1 Na ɔbaa dɛ ɔhyɛɛ hɔn dɛ wɔnkyerɛw nsɛm a Egya no dze ama Malachi no, dza ɔse ɔnkã nkyerɛ hɔn no. Na ɔbaa dɛ ber a wɔkyerɛwee wiei no, ɔkyerɛkyerɛɛ mu kyerɛɛ hɔn. Na iyi nye nsɛm a ɔkãa kyerɛɛ hɔn: Dɛm na Egya no see Malachi—Hwɛ morosoma mo ^abɔfoe, na obesiesie kwan edzi m’enyim, na Ewuradze a hom rohwehwɛ no no, ɔbɛba ne temple mu mpofirmu, ahyɛmu bɔfo no mpo a, ɔno a hom enyi gye noho no; hwɛ, ɔbɛba, Dɔm Ewuradze na ɔse.

2 Mbom woana botum ^aegyina ne mbaa da no enyim? na sɛ opue a, woana begyina? na ɔtse dɛ ^bnamfo gya, na ɔtanhofo semina.

3 Na ɔbɛtsena ase dɛ dwetɛ namfo na yiyimufo; na ɔbɛtsew ^aLevi mbabanyin ho, na ɔapɔw hɔnho dɛ sika na dwetɛ, na wɔdze ^bayɛyɛdze bɛma Ewuradze wɔ tsenenee mu.

4 Nna Judah na Jerusalem ayɛyɛdze bɔsɔ Ewuradze enyi dɛ ndadaber no, na tsetse mfe no.

5 Na mebɛbɛn hom, mobobu atsɛn; na mebɛyɛ ɔdasefo a noho yɛ har meetsia abayifo, na awartofo, na ntanhunkafo, na hɔn a wodzi ɔpaanyi emim wɔ n’apaadze mu, na wosisi okunafo, na ^aegyankaba, na wɔbɔ ɔhɔho enyi, na wonnsuro me, Dɔm Ewuradze na ɔse.

6 Na emi nye Ewuradze, mennsakyer; dɛm ntsi hom, Jacob mba, hom nnsãe.

7 Ofitsi hom egyanom nda do na hom ^aadan efi m’ahyɛdze ho, na hom enndzi do. ^bHom nsan mbra me nkyɛn, na mebɛsan maba hom nkyɛn, Dɔm Ewuradze na ɔse. Mbom hom kã dɛ: Ebɛnadze mu na yɛnsan?

8 Aso nyimpa botwa Nyame edwoo? Naaso hom etwa me edwoo. Mbom hom kã dɛ: Ebɛnadze mu na yetwa wo edwoo? ^aEbupɛn du na ^bayɛyɛdze mu a.

9 Wɔdze ndom adom hom, osiandɛ hom twa me edwoo, ɔman yi nyinara a.

10 Hom mfa ^aebupɛn du no nyina mbra adzekoradan no mu, ma edziban mbra me fie; na hom mfa iyi nsɔ me nhwɛ, Dɔm Ewuradze na ɔse, sɛ munnkobue ɔsor ntokura ama hom, na mehue ^bnhyira ama hom a hom rinnya bea a ɔsõ a wɔdze bɛgye.

11 Na mubotwuw ɔsɛɛfo no enyim wɔ hom ntsi, na ɔnnkɛsɛɛ hom asaase do eduadzewa; eso hom wenyindua rommpo no nsowee nngu famu ansaana ne ber edu wɔ kwã no mu, Dɔm Ewuradze na ɔse.

12 Na amanaman nyina bɛfrɛ hom ahomkafo osiandɛ hom bɛyɛ enyika asaase, Dɔm Ewuradze na ɔse.

13 Hom akasa dzendzen wɔ mo do, Ewuradze na ɔse. Naaso hom kã dɛ: Ebɛnadze mu na yɛakasa etsia wo?

14 Hom akã dɛ Nyame som yɛ kwa, na ebɛn mfaso na ɔyɛ dɛ yeedzi n’ahyɛdze do, na yɛanantsew awerɛhodzi mu wɔ Dɔm Ewuradze enyim?

15 Na afei yɛfrɛ ɔhopɔwnyi ɔhomkanyi; nyew, hɔn a wɔyɛ emumuyɛ no esi hɔn yie; nyew, hɔn a wɔsɔ Nyankopɔn hwɛ no, na wofi mu fir mpo.

16 Nna hɔn a wosuroo Ewuradze no ^akasaa kyerɛkyerɛɛ hɔnho, na Ewuradze yɛɛ aso na otsiei; na wɔkyerɛɛw ^bnkaa nwoma wɔ n’enyim maa hɔn a wosuroo Ewuradze, na wɔdwendween ne dzin ho no.

17 Na wɔbɛyɛ me dze, Dɔm Ewuradze no na ɔse, wɔ da a ^amebɛyɛ m’egudze na mebɛkam hɔn do dɛ nyimpa rekam nankasa ne ba a ɔsom no do.

18 Nkyii na hom bɛsan ^aebohu nsonsonee a ɔda tseneneenyi na mumuyɛnyi ntamu, nyia ɔsom Nyame na nyia ɔnnsom no no ntamu.