1 Afei hwɛ, mebɛkyerɛ wo dɛ woenntum ennsi ɔmanhen wɔ asaase no do; mbom dɛm afe yi ara mu, nyew, afe a ɔtɔ do eduasa no mu, woguu atsɛmbu egua no ho fi, nyew, wokum ɔtsɛmbufopanyin a ɔwɔ asaase no do no.

2 Na dɔm no kyekyɛɛ hɔn mu, tsiatsiaa hɔnho nkorkor; na wɔpaapaa hɔn mu ebusuakuw, na ɔbarimba biara dɛ mbrɛ n’ebusua tse nye n’ebusuafo, nye n’anyɛnkofo; na dɛm na wɔyɛe dze sɛɛ asaase no do aban no.

3 Na ebusuakuw biara yii ɔhen anaa panyin bi ma ɔhwɛɛ hɔn do; na dɛm na ɔmaa wɔbɛyɛɛ mbusuakuw nye mbusuakuw do mpanyimfo.

4 Afei hwɛ, obiara nnyi nyimpa no mu a onnyi ebusua, ebusuafo nye anyɛnkofo pii; dɛm ntsi hɔn mbusuakuw no bɛyɛɛ akɛse.

5 Afei wɔyɛɛ iyinom nyina no nna akõkoekõ biara nnsii hɔn mu; na dɛm emumuyɛ yi nyina baa dɔm no do osian Satan a ^awogyaa hɔnho mu maa no tum no tsi.

6 Na wɔsɛɛ aban ne nhyehyɛɛ no, osian dɛm anyɛnkofo nye ebusuafo no a wokuum nkɔnhyɛfo no hɔn ^ansumaamu fɛkuwbɔ ntsi.

7 Na wɔdze wentwiwentwi pii baa asaase no do araa ma hɔn a wɔyɛ atseneneefo wɔ dɔm no mu no mu dodowara bɛyɛɛ emumuyɛfo; nyew, atseneneefo kumaabi na wɔkaa hɔn mu.

8 Na mfe esia annso mpo na dɔm no hɔn kɛse fii hɔn tseneneeyɛ ho, tse dɛ ɔkraman a ɔasan akɔ ne ^afe ho, anaadɛ ɔtse prekober a ɔasan akɛhyɛ ne dɛtse mu.

9 Afei dɛm nsumaamu fɛkuwbɔfo yi a wɔdze emumuyɛ pii aba dɔm yi do yi boaboaa hɔn ano na wɔdze ɔbarimba bi a wɔfrɛ no Jacob sii hɔ dɛ ɔnhwɛ hɔn do;

10 Na wɔfrɛɛ no hɔn ɔmanhen; dɛm ntsi ɔbɛyɛɛ ɔmanhen wɔ dɛm fɛkuw yi do; na ɔno nyia ɔgyee n’enyim kasaa tsiaa nkɔnhyɛfo no a wɔgyee Jesus ho dase no.

11 Na ɔbaa dɛ nna hɔn dodow nnyɛ kɛse dɛ nkorɔfo no mbusuakuw no a wɔakã hɔnho abɔmu a hɔn mpanyimfo na wɔhyehyɛ hɔn mbra biara dɛ mbrɛ n’ebusuakuw no tse; naaso wɔyɛ atamfo; ɔwɔ mu dɛ wɔnnyɛ atseneneefo, naaso wɔnye hɔn yɛɛ kor tsiaa hɔn a wodzii ahyɛmu dɛ wɔbɛsɛɛ aban no.

12 Dɛm ntsi, Jacob hun dɛ hɔn atamfo dɔɔ sõ sen hɔn, na ɔno na ɔyɛ kuw no hɔn do ɔhen dɛm ntsi ɔhyɛɛ no nkorɔfo no dɛ wonguan nkɔ asaase n’etsifi afamu no ho na wɔnkɛkyekyer ahenman mfa mma hɔnho, nkesi dɛ etuatsewfo bɛba abɛkã hɔnho, (na ɔdaadaa hɔn dɛ ^aetuatsewfo no bɔdɔɔ so) ama woeenya ahoɔdzen ara yie nye nkorɔfo no mbusuakuw no eedzi esi; na wɔyɛɛ no dɛm ara.

13 Na hɔn nantsew mu yɛɛ hyew ara yie ma woenntum ennsiw hɔn kwan araa kesii dɛ wofii bea a dɔm no wɔ koraa. Na dɛm na afe a ɔtɔ do eduasa dze baa n’ewiei; na dɛm na Nephi no nkorɔfo hɔn ndzeyɛɛ tse.

