1 Xcʼulvachitej cʼa chi ri Jesús xubij chique ri rutijoxelaʼ chi tiquicʼamaʼ pe chire caxlan vey y ruyaʼal ruvech utzilej kʼayis.

2 Tok rijeʼ xebequicʼamaʼ pe ri caxlan vey y ri ruyaʼal ruvech utzilej kʼayisʼ xubij chique ri nimalej molaj vinakiʼ chi quetzʼuyeʼ ka pa ri ulef.

3 Tok ri tijoxelaʼ xequiqʼuen cʼa pe ri caxlan vey y ri ruyaʼal ruvech utzilej kʼayis, rijaʼ xuchop cʼa ri caxlan vey y xuperelaʼ ka. Cʼa cʼariʼ, xuturusaj. Jariʼ tok xuyaʼ cʼa chique ri rutijoxelaʼ y xubij chique chi tiquitijaʼ.

4 Tok rijeʼ quitijon cʼa chic y xquinaʼ chi xenoj, rijaʼ xubij chique chi tiquiyaʼ cʼa chukaʼ chique ri nimalej molaj vinakiʼ.

5 Tok ri nimalej molaj vinakiʼ quitijon cʼa chic y xquinaʼ chi xenoj, jariʼ tok ri Jesús quereʼ chic xubij chique ri rutijoxelaʼ: Can kitzij vi cʼa chi cʼo jun xtitak chiʼicojol rix. Chire cʼa rijaʼ xtinyaʼ vi ri uchukʼaʼ richin chi xtuperelaʼ cʼa ri caxlan vey, y xtuturusaj cʼa, y xtuyaʼ chique ri vinakiʼ ri e richin ri nukʼataj, o pa jun chic chʼabel, chique checonojel ri xqueniman y xquekasex chuxeʼ yaʼ pa nubiʼ yin.

6 Cʼo cʼa chi rix niben reʼ jutakel, achiʼel cʼa ri xinben yin vacami. Nuperon cʼa chic ri caxlan vey, y nuturusan, y nuyaʼon chic chive rix.

7 Reʼ xtiben cʼa richin ri runatabal ri nuchʼacul ri xinkʼalajirisaj yan chivech. Jareʼ jun kʼalajirisanic chuvech ri Tataʼixel chi yin junelic yinokaka chiʼicʼuʼx. Vi yininataj cʼa junelic, can xticʼojeʼ vi ri Vuxlabal iviqʼuin.

8 Xcʼulvachitej cʼa chi tok xubij yan can re chʼabel reʼ cʼariʼ xubij chique ri rutijoxelaʼ chi quecʼuluman apon riqʼuin ri ruyaʼal ruvech utzilej kʼayis ri cʼo chupan ri kumbel y tiquikumuʼ cʼa. Xubij chukaʼ chi tiquiyaʼ cʼa chique ri nimalej molaj vinakiʼ, richin queriʼ rijeʼ xtiquikum cʼa chukaʼ.

9 Xcʼulvachitej cʼa chi queriʼ xquiben, y can xquikum vi cʼa y xenoj. Cʼa cʼariʼ, xquiyaʼ chique ri nimalej molaj vinakiʼ y rijeʼ chukaʼ xquikum y xenoj.

10 Tok ri tijoxelaʼ queriʼ quibanon chic, ri Jesús quereʼ xubij chique: Nim ruva ikʼij rix roma ri ibanon. Roma cʼa re reʼ can nutakej vi ri nupixaʼ, y reʼ nujiquibaʼ chuvech ri Tataʼixel chi can nirayij vi niben ri xinbij chive.

11 Jutakel cʼa xtiben reʼ quiqʼuin ri vinakiʼ ri nitzolin pe quicʼuʼx y yekasex ka chuxeʼ yaʼ pa nubiʼ yin. Cʼo cʼa chi xtiben richin ri runatabal ri nuquiqʼuel ri nuquiran ivoma rix, richin queriʼ xtikʼalajirisaj cʼa apon chuvech ri Tataʼixel chi yininataj junelic. Vi yininataj cʼa junelic, can xticʼojeʼ vi cʼa ri Vuxlabal iviqʼuin.

12 Yixintek cʼa chi queʼibanalaʼ ronojel reʼ. Vi yeʼiben ronojel reʼ junelic, can nim vi ruva ikʼij, roma cʼa ix paban ka pa ruviʼ ri nuxeʼel.

13 Man riqʼuin vi riʼ, ri e cʼo chiʼicojol ri nicʼo chic ruviʼ niquiben chire o can jubaʼ chic oc niquiben chire, rijeʼ riʼ xa man e paban ta cʼa pa ruviʼ ri cof nuxeʼel yin, xa pa ruviʼ sanayiʼ. Tok nikaka pe ri job y nipe ri kʼekel job y nixicʼan pe ri cakʼikʼ y yerucajij, ja cʼariʼ tok xquetzak ka rijeʼ y ri ruchiʼ ri xibalbay e jakatajinek chic richin yequicʼul ka.

