1 Na afei ɔbaa dɛ mbrɛ hɛn kyerɛwsɛm se no, na yenyim dɛ hɛn kyerɛwsɛm no yɛ nokwar, na hwɛ, nokwafo na ɔdze nkyerɛwee no esie—na nokwar, ɔyɛɛ ^aanwanwadze pii wɔ Jesus ne ^bdzin mu; na ɔdasanyi biara nnyi hɔ a obotum ayɛ anwanwadze wɔ Jesus ne dzin mu, gyedɛ ɔatsew noho efi no emumuyɛ biara ho—

2 Na afei ɔbaa dɛ, sɛ dɛm nyimpa yi annyɛ mfomdo wɔ ber a ɔrekan hɛn mber yi a, nna ɔno afe a ɔtɔ do ^aeduasa ebiasa ebotwa mu kɔ;

3 Na nkorɔfo no hyɛɛ ase dɛ wɔrohwɛ asɛnkyerɛdze a nkɔnhyɛnyi Samuel, Lamannyi no kãe no kwan dzendzenndzen, nyew, aber no a ^asum bɛhyɛ kebii, bɛyɛ ndaansa wɔ asaase enyi do no.

4 Na ekyingye kɛse na ɔhyɛɛ ase sii nkorɔfo no mu, ammfa hɔnho koraa dɛ woeyi ^ansɛnkyerɛdze pii akyerɛ hɔn.

5 Na ɔbaa dɛ afe a ɔtɔ do eduasa anan no mu, bosoom a odzi kan, nda a otsĩa anan no ehum kɛse bi tui, nna obiara nnhun dɛm bi pɛn wɔ asaase no nyina do.

6 Na ehum kɛse huhu bi so bɔe; na ^asor paapaa mu kɛsenara ma ^bɔwosoow asaase nyina tse dɛ mbrɛ no mu repaapaa.

7 Na enyinam dzendzen bi a wonnhu ne saso bi da wɔ asaase yi do tsewee.

8 Na ogya tɔɔ ^aZarahemla kuropɔn no mu.

9 Na Moroni kuropɔn no memee kɔr po ase, na no mu nyimpa nyinara po faa hɔn.

10 Na dɛtse tui kataa Moronihah kuropɔn do ma kurow no n’ananmu bɛyɛɛ bepɔw kɛsenara.

11 Na ɔsɛɛ kɛse a ɔyɛ hu sii asaase n’anaafo afamu.

12 Mbom hwɛ, ɔsɛɛ kɛse a ɔyɛ hu pii sii etsifi mantam mu hɔ; na hwɛ, asaase mu nyina enyi danee, osian mframa dzendzen nye ehum na sor mpaapaamu nye enyinam, nye asaasewosow kɛse a osii asaase nyina do no ntsi;

13 Na ^aatsɛmpɔnkwan nyina mu tutui, na akwan a ɔda hɔ petee nyina mu sɛɛ, na mbea a ɔyɛ tromm nyina bɛyɛɛ krann.

14 Na nkuropɔn akɛse pii a ɔyɛ atsenkã ^amemee kɛhyɛɛ asaase tsir mu, na dodowara so hyewee, na dodowara so wosowee araa kesii dɛ no do adan nyina bubui guu famu, na no mu nyimpa nyina wuwui, na dɛm mbea no bɛyɛɛ amamfõ.

15 Na nkuropɔn binom so wɔ hɔ a ɔkae, na mbom no mu ndzɛmba a ɔsɛe no dɔɔ sõ ara yie, na no mu nyimpa pii wuwui.

16 Na binom so ekyinehyia mframa hwiim hɔn kɔree; na bea a ɔnye hɔn kɔree dze, obiara nnyim, dza wonyim ara nye dɛ ohwiim hɔn kɔree.

17 Na dɛm maa asaase nyina enyi do bɛyɛɛ basabasa, osian mframa dzendzen nye sor mpaapaamu, nye enyinam, nye asaasewosow no ntsi.

18 Na hwɛ, ^ambotan no mu paapaa ebien ebien; hɔn mu paapae guu asaase enyi do ara ma ɔyɛɛ dɛ mbosabo, na ma mu akekã, na ma apaapaa wɔ asaase enyi do nyina.

19 Na ɔbaa dɛ afei sor mpaapaamu, nye enyinam, nye ehum, nye mframa dzendzen, nye asaasewosow nyina bɔɔ adze—na hwɛ, iyi nyina kɔr do wɔ bɛyɛ ^adɔnhwer ebiasa ntamu; na binom see dɛ mber no kyɛree sen dɛm; naaso dɛm ndzɛmba akɛse huhu yi nyina sii wɔ bɛyɛ dɔnhwer ebiasa ntamu—na afei hwɛ, sum hyɛɛ asaase n’enyi do mã.

20 Na ɔbaa dɛ sum kebii hyɛɛ asaase nyina enyi do araa ma nyimpa a wɔwɔ hɔ a woennwu no ^atsee ^bsum no n’ehubɔhubɔw nkã;

21 Na kan biara nnyi beebiara, osian sum no ntsi, kyɛndar, ogya anaa adze a ɔma kan biara nnyi hɔ a wobotum dze asɔ hɔn nyena papa ewui no, dɛm ntsi nna kan biara nnyi beebiara;

22 Na woennhu kan biara, anaa ogya biara, anaa ewia, anaa bosoom, anaa nworaba, osian sum kebii kɛse a ɔahyɛ asaase enyi do ntsi.

23 Na ɔbaa dɛ bɛyɛ ^anda ebiasa tamu nna wonnhu kan biara; na dɛm aber no nyina mu no awerɛhow kɛse nye ntsẽatsẽamu nye osũ nko na osii wɔ nkorɔfo no nyina mu; nyew nkorɔfo no sũu pii, osian sum nye ɔsɛɛ kɛse a aba hɔn do no ntsi.

24 Na wɔtsee dɛ worusũ wɔ beebi dze rekã dɛ: O nkyɛ yenuu hɛnho ansaana dɛm da kɛse huhu yi aba, nkyɛ wɔdze hɛn enuanom hɔn nkwa kyɛɛ hɔn na wɔannhyew hɔn wɔ dɛm kuropɔn kɛse ^aZarahemla no mu.

25 Na wɔtsee dɛ worusũ na wɔdze awerɛhow rekã dɛ: O nkyɛ yenuu hɛnho ansaana dɛm da kɛse huhu yi asõ, na nkyɛ yennku na yennsiw nkɔnhyɛfo no abo, na yennyi hɔn edzi; nkyɛ wɔgyee hɛn nãnom, nye hɛn mbabaa fɛɛfɛw, nye hɛn mba nkwa na woennsie hɔn wɔ dɛm kurow kɛse Moronihah mu. Na dɛm na nkorɔfo no hɔn ntseatseamu ne kɛse nye no hu tse.