1 Kag karon natabo ini nga sa ika-disesais nga tuig halin sa pagkatawo ni Cristo, si Laconeus, nga gobernador sang kadutaan, nakabaton sing isa ka sulat halin sa lider kag sa gobernador sining guban sang mga tulisan; kag amo ini ang mga pulong nga nasulat nga nagasiling:

2 Laconeus, labing dungganon kag puno nga gobernador sang kadutaan, tan-awa, nagahimo ako sining sulat sa imo, kag nagahatag sa imo sing tuman kadako nga pagdayaw tungod sang imo kalig-on, kag amo man sang kalig-on sang imo katawhan, sa pagdampig sinang inyo ginahunahuna nga inyo kinamatarong kag kahilwayan; huo, ginatindugan ninyo sing maayo, nga daw ginasakdag kamo sang kamot sing isa ka dios, sa pagpangapin sang inyo kahilwayan, kag sang inyo pagkabutang, kag sang inyo pungsod, ukon sinang inyo ginatawag nga inyo.

3 Kag daw kasubo sa panan-aw ko, labing dungganon nga Laconeus, nga mangin tuman ikaw ka buang-buang kag ka hambog agud maghunahuna nga makatindog kamo batok sa tuman kadamo nga maisog nga mga lalaki nga yara sa akon pagmando, nga sa sini nga tion subong nakahanda sa ila mga armas, kag nagahulat sing may dako nga kahanda para sa sugo—Salakaya ang mga Nefinhon kag pamatya sila.

4 Kag ako, nga nakahibalo sang ila di-malupig nga espiritu, kay napamatud-an na sila sa patag-awayan, kag nakahibalo sang ila wala’y katubtuban nga pagdumot sa inyo tungod sang madamo nga pagpangdaug-daug nga inyo ginhimo sa ila, gani kon magsalakay sila batok sa inyo pagabisitahan nila kamo sing lubos nga kalaglagan.

5 Gani naghimo ako sining sulat, nga ginaselyohan ini sang akon kaugalingon nga kamot, nga nabalaka para sa inyo kaayohan tungod sang inyo kabakod sa sinang inyo ginapatihan nga husto, kag sa inyo dungganon nga espiritu sa patag-awayan.

6 Gani nagasulat ako sa imo, nga nagapangabay nga iampo ninyo sa sining akon katawhan, ang inyo mga siyudad, ang inyo mga kadutaan, kag ang inyo mga ginapanag-iyahan, imbes nga bisitahan nila kamo sang espada kag magaabot ang kalaglagan sa inyo.

7 Ukon sa iban nga pulong, iampo ang inyo mga kaugalingon sa amon, kag makig-isa sa amon kag hibaloa ang amon sekreto nga mga buhat, kag mangin amon mga kauturan agud mangin pareho kamo sa amon—indi amon mga ulipon, kundi amon mga kauturan kag mga umalambit sa tanan namon nga ginapanag-iyahan.

8 Kag tan-awa, ginapromisa ko sa imo, kon himuon ninyo ini, upod ang isa ka panumpa, indi kamo paglaglagon; apang kon indi ninyo ini paghimuon, ginapromisa ko sa imo upod ang isa ka panumpa, nga sa madason nga bulan isugo ko nga ang akon mga kasoldadohan magasalakay batok sa inyo, kag indi nila pagpunggan ang ila kamot kag indi magkaluoy, kundi nga pamatyon kamo, kag patup-on ang espada sa inyo bisan tubtob nga magkalaubos kamo.

9 Kag tan-awa, ako si Gidianhi; kag ako ang gobernador sining sekreto nga katilingban sang mga Gadianton; nga ang amo nga katilingban kag ang mga buhat sini nahibal-an ko nga maayo; kag iya pa sang dumaan nga panahon ang mga ini kag ginpasa ang mga ini sa amon.

10 Kag ginahimo ko ining sulat sa imo, Laconeus, kag ginalauman ko nga itugyan ninyo ang inyo mga kadutaan kag ang inyo mga ginapanag-iyahan, nga wala sing pagpaagay sang dugo, agud mabawi sining akon katawhan ang ila mga kinamatarong kag pagdumala, nga nagsilipak sa inyo tungod sang inyo kalainan sa pagdumili sa ila sang ila mga kinamatarong sa pagdumala, kag luwas lang kon himuon ninyo ini, itimalus ko ang mga pagpangdaug-daug sa ila. Ako si Gidianhi.

11 Kag karon natabo ini, sang nabaton ni Laconeus ining sulat nakibot gid sia, tungod sang kaisog ni Gidianhi sa pagmandar sang pagpanag-iya sang duta sang mga Nefinhon, kag sa pagpahog man sa katawhan kag pagtimalus sa mga pagpangdaug-daug sinang mga wala nag-antos sang pagdaug-daug, luwas lang nga sila mismo ang nagdaug-daug sang ila mga kaugalingon sa pagsipak padulong sa sinang mga malain kag makangilil-ad nga mga tulisan.

12 Karon tan-awa, ining si Laconeus, ang gobernador, isa ka matarong nga tawo, kag indi mahadlok sang mga mandar kag sang mga pamahog sing isa ka tulisan; gani ginbale-wala niya ang sulat ni Gidianhi, ang gobernador sang mga tulisan, kundi nga ginsugo niya nga ang iya katawhan magpakitluoy sa Ginuo para sa kusog bilang pagpanghanda sa tion nga ang mga tulisan magsalakay batok sa ila.