14 Roma cʼariʼ, nim ruva ikʼij rix vi yeʼitakej ri nupixaʼ ri rubin pe chuve ri Tataʼixel chi cʼo chi yenyaʼ chive.

15 Can kitzij, kitzij ninbij chive chi cʼo chi nichajij iviʼ y yixchʼo akʼanij riqʼuin ri Dios jutakel, richin queriʼ man ta xquixyukex cʼa el roma ri itzel vinek y man ta cʼa quixucʼuex el roma rijaʼ.

16 Achiʼel cʼa nubanon yin tok in chʼovinek akʼanij riqʼuin ri Dios chiʼicojol rix, que cʼa chukaʼ riʼ rix quixchʼo cʼa akʼanij riqʼuin ri Dios chupan ri nukʼataj, chiquicojol ri nuvinak ri nitzolin pe quicʼuʼx y yekasex chuxeʼ yaʼ pa nubiʼ yin. Can kitzij vi cʼa chi ja yin ri in sakil. Nukʼalajirisan cʼa chivech riqʼuin ri nubanobal yin ri achique rucʼamon niben rix.

17 Xcʼulvachitej cʼa chi tok ri Jesús e rubin chic re chʼabel reʼ chique ri rutijoxelaʼ, cʼariʼ rijaʼ xerutzuʼ cʼa chic apon ri nimalej molaj vinakiʼ y quereʼ xubij chique:

18 Vaveʼ cʼa, can kitzij, kitzij ninbij chive chi cʼo chi nichajij iviʼ y yixchoʼ akʼanij riqʼuin ri Dios jutakel, richin queriʼ man ta cʼa xquixoc cʼa pa itzel yukʼbel. Roma ri Satanás nurayij yixruchop richin xquixruchayuj ta cʼa, achiʼel cʼa niban chire ri sek ruvech qʼuimal.

19 Roma cʼariʼ, cʼo chi yixchʼo akʼanij jutakel riqʼuin ri Tataʼixel pa nubiʼ yin.

20 Xabachique cʼa ri nicʼutuj chire ri Tataʼixel pa nubiʼ yin, vi choj riʼ, y vi can ninimaj vi chi niyatej chive, jariʼ tok can xtiyaʼox vi cʼa chive.

21 Quixchʼo cʼa akʼanij riqʼuin ri Tataʼixel quiqʼuin ri ichinamit junelic pa nubiʼ yin, richin queriʼ xqueturusex cʼa ri ivixjayil y ri ivalcʼual.

22 Vacami, timoloʼ cʼa iviʼ binakel. Man tikʼet cʼa manjun vinek richin chi man ta cʼa xtoc apon iviqʼuin rix tok nimol iviʼ, xa can tiyaʼ vi kʼij chique richin yepe iviqʼuin y man cʼa queʼiket.

23 Xa quixchʼo cʼa akʼanij riqʼuin ri Dios pa quiviʼ rijeʼ, y man cʼa queʼivelesaj el. Vi xquepe cʼa iviqʼuin binakel, quixchʼo cʼa akʼanij riqʼuin ri Tataʼixel coma rijeʼ pa nubiʼ yin.

24 Roma cʼariʼ, tiyacaʼ cʼa akʼanij ri isakil richin chi nisakirisan pe chiquivech ri vinakiʼ ri e cʼo chuvachʼulef. Can kitzij vi cʼa chi xa ja yin ri in sakil ri xtiyec akʼanij y chukaʼ ronojel ri itzʼeton chi nubanon yin. Can kitzij vi chi rix itzʼeton chi yin in chʼovinek akʼanij riqʼuin ri Tataʼixel, y chiʼivonojel rix ivetaman riʼ.

25 Chukaʼ nitzʼet chi yin nubin can chi man rucʼamon ta chi manjun chive rix nel ta cʼa el vaveʼ. Xa nubin cʼa chive chi quixjel pe viqʼuin, richin quereiʼ can xtinaʼ vi cʼa y xtitzʼet. Que cʼa chukaʼ reʼ tibanaʼ cʼa rix quiqʼuin ri vinakiʼ vaveʼ chuvachʼulef. Ri nikʼajon richin re pixaʼ reʼ xa nuyaʼ ka kʼij chi niyukex el pa itzel yukʼbel.

26 Vacami cʼa, xcʼulvachitej chi tok ri Jesús e rutzijon chic re chʼabel reʼ, rijaʼ xerutzuʼ cʼa chic ri tijoxelaʼ ri e ruchaʼon, y quereʼ xubij chique:

27 Vaveʼ cʼa, can kitzij, kitzij ninbij chive chi xtinyaʼ cʼa jun chic pixaʼ chive. Cʼa cʼariʼ, cʼo chi yibe riqʼuin ri Nataʼ, richin chi yentakej chʼakaʼ chic pixaʼ ri e ruyaʼon pe rijaʼ chuve.