14 Na ɔbaa dɛ afe a ɔtɔ do eduasa biako mu no, wɔkyekyɛɛ hɔn mu mbusuakuw, ɔbarimba biara na ne yer na n’ebusua, nye n’ebusuafo, nye n’anyɛnkofo; naaso nna wɔayɛ nhyehyɛɛ bi dɛ obiara nye no nua nnkedzi akõ; na mbom wɔannyɛ kor wɔ hɔn mbrahyɛ nye amambu ho, osiandɛ wɔhyehyɛɛ biribiara dɛ mbrɛ hɔn ahemfo nye hɔn mpanyimfo hɔn adwen tse. Mbom wɔhyɛɛ mbra katsee dɛ mma ebusuakuw biara mmfi n’asaase do nnkɛfa kor ne dze do, iyi maa asomdwee kakraabi baa asaase no do; naaso nna wɔadan hɔn akoma efi Ewuradze hɔn Nyankopɔn ho, na wosiiw nkɔnhyɛfo abo na wɔpaam hɔn fii hɔn mu.

15 Na ɔbaa dɛ ^aNephi, ɔnam dɛ abɔfo bɛseraa no na ɔtsee Ewuradze ne ndze, na ohun abɔfo na n’enyiwa gye ho dase na wɔmaa no tum a ɔdze bohu Christ no som dwumadzi, na bio ɔdze n’enyiwa gye ho dase mbrɛ ma wosii wɔdaan ntsɛntsɛm fii tseneneeyɛ ho baa hɔn emumuyɛ na mbusubɔ mu;

16 Dɛm ntsi, osiandɛ no werɛ howee wɔ hɔn akomadzen nye hɔn adwen a woefura ntsi—ɔkɔr hɔn mu dɛm afe noara mu, na ɔhyɛɛ ase gyee dase ndamyɛ mu faa nnuho nye bɔnfakyɛ a yenya fi gyedzi a yɛwɔ no wɔ Ewuradze Jesus Christ mu.

17 Na ɔkyerɛkyerɛɛ hɔn ndzɛmba pii; na worunntum nnkyerɛw ne nyinara, na wɔkyerɛw ne fã so a ɔrennyɛ yie, dɛm ntsi wɔannkyerɛw no koraa wɔ nwoma yi mu. Na Nephi dze ^atum kyerɛkyerɛɛ wɔ tumdzi kɛse mu.

18 Na ɔbaa dɛ hɔn bo fuuw no osian tum kɛse a ɔwɔ sen hɔn ntsi, osiandɛ nna ^aɔyɛ dzen ma hɔn dɛ wɔnnkɛgye ne nsɛm no edzi, osiandɛ ne gyedzi a ɔwɔ no wɔ Ewuradze Jesus Christ mu no sõ araa ma abɔfo bɔsoom no daa daa.

19 Na ɔnam Jesus dzin mu tuu mbɔnsam nye ^aesunsum fĩ; na onyaan no nuabanyin mpo a dɔm no, siiw no abo ma owui.

20 Na dɔm no hunii na wɔgyee ho dase, na hɔn bo fuuw no osian no tum no ntsi; na ɔyɛɛ ^aanwanwadze pii so wɔ Jesus dzin mu, wɔ dɔm no enyim.

21 Na ɔbaa dɛ afe a ɔtɔ do eduasa biako no twaa mu kɔree, na dɔm kumaabi na wonyaa nsakyer na wɔbaa Ewuradze nkyɛn; mbom dodowara a wonyaa nsakyer no gyee dase nokwar mu kyerɛɛ dɔm no dɛ Nyame no tum nye no Sunsum a ɔwɔ Jesus Christ a wɔgye no dzi no mu no aba hɔn nkyɛn.

22 Na dodowara a wotuu mbɔnsam fii hɔn mu, nye hɔn a wɔsaa hɔn yarba na honam yaw no daa no edzi nokwar mu kyerɛɛ dɔm no dɛ Nyame no Sunsum na ɔsaa hɔn yarba; na wɔkyerɛɛ nsɛnkyerɛdze so, na wɔyɛɛ anwanwadze so wɔ dɔm no mu.

23 Dɛm so na afe a ɔtɔ do eduasa ebien no so dze twaa mu kɔree. Na Nephi sũi frɛɛ dɔm no wɔ afe eduasa ebiasa n’ahyɛse no mu; na ɔkãa nsɛmpa a ɔfa nnuho nye bɔnfakyɛ ho asɛm kyerɛɛ hɔn.

24 Afei mepɛ dɛ hom kaa dɛ obiara nnyi hɔ a onyaa nnuho a wɔammfa nsu ^aennuma no.

25 Dɛm ntsi Nephi hyɛɛ mbanyin binom asɔfo wɔ ɔsomdwumadzi no mu, ama obiara a ɔbɛba hɔn nkyɛn no wɔdze nsu enuma no, na iyi bɛyɛ ahyɛnsew nye dasegye wɔ Nyankopɔn nye dɔm no enyim, dɛ woenu hɔnho na woenya ^abɔnfakyɛ.

26 Na dodowara wɔ hɔ a wonuu hɔnho na wonumaa hɔn kɔr nnuho mu wɔ dɛm afe yi n’ahyɛse mu; na dɛm na afe no dze kɔr n’ewiei.