Balaan ng mga Kasulatan
3 Nefi 7


Kapitulo 7

Ang puno nga hukom ginpatay, ang gobyerno naguba, kag ang katawhan nagbinahin-bahin sa mga tribo—Si Jacob, nga isa ka anti-Cristo, nangin hari sang sekreto nga padihot—Si Nefi nagwali sang paghinulsol kag pagtuo kay Cristo—Ang mga anghel nag-alagad sa iya adlaw-adlaw, kag ginbangon niya ang iya utod nga lalaki halin sa mga minatay—Madamo ang naghinulsol kag nabunyagan. Mga A.D. 30–33.

1 Karon tan-awa, ipakita ko sa inyo nga wala sila nagpapungko sang hari sa kadutaan; kundi sa sining amo man nga tuig, huo, sa ika-treinta nga tuig, ginlaglag nila sa hukom-lingkuranan, huo, ginpatay ang puno nga hukom sang kadutaan.

2 Kag ang katawhan nagbinahin-bahin batok sa isa kag isa; kag nagbinulag sila sa isa kag isa bilang mga tribo, ang tagsa ka tawo suno sa iya panimalay kag sa iya paryente kag mga kaabyanan; kag gani ginguba nila ang gobyerno sang kadutaan.

3 Kag ang tagsa ka tribo nagpili sing isa ka puno ukon isa ka lider nila; kag gani sila nangin mga tribo kag mga lider sang mga tribo.

4 Karon tan-awa, ang tagsa sa ila may madamo nga panimalay kag madamo nga paryente kag mga kaabyanan; gani ang ila mga tribo nangin tuman kadako.

5 Karon ini tanan nahimo, kag wala pa sing mga giyera tubtob sa sini nga tion sa tunga nila; kag ining tanan nga kalainan nagtupa sa katawhan tungod ginpaidalom nila ang ila mga kaugalingon sa gahum ni Satanas.

6 Kag ang mga pagsulundan sang gobyerno naguba tungod sang sekreto nga padihot sang mga kaabyanan kag mga paryente sadtong mga nagpamatay sang mga propeta.

7 Kag nagtuga sila sang dako nga pagbinaisay sa kadutaan, sa bagay nga ang mas matarong nga bahin sang katawhan halos tanan nangin mga malain; huo, may diutay lamang nga matarong nga mga tawo sa ila.

8 Kag gani wala pa nakaligad ang anum ka tuig humalin sang ang kalabanan sang katawhan nagtalikod sa ila pagkamatarong, pareho sang ido sa pagkaon sang iya suka, ukon pareho sang nayon sa iya pagtubog sa lunang.

9 Karon ining sekreto nga padihot, nga nagdala sing tuman kadako nga kalainan sa katawhan, nagtipon sang ila mga kaugalingon, kag nagbutang bilang ila lider sing isa ka lalaki nga ila ginatawag kay Jacob;

10 Kag gintawag nila sia nga ila hari; gani nangin hari sia sining malain nga guban; kag isa sia sang labing kilala nga naghambal batok sa mga propeta nga nagpamatuod parte kay Jesus.

11 Kag natabo ini nga indi sila tuman kabakod sa kadamuon sangsa mga tribo sang katawhan, nga nag-isa sing tingob luwas lang nga ang ila mga lider naghimo sang ila mga layi, ang tagsa-tagsa suno sa iya tribo; apang mga magkaaway sila; bisan pa indi sila matarong nga katawhan, apang nagkaisa sila sa pagdumot sa sinang mga nagsulod sa kasugtanan nga gub-on ang gobyerno.

12 Gani, si Jacob nga nakita nga ang ila mga kaaway mas madamo sangsa ila, sia nga hari sang guban, gani ginsugo niya ang iya katawhan nga magpalagyo sila padulong sa pinakanorte nga bahin sang kadutaan, kag didto magpauswag para sa ila mga kaugalingon sing isa ka ginharian, tubtob nga mabuylogan sila sang mga nagsilipak, (kay gin-into niya sila agud mangin madamo ang magsilipak) kag mangin igo ang ila kadamuon sa pagpakig-away sa mga tribo sang katawhan; kag ginhimo nila ini.

13 Kag sa pagkadasig sang ila paglakat nga indi ini mabalabagan tubtob nga indi na sila malab-ot sang katawhan. Kag gani natapos ang ika-treinta nga tuig; kag amo ini ang kahimtangan sang katawhan ni Nefi.

