Balaan ng mga Kasulatan
3 Nefi 28


Kapitulo 28

Siyam sa dose ka disipulo ang naghandum kag ginpromisahan sang palanublion sa ginharian ni Cristo kon mapatay sila—Ang tatlo ka Nefinhon naghandum kag ginhatagan sing gahum batok sa kamatayon agud makapabilin sa duta tubtob nga si Jesus magkari liwat—Ginbag-o ang ila dagway kag nakakita sang mga butang nga wala ginatugot nga imitlang, kag nagaalagad sila subong sa mga tawo. Mga A.D. 34–35.

1 Kag natabo ini sang nasiling ni Jesus ining mga pulong, naghambal sia sa iya mga disipulo, sing isa-isa, nga nagasiling sa ila: Ano bala ang inyo luyag halin sa akon pagkatapos nga didto na ako sa Amay?

2 Kag tanan sila naghambal luwas lang sang tatlo nga nagasiling: Luyag namon nga pagkatapos nga magkabuhi kami tubtob sa pangidaron sang tawo, nga ang amon pag-alagad, nga sa sini mo kami gintawag, mahimo nga matapos na, agud makakadto na kami gilayon sa imo sa imo ginharian.

3 Kag nagsiling sia sa ila: Bulahan kamo tungod naghandum kamo sining butang halin sa akon; gani, pagkatapos nga maglab-ot kamo sa edad nga sitenta’y dos ka tuig magakadto kamo sa akon sa akon ginharian; kag upod sa akon makakita kamo sang kapahuwayan.

4 Kag sang nakahambal sia sa ila, nagliso sia sa tatlo, kag nagsiling sa ila: Ano bala ang inyo luyag nga himuon ko sa inyo kon didto na ako sa Amay?

5 Kag nagkasubo sila sa ila mga tagipusuon kay wala sila nangisog sa paghambal sa iya sang butang nga ila ginahandum.

6 Kag nagsiling sia sa ila: Tan-awa, nakahibalo ako sang inyo mga panghunahuna, kag naghandum kamo sang butang nga si Juan, ang akon pinalangga, nga kaupod nakon sa akon pag-alagad, antes nga ginlansang ako sa krus sang mga Judio, naghandum halin sa akon.

7 Gani, labaw kamo nga bulahan, kay indi gid kamo makatilaw sang kamatayon; kundi nga magakabuhi kamo sa pagtan-aw sang tanan nga kahimoan sang Amay sa mga anak sang katawhan, bisan tubtob nga ang tanan nga butang matuman suno sa kabubut-on sang Amay, kon magkari ako sa akon himaya upod ang mga kagamhanan sang langit.

8 Kag indi gid kamo mag-antos sang mga kasakit sang kamatayon; kundi nga kon magkari ako sa akon himaya magabaylo kamo sa isa lang ka pisok halin sa pagkamay-kamatayon padulong sa pagkawala’y kamatayon; kag dayon pakamaayohon kamo sa ginharian sang akon Amay.

9 Kag sa liwat, indi kamo makabatyag sang kasakit samtang nagapuyo kamo sa unod, kag indi man sang kasubo luwas lang nga ini tungod sang mga sala sang kalibutan; kag ini tanan pagahimuon ko tungod sang butang nga inyo ginahandum halin sa akon, kay naghandum kamo nga magdala sang mga kalag sang mga tawo sa akon, samtang ang kalibutan nagapadayon.

10 Kag sa sini nga kabangdanan makaangkon kamo sang kabug-osan sang kalipay; kag magapungko kamo sa ginharian sang akon Amay; huo, ang inyo kalipay malubos, bisan pareho nga ang Amay naghatag sa akon sang kabug-osan sang kalipay; kag mangin pareho kamo sa akon, kag ako mangin pareho sa Amay; kag ang Amay kag ako isa;

11 Kag ang Balaan nga Espiritu nagapamatuod parte sa Amay kag sa akon; kag ang Amay nagahatag sang Balaan nga Espiritu sa mga anak sang katawhan tungod sa akon.

12 Kag natabo ini nga sang nahambal ni Jesus ining mga pulong, gintandog niya ang tagsa-tagsa sa ila paagi sa iya tudlo luwas lang sa tatlo nga magapabilin, kag dayon naglakat sia.

13 Kag tan-awa, ang kalangitan nabuksan, kag ginsabnit sila pa-langit, kag nakakita kag nakabati sang di-mamitlang nga mga butang.

14 Kag gindumilian sila nga imitlang nila; kag wala man sila paghatagi sing gahum nga mamitlang nila ang mga butang nga ila nakita kag nabatian;

15 Kag kon yara sila sa lawas ukon wala sa lawas, indi nila mapat-od; kay para sa ila ini daw pagbalhin sang dagway nila, nga nag-ilis sila halin sa sining lawas nga unod padulong sa kahimtangan nga wala’y kamatayon, agud makakita sila sang mga butang sang Dios.

16 Apang natabo ini nga nagpanudlo sila liwat sa ibabaw sang duta; ugaling wala sila nagpanugid parte sa mga butang nga ila nabatian kag nakita tungod sang kasugoan nga ginhatag sa ila sa langit.

17 Kag karon, kon sila man may kamatayon ukon wala’y kamatayon, halin sa adlaw sang ila pagbalhin sang dagway, wala ako nakahibalo;

18 Apang ini lamang ang akon nahibal-an, suno sa kasulatan nga ginhatag—naglakat sila sa ibabaw sang kadutaan, kag nag-alagad sa tanan nga katawhan, nga ginapabuylog sa simbahan ang tanan nga magpati sa ila pagpangwali; nga ginabunyagan sila, kag ang tanan nga nabunyagan nagbaton sang Balaan nga Espiritu.

19 Kag ginhunong sila sa bilanggoan sinang indi mga miyembro sang simbahan. Kag ang mga bilanggoan indi makapugong sa ila kay nagkalapihak ang mga ini.

20 Kag ginpanghulog sila sa idalom sang duta; apang ginsakit nila ang duta paagi sa pulong sang Dios, sa bagay nga paagi sa iya gahum nakaluwas sila halin sa kaidadalman sang duta; kag gani indi sila makakutkot sang mga buho nga makapugong sa ila.

21 Kag katatlo ka beses sila nga ginpangdap-ong sa hurno kag wala sila nasamaran.

22 Kag kaduha sila nga ginsulod sa lungib sang mabangis nga mga sapat; kag tan-awa nakighampang sila sa mga sapat pareho sing isa ka bata sa nagasuso nga carnero, kag wala nasamaran.

23 Kag natabo ini nga naglibot sila sa tanan nga katawhan ni Nefi, kag nagwali sang ebanghelyo ni Cristo sa tanan nga katawhan sa ibabaw sang kadutaan; kag nahaylo sila sa Ginuo, kag nagbuylog sa simbahan ni Cristo, kag gani ang katawhan sina nga henerasyon ginpakamaayo, suno sa ginsiling ni Jesus.

24 Kag karon ako, si Mormon, magauntat sing makadali sa paghambal parte sining mga butang.

25 Tan-awa, nagahana na kuntani ako nga isulat ang mga ngalan sinang mga indi gid makatilaw sang kamatayon, apang gindumilian sang Ginuo; gani wala ko pag-isulat ang mga ini kay ginatago sila halin sa kalibutan.

26 Apang tan-awa, nakita ko sila, kag nakaalagad sila sa akon.

27 Kag tan-awa mangin yara sila sa mga Gentil, kag ang mga Gentil indi makakilala sa ila.

28 Mangin yara man sila sa mga Judio, kag ang mga Judio indi makakilala sa ila.

29 Kag matabo ini nga kon makita sang Ginuo nga nagakaigo suno sa iya kinaalam nga mag-alagad sila sa tanan nga naglinapta nga mga tribo sang Israel, kag sa tanan nga nasyon, mga kaliwat, mga lengguahe kag katawhan, kag magdala halin sa mga ini padulong kay Jesus sang madamo nga kalag, agud ang ila handum matuman, kag tungod man sang makakumbinse nga gahum sang Dios nga yara sa ila.

30 Kag pareho sila sang mga anghel sang Dios, kag kon magpangamuyo sila sa Amay sa ngalan ni Jesus mapakita nila ang ila mga kaugalingon sa bisan sin-o nga tawo nga nagakaigo para sa ila.

31 Gani, dalagko kag dalayawon nga mga buluhaton ang pagahimuon nila antes sang dako kag magaabot nga adlaw kon san-o ang tanan nga katawhan pat-od gid nga magatindog sa atubang sang hukom-lingkuranan ni Cristo;

32 Huo, bisan sa mga Gentil may isa ka dako kag dalayawon nga buluhaton nga pagahimuon nila antes sinang adlaw sang paghukom.

33 Kag kon may yara kamo sang tanan nga balaan nga mga kasulatan nga nagahatag sang kasaysayan sang tanan nga dalayawon nga mga buluhaton ni Cristo, mahibal-an ninyo, suno sa mga pulong ni Cristo, nga ining mga butang pat-od gid nga maabot.

34 Kag kalisud sa iya nga indi mamati sa mga pulong ni Jesus, kag sa ila man nga iya ginpili kag ginpadala sa ila; kay kon sin-o man ang indi magbaton sang mga pulong ni Jesus kag sang mga pulong sinang iya mga ginpadala wala nagabaton sa iya; kag gani indi niya sila pagbatonon sa katapusan nga adlaw;

35 Kag mangin mas maayo pa para sa ila kon wala sila nabun-ag. Kay nagahunahuna bala kamo nga makalikaw kamo sa hustisya sing isa ka nasaklaw nga Dios nga ginlapakan sang mga tiil sang mga tawo agud paagi sa sini magaabot ang kaluwasan?

36 Kag karon tan-awa, samtang nagahambal ako parte sang mga ginpili sang Ginuo, huo, bisan ang tatlo nga ginsabnit paibabaw sa kalangitan, nga wala ko mahibal-i kon bala natinloan sila halin sa pagkamay-kamatayon padulong sa pagkawala’y kamatayon—

37 Apang tan-awa, sugod sang nagsulat ako, nakapamangkot ako sa Ginuo, kag ginpakita niya sa akon nga kinahanglan nga may himuon gid nga pagbag-o sa ila mga lawas, kay kon indi, kinahanglan nga matilawan gid nila ang kamatayon;

38 Gani, agud indi nila matilawan ang kamatayon may pagbag-o nga ginhimo sa ila mga lawas agud indi sila mag-antos sang kasakit ukon kasubo luwas lang nga tungod sang mga sala sang kalibutan.

39 Karon ining pagbag-o indi mangin pareho sa sinang matabo sa katapusan nga adlaw; kundi may pagbag-o nga ginhimo sa ila, sa bagay nga si Satanas mangin wala sing gahum sa ila, agud nga indi niya sila masulay; kag ginpakabalaan sila sa unod, amo nga mga balaan sila, kag ang mga gahum sang duta indi makapugong sa ila.

40 Kag sa sini nga kahimtangan magapabilin sila tubtob sa adlaw sang paghukom ni Cristo; kag sa sina nga adlaw magabaton sila sing mas dako nga pagbag-o, kag pagabatonon sa ginharian sang Amay agud indi na maggwa pa, kundi nga magapuyo upod sa Dios sing wala’y katapusan sa mga langit.