Kapitulo 29
Ang paggwa sang Libro ni Mormon isa ka tanda nga ang Ginuo nagsugod na sa pagtipon sang Israel kag pagtuman sang Iya mga kasugtanan—Inang mga magasikway sang Iya mga rebelasyon kag mga dulot sa ulihing mga adlaw pagasumpaon. Mga A.D. 34–35.
1 Kag karon tan-awa, ginasiling ko sa inyo nga kon makita sang Ginuo nga nagakaigo, suno sa iya kinaalam, nga ining mga pahayag magaabot sa mga Gentil suno sa iya pulong, dayon mahibal-an ninyo nga ang kasugtanan nga ginhimo sang Amay sa mga anak sang Israel, parte sa ila pagpanumbalik sa mga kadutaan nga ila palanublion, nagasugod na nga matuman.
2 Kag mahibal-an ninyo nga ang mga pulong sang Ginuo, nga ginpahayag sang balaan nga mga propeta, matuman na tanan; kag indi kamo dapat magsiling nga ang Ginuo nagapadugay-dugay sang iya pagkari sa mga anak sang Israel.
3 Kag indi kamo dapat maghunahuna sa inyo mga tagipusuon nga ang mga pulong nga ginpanghambal wala’y kapuslanan, kay tan-awa, ang Ginuo magadumdum sang iya kasugtanan nga ginhimo niya sa iya katawhan nga iya sang panimalay ni Israel.
4 Kag sa tion nga makita ninyo ining mga pahayag nga nagakatabo sa inyo, dayon indi ninyo dapat nga tamayon pa ang mga kahimoan sang Ginuo, kay ang espada sang iya hustisya yara sa iya tuo nga kamot; kag tan-awa, sa sina nga adlaw, kon tamayon ninyo ang iya mga kahimoan ipahanabo niya nga pagalambuton kamo sini sa indi madugay.
5 Kalisud sa iya nga nagatamay sa mga kahimoan sang Ginuo; huo, kalisud sa iya nga magapanghiwala sa Cristo kag sa iya mga binuhatan!
6 Huo, kalisud sa iya nga magapanghiwala sang mga rebelasyon sang Ginuo, kag magasiling nga ang Ginuo wala na nagahikot paagi sa rebelasyon, ukon paagi sa propesiya, ukon paagi sa mga dulot, ukon paagi sa paghambal sa nagkalain-lain nga mga lengguahe, ukon paagi sa mga pagpaayo, ukon paagi sa gahum sang Balaan nga Espiritu!
7 Huo, kalisud sa iya nga magasiling sa sina nga adlaw, agud makaangkon sing manggad, nga wala sang milagro nga mahimo paagi kay Jesucristo; kay sia nga nagabuhat sini mangin pareho sa anak sang kalaglagan, nga para sa iya wala sang kaluoy, suno sa pulong ni Cristo!
8 Huo, indi na kamo dapat pa nga magpanagutsot, ukon magtamay, ukon magyaguta sa mga Judio, ukon sin-o man sang nagkalabilin sang panimalay ni Israel; kay tan-awa, ang Ginuo nagadumdum sang iya kasugtanan sa ila, kag himuon niya sa ila ang suno sa iya ginpanumpa.
9 Gani indi ninyo dapat paghunahunaon nga maliso ninyo ang tuo nga kamot sang Ginuo sa wala agud indi sia makahikot sang paghukom sa pagtuman sang kasugtanan nga iya ginhimo sa panimalay ni Israel.