Balaan ng mga Kasulatan
3 Nefi 23


Kapitulo 23

Ginsakdag ni Jesus ang mga pulong ni Isaias—Ginsugo Niya ang katawhan nga usisaon ang mga propeta—Ang mga pulong ni Samuel nga Lamanhon parte sa Pagkabanhaw gindugang sa ila mga kasulatan. Mga A.D. 34.

1 Kag karon, tan-awa, ginasiling ko sa inyo, nga dapat ninyo usisaon ining mga butang. Huo, isa ka kasugoan ang ginahatag ko sa inyo nga usisaon ninyo sing matutum ining mga butang; kay gamhanan ang mga pulong ni Isaias.

2 Kay wala’y duhaduha nga naghambal sia tuhoy sa tanan nga butang parte sa akon katawhan nga iya sang panimalay ni Israel; gani kinahanglanon gid nga maghambal man sia sa mga Gentil.

3 Kag ang tanan nga butang nga iya ginhambal natabo na kag matabo pa, bisan suno sa mga pulong nga iya ginhambal.

4 Gani pamatii ang akon mga pulong; isulat ang mga butang nga akon ginhambal sa inyo; kag suno sa tion kag sa kabubut-on sang Amay ipahayag ang mga ini sa mga Gentil.

5 Kag kon sin-o man ang magpamati sa akon mga pulong kag maghinulsol kag mabunyagan, ang amo man maluwas. Usisaa ang mga propeta, kay madamo dira ang nagapamatuod parte sining mga butang.

6 Kag karon natabo ini nga sang nahambal ni Jesus ining mga pulong nagsiling sia liwat sa ila, pagkatapos nga mapaathag niya ang tanan nga balaan nga mga kasulatan nga ila nabaton, nagsiling sia sa ila: Tan-awa, ang iban pa nga balaan nga mga kasulatan luyag ko nga isulat ninyo, nga wala pa ninyo nasulat.

7 Kag natabo ini nga nagsiling sia kay Nefi: Dal-a diri ang kasulatan nga inyo ginsulat.

8 Kag sang nadala ni Nefi ang mga kasulatan, kag nahumlad ang mga ini sa iya atubang, gintan-aw niya ang mga ini kag nagsiling:

9 Sa pagkamatuod, ginasiling ko sa inyo, ginsugo ko ang akon alagad nga si Samuel, ang Lamanhon, nga magpamatuod sia sa sining katawhan, nga sa adlaw nga himayaon sang Amay ang iya ngalan sa akon nga may madamo nga santos nga magabangon halin sa mga minatay, kag magapakita sa madamo, kag magaalagad sa ila. Kag nagsiling sia sa ila: Indi bala amo sini?

10 Kag ang iya mga disipulo nagsabat sa iya kag nagsiling: Huo, Ginuo, si Samuel nagpropesiya suno sa imo mga pulong, kag natuman ini tanan.

11 Kag si Jesus nagsiling sa ila: Paano bala nga wala ninyo nasulat ini nga butang, nga madamo nga santos ang nagbangon kag nagpakita sa madamo kag nag-alagad sa ila?

12 Kag natabo ini nga nadumduman ni Nefi nga wala nasulat ini nga butang.

13 Kag natabo ini nga nagsugo si Jesus nga isulat ini; gani ginsulat ini suno sa iya ginsugo.

14 Kag karon natabo ini nga sang napaathag ni Jesus ang tanan nga balaan nga mga kasulatan sa kabilogan, nga ila nasulat, ginsugo niya sila nga itudlo nila ang mga butang nga iya ginpaathag sa ila.