13 Huo, nagpabantala sia sa tanan nga katawhan nga tiponon nila ang ila mga babayi kag ang ila mga kabataan, ang ila mga panong kag ang ila mga baka, kag ang tanan nila nga pagkabutang, luwas sa ila duta, sa isa ka lugar.

14 Kag nagsugo sia nga ang mga pamakod tukuron sa ila palibot, kag ang kabakod sini dapat mangin tuman gid. Kag nagsugo sia nga ang mga kasoldadohan, sang mga Nefinhon kag sang mga Lamanhon, ukon sang tanan sa ila nga naisip sa mga Nefinhon dapat ibutang bilang mga bantay sa palibot agud bantayan sila, kag agud amligan sila batok sa mga tulisan sa adlaw kag gab-i.

15 Huo, nagsiling sia sa ila: Pareho nga buhi ang Ginuo, luwas lang kon maghinulsol kamo sang tanan ninyo nga kalainan, kag magpakitluoy sa Ginuo, indi gid kamo maluwas halin sa mga kamot sang mga tulisan ni Gadianton.

16 Kag sa pagkagamhanan kag kadalayawon sang mga pulong kag mga propesiya ni Laconeus nga nagtuga ang mga ini sang kahadlok nga magpangibabaw sa tanan nga katawhan; kag nagtinguha sila sa ila mga kaugalingon sa bug-os nila nga ikasarang nga himuon ang suno sa mga pulong ni Laconeus.

17 Kag natabo ini nga si Laconeus nagpili sang puno nga mga kapitan sa tanan nga kasoldadohan sang mga Nefinhon agud pangunahan sila sa tion nga ang mga tulisan magsalakay halin sa kamingawan batok sa ila.

18 Karon ang pinakapuno sa tanan nga puno nga mga kapitan kag ang pinakamataas nga komandante sang tanan nga kasoldadohan sang mga Nefinhon ginpili, kag ang iya ngalan amo si Gidgidoni.

19 Karon kustombre sa tanan nga Nefinhon ang magpili sang ila puno nga mga kapitan, (luwas lang sa tinion sang ila kalainan) sing isa nga may espiritu sang rebelasyon kag amo man sang propesiya; gani, ining si Gidgidoni isa ka gamhanan nga propeta sa ila, kag amo man ang puno nga hukom.

20 Karon ang katawhan nagsiling kay Gidgidoni: Magpangamuyo ka sa Ginuo, kag magtaklad kita sa mga kabukiran kag sa kamingawan agud salakayon naton ang mga tulisan kag pamatyon sila sa ila kaugalingon nga mga kadutaan.

21 Apang si Gidgidoni nagsiling sa ila: Ang Ginuo nagadumili; kay kon magtaklad kita batok sa ila itugyan kita sang Ginuo sa ila mga kamot; gani ihanda naton ang aton mga kaugalingon sa sentro sang aton mga kadutaan, kag tiponon naton ang aton mga kasoldadohan, kag indi kita magsalakay batok sa ila, kundi nga hulaton naton tubtob nga magsalakay sila batok sa aton; gani pareho nga buhi ang Ginuo, kon himuon naton ini itugyan niya sila sa aton mga kamot.

22 Kag natabo ini, sa ika-disesiyete nga tuig, sa hingapusan nga bahin sang tuig, ang pabantala ni Laconeus naglapnag sa bug-os nga ibabaw sang kadutaan, kag ginpangdala nila ang ila mga kabayo, kag ang ila mga karwahe, kag ang ila mga kasapatan, kag ang tanan nila nga panong, kag ang ila mga baka, kag ang ila uyas, kag ang tanan nila nga pagkabutang, kag naglinakat sing linibo kag sing napulo ka linibo, tubtob nga tanan sila nakakadto na sa lugar nga ginpili nga ila pagatiponan sang ila mga kaugalingon; agud pangapinan ang ila mga kaugalingon batok sa ila mga kaaway.

23 Kag ang duta nga ginpili amo ang duta sang Zarahemla, kag ang duta nga yara sa ulot sang duta nga Zarahemla kag sang duta nga Bugana, huo, sa gin-utlan nga yara sa tunga sang duta nga Bugana kag sang duta nga Kamingaw.

24 Kag may tuman kadamo nga linibo sang katawhan nga ginatawag nga mga Nefinhon ang nagtililipon sang ila mga kaugalingon sa sini nga duta. Karon si Laconeus nagsugo nga magtililipon sila sang ila mga kaugalingon sa duta pa-sur tungod sang dako nga sumpa nga yara sa duta pa-norte.

25 Kag nagpamakod sila sang ila mga kaugalingon batok sa ila mga kaaway; kag nagpuyo sila sa isa ka duta, kag sa isa ka grupo, kag nagkahadlok sila sang mga pulong nga ginhambal ni Laconeus, sa bagay nga naghinulsol sila sang tanan nila nga sala; kag nagpangamuyo sila sa Ginuo nga ila Dios, nga luwason niya sila sa tion nga ang ila mga kaaway magsalakay batok sa ila agud magpakig-away.

26 Kag tuman sila kamasinulub-on tungod sang ila mga kaaway. Kag si Gidgidoni nagsugo nga maghimo sila sang mga armas sa giyera sang tagsa ka sahi, kag dapat mangin mabakod sila sa hinganib, kag sa mga taming, kag sa mga panagang, suno sa iya sugo.