14 Kag natabo ini, sa ika-treinta’y uno nga tuig nga nagbinahin-bahin sila sa mga tribo, ang tagsa ka tawo suno sa iya panimalay, paryente kag mga kaabyanan; apang nag-ugyonay sila nga indi sila maggiyera batok sa isa kag isa; apang wala sila nagakaisa sa ila mga layi, kag sa ila pamaagi sang pagdumala, kay ginpahamtang ang mga ini suno sa mga kaisipan sang ila mga puno kag ila mga lider. Apang naghimo sila sang tuman kaistrikto nga mga layi nga ang isa ka tribo indi maglapas batok sa isa, sa bagay nga bisan paano nakaangkon sila sang paghidaet sa kadutaan; apang, ang ila mga tagipusuon nagtalikod sa Ginuo nga ila Dios, kag ginpangbato nila ang mga propeta kag ginpanabog sila halin sa ila.

15 Kag natabo ini nga si Nefi—nga ginbisita sang mga anghel kag amo man sang tingug sang Ginuo, tungod nga nakakita sang mga anghel, kag bilang saksi, kag naagom ang gahum nga ginhatag sa iya agud makahibalo sia parte sa pag-alagad ni Cristo, kag bilang saksi man sa ila madasig nga pagbalik halin sa pagkamatarong padulong sa ila kalainan kag mga kangil-aran;

16 Gani, tungod nagkasubo sang katig-a sang ila mga tagipusuon kag sang pagkabulag sang ila mga kaisipan—naglibot sa ila sa amo man nga tuig, kag nagsugod sa pagpamatuod, sing maisog, sang paghinulsol kag kapatawaran sang mga sala paagi sa pagtuo sa Ginuong Jesucristo.

17 Kag nagpanudlo sia sang madamo nga butang sa ila; kag ang tanan sini indi sarang nga masulat, kag ang bahin lang sang mga ini mangin kulang, gani wala pag-isulat ang mga ini sa sini nga libro. Kag si Nefi nagpanudlo nga may gahum kag may dako nga awtoridad.

18 Kag natabo ini nga naakig sila sa iya, labi na kay may mas dako sia nga gahum sangsa ila, kay indi mahimo nga indi sila magpati sa iya mga pulong, kay sa pagkadako sang iya pagtuo sa Ginuong Jesucristo nga ang mga anghel nag-alagad sa iya adlaw-adlaw.

19 Kag sa ngalan ni Jesus ginpanabog niya ang mga yawa kag di-matinlo nga mga espiritu; kag bisan ang iya utod nga lalaki iya ginbangon halin sa mga minatay pagkatapos nga ginbato sia kag nag-antos sang kamatayon tungod sang katawhan.

20 Kag nakita ini sang katawhan, kag nasaksihan ini, kag naakig sa iya tungod sang iya gahum; kag naghimo man sia sing madamo pa nga milagro, sa panulok sang katawhan, sa ngalan ni Jesus.

21 Kag natabo ini nga ang ika-treinta’y uno nga tuig nagligad, kag may diutay lamang nga mga nahaylo sa Ginuo; apang ang tanan nga nahaylo matuod gid nga nagpakita sa katawhan nga ginbisita sila sang gahum kag Espiritu sang Dios, nga yara kay Jesucristo, nga kay sin-o sila nagapati.

22 Kag ang tanan nga may mga yawa nga ginpanabog halin sa ila, kag ginpaayo sang ila mga masakit kag sang ila mga kahuyangan, matuod gid nga nagpakita sa katawhan nga ginhikot ang mga ini sang Espiritu sang Dios, kag napaayo; kag nagpakita man sila sing mga tanda kag naghimo sang pila ka mga milagro sa katawhan.

23 Gani nagligad man ang ika-treinta’y dos nga tuig. Kag si Nefi nagpanudlo sa katawhan sa pagsugod sang ika-treinta’y tres nga tuig; kag nagwali sia sa ila sang paghinulsol kag kapatawaran sang mga sala.

24 Karon luyag ko nga ipadumdum man sa inyo, nga wala sing bisan sin-o man nga naghinulsol nga wala mabunyagi sang tubig.

25 Gani, may mga gin-ordin si Nefi, nga mga lalaki sa sini nga pag-alagad, nga ang tanan nga magpalapit sa ila dapat nga mabunyagan sang tubig, kag ini bilang saksi kag testimonya sa atubang sang Dios, kag sa katawhan, nga naghinulsol sila kag nakabaton sang kapatawaran sang ila mga sala.

26 Kag may madamo sa pagsugod sini nga tuig nga nabunyagan sa paghinulsol; kag sa amo sini nagligad ang laban nga bahin sang tuig.