28 Vacami, can kitzij vi cʼa chi jareʼ ri pixaʼ ri ninyaʼ can chive, chi man tiyaʼ kʼij chire jun vinek richin nicʼuluman apon riqʼuin ri nuchʼacul y ri nuquiqʼuel tok rix niben ri samaj riʼ, vi ivetaman chi rijaʼ xa man rucʼamon ta.

29 Roma cʼa, achique nitijon ri nuchʼacul y nikumun ri nuquiqʼuel y xa man rucʼamon ta, can nutij vi y nukum ka etzelanic pa ránima. Roma cʼariʼ, vi rix ivetaman cʼa chi jun vinek xa man rucʼamon ta richin nivaʼ y nuqʼuiyaʼ riqʼuin ri nuchʼacul y ri nuquiqʼuel, can tikʼataʼ vi cʼa rijaʼ.

30 Man riqʼuin vi riʼ, man tivelesaj cʼa el chiʼicojol rix, xa titolaʼ cʼa rijaʼ y quixchʼo cʼa akʼanij riqʼuin ri Tataʼixel roma rijaʼ pa nubiʼ yin. Vi rijaʼ xa nitzolin cʼa pe ri rucʼuʼx y nikasex ka chuxeʼ yaʼ pa nubiʼ yin, cʼa cʼariʼ, ticʼulu cʼa y tiyaʼ cʼa chire rijaʼ ri nuchʼacul y ri nuquiqʼuel.

31 Vi rijaʼ xa man nitzolin ta pe rucʼuʼx, man xtajilex ta cʼa chiquicojol ri nuvinak, richin queriʼ man cʼa xqueruvulaj ta ri nuvinak. Kitzij cʼa chi yin vetaman cʼa quivech ri nucarneʼl y rijeʼ can e ajilan vi.

32 Man riqʼuin vi riʼ, man tivelesaj cʼa el chupan ri jay richin nolojriʼil y ri chʼakaʼ chic cʼojlibel richin ruyaʼic rukʼij ri Ajaf. Xa titolaʼ cʼa jutakel ri queriʼ rubanon. Roma cʼa rix xa man ivetaman ta vi rijeʼ xtiquitzalkʼomij pe quiʼ, y xtitzolin pe quicʼuʼx, y xquepe viqʼuin yin riqʼuin tzʼaket rurayibal ri cánima, y yin xquenvakʼomaj. Queriʼ cʼa xa ivoma rix xticʼamer pe ri colotajic chique.

33 Roma cʼariʼ, queʼitakej cʼa re pixaʼ reʼ ri e nuyaʼon can chive, richin queriʼ man xquixetzelex ta. Roma xa joʼoc ruvech ri netzelex roma ri Tataʼixel.

34 Yin yenyaʼ cʼa re pixaʼ reʼ chive xa roma tok yixtojojen chiʼicojol. Nim ruva ikʼij vi manek chic tojojenic chiʼicojol.

35 Vacami cʼa, yibe riqʼuin ri Tataʼixel, roma cʼa nicʼatzin chi yibe riqʼuin ri Tataʼixel ivoma rix.

36 Xcʼulvachitej cʼa chi tok ri Jesús xutanabaʼ re chʼoven reʼ, rijaʼ xuyaʼ rukʼaʼ pa quiviʼ ri tijoxelaʼ chiquijujunal ri e ruchaʼon, cʼa tok ruyaʼon chic ri rukʼaʼ pa quiviʼ checonojel rijeʼ y rijaʼ xchʼo quiqʼuin tok queriʼ xuben chique.

37 Ri nimalej molaj vinakiʼ man xcacʼaxaj ta cʼa ri chʼabel ri xubij chique rijeʼ. Roma cʼariʼ, man xejiquiban ta chirij riʼ. Jacʼa ri tijoxelaʼ xquijiquibaʼ chi rijaʼ xuyaʼ chique rijeʼ ri uchukʼaʼ richin niquikʼaxaj cʼa ri Uxlabixel. Vaveʼ cʼa, yin xtincʼut jubaʼ chic chivech chi kitzij re juquibanic reʼ.

38 Xcʼulvachitej chi tok ri Jesús ruyaʼon chic ri rukʼaʼ pa quiviʼ checonojel rijeʼ, xkaka cʼa pe jun sutzʼ y xmukeʼ ka pa quiviʼ ri nimalej molaj vinakiʼ riʼ, richin queriʼ man xetiquir ta chic xquitzʼet el ri Jesús.

39 Tok mukuvinek cʼa pa quiviʼ ri vinakiʼ, rijaʼ xel el chiquicojol y xjoteʼ el chicaj. Xaxe cʼa ri tijoxelaʼ xquitzʼet el y xquijiquibaʼ chi rijaʼ can xjoteʼ vi chic el chicaj.