Balaan ng mga Kasulatan
3 Nefi 6


Kapitulo 6

Ang mga Nefinhon nag-uswag—Ang bugal, manggad, kag pagbinahin-bahin sang katilingban nagtuhaw—Ang Simbahan natunga tungod sang mga pag-ilinaway—Ginpangunahan ni Satanas ang katawhan sa hayag nga pagrebelde—Madamo nga propeta ang nagwali sang paghinulsol kag ginpamatay—Ang mga nagpatay sa ila nagplano sa pag-agaw sang gobyerno. Mga A.D. 26–30.

1 Kag karon natabo ini nga ang katawhan sang mga Nefinhon nagbalik tanan sa ila kaugalingon nga mga kadutaan sa ika-beynte sais nga tuig, ang tagsa ka lalaki, upod ang iya panimalay, ang iya mga panong kag ang iya mga baka, ang iya mga kabayo kag ang iya kasapatan, kag tanan nga butang nga ila ginapanag-iyahan.

2 Kag natabo ini nga wala nila maurot kaon ang tanan nila nga panigana; gani gindala nila ang tanan nga wala nila makaon, sang tanan nila nga uyas sang tagsa ka sahi, kag ang ila bulawan, kag ang ila pilak, kag tanan nila nga malahalon nga mga butang, kag nagbalik sila sa ila kaugalingon nga mga kadutaan kag ila mga ginapanag-iyahan, sa norte kag sa sur, sa duta pa-norte kag sa duta pa-sur.

3 Kag inang mga tulisan nga nagsulod sa kasugtanan nga tipigan ang paghidaet sang kadutaan, nga maluyag nga magpabilin nga mga Lamanhon, ginhatagan nila sang mga duta suno sa ila kadamuon agud may yara sila makuhaan sang ila pangabuhian paagi sa ila mga pagpangabudlay; kag gani ginpaluntad nila ang paghidaet sa bug-os nga kadutaan.

4 Kag nagsugod sila liwat sa pag-uswag kag sa pagmanggaranon; kag ang ika-beynte sais kag siyete nga mga tuig nagligad, kag may dako nga kahusayan sa kadutaan; kag naghimo sila sang ila mga layi suno sa katarongan kag hustisya.

5 Kag karon wala sing kon ano sa bug-os nga kadutaan nga makaupang sang katawhan sa dalayon nga pag-uswag luwas lang nga mahulog sila sa kalapasan.

6 Kag karon si Gidgidoni, kag ang hukom nga si Laconeus, kag inang pinili nga mga lider, ang nagpaluntad sining dako nga paghidaet sa kadutaan.

7 Kag natabo ini nga may madamo nga siyudad nga gintukod liwat, kag may madamo nga siyudad nga ginpangkay-o.

8 Kag may madamo nga mayor nga mga dalan nga ginpasad, kag madamo nga mga dalanon ang ginpanghimo nga nagaangot sang siyudad sa siyudad, kag sang duta sa duta, kag sang lugar sa lugar.

9 Kag gani nagligad ang ika-beynte otso nga tuig, kag ang katawhan nakaangkon sang dalayon nga paghidaet.

10 Apang natabo ini, sa ika-beynte nuebe nga tuig may nagsugod nga pila ka mga pagbinaisay sa tunga sang katawhan; kag ang pila naalsa sa bugal kag mga paghinambog tungod sang ila tuman kadamo nga manggad, huo, bisan tubtob sa mapintas nga mga paghingabot;

11 Kay may madamo nga negosyante sa kadutaan, kag madamo man nga mananabang, kag madamo nga opisyal.

12 Kag ang katawhan nagsugod nga makilala sa kahimtangan sang pangabuhi, suno sa ila mga manggad kag sa ila mga kahigayunan sa pagtuon; huo, may pila nga nangin ignorante tungod sang ila kaimulon, kag ang iban nagbaton sang dako nga tinun-an tungod sang ila mga manggad.

13 May pila nga naalsa sa bugal, kag ang iban tuman kamapainubuson; may pila nga nagabalus sang pakahuya sa pagpakahuya, samtang may iban nga nagaantos sang mga pagpakahuya kag paghingabot kag tanan nga sari sang mga pag-antos, kag indi magbalus kag magpasipala man, kundi nga mga mapainubuson kag mahinulsulon sa atubang sang Dios.

14 Kag gani nangin may isa ka dako nga indi pagpalareho sa bug-os nga kadutaan, sa bagay nga ang simbahan nagsugod nga mabahin-bahin; huo, sa bagay nga sa ika-treinta nga tuig ang simbahan nabahin-bahin sa bug-os nga kadutaan luwas sa pila ka mga Lamanhon nga nahaylo sa matuod nga pagtuluohan; kag indi nila pagtalikdan ini, kay mabakod sila, kag malig-on, kag di-malingkang, nga nakahanda nga may bug-os nga katutum sa pagtuman sang mga kasugoan sang Ginuo.

