1 Na afei, hwɛ, mese hom dɛ hom ^anhwehwɛ dɛm ndzɛmba yi mu yie. Nyew, me ma hom mbrasɛm dɛ hom mfa enyimpi nhwehwɛ dɛm ndzɛmba yi mu yie; osiandɛ ^bIsaiah ne nsɛm no mu yɛ dur.

2 Na ampa ɔkãa nsɛm nyina a ɔfa mo nkorɔfo a wɔyɛ Israel fifo yi ho; dɛm ntsi ohia dɛ ɔkasa kyerɛ Amanamamfo so.

3 Na ndzɛmba a ɔkãa ho nsɛm nyina ayɛ hɔ, na ^aɔbɛyɛ hɔ so, mpo dɛ mbrɛ nsɛm a ɔkãa no tse.

4 Dɛm ntsi hom ntsie me nsɛm; hom nkyerɛw dza makã akyerɛ hom no; na ɔbɔkɔ Amanamamfo hɔ wɔ Egya noara n’aber a ɔahyehyɛ na ne pɛ do.

5 Na obiara a obetsie me nsɛm na obonu noho na wobonuma no no, ɔnoara so na wɔbɛgye no nkwa. Hom nhwehwɛ ^ankɔnhyɛfo no mu, na hɔn mu dodowara na wɔgyee dɛm ndzɛmba yi ho dase.

6 Na afei ɔbaa dɛ aber a Jesus kãa dɛm nsɛm yi wiei no, ɔsee hɔn bio dɛ, ekyir yi a oesiansian kyerɛwsɛm a hom nsa akã yi mu akyerɛ hɔn no, ɔsee hɔn dɛ: Hwɛ, kyerɛwsɛm binom so wɔ hɔ a mepɛ dɛ hom kyerɛw a hom nnyɛe.

7 Na ɔbaa dɛ ɔsee Nephi dɛ: Fa kyerɛwsɛm a edze esie no bra.

8 Na ber a Nephi dze kyerɛwsɛm no bae, na ɔdze bɔtoo n’enyim no, ɔtoo n’enyi hwɛe na ɔsee dɛ:

9 Nokwar mese hom dɛ, mehyɛɛ m’akowaa ^aSamuel, Lamannyi no dɛ ɔngye dase nkyerɛ dɛm nkorɔfo yi dɛ da no a Egya no bɛhyɛ ne dzin enyimnyam wɔ mo mu no, ^bahotseweefo ^cpii wɔ hɔ a ^dwɔbɔsoɛr efi owu mu, na wobeyi hɔnho akyerɛ dodowara, na wɔbɔsom hɔn. Na obisaa hɔn dɛ: Ana ɔnntse dɛm?

10 Na n’esuafo no buaa no see dɛ: Nyew, Ewuradze, Samuel hyɛɛ nkɔm wɔ wo nsɛm yi ho, na ne nyinara hyɛɛ mã.

11 Na Jesus see hɔn dɛ: Ɔyɛ dɛn ntsi na hom annkyerɛw dɛm adze yi, dɛ ahotseweefo pii soɛree na woyii hɔnho kyerɛɛ dodowara na wɔsoom hɔn?

12 Na ɔbaa dɛ Nephi kaa dɛ dɛm adze yi wɔnnkyerɛwee.

13 Na ɔbaa dɛ Jesus hyɛɛ hɔn dɛ wɔnkyerɛw; dɛm ntsi wɔkyerɛwee dɛ mbrɛ ɔsee hɔn no ara.

14 Na afei ɔbaa dɛ ber a Jesus ^asiansian kyerɛwsɛm no a wɔakyerɛw dɛ adze kor mu wiei no, ɔhyɛɛ hɔn dɛ wɔnkɛkyerɛkyerɛ ndzɛmba a oesiansian mu akyerɛ hɔn no.