1 Na ɔbaa dɛ aber a Jesus n’esuafo no worututu akwan na wɔrekekã dza wɔatse nye ndzɛmba so a woehu, na worunuma wɔ Jesus ne dzin mu no, ɔbaa dɛ esuafo no boaa hɔn ano wɔ fakor na wɔbɔɔ mu faa akɔnkye na wɔbɔɔ mpaa enyiberdo.

2 Na Jesus yii noho kyerɛɛ hɔn bio, osiandɛ nna wɔrobɔ mpaa ma Egya no wɔ ne dzin mu; na Jesus baa begyinaa hɔn finimfin, na ɔsee hɔn dɛ: Ebɛnadze na hom pɛ dɛ meyɛ ma hom?

3 Na wɔsee no dɛ: Ewuradze yɛpɛ dɛ ekyerɛ hɛn dzin a yɛmfa mfrɛ asɔr yi; osiandɛ ekyingye esi nkorɔfo no mu a ɔfa dɛm adze yi ho.

4 Na Ewuradze see hɔn dɛ: Nokwar, nokwar, mese hom dɛ, ɔyɛ dɛn ntsi na nkorɔfo no hwinhwin na wɔgye kyim wɔ dɛm adze yi ntsi?

5 Ana wɔnnkenkaan kyerɛwsɛm no, dza ɔkã dɛ hom mfa Christ ne dzin nto hom do no ? Osiandɛ dzin yi na wɔdze bɛfrɛ hom wɔ da a odzi ewiei no mu.

6 Na obiara a ɔbɛfa me dzin ato no do, na obetsim ekodu ewiei no, dɛm nyimpa no na wɔbɛgye no nkwa wɔ da a odzi ewiei no mu.

7 Dɛm ntsi, biribiara a hom bɛyɛ no, hom nyɛ no wɔ me dzin mu; dɛm ntsi hom mfa me dzin mfrɛ asɔr no; na hom mfrɛ Egya no wɔ me dzin mu ama oeehyira asɔr no wɔ emi ntsi.

8 Na ɔyɛ dɛn yɛ m’asɔr, sɛ wɔammfa me dzin ammfrɛ no a? Osiandɛ sɛ wɔdze Moses ne dzin to asɔr do a nna ɔyɛ Moses n’asɔr; anaadɛ sɛ wɔdze nyimpa ne dzin to do a nna ɔyɛ nyimpa n’asɔr; na mbom sɛ wɔdze me dzin frɛ no a nna ɔyɛ m’asɔr, sɛ ɔwɔ mu dɛ wɔnam m’asɛmpa do kyekyeree a.

9 Nokwar mese hom dɛ, wɔnam m’asɛmpa ne nkyekyeree do si hom pi; dɛm ntsi biribiara a hom bɛfrɛ no, hom mfrɛ no wɔ me dzin mu; dɛm ntsi, sɛ hom frɛ Egya no wɔ asɔr no ntsi, wɔ me dzin mu a, Egya no betsie hom,

10 Na sɛ ɔwɔ mu dɛ m’asɛmpa do na wɔnam kyekyeer asɔr no a, Egya no bɛda nankasa no ndwuma edzi wɔ mu.

11 Mbom ɔwɔ mu dɛ sɛ wɔnnam m’asɛmpa do kyekyeree na wɔnam nyimpa no ndwuma do yɛɛ anaa wɔnam abɔnsam no ndwuma do yɛɛ a, nokwar, mese hom dɛ wɔwɔ enyigye wɔ hɔn ndwuma mu mber tsiabaa mu, na ewiei no bɛba, na wobotwa egu na wɔatow akyen gya mu a ɔnnkɛsan aba bio.

12 Osiandɛ hɔn ndwuma dzi hɔn ekyir, na osian hɔn ndwuma ntsi na woetwa hɔn akyen no; dɛm ntsi hom nkaa dza makã akyerɛ hom no.

13 Hwɛ medze m’asɛmpa no ama hom, na iyi nye asɛmpa a medze ama hom no—dɛ mebaa wiadze bɛyɛɛ m’Egya ne pɛ, osiandɛ m’Egya na ɔsomaa me.

14 Na m’Egya somaa me ama wɔaama mo do asɛn mbeamudua no do wɔ sor; na wɔaama mo do wɔ mbeamudua no do wɔ sor ekyir no, ɔbɛma maatwe adasa nyinara ama moho, dɛ mbrɛ adasa na wɔmaa mo do wɔ sor no, dɛmara so mpo na Egya no bɛma adasa do wɔ sor, na woebegyina m’enyim, na woebu hɔn atsɛn wɔ hɔn ndwuma ho, dɛ oye anaa omuo—

15 Na iyi ho ntsi na wɔmaa mo do sɛɛn sor; dɛm ntsi, ɔnam Egya no tum do mobɔtwe adasa nyina ama moho, ama woeebu hɔn atsɛn dɛ mbrɛ hɔn ndwuma tse.

16 Na ɔbɛba dɛ obiara a obonu noho na oenuma no wɔ me dzin mu no wɔbɛhyɛ no mã; na sɛ otsim kodu ewiei a, hwɛ, sɛ mosoɛr gyina dɛ murubobu wiadze atsɛn a murummbu no fɔ wɔ m’Egya n’enyim wɔ da no mu.

17 Na nyia ɔannsɔw ennkodu ewiei no, dɛm nyimpa no wobotwa no egu na wɔatow no akyen gya mu, na orimmfi mu mmpue bio, osian Egya no ne pɛrpɛrdzi no ntsi.

18 Na iyi nye asɛm a ɔdze ama adasamba. Na iyi ma ɔhyɛ ne nsɛm a ɔdze ama no mã, na onndzi ator, mbom ɔhyɛ ne nsɛm nyina mã.

19 Na adze biara a no ho nntsew no rennhɛn n’ahenman mu; dɛm ntsi obiara rennhɛn n’ahomgye mu gyedɛ hɔn a osian hɔn gyedzi ntsi, wonuu hɔnho wɔ hɔn bɔn ho, na wodzii nokwar dze kɔr ewiei ma wɔahor hɔn ntar wɔ mo bɔgyaa mu no.

20 Afei iyi nye mbrasɛm no: Hom nnu hom ho, hom a hom wɔ asaase n’ano n’ano nyina, na hom mbra me nkyɛn ma wonnuma hom wɔ me dzin mu, ama Sunsum Krɔnkrɔn no a hom benya no aatsew homho, ma hom eetum egyina m’enyin wɔ da a odzi ewiei no mu dɛ nkekãa biara nnyi homho.

21 Nokwar, nokwar, mese hom dɛ, iyi nye m’asɛmpa no; na hom nyim ndzɛmba a ɔsɛ dɛ hom yɛ wɔ m’asɔrfi mu; na ndwuma a hom ehu me dɛ meyɛ no ɔnoara na hom so hom nyɛ; na dza hom ehu me dɛ meyɛ no, ɔnoara mpo na hom nyɛ;

22 Dɛm ntsi, sɛ hom yɛ dɛm ndzɛmba yinom a nna nhyira akã hom, na wɔbɛma hom do wɔ da a odzi ewiei no mu.

23 Hom nkyerɛw ndzɛmba a hom ehu na hom atse yi, na nnyɛ dza wɔabra hom wɔ ho no bi a.

24 Hom nkyerɛw dza dɛm nkorɔfo yi bɛyɛ, mpo dɛ mbrɛ wɔakyerɛw dza wɔayɛ ma ɔabɛsen no.

25 Na hwɛ, nwoma no mu dza wɔakyerɛw, nye dza wɔbɛkyerɛw no na wɔdze bobu dɛm nkorɔfo yi atsɛn, na ɔno do na adasa dze bohu hɔn ndwuma.

26 Na hwɛ, ndzɛmba nyina Egya no akyerɛw; dɛm ntsi dza wɔbɛkyerɛw wɔ nwoma no mu no na wɔdze bobu wiadze atsɛn.

27 Na hom nhu dɛ hom bɛyɛ dɛm nkorɔfo yi hɔn atsɛmbuafo, dɛ mbrɛ atsɛmbu a medze bɛma hom no tse, dza ɔyɛ pɛrpɛr no. Dɛm ntsi, ebɛn nyimpa ne saso na ɔsɛ dɛ hom yɛ? Nokwar mese hom dɛ, dɛ ma metse mpo.

28 Na afei morokɔ Egya no nkyɛn. Na nokwar mese hom dɛ biribiara a hom bebisa Egya no wɔ me dzin mu no, wɔdze bɛma hom.

29 Dɛm ntsi, hom mbisa, na hom nsa bɛkã; hom mbɔ mu, na wobobue ama hom; na nyia obisa no, ne nsa kã; na nyia ɔbɔ mu no, wobue ma no.

30 Na afei, hwɛ, midzi dɛw kɛse, ma ɔrehyɛ mã mpo, osian hom nye dɛm ebusuasantsen yi so ntsi; nyew, na Egya no so mpo dzi dɛw, na abɔfo krɔnkrɔn no nyinara so, osian hom nye dɛm ebusuasantsen yi ntsi, osiandɛ hɔn mu biara nnyewee.

31 Hwɛ, mepɛ dɛ hom tse ase dɛ ebusuasantsen yi a wɔtse nkwa mu seseiara yi hɔn mu biara nnyewee; na hɔn mu na menya enyigye ne mãhyɛ.

32 Mbom hwɛ, midzi yaw wɔ ebusuasantsen a otsĩa anan a wodzi ebusuasantsen yi ekyir no ho, osiandɛ ɔdze hɔn kɔ ndɔmmum mu dɛ ɔsɛɛ ba no mpo; na wɔbɔtɔn me dze agye dwetɛ na sika, nye dza awebowa tum sɛɛ no na ewifo tum bubu mu kowia. Na da no mu na mebɛba abɛsera hɔn, na medze hɔn ndwuma bobua hɔnankasa hɔn etsifi.

33 Na ɔbaa dɛ aber a Jesus wiee dɛm nsɛm yinom kã no, ɔsee n’esuafo no dɛ: Hom nhɛn abow tseabaa no mu; na abow a ɔyɛ tseabaa, na ɔkwan a ɔyɛ heaheaba nye dza wɔdze kɔ nkwa mu, na kumaabi na wohu; na mbom abow a ɔtserɛw, na kwan a ɔyɛ tɛtɛr nye dza wɔdze kɔ owu mu, na dodowara wɔ hɔ a wɔfa mu, kesi dɛ adzesaa no bɛba a nyimpa biara nntum nnyɛ edwuma.