1 Kag natabo ini nga ginsugo ni Jesus ang iya mga disipulo nga magdala sila sing pila ka tinapay kag bino sa iya.

2 Kag samtang naglakat sila agud magkuha sang tinapay kag alak, ginsugo niya ang kadam-an nga magpungko sila sa duta.

3 Kag sang nag-abot ang mga disipulo nga may dala nga tinapay kag alak, nagkuha sia sang tinapay kag ginsipad-sipad kag ginbendisyonan ini; kag ginhatagan niya ang mga disipulo kag ginsugo nga magkaon sila.

4 Kag sang nakakaon sila kag nabusog, nagsugo sia nga hatagan nila ang kadam-an.

5 Kag sang nakakaon ang kadam-an kag nabusog, nagsiling sia sa mga disipulo: Tan-awa, may isa nga pilion sa inyo, kag sa iya ihatag ko ang gahum nga sipad-siparon niya ang tinapay kag bendisyonan ini kag ihatag ini sa katawhan sang akon simbahan, sa tanan nga magpati kag magpabunyag sa akon ngalan.

6 Kag ini dalayon ninyo nga himuon, bisan pareho sang akon ginhimo, bisan pareho sang pagsipad-sipad ko sang tinapay kag pagbendisyon sini kag paghatag sini sa inyo.

7 Kag ini inyo himuon bilang pagpanumdum sang akon lawas nga akon ginpakita sa inyo. Kag ini mangin testimonya sa Amay nga dalayon ninyo ako nga ginadumdum. Kag kon dalayon ninyo ako nga ginadumdum maangkon ninyo ang akon Espiritu nga makaupod ninyo.

8 Kag natabo ini nga sang nasiling niya ining mga pulong, ginsugo niya ang iya mga disipulo nga magkuha sila sang bino halin sa ilimnan kag imnon ini, kag hatagan man nila ang kadam-an agud makainom sila sini.

9 Kag natabo ini nga ginhimo nila ang sugo ni Jesus, kag nag-inom sini kag nabusog; kag ginhatagan nila ang kadam-an, kag nag-inom sila kag nabusog sila.

10 Kag sang nahimo ini sang mga disipulo, si Jesus nagsiling sa ila: Bulahan kamo tungod sining butang nga inyo ginhimo, kay pagtuman ini sang akon mga kasugoan, kag nagasaksi ini sa Amay nga handa kamo sa paghimo sinang akon ginsugo sa inyo.

11 Kag ini dalayon ninyo nga himuon sa sinang mga nagahinulsol kag nabunyagan sa akon ngalan; kag inyo ini himuon bilang pagpanumdum sang akon dugo, nga ginpaagay ko para sa inyo, agud makasaksi kamo sa Amay nga dalayon ninyo ako nga ginadumdum. Kag kon dalayon ninyo ako nga ginadumdum maangkon ninyo ang akon Espiritu nga makaupod ninyo.

12 Kag ginahatagan ko kamo sing kasugoan nga himuon ninyo ining mga butang. Kag kon dalayon ninyo nga himuon ining mga butang bulahan kamo kay napasad kamo sa akon bato.

13 Apang kon sin-o man sa inyo ang maghimo sing kapin ukon kulang sangsa mga ini wala napasad sa akon bato, kundi napasad sa balason nga pundasyon; kag kon magbundak ang ulan, kag mag-abot ang mga baha, kag maghuyop ang mga hangin, kag maghampak sa ila, matumba sila, kag ang mga ganhaan sang impiyerno nakahanda nga bukas agud batonon sila.

14 Gani bulahan kamo kon tumanon ninyo ang akon mga kasugoan nga ginsugo sa akon sang Amay nga ihatag ko sa inyo.

15 Sa pagkamatuod, sa pagkamatuod, ginasiling ko sa inyo, kinahanglan gid kamo nga magbantay kag magpangamuyo sing dalayon kay basi sulayon kamo sang yawa, kag madala kamo nga bihag niya.

16 Kag pareho nga nagpangamuyo ako sa tunga ninyo sa amo man magpangamuyo kamo sa akon simbahan, sa tunga sang akon katawhan nga nagahinulsol kag nabunyagan sa akon ngalan. Tan-awa ako ang kasanag; nagpahamtang ako sang ehemplo para sa inyo.

17 Kag natabo ini nga sang nahambal ni Jesus ining mga pulong sa iya mga disipulo, nag-atubang sia liwat sa kadam-an kag nagsiling sa ila:

18 Tan-awa, sa pagkamatuod, sa pagkamatuod, ginasiling ko sa inyo, kinahanglan gid kamo nga magbantay kag magpangamuyo sing dalayon kay basi makasulod kamo sa pagsulay; kay luyag kamo nga angkonon ni Satanas, agud maayag niya kamo pareho sang trigo.

19 Gani kinahanglan gid kamo nga magpangamuyo sing dalayon sa Amay sa akon ngalan;

20 Kag kon ano man ang inyo pangayuon sa Amay sa akon ngalan, nga matarong, nga nagapati nga makabaton kamo, tan-awa ihatag ini sa inyo.

21 Magpangamuyo sa inyo mga panimalay sa Amay, dalayon sa akon ngalan, agud ang inyo mga asawa kag ang inyo mga anak pakamaayohon.

22 Kag tan-awa, magatililipon kamo sing masunson; kag indi ninyo pagdumilian ang bisan sin-o nga tawo sa pag-upod sa inyo kon magtililipon kamo, kundi tugotan sila nga mag-upod sila sa inyo kag indi sila pagdumilian;

23 Sa baylo magpangamuyo kamo para sa ila, kag indi sila pagpanabugon; kag kon mag-upod sila sa inyo sing masunson magpangamuyo kamo para sa ila sa Amay, sa akon ngalan.

24 Gani, ipataas ang inyo mga suga agud magsilak ini sa kalibutan. Tan-awa ako ang kasanag nga ipataas ninyo—inang nakita ninyo nga akon ginahimo. Tan-awa nakita ninyo nga nagpangamuyo ako sa Amay, kag kamo tanan nakasaksi.

25 Kag nakita ninyo nga nagsugo ako nga wala sing isa sa inyo nga magpalayo, kundi nagsugo nga magpalapit kamo sa akon, agud mahikap ninyo ang akon mga pilas kag makita ako; ang amo man himuon ninyo sa kalibutan; kag kon sin-o man ang maglapas sining kasugoan nagatugot sang iya kaugalingon nga madala sa pagsulay.

26 Kag karon natabo ini nga sang nahambal ni Jesus ining mga pulong, nagtulok sia liwat sa iya mga disipulo nga iya ginpili, kag nagsiling sa ila:

27 Tan-awa sa pagkamatuod, sa pagkamatuod, ginasiling ko sa inyo, ginahatagan ko kamo sing isa pa ka kasugoan, kag dayon kinahanglan gid nga magkadto na ako sa akon Amay agud matuman ko ang iban pa nga mga kasugoan nga ginhatag niya sa akon.

28 Kag karon tan-awa, amo ini ang kasugoan nga akon ginahatag sa inyo, nga indi ninyo pagtugotan ang bisan sin-o nga hungod nga mag-ambit sang akon unod kag dugo nga di-nagakaangay, kon magpanagtag kamo sini;

29 Kay kon sin-o man ang magkaon kag mag-inom sang akon unod kag dugo nga di-nagakaangay magakaon kag magainom sing silot sa iya kalag; gani kon nakahibalo kamo nga ang isa ka tawo di-nagakaangay nga magkaon kag mag-inom sang akon unod kag dugo dumilian ninyo sia.

30 Apang, indi ninyo sia pagtabugon halin sa inyo, kundi alagaran ninyo sia kag magpangamuyo sa Amay para sa iya, sa akon ngalan; kag kon maghinulsol sia kag mabunyagan sa akon ngalan, batonon ninyo sia, kag hatagan sia sang akon unod kag dugo.

31 Apang kon indi sia maghinulsol indi sia pag-isipon sa akon katawhan agud nga indi niya mahalitan ang akon katawhan, kay tan-awa kilala ko ang akon mga carnero, kag naisip sila.

32 Apang, indi ninyo sia pagtabugon halin sa inyo mga sinagoga, ukon sa inyo mga lugar sang pagsimba, kay sa amo sina sa ila magapadayon kamo sa pag-alagad; kay indi kamo makahibalo nga basi magbalik sila kag maghinulsol, kag magpalapit sa akon nga may bug-os nga katuyoan sang tagipusuon, kag paayohon ko sila; kag kamo ang mangin paagi sa pagdala sang kaluwasan sa ila.

33 Gani, tumana ining mga kasugoan nga akon ginasugo sa inyo agud indi kamo mapaidalom sa pagkondenar; kay kalisud sa iya nga pagakondenahon sang Amay.

34 Kag ginahatagan ko kamo sining mga kasugoan tungod sang mga pagbinaisay sa tunga ninyo. Kag bulahan kamo kon wala kamo sing mga pagbinaisay sa tunga ninyo.

35 Kag karon makadto ako sa Amay tungod kinahanglanon nga magkadto ako sa Amay para sa inyo.

36 Kag natabo ini nga sang nakatapos si Jesus sining mga ginpanghambal, gintandog niya sang iya kamot ang mga disipulo nga iya ginpili, sing isa-isa, bisan tubtob nga natandog niya sila tanan, kag naghambal sa ila samtang ginatandog niya sila.

37 Kag ang kadam-an wala nakabati sang mga pulong nga iya ginhambal, gani wala sila nagpamatuod; apang ang mga disipulo nagpamatuod nga ginhatagan niya sila sing gahum nga maghatag sang Balaan nga Espiritu. Kag ipakita ko sa inyo pagkatapos sini nga ining testimonya matuod.

38 Kag natabo ini nga sang natandog na sila tanan ni Jesus, may nagtuhaw nga panganod kag nagtabon sa kadam-an nga indi nila makita si Jesus.

39 Kag samtang ginatabonan sila nagbiya sia sa ila, kag nagkayab sa langit. Kag nakita sang mga disipulo kag nagpamatuod nga nagkayab sia liwat sa langit.