15 Karon ang kabangdanan sining kalainan sang katawhan amo ini—si Satanas may dako nga gahum, sa pagsugyot sang katawhan sa paghimo sang tanan nga sari sang kalainan, kag sa pagpahambog sa ila sa bugal, nga nagasulay sa ila sa paghangad sang gahum, kag awtoridad, kag manggad, kag sang wala’y pulos nga mga butang sang kalibutan.

16 Kag gani gindala palayo ni Satanas ang mga tagipusuon sang katawhan sa paghimo sang tanan nga sari sang kalainan; gani nakaagom sila sang paghidaet sa sulod sang pila lamang ka tuig.

17 Kag gani, sa pagsugod sang ika-treinta nga tuig—ang katawhan nga natugyan sa gahum sang yawa sa sulod sang malawig nga panahon agud madala sa mga pagsulay sang yawa sa bisan diin niya sila luyag nga dal-on, kag sa paghimo sang kon ano man nga kalainan nga luyag niya nga ila himuon—kag gani sa pagsugod sining ika-treinta nga tuig, yara sila sa kahimtangan sang makahaladlok nga kalainan.

18 Karon indi sila nakasala nga wala’y hinalung-ong, kay nahibal-an nila ang kabubut-on sang Dios parte sa ila, kay gintudlo ini sa ila; gani hungod sila nga nagrebelde batok sa Dios.

19 Kag karon sa mga adlaw ini sadto ni Laconeus, nga anak ni Laconeus, kay si Laconeus amo ang nagpungko sa lingkuranan sang iya amay kag nagdumala sang katawhan sa sina nga tuig.

20 Kag nagsugod nga may mga tawo nga nakabaton sing inspirasyon halin sa langit kag ginpadala, nga nagatindog sa tunga sang katawhan sa bug-os nga kadutaan, nga nagawali kag nagasaksi sing maisog parte sa mga sala kag mga kalainan sang katawhan, kag nagapamatuod sa ila parte sa pagtubos nga pagahimuon sang Ginuo para sa iya katawhan, ukon sa iban nga pulong, ang pagkabanhaw ni Cristo; kag nagpamatuod sila sing maisog parte sa iya kamatayon kag mga pag-antos.

21 Karon madamo sang katawhan ang tuman nga naakig tungod sang mga nagsaksi parte sining mga butang; kag ang mga naakig kalabanan mga puno nga hukom, kag sila nga nangin mga mataas nga pari kag mga mananabang; huo, ang tanan nga mananabang naakig sa ila nga nagsaksi parte sining mga butang.

22 Karon wala sing mananabang kag hukom kag mataas nga pari nga may gahum sa pagsentensya sa bisan sin-o sang kamatayon luwas lang kon ang pagsentensya sa ila ginpirmahan sang gobernador sang kadutaan.

23 Karon may madamo sinang mga nagpamatuod parte sa mga butang nga may kaangtanan kay Cristo nga nagpamatuod sing maisog, ang ginpangdakop kag ginpamatay sing sekreto sang mga hukom, agud nga ang ihibalo parte sa ila kamatayon indi maglab-ot sa gobernador sang kadutaan tubtob nga pagkatapos sang ila kamatayon.

24 Karon tan-awa, batok ini sa mga layi sang kadutaan nga patyon ang bisan sin-o nga tawo luwas lang kon may gahum sila halin sa gobernador sang kadutaan—

25 Gani may reklamo nga ginpasaka sa duta sang Zarahemla, sa gobernador sang kadutaan, batok sining mga hukom nga nagsentensya sang mga propeta sang Ginuo sang kamatayon nga indi suno sa layi.

26 Karon natabo ini nga ginpangdakop sila kag gindala sa atubang sang hukom agud hukman sang krimen nga ila nahimo suno sa layi nga ginpahamtang sang katawhan.

27 Karon natabo ini nga inang mga hukom may madamo nga abyan kag mga paryente; kag ang nabilin, huo, bisan halos tanan nga mananabang kag mga mataas nga pari, nagtililipon sang ila mga kaugalingon, kag nakig-isa sa mga paryente sinang mga hukom nga pagabistahon suno sa layi.

28 Kag nagpakighisugot sila sa isa kag isa, huo, bisan sa sinang kasugtanan nga ginhatag sadto pa sang dumaan nga panahon, nga ang amo nga kasugtanan ginhatag kag gindumalahan sang yawa, nga magtingob batok sa tanan nga pagkamatarong.

29 Gani nagtingob sila batok sa katawhan sang Ginuo, kag nagsulod sa kasugtanan nga laglagon sila, kag luwason inang mga may sala sa pagpamatay halin sa gapos sang hustisya, nga ipatuman na kuntani suno sa layi.

30 Kag ginlapas nila ang layi kag ang mga kinamatarong sang ila pungsod; kag nakighisugot sila sa isa kag isa nga patyon ang gobernador, kag papungkuon ang isa ka hari sa kadutaan agud ang kadutaan indi na mangin hilway kundi mapaidalom na sa mga hari.