnin xepachkʼomix y xquinabej chi man utz ta ri xquinojilaʼ can. Roma cʼa xkʼalajirisex chiquivech chi ri pixaʼ manjani tikʼajer, y cʼo chi nikʼajer chironojel. Kitzij cʼa chi xbix chique chi cʼo chi nikʼajer. Kitzij cʼa chi manjun ri rucʼaj ni manjun ti chʼap xtikʼax ta el tok cʼa manjani tikʼajer chironojel ri pixaʼ. Roma cʼariʼ tok can chupan vi ri junaʼ riʼ, xkʼalajirisex chiquivech chi xa e sachinek, y rijeʼ xequikʼalajirisalaʼ ri quimac.

26 Que cʼariʼ, xkʼax can ri junaʼ jumuchʼ cablajuj. Y xecʼamatej pe chique ri vinakiʼ utzilej tak rutzijol, coma ri retal ri xekʼalajirisex pe, achiʼel cʼa ri quichʼabel ri lokʼolej rutzijol quichin conojel ri chʼajchʼojilej e yaʼol lokʼolej rutzijol.

27 Xcʼulvachitej cʼa chi ri junaʼ jumuchʼ oxlajuj xkʼax can riqʼuin uxlanibel cʼuʼxʼ. Man riqʼuin vi cʼariʼ, cʼa e cʼo na ri elekʼomaʼ richin ri Gadiaton ri xecʼaseʼ pa ri loman tak juyuʼ, y cʼa xquinakalaʼ na ri ruvachʼulef. Ri quijul y ri quicʼojlibal acuchi niquevaj vi quiʼ, can janíla vi ri cuchukʼaʼ. Xa romariʼ tok ri vinakiʼ man xetiquir ta xequichʼec. Roma cʼariʼ, rijeʼ xequicamisaj e qʼuiy, y janíla camisanic xquibanalaʼ chiquicojol ri vinakiʼ.

28 Xcʼulvachitej cʼa chi pa ri junaʼ jumuchʼ cajlajujʼ ri elekʼomaʼ riʼ janíla xeqʼuiyer. Jariʼ roma e qʼuiy vinek xquichʼer el quiʼ quiqʼuin ri Nefiʼiʼ y xebe quiqʼuin ri elekʼoma. Ja cʼareʼ xbanon chi janíla xebison ri Nefiʼiʼ ri xecanej can chupan ri ruvachʼulef.

29 Chukaʼ cʼa ri Lamaniʼ janíla xebison. Kitzij cʼa chi e qʼuiy chique ri calcʼual xenimer. Y tok cʼo chic qʼuiy quijunaʼ richin chi niquiben ri nicajoʼ rijeʼ, jariʼ tok xeyukʼ el coma ri tzʼucuj tak tzij y ri jebelilej tak tzijonic quichin e jujun chique ri e Zoramiʼ. Riqʼuin cʼariʼ, xquitun quiʼ quiqʼuin ri elekʼomaʼ riʼ richin ri Gadianton.

30 Quereʼ cʼa, ri Lamaniʼ chukaʼ xquitij pokonal, y ri quicukubabel cʼuʼx y ri quichojmilal jutakel xqʼuis ka roma ri quetzelal ri ijaʼtzul